རེད། སྐབས་རེར་ངས་སེམས་ཐག་ཉེ་བའི་རོགས་པ་འགའ་ལ་བརྩམས་སྒྲུང་ཀློག་མཁན་མེད་པའི་སྡུག་བསྔལ་དེ་འདྲེན་དུས། ཁོ་ཚོས“ཡག་པོ་འབྲི་ཐུབ་ན་ཀློག་མཁན་ཡོད་ཡོད་པ་རེད”ཟེར་གྱི་འདུག་རུང་། ངས་ལོ་ངོ་བཅུ་ཕྲག་ཙམ་གྱི་གོང་ནས་བརྩམས་སྒྲུང་ཐན་ཐུན་རེ་འབྲི་འགོ་བརྩམས་པ་ནས་བཟུང་ད་བར་དུ་བཙན་བྱོལ་སྤྱི་ཚོགས་ནང་དུ་བརྩམས་སྒྲུང་གི་འགྲན་བསྡུར་དང་། བརྩམས་སྒྲུང་སྐོར་གྱི་བགྲོ་གླེང་གཞི་རྒྱ་ཆེན་པོ་ཞིག་འཚོགས་པ་གཏན་ནས་མི་དྲན་པས། “ཡག་པོ་ཞིག་འབྲི་ཐུབ་ན་ཀློག་མཁན་ཡོད་ཡོད་པ་”ཡིན་ན་ཡང་། དེ་ལ་དོ་སྣང་དང་ཆེ་མཐོང་མེད་པ་གསལ་པོ་རེད། ད་ལྟ་ངས་ཁྱེད་ཚོ་ལ་སྡུག་དམེ་འདི་འདོན་སྐབས། སེམས་སུ་ང་ཚོ་བཙན་བྱོལ་ལ་འབྱོར་ནས་བགྲང་བྱ་ཧྲིལ་པོ་དྲུག་ཅུ་ལྷག་ཕྱིན་པའི་དུས་ཡུན་ནང་། ཕུལ་དུ་བྱུང་བའི་བོད་ཡིག་གི་བརྩམས་སྒྲུང་རྩོམ་པ་པོ་གཅིག་ཀྱང་(དབྱིན་ཇིའི་ནང་དུའང་ཕལ་ཆེར་གཅིག་མཚུངས་རེད།)མ་བྱུང་བའི་རྒྱུ་རྐྱེན་ཡང་འདི་ལ་ཐུག་པ་ཨེ་ཡིན་སྙམ་པའི་གློ་བུར་གྱི་ཚོར་སྣང་ཞིག་སྐྱེས་བྱུང་། 

ཨ་ཙི། ངས་རང་ཉིད་ཀྱི་སེམས་ངལ་དང་ཚོར་སྣང་ཞེ་ཅིག་བཤད་དེ་བསྡད་ན། ཁྱོད་ཚོར་ཉོབ་སྣང་སྐྱེ་སྲིད། དེ་རིང་ངས་ཁྱོད་ཚོར་འཕྲིན་ཡིག་ཅིག་འབྲི་བཞིན་པ་འདི་ངས་ཁྱོད་ཚོ་དང་། ཁྱོད་ཚོ་དང་ལྷན་དུ་བསྐྱལ་བའི“གསོག་སྒར་སློབ་གྲའི”ལོ་ཟླ་དེ་དག་དྲན་པའི་དབང་གིས་ཡིན་པ་ལས། རང་ཉིད་ཀྱི་མི་ཚེ་དང་འཚོ་བའི་སྡུག་ཡུས་འདོན་ཆེད་མ་ཡིན། 

ངས་འདི་ལྟར་ཅི་ཡིན་འདི་ཡིན་མེད་པར་ཁྱོད་ཚོར་འཕྲིན་ཡིག་འདི་འབྲི་བའི་རྒྱུ་རྐྱེན་ནི། ཉེ་ཆར་ང་རང་གསོག་སྒར་སློབ་གྲྭར་ཐེངས་གཅིག་ཕྱིན་པ་ན། སྔོན་ཆད་སྒྲིག་ཆས་སྔོ་དཀར་གྱོན་པའི་སློབ་མའི་འདུ་འཛི་དང་། གསོན་ཤུགས་ཀྱིས་ཁེངས་པའི་ང་ཚོའི་མ་ཡུམ་སློབ་གླིང་དེ་ད་ལྟ་རུ་བ་སྤོས་ཟིན་པའི་མཚེར་ཤུལ་ཞིག་ལྟར་སྟོང་ལྷང་ངེར་གྱུར་བ་མཐོང་ནས་ཡིད་ལ་སྐྱོ་སྣང་དྲག་པོ་ཞིག་སྐྱེས་པ་དང་། འཁྲེང་ཞེན་གྱིས་སྔོན་ཆད་ཀྱི་གསོག་སྒར་སློབ་གྲྭའི་རྣམ་པ་དང་། སློབ་གླིང་དེའི་ནང་དུ་ལང་ཚོའི་ལོ་ཟླ་དུ་མ་སྐྱེལ་མཁན་གྱི་སློབ་མ་དེ་དག་དྲན་པས་ཡིན། 

