ངས་ཁོང་གི་རེ་སྐུལ་ལྟར་འཕྲལ་དུ་དཔེ་འཕྲིན་དེ་དང་། བུད་མེད་འགའ་ཤས་ཀྱིས<<རྒྱ་མཚོའི་ཀློང་གི་གསོལ་འདེབས>>གླེང་བཞིན་པའི་འདྲ་པར་དེ་རང་ཉིད་ཀྱི་གྲོགས་ཚོམ་དུ་བརྒྱུད་སྐུར་བྱེད་གྲབས་བགྱིས་མོད། འོན་ཀྱང་ཞིབ་འདང་ཞིག་བརྒྱབ་ན། དེ་ནི་ཁོང་གི་ངོ་སོ་སྲུང་ཆེད་ཙམ་ལས་དོན་སྙིང་དེ་ཙམ་མ་མཆིས་པ་མཐོང་། དེ་བས་ངས་གལ་སྲིད་བརྒྱུད་སྐུར་བྱས་ན་དེ་དང་འབྲེལ་བའི་སྐད་ཆ་ཚིག་འགའ་ཤས་ཞིག་བརྗོད་དགོས་པ་མཐོང་ཞིང་། དེ་ཡང་དགོང་མོ་ལས་ཁུངས་གྲོལ་ནས་ཁྱིམ་དུ་འབྱོར་རྗེས་བྲི་བའི་ཐག་བཅད།

རྩོམ་པ་པོ་ཁཱ་ལ་དྷི་ཧོ་སཱ་ནི(Khaled Hosseini) ལགས་ནི། ང་རང་དགའ་ཤོས་བྱེད་སའི་རྩོམ་པ་པོ་དག་གི་ཁྲོད་ནས་གཅིག་ཡིན་ལ། ངས་རྒྱུན་པར་བོད་ཀྱི་ཆག་འཇིག་དང་། དེ་ལ་བརྟེན་ནས་བོད་མི་རིགས་ལ་བྱུང་བའི་དཀའ་སྡུག་རྣམས་མཚོན་པའི་བརྩམས་སྒྲུང་སྤུས་ལེགས་ཤིག་ཇི་ལྟར་འབྲི་དགོས་མིན་ཐོག་ལ་མནོ་བསམ་གཏོང་སྐབས། རང་བཞིན་གྱིས་རྩོམ་པ་པོ་ཁོང་དང་ཁོང་གི་བརྩམས་ཆོས་རྣམས་མིག་ལམ་དུ་ཤར་ནས་ཁོང་ལ་མིག་དཔེ་ལྟ་བའམ་ལད་ཟློས་བྱེད་པའི་བསམ་པ་ཞིག་འཁོར་འོང་། ཡང་གཅིག་བཤད་ན། འདིས་ངའི་སེམས་ན་རྩོམ་པ་པོ་ཁོང་གིས་གོ་གནས་ཇི་ཙམ་བཟུང་ཡོད་པ་མཚོན་འདུག