དེ་ཡང་ཁྱོད་ཚོ་ལ་གསལ་པོར་བཤད་ན། ཟླ་གཅིག་ཙམ་གྱི་གོང་དུ་ང་རང་གསོག་སྒར་སློབ་གྲྭར་ཐེངས་གཅིག་འགྲོ་དགོས་ཁེལ་སོང་། ངས་རང་ཉིད་ཀྱི་ལོ་གསུམ་ལ་སོན་པའི་བུ་ཆུང་དཔེ་སྟོན་སློབ་གྲྭར་གཏོང་རྒྱུའི་རེ་བ་རྒྱག་གི་ཡོད་པས། གསོག་སྒར་སློབ་གྲྭར་སྤོས་པའི་དཔེ་སྟོན་སློབ་གྲྭའི་ལས་ཁུངས་ལ་བུ་ཆུང་སློབ་འཇུག་གི་ཐོ་འགོད་བྱེད་དུ་ཕྱིན་པ་ཡིན། 

ངས་སྦག་སྦག་གསོག་སྒར་སློབ་གྲྭའི་རྒྱ་སྒོའི་མདུན་གྱི་རྡོ་ཕ་བོང་དེའི་འཁྲིས་སུ་བཀག་ནས་མར་བབ་པ་ན། རྒྱ་སྒོ་ལྗང་ཁུ་དེ་བརྒྱབ་ནས་འདུག་ཅིང་། མི་གཅིག་ཀྱང་མཐོང་ཡུལ་དུ་མེད་པར་ཡོད་ཚད་ཁུ་སིམ་སིམ་དང་འཇམ་ཐིང་ཐིང་རེད་འདུག ང་རང་རྒྱ་སྒོའི་སྒོ་ཆུང་ནས་ནང་དུ་འཛུལ་དུས་ཀྱང་། དགེ་སློབ་གཅིག་ཀྱང་མཐོང་རྒྱུ་མི་འདུག་པ་དང་། ཐ་ན་རྒྱ་སྒོའི་གམ་གྱི་སློབ་གྲྭའི་ཟ་ཁང་གི་སྒོ་ཡང་བརྒྱབ་ནས་བཞག་འདུག ང་རང་ཟ་ཁང་གྱི་གཞོགས་སུ་ཡོད་པའི་རྡོ་བཀྱག་ནས་བབ་སྟེ་གསོལ་ཚིགས་ཁང་གི་ཕྱོགས་སུ་འགྲོ་དུས། རྡོ་བཀྱག་དང་སློབ་གྲྭའི་ཁོར་ཡུག་དེ་རང་ཉིད་ཀྱི་དྲན་པའི་ངོགས་སུ་ཡོད་པ་ལས་ཅུང་ཆུང་བ་མཐོང་བྱུང་། ང་རང་གསོག་སྒར་མ་ཕྱིན་ནས་ཕལ་ཆེར་ལོ་ལྔ་དྲུག་ཅིག་ཕྱིན་འདུག 

གསོལ་ཚིགས་ཁང་གི་སྟེང་ཐོག་གི་སྒོ་ཕྱེ་ནས་འདུག་པས། ང་རང་ཡར་ནང་དུ་འཛུལ་བ་ན། དེ་ནི་སྔོན་གྱི་ཅོག་ཙེ་སྟར་པ་མང་པོ་ནར་རེར་བསྒྲིགས་པའི་སློབ་མའི་གསོལ་ཚིགས་ཁང་ཆེན་པོ་དེ་མ་ཡིན་པར་ཁང་མིག་མང་པོར་བགོས་པའི་ལས་ཁུངས་ཤིག་རེད་འདུག ང་ཡར་ནང་དུ་འཛུལ་དུས། སྒོ་མཚམས་ཀྱི་ཤེལ་སྒོ་ཆེན་པོ་ལྡན་པའི་ཁང་མིག་ནས་སྐྱེས་པ་གཅིག་དང་། བུད་མེད་གཉིས་ཀྱིས་ང་ལ་དྲི་བའི་མིག་གིས་ཅེར་ནས་འདུག ངས་འཕྲལ་མར་གུས་ཚུལ་ཞིག་བསྟན་ནས“འདི་དཔེ་སྟོན་སློབ་གྲྭའི་ལས་ཁུངས་ཨེ་རེད”ཅེས་དྲིས་པར། སྐྱེས་པ་དེས“མ་རེད། འདི་སམ་བྷོ་ཊའི་ལས་ཁུངས་རེད། དཔེ་སྟོན་སློབ་གྲྭ་ཕར་ཕྱོགས་སུ་ཡོད་རེད”ཅེས་བཤད་དེ་འཛིན་ཁང་དང་། ལག་ཤེས་ལྡན་ཚན་གྱི་ཕྱོགས་སུ་ལག་བརྡ་ཞིག་བྱས་པ་མ་ཟད། ཁོ་རང་དངོས་སུ་ཕྱི་རུ་དོན་ནས“ཕར་ཕྱོགས་དེ་གསོག་སྒར་སློབ་གྲྭའི་ཡིག་ཚང་རེད། དེ་ནས་ཕར་སོང་ནས་ཡར་ཕྱིན་ན་རྒྱབ་ལོགས་ལ་ཁང་པ་འགའ་ཡོད་རེད། དཔེ་སྟོན་སློབ་གྲྭ་དེར་ཡོད་རེད། ཕར་སོང་ན་སློབ་ཕྲུག་ཐུག་རྒྱུ་རེད། ཁོ་ཚོར་སྐད་ཆ་དྲིས་དང་། རྒྱབ་ལོགས་དེ་ག་རང་ཡོད་རེད”ཅེས་ལམ་བསྟན་བྱུང་། ངས་ཁོ་ལ་རང་ཉིད་གསོག་སྒར་སློབ་གྲྭའི་སློབ་ཟུར་ཡིན་པ་དང་། ལམ་ཤེས་ཀྱི་ཡོད་ཅེས་ལབ་འདོད་སྐྱེས་བྱུང་རུང་། དེ་ལྟར་མ་ལབས་པར་ཁོ་ལ་ཐུགས་རྗེ་ཆེ་ཞུས་ནས་ཕར་ཕྱིན་པ་ཡིན། 

ཡིད་ཆེས་དཀའ་བ་ཞིག་ལ། ང་རང་གསོག་སྒར་སློབ་གྲྭའི་ཡིག་ཚང་གི་མདུན་ནས་ཕར་འགྲོ་དུས་ཀྱང་། དགེ་སློབ་གཅིག་ཀྱང་མཐོང་ཡུལ་དུ་མི་འདུག སློབ་གྲྭའི་ལས་ཁུངས་ཀྱི་སྒེའུ་ཁུང་ཕྱེ་ནས་འདུག་རུང་། ནང་དུ་མདུན་ཅོག་དང་རྐུབ་སྟེགས་སྟོང་པ་འགའ་ལས་མི་གཅིག་ཀྱང་མི་འདུག དེ་བཞིན་རྒྱལ་གླུ་ཐང་ཡང་སྟོང་ལྷང་ངེར་འདུག་ལ། ཚོགས་ཁང་གི་སྒོ་ལ་ཟྭ་བརྒྱབ་ནས་དུས་ཡུན་རིང་པོར་ཕྱེ་མེད་པར་སྣང་། ངོ་མ་སྔོན་ཆད་སྒྲིག་ཆས་སྔོ་དཀར་གྱོན་པའི་སློབ་མའི་འདུ་འཛི་དང་། སྐད་ཅོར་གྱིས་ཁེངས་པའི་ཁོར་ཡུག་དེ་ད་ལྟ་དེ་ལྟར་སྟོང་ལྷང་ངེར་དང་། ཁུ་སིམ་མེར་གྱུར་འདུག་པ་མཐོང་དུས། ངའི་སེམས་ལ་འགྲེལ་མི་ཤེས་པའི་སྐྱོ་ཤས་དྲག་པོ་ཞིག་སྐྱེས་པ་དང་། སློབ་གྲྭ་ཞིག་ལ་གསོན་ཤུགས་དང་མཛེས་སྡུག་སྤྲོད་མཁན་དེ་སློབ་མ་ཡིན་པ་དང་། སློབ་མ་མེད་ན་ཡོད་ཚད་མེད་པའི་གནས་ལུགས་ཤིག་རྟོགས་བྱུང་། 

དེ་ནས་ང་རང་བུའི་ཉལ་ཁང་གི་ཟུར་དུ་འབྱོར་དུས། ཡར་ཕྱོགས་ཀྱི་རྨང་གཞི་དང་། ལག་ཤེས་སྡེ་ཚན་གྱི་ཐོག་བརྩེགས་མདུན་དུ་ལོ་ན་བཅུ་གྲངས་ལ་སོན་པའི་བྱིས་པ་མང་པོ་རྩེ་འཇོར་རོལ་བཞིན་ཡོད་པ་མཐོང་། དེ་དག་དཔེ་སྟོན་སློབ་གྲྭའི་སློབ་ཕྲུག་ཡིན་པ་བཤད་ག་ལ་དགོས། ང་རང་ཡར་ཁོ་ཚོའི་ཕྱོགས་སུ་ཕྱིན་པ་ཡིན། 