འདི་ནས་བརྩིས་ན་ལོ་ངོ་བརྒྱད་དགུའི་ཡར་སྔོན་ཏེ། ང་རང་ཀུན་ཕན་སློབ་གྲྭར་སློབ་གཉེར་བྱེད་བཞིན་པའི་ཚེ། ཁོ་རི་སི་ཏྲིན (Christine) ཟེར་བའི་ཨིན་ཇིའི་དགེ་རྒན་བཟང་པོ་ཞིག་ཡོད་པ་དེས་རྩོམ་པ་པོ་ཁོང་གི་སྒྲུང་གཏམ་ཐོག་མ<<ཤོག་བྱ་གཏོང་མཁན་གྱི་མི>>ཞེས་པ་དེ་ཐོག་མར་ང་ཚོ་ལ་མཚམས་སྦྱོར་བགྱིས་ཏེ་ཨིན་ཇི་སྦྱོང་བྱེད་ཀྱི་སློབ་དེབ་དུ་བཀོལ་སྟབས། ངས་སོ་སོའི་མི་རིགས་ཀྱི་དཀའ་སྡུག་རྣམས་སྨྱུག་རྩེ་བརྒྱུད་དེ་འཛམ་གླིང་མི་དམངས་ཀྱི་མིག་མདུན་དུ་སྟར་མཁན་གྱི་རྩོམ་པ་པོ་ཁོང་ཐོག་དང་པོར་ངོ་ཤེས། སྐབས་དེ་དུས་ངས་ཚིག་མཛོད་ཀྱི་རོགས་སྐྱོར་མེད་པར་ཨིན་ཇིའི་བརྗོད་པ་ཧྲིལ་པོ་ཞིག་གོ་དཀའ་ཡང་། དགེ་རྒན་བཟང་པོ་དེའི་ངང་རྒྱུད་རིང་བའི་འགྲེལ་བཤད་དང་། ཐབས་མཁས་ཀྱི་སྐུལ་ལྕག རང་ཉིད་ཀྱི་ཨ་གསར་འདྲེས་པའི་ཨུ་ཚུགས་བཅས་ལ་བརྟེན་ནས་སྒྲུང་དེབ་དེའི་མཇུག་སྐྱོང་ཐུབ་པ་མ་ཟད། དེའི་ནང་གི་གཏམ་རྒྱུད་ཀྱིས་ངའི་ཡིད་དབང་ཕྲོག་སོང་།

དེའི་རྗེས་རྩོམ་པ་པོ་ཁོང་གི་སྒྲུང་དེབ་གཉིས་པ(ངོ་མཚར་བའི་ཉི་མ་སྟོང་།) དང་། གསུམ་པ(རི་བོའི་བྲག་ཅ།)གཉིས་རིམ་གྱིས་ཐོན་པས། ངས་ཀྱང་རིངས་བྲེལ་ངང་ཉོས་ནས་བཀླགས་པ་ཡིན། ཁོང་གི་དེབ་གཉིས་པ་དེ་ཐོན་པའི་སྐབས། ངའི་ཨིན་ཇི་དེ་ཙམ་ཡར་རྒྱས་ཕྱིན་མེད་སྟབས། (དྲང་པོར་བཤད་ན། ད་ལྟའང་ཤིན་ཏུ་ཞན།) མི་ཆོད་པའི་དཀའ་ངལ་ཆེན་པོ་ཕྲད་དེ་ནང་རབ་རིབ་ཙམ་ལས་མ་རྟོགས།

ཡིན་ན་ཡང་། ངས<<རི་བོའི་བྲག་ཅ།>>ས་རཱ་མཐོ་སློབ་ཏུ་བཀླགས་ཤིང་། སྐབས་དེ་དུས་ངའི་སྐད་ཡིག་གི་ཆུ་ཚད་སྔར་ལས་རིམ་པ་གཅིག་མཐོ་རུ་ཕྱིན་ཡོད་པས། ཀློག་དེ་ཧ་ཅང་ལེགས་པོ་འཁྱོངས་ལ། རྩོམ་པ་པོ་ཁོང་ལ་སྔར་ལས་ཀྱང་ལྷག་པའི་དད་མོས་སྐྱེས་སོང་། དེ་བས་ང་ལ་ཉན་མཁན་དང་དོ་སྣང་སྤྲོད་མཁན་རེ་རག་ན། (གཙོ་བོ་གསར་བྱུང་རྩོམ་པ་པོ་རྡོ་དཀར་ཁྲ་ལགས་རེད།) རྣ་སུན་སུན་བར་སྒྲུང་དེའི་སྒྱུ་རྩལ་གྱི་ཁྱད་ཆོས་དང་། ཡིད་སྐྱོ་བའི་གཏམ་རྒྱུད་ཀྱི་ནང་དོན་བརྗོད་མྱོང་ཡོད། ངོ་མ་ངས་སྒྲུང་གཏམ་དེའི་སྐོར་མང་པོ་མང་པོ་ཞིག་བརྗོད་དེ་རྡོ་དཀར་ཁྲ་ལགས་ལ་བག་ཆགས་ཟབ་མོ་ཞིག་བཞག་པ་འདྲ་སྟེ། ཉེ་ཆར་ཁོང་གིས་ང་ལ”སྔོན་མ་ཁྱོད་ཀྱིས་བཤད་མྱོང་བའི་སྒྲུང་གཏམ་དེའི་ཁ་བྱང་ལ་ཅི་རེད”ཅེས་དྲིས་ཏེ་ཁོས་ཀྱང་དེ་ཀློག་འདོད་ཚུལ་བརྗོད་བྱུང་།