བརྩེ་བའི་སློབ་གྲོགས་ཁྱེད་ཚོས་ཤེས་སམ། ང་ཚོ་ ABCD དང་། ཀ་ཁ་ག་ང་ཐོག་མར་སྦྱོང་སའི་རྨང་གཞིའི་འཛིན་ཁང་གི་ཐོག་སོ་གོང་འོག་གཉིས་ཀ་དཔེ་སྟོན་སློབ་གྲྭའི་སློབ་ཕྲུག་ཚོའི་འཛིན་ཁང་དུ་གྱུར་འདུག་པ་དང་། དེའི་རྒྱབ་ཏུ་ཡོད་པའི་ལག་ཤེས་སྡེ་ཚན་གྱི་འཚེམ་པོ་ཁང་ལ་དཔེ་སྟོན་སློབ་གྲྭའི་ལས་ཁུངས་གསར་དུ་བཙུགས་མ་ཐག་རེད་འདུག ད་དུང་འཚེམ་པོ་ཁང་གི་སྒང་དུ་ཡོད་པའི་ལྷ་བྲིས་སྡེ་ཚན་གྱི་ཉི་ཁྱམས་སུའང་སློབ་ཕྲུག་མང་པོ་འཚོགས་འདུག ངས་ལས་ཁུངས་ལ་བྱིས་པའི་སྐྱེ་ལོ་སྐྱེ་ཚེས་དང་རང་ཉིད་ཀྱི་སྐྱབས་བཅོལ་ལག་དེབ་ཀྱིས་གཙོས་པའི་དགོས་ངེས་ཀྱི་ཡིག་ཆ་རྣམས་ཕུལ་ནས་ཐོ་འགོད་བྱས་རྗེས། ཕྱིར་དོན་ནས་མར་སློབ་མའི་ཉལ་ཁང་གི་ཕྱོགས་སུ་ཕྱིན་པ་ཡིན། 

ང་རང་ལག་ཤེས་སྡེ་ཚན་དང་། རྨང་གཞིའི་འཛིན་ཁང་ནས་མར་བུའི་ཉལ་ཁང་གི་རྒྱབ་ནས་བུ་མོའི་ཉལ་ཁང་གི་ཕྱོགས་སུ་ཐེན་པའི་རྐང་ལམ་དེ་དེད་ནས་འགྲོ་དུས། སྔོན་ཆད་བུ་མོ་རྣམས་རྐང་ལམ་དེ་བརྒྱུད་དེ་ཉལ་ཁང་ནས་ཡར་འཛིན་ཁང་དང་། འཛིན་ཁང་ནས་མར་ཉལ་ཁང་དུ་འགྲོ་སྐབས། བུའི་ཉལ་ཁང་གི་སྒེའུ་ཁུང་གི་ཕག་ཏུ་གབ་པའི་བསྟན་བཤིག་ཆེ་བའི་སློབ་མ་འགས་སྐད་ཤུགས་ཆེན་པོས་ཁོ་ཚོའི་མིང་ནས་བོས་ཏེ་སྙད་བརྐོ་བ་དང་། ཡང་གཟའ་མཇུག་ལ་དགའ་རོགས་ཡོད་པའི་བུ་མོ་ཚོས་གྱོན་ཆས་བྷ་ཀྲིན་(Bucket)གང་ཐོགས་ཏེ་རྐང་ལམ་དེའི་སྟེང་ནས་ཡར་བུའི་ཉལ་ཁང་གི་སྒེའུ་ཁུང་ལ་བལྟས་ཏེ་སོ་སོའི་དགའ་རོགས་འབོད་པའི་སྣང་བརྙན་རྣམས་དྲན་བྱུང་བ་མ་ཟད། མཚན་མོ་གཅིག་ལ་ང་རང་རང་སྦྱོང་གྲོལ་ནས་མར་ཉལ་ཁང་དུ་ལོག་སྐབས། རྐང་པ་གཉིས་ཀའི་ཚིགས་ལོག་ནས་འགྲོ་མི་ཐུབ་པར་གྱུར་སྟབས། ཉལ་ཁང་གཅིག་པ་ཚོས་ངའི་མཆན་ཁུང་གཡས་གཡོན་ནས་བཀྱགས་ཏེ་པ་པི་ལི་སི་(Pa Police)ཡི་སར་ཁུར་བའི་གནས་ཚུལ་ཞིག་ཀྱང་ཁ་སང་བྱུང་བ་ལྟར་གསལ་པོར་དྲན་བྱུང་བས། ལོ་ངོ་དུ་མར་གཏིང་རྗེད་དུ་སོང་བའི་འདས་དོན་ཞིག་དེ་ལྟར་གློ་བུར་དུ་དྲན་པ་ལ་ང་རང་ཡང་ཡ་མཚན་སྐྱེས་པ་དང་། མཁས་པ་སུ་ཞིག་གིས་ང་ཚོའི་མི་ཚེའི་མྱོང་བ་ཡོད་ཚད་སེམས་ཀྱི་སྒྱེ་མོའི་ནང་དུ་བསགས་ནས་འཇོག་པ་དང་། མྱོང་བ་གསར་པ་བྱུང་རིམ་བཞིན་རྙིང་པ་རྣམས་འོག་ཏུ་འཐིམ་ན་ཡང་། གློ་བུར་དང་དམིགས་བསལ་གྱི་རྒྱུ་རྐྱེན་འགའ་ལ་བརྟེན་ནས་འོག་ཏུ་ཐིམ་པའི་མྱོང་བ་འགའ་སྒྱེ་མོའི་ཁ་རུ་དོན་གྱི་ཡོད་ཅེས་གསུང་བ་དེ་ཅི་འདྲའི་བདེན་ཨང་སྙམ་བྱུང་། 

རྒྱལ་གླུ་ཐང་དང་ཚོགས་ཁང་ལྟར། བུའི་ཉལ་ཁང་གི་ཐོག་བརྩེགས་དམར་པོ་གསུམ་ཡང་ཧ་ཅང་ཉམ་ཐག་པའི་ངང་ཁུ་སིམ་མེར་ལངས་ནས་འདུག་པ་དང་། ཡུན་རིང་བརྒྱབ་ནས་བཞག་པའི་ཉལ་ཁང་གི་ཤེལ་ཁྲའི་ངོས་སུ་ཐལ་རྡུལ་ཆགས་ཤིང་། ཐོག་བརྩེགས་ཀྱི་རྨིང་མཚམས་སུ་ཕྱག་མེད་པའི་ལོ་མ་སྐམ་པོ་མང་པོ་འཁྱིལ་འདུག ངས་བུའི་ཉལ་ཁང་གི་ཉམ་ཐག་པའི་ཚུགས་ག་དེ་མཐོང་དུས། ཞེ་ལ་སྨྲ་མི་ཤེས་པའི་སྐྱོ་སྣང་ཞིག་སྐྱེས་པ་དང་། སེམས་ཀྱི་འཆར་ཡོལ་ངོས་སུ་སྐད་ཤུགས་ཆེ་བའི་སྒྲ་སྒམ་ནས་གྲགས་པའི་གླུ་གཞས་ཤིག་ཉལ་ཁང་གང་ཞིག་གི་སྒེའུ་ཁུང་ནས་ཕྱིའི་ཁོར་ཡུག་ཏུ་མཆེད་བཞིན་པ་དང་། ཐོག་བརྩེགས་ཀྱི་རྩིག་མཚམས་སུ་ལྷམ་སྒྲོག་བཤིག་ནས་གཙང་མར་དཀྲུས་པའི་ལྷམ་ཆ་འགའ་ཉི་མར་སྐེམ་ཡོད་པའི་སྔོན་གྱི་སྣང་བརྙན་རབ་རིབ་འགའ་ཤར་བྱུང་། 

དེ་ནས་ང་རང་མུ་མཐུད་མར་ཕྱིན་ནས་བུའི་ཉལ་ཁང་ཐོག་བརྩེགས་བར་མའི་རྒྱབ་ཏུ་འབྱོར་བ་ན། དེའི་རྒྱབ་ལོགས་སུ་ཡོད་པའི་རྡོའི་ table teniss རྩེ་ས་དེ་སྔར་བཞིན་གནས་འདུག་པ་མཐོང་བས། ང་རང་ཅུང་ཧ་ལས་སོང་། ཁྱོད་ཚོས་དྲན་སོས་ཀྱི་འདུག་གམ། སྔོན་ཆད་ང་ཚོ་རྡོའི་ཅོག་ཙེ་དེའི་མཐའ་ནས་བང་རིང་པོར་བསྒྲིགས་ནས་སོ་སོའི་རྩེ་རས་ལ་སྒུག་མྱོང་བ་དང་། ཅུང་བྱང་ཆ་ལྡན་པ་ལ་ལས་རྩེ་མཁན་རྣམས་གཅིག་རྗེས་གཉིས་མཐུད་ལ་འཕུད་ཐུབ་པ་བྱུང་དུས། སྤྲོ་སྣང་ཆེས་ཆེར་འཕེལ་ནས་ཁོ་ཚོ་འཛམ་གླིང་སྟེང་གི་ཅོག་ཙེའི་སྤོ་ལོ་རྩེ་མཁན་ཨང་དང་པོ་དེ་ཡིན་པའི་རྣམ་འགྱུར་རེ་སྟོན་ངེས། ད་ལྟ་རྡོའི་ཅོག་ཙེའི་མཐའ་རུ་རྩེ་འདོད་ཆེན་པོས་སྟར་ཕྲེང་སྒྲིག་མཁན་གྱི་སློབ་མ་དེ་དག་སའི་གོ་ལའི་གླིང་ཕྲན་བདུན་གྱི་ནང་དུ་ཁ་ཐོར་ནས་ཡོད་པས། རྡོ་ཅོག་དེ་དྲོད་མེད་པའི་ཉི་འོད་ཁྲོད་དུ་གཅིག་པུར་རྩེ་མཁན་མེད་པར་ལུས་འདུག རྡོ་ཅོག་དེས་སྔོན་ཆད་དེར་སྤྲོ་སྣང་གིས་འཚོགས་མྱོང་བའི་མི་དེ་དག་དང་དེ་དག་གི་དགོད་སྒྲ་དྲན་སྲིད་དམ། 