གནས་ཚུལ་དེ་དག་ལ་བརྟེན་ནས་ན་ནིང(༢༠༡༨)ཁོང་གི་བརྩམས་ཆོས་གསར་པ<<རྒྱ་མཚོའི་ཀློང་གི་གསོལ་འདེབས>>ཞེས་པ་དེ་ཐོན་པའི་གསར་འགྱུར་མཐོང་མ་ཐག ངའི་སེམས་ལ་ཀློག་འདོད་ཀྱི་ཟ་འཕྲུག་ཅིག་ལངས་རུང་། རེ་ཞིག་མཐུན་རྐྱེན་མ་འཛོམས་པའི་དབང་གིས་བསྐྱུར་དགོས་ཐུག སྤྱིར་ཡིན་ན། སྒྲུང་གཏམ་དེ་དེ་འདྲའི་མཐུག་པོ་ཞིག་ཡིན་ཚོད་མི་འདུག་པས། ཨེ་མ་ཛོན( Amazon)ནས་ཧིན་སྒོར ༤༩༩ ཡིས་ཁུག་འདུག་ཀྱང་། རིན་དོད་དེས་ངའི་བུ་ཆུང་ལ་བདུན་ཕྲག་གཅིག་ཙམ་གྱི་ཆུ་གདན་ཉོ་ཐུབ། ད་ལྟ་ངའི་དཔེ་དེབ་ལས་ཁོའི་ཆུ་གདན་ཁ་ཚ་དགོས་གལ་ཆེ་བའི་སྒང་ཞིག་ཡིན་གཤིས། ངས་དྲྭ་ཐོག་ནས་རིན་གོང་ལ་ལྟ་ཙམ་ལྟ་ཙམ་བགྱིས་པ་ལས་མ་མངགས།

དེ་བས་དེ་རིང་མྱི་གསོན་པོ་ལགས་ཀྱི་དཔེ་འཕྲེན་དེ་མཐོང་བ་ན། ང་རང་ཅུང་ཧ་ལས་སོང་། ངས་ཉོ་མ་ཐུབ་གོང་ནས་ཁོང་གིས་བསྒྱུར་ཟིན་འདུག ད་ནི་ཁོང་ལ་བཀྲ་ཤིས་བདེ་ལེགས་ཞུ་བ་དང་འབྲེལ། མི་འགྱངས་པར<<རྒྱ་མཚོའི་ཀློང་གི་གསོལ་འདེབས།>>ཀྱི་མ་ཡིག་དང་བོད་འགྱུར་གཉིས་ཀ་མཇལ་ཐུབ་པའི་རེ་བ་རྒྱག་རྒྱུ་ལས་ལྷག་མི་འདུག །

༢༠༡༩།༡།༨ ཉིན།

ཟུར་མཆན། རྩོམ་པ་པོའི་མཚན་དང་ཁོང་གི་བརྩམས་ཆོས་ཀྱི་ཁ་བྱང་རྣམས་མྱི་གསོན་པོའི་དཔེ་འཕྲིན་ནང་ལྟར་བཀོད་ཡོད།