ང་ལ་རང་ཉིད་ཀྱི་མི་ཚེའི་ལོ་ངོ་གསུམ་ཙམ་སྐྱེལ་སའི་ཉལ་ཁང་(ཨང་ ༢༠ རེད།)དེ་ད་ལྟ་ཅི་འདྲ་ཞིག་ཆགས་ཡོད་དམ་སྙམ་པའི་ལྟ་འདོད་ཅིང་ལངས་བྱུང་རུང་། ཐོག་བརྩེགས་ནང་དུ་འཛུལ་སའི་བར་ཁྱམས་ལ་སྔར་མེད་པའི་སྒོ་ཞིག་བརྒྱབ་ནས་ནང་དུ་འཛུལ་ས་མེད་པ་བཟོས་འདུག་པས། རང་ཉིད་ཀྱི་འདོད་པ་ཆུང་ཆུང་དེ་སྐོང་མ་ཐུབ་པར་ཕྱིར་མི་ལོག་ཀ་མེད་བྱུང་།

ང་རང་ཕྱིར་ལོག་དུས། སྔོན་ཆད་ང་ཚོས་འཛིན་གྲྭའི་དྲན་རྟེན་གྱི་འདྲ་པར་མང་པོའི་རྒྱབ་ལྗོངས་སུ་འཇོག་མྱོང་བའི་དཔེ་མཛོད་ཁང་དང་འཛིན་ཁང་ལའང་ལྟ་རུ་ཕྱིན་པ་ཡིན། དཔེ་མཛོད་ཁང་གི་ནང་དུ་སློབ་མ་ལྔ་དྲུག་ཅིག་གིས་དཔེ་ཀློག་དང་། གླེང་མོལ་བྱེད་ཀྱིན་འདུག་རུང་། འཛིན་ཁང་ཚང་མ་སྟོང་པ་སྟོང་རྐྱང་དུ་གྱུར་འདུག ངས་སློབ་གྲྭའི་གསོན་ཤུགས་ཤོར་བའི་ཁོར་ཡུག་གི་ཕྱོགས་སྣ་ཚོགས་པར་དུ་བླངས་པ་མ་ཟད། ཐ་ན་འཛིན་གྲྭ་བརྒྱད་པའི་སྒང་གི་གྲུ་ཁུག་ཆུང་ཆུང་དེའང་པར་དུ་བླངས་པ་དང་། པར་དེ་ངོ་དེབ་ཐོག་ཏུ་བཞག་སྟེ“འདི་ངོ་ཤེས་མཁན་སུ་ཡོད། འདིར་མ་རུང་བ་བྱེད་མྱོང་མཁན་སུ་ཡོད”ཅེས་འདྲི་འདོད་ཅིག་བྱུང་། འོན་ཀྱང་། ངས་པར་དེ་དངོས་སུ་ངོ་དེབ་ཐོག་ཏུ་འཇོག་མ་ཐུབ་པར་ལུས་སོང་། ང་ལ་པར་ཞིག་ངོ་དེབ་ཏུ་འཇོག་པ་ལྟ་བུའི་ལས་དོན་ཆུང་ཚགས་རྣམས་ཀྱང་འཕྲལ་དུ་ལག་སྟར་བྱེད་མི་ཐུབ་པའི་སྒྱིད་ལུག་གི་གོམས་གཤིས་ངན་པ་ཞིག་འཇགས་ནས་ཡུན་རིང་ཕྱིན་ཡོད།

ང་རང་ཕྱིར་རྒྱ་སྒོའི་ཐད་ཀྱི་རྡོ་ཕ་བོང་གཉིས་ཀྱི་འཁྲིས་སུ་བཀག་པའི་སྦག་སྦག་གི་སར་འབྱོར་དུས། དེ་གཉིས་ཀྱང་རང་ཉིད་ཀྱི་དྲན་ཚོད་ལས་ཆུང་བ་ཚོར་བྱུང་། སྔོན་ཆད་སློབ་མ་ཞིག་རྩ་དགོངས་ཞུས་ནས་འགྲོ་བའི་ཞོགས་པར། (རྩ་དགོངས་ཞུ་མཁན་རྣམས་ཞོགས་པའི་སློབ་ཐུན་དང་པོ་མ་འཚོགས་གོང་ནས་འགྲོ་བའི་ལམ་སྲོལ་ཞིག་ཡོད།) ཁོའམ་མོའི་ཉལ་ཁང་གཅིག་པ་དང་འཛིན་གྲོགས་ཚོས་བང་བསྒྲིགས་ནས་སྐེ་ལ་ཁ་བཏགས་རེ་བསྐོན་ཏེ་ལུས་ལ་འཐམ་འཁྱུད་རེ་བྱས་ཤིང་། རྡོ་ཕ་བོང་དེ་གཉིས་རྒྱབ་ལྗོངས་སུ་བཞག་ནས་ཚང་མ་འདུས་པའི་པར་(group photo)དང་། སེམས་ཐག་ཉེ་བ་ཚོ་དང་ལྷན་དུ་མི་གཉིས་རེའི་པར་རེ་བླངས་རྗེས། ད་གཟོད་ཕེབས་སྐྱེལ་གྱི་བྱེད་སྒོ་གྲུབ་པ་ཡིན་ལ། བྱེད་སྒོ་དེ་འགྲོ་མཁན་དང་སྡོད་མཁན་གཉིས་ཀྱི་ཆེས་མཐའ་མའི་ཐུག་འཕྲད་དུ་འགྱུར་བའང་རྒྱུན་ལྡན་ཡིན། 

ང་རང་རྡོ་ཕ་བོང་ཆེན་པོ་དེ་གཉིས་ཀྱི་གམ་དུ་ལངས་ནས་མར་འོག་གི་རྒྱུགས་ཆུ་ལ་བལྟས་པ་ན། དགུན་དུས་ཀྱི་རྒྱུགས་ཆུ་དེའང་ཤིན་ཏུ་བྲི་སྟེ་གྲམ་རྡོ་དག་གི་བར་ནས་ཉམ་ཐག་པའི་ངང་རྒྱུ་བཞིན་འདུག་ཅིང་། ཁ་ཟུར་གཡས་གཡོན་གཉིས་སུ་ཁྱད་མཚར་བའི་ལྦུ་བ་དཀར་སོབ་བེར་ཆགས་འདུག་པས། ངའི་སེམས་སུ་ལུང་པའི་གཞོགས་གཉིས་ལ་སྔར་མེད་པའི་མགྲོན་ཁང་དང་། ཟ་ཁང་། སྤྲོ་བཞུགས་ཁང་(resorts)མང་པོ་ཞིག་གསར་དུ་སྐྲུན་བཞིན་པ་དེ་དག་གི་གོས་དང་། སྣོད་བཀྲུས་པའི་ཆུ་རྣམས་རྒྱུགས་ཆུར་འདྲེས་ནས་དེ་འདྲའི་ལྦུ་བ་མང་པོོ་ཆགས་པ་ཨེ་ཡིན་དྲན་བྱུང་། 

དེ་ལྟར་ང་རང་གཅིག་པུར་རྒྱ་སྒོའི་ཐད་ཀྱི་མུ་ཟུར་དེར་ལངས་ནས་ཆེ་ཆུང་དང་བཟོ་དབྱིབས་མི་མཚུངས་པའི་རྡོ་ཕ་བོང་གྲངས་མེད་ཀྱིས་ཁེངས་པའི་གྲམ་གཞུང་ལ་ལྟ་སྐབས། སྔོན་ཆད་རྡོ་ཆེན་པོ་དེ་དག་གི་ངོས་སུ་ཚོན་མདོག་སྣ་ཚོགས་ཀྱི་གྱོན་ཆས་མང་པོ་ཉི་མར་བསྐམས་ནས་བཞག་ཡོད་པ་དང་། གཞོགས་གཡས་གཡོན་གང་རུང་ལ་འགྱིག་གི་བྷ་ཀྲིན་(bucket)རེ་བཟུང་བའི་སློབ་མ་རྣམས་ཀྱིས་རྒྱུགས་ཆུའི་གཞུང་ནས་གོས་ལྷམ་འཁྲུད་བཞིན་པའི་རྣམ་པ་ཞིག་ཝ་ལེར་སེམས་སུ་འཁོར་བས། ངས་ད་དུང་ཡང་མིང་མི་ཤེས་པའི་ཆུ་མོ་(རྒྱུགས་ཆུ་དེར་མིང་ཞིག་ཅིས་ཀྱང་ཡོད་ངེས།)དེའི་ནང་དུ་བྲང་གཞུང་གཡོན་མར་ T.T.S. ཞེས་པའི་དབྱིན་ཡིག་སེར་པོ་བྲིས་པའི་སོའུ་ཊར་(sweater)ལྗང་ནག་འཁྲུད་མཁན་གྱི་སློབ་གྲོགས་དེ་དག་ད་ལྟ་གོ་ལ་རིལ་མོ་འདིའི་ས་ཕྱོགས་གང་ཞིག་ཏུ་འཚོ་བ་རོལ་བཞིན་ཡོད་དམ་སྙམ་བྱུང་། 

ངོ་མ། ཕྱི་ལོ་ ༡༩༤༩ ལོར་རྒྱ་ནག་གི་འདྲེ་དམག་ཐོག་མར་ང་ཚོ་བོད་ཆོས་ལྡན་གྱི་ཞིང་ཁམས་སུ་བཙན་འཛུལ་བྱེད་འགོ་བརྩམས་ནས་བགྲང་བྱ་བཅུ་ཕྱིན་པའི་རྗེས་ཏེ། ཕྱི་ལོ་ ༡༩༥༩ ལོར་བོད་ས་ཧྲིལ་པོ་མངོན་སུམ་འཛེམ་མེད་ཀྱི་དྲག་པོའི་བཙན་འོག་ཏུ་བསྡུས་ཏེ་བོད་ཀྱི་ཆོས་རྒྱལ་ཆེན་པོའང་རྒྱ་གར་བྱང་ཕྱོགས་ཀྱི་དྷ་ས་ཞེས་པའི་རི་གྲོང་འདིར་བཙན་བྱོལ་དུ་ཕེབས་དགོས་པའི་སྐྱོ་གར་དེ་བྱུང་བའི་མཇུག་འབྲས་སུ། ང་ཚོའང་མཐའ་མེད་པའི་དུས་ཚོད་ཀྱི་ལྟེབ་ཁུག་ངེས་ཅན་ཞིག་ལ་དྷ་སའི་ཉེ་འདབས་སུ་ཆགས་པའི་གསོག་སྒར་སློབ་གྲྭར་(མིང་དངོས་ལ་ཤེས་རབ་དགའ་ཚལ་སློབ་གླིང་ཟེར་ཡང་། འདི་གཞུང་འབྲེལ་མཛད་སྒོ་དང་། སྐུ་མགྲོན་རྣམས་ཀྱི་གཏམ་བཤད་ནང་དུ་གཙོ་བོར་སྤྱོད་པ་ལས་དགེ་སློབ་ཚོའི་ངག་ཏུ་“གསོག་སྒར་སློབ་གྲྭ་”འཇགས་ཡོད་པས། ང་ཤེས་རབ་དགའ་ཚལ་སློབ་གླིང་ལས་གསོག་སྒར་སློབ་གྲྭར་བརྩེ་གདང་ཆེ་བ་ཡོད།)ཐེངས་གཅིག་འཛོམས་པ་རེད་ལ། ཡང་སྐྱོ་གར་དེའི་དབང་གིས་སྲན་ཕུང་ལ་དབྱུག་པས་གཞུས་པ་ལྟར་སླར་ཡང་ས་ཕྱོགས་དང་ཡུལ་གྲུ་གང་སར་འཐོར་དགོས་བྱུང་བ་རེད། འདི་ནི་ང་ཚོས་མི་འདོད་བཞིན་མྱོང་དགོས་པའི་མི་སྒེར་གྱི་མི་ཚེའི་དཀའ་སྡུག་ཅིག་རེད་ལ། ཤེ་ཁི་སི་ཕིར་(Shakespeare)སྟོང་གིས་ཀྱང་འབྲི་མི་ནུས་པའི་པུར་རྒྱལ་བཙན་པོའི་རྒྱལ་ཁབ་འཇིག་པའི་སྐྱོ་གར་རིང་མོ་ཞིག་ཀྱང་རེད། 

ངའི་བསམ་བློའི་འགྱུར་འགྲོས་དེ་འདས་པའི་དྲན་འཆར་ལས་ང་ཚོའི་རྒྱལ་ཁབ་དང་མི་རིགས་ཀྱི་ལས་དབང་ལ་ཕྱོགས་དུས། ངས་བརྩེ་བའི་སློབ་གྲོགས་ཁྱོད་ཚོ་ད་ལྟ་བཙན་བྱོལ་ལ་བྲིན་རྒྱུགས་ཆེ་བའི་ལུང་ཚན་གྱི་ཕྱོགས་རིས་ནང་དུ་ལྷུངས་ཨེ་ཡོད་དྲན་བྱུང་། གལ་སྲིད་ཡོད་ན། ངས་ང་ཚོ་ལ་(ང་རང་ཉིད་ཡང་འདིའི་ནང་དུ་འདུས་ཡོད།)འཁང་ར་དང་ལེ་བདའ། དམའ་འབེབས་དང་སྡང་སེམས་བྱེད་ཀྱི་མེད། ཕྱི་རྐྱེན་དང་ནང་རྐྱེན་སྣ་ཚོགས་ཀྱི་དབང་གིས་སྤྱི་ཚོགས་ཤིག་གི་དགོས་མཁོའི་འགྱུར་འགྲོས་དེ་ལྟར་གྱུར་ན། ང་ཚོ་གསོག་སྒར་སློབ་གྲྭའི་སློབ་མ་རེ་ཟུང་ཞིག་གིས་་དེ་ལ་ཁ་གཏད་ག་ལ་གཅོག་ཐུབ། ཐུབ་ཀྱི་མ་རེད། འོན་ཀྱང་། ང་ཚོའི་ལུང་ཚན་གྱི་ཕྱོགས་རིས་དང་སྡང་སེམས་དྲག་ཏུ་འཕར་ནས་མི་ཞིག་གསོད་ཐུབ་པའི་ཚད་དུ་སླེབ་སྐབས་ཀྱང་། ཕ་སྦྲེའུ་བྱང་ཆུབ་སེམས་དཔའ་དང་། མ་བྲག་སྲིན་མོ་གཉིས་ལས་མཆེད་པའི་རིགས་བརྒྱུད་གཅིག་པའི་སྤུན་ཟླ་ཞིག་གསོད་བཞིན་པའི་གནོང་སེམས་ཤིག་ཅིས་ཀྱང་སྐྱེ་དགོས་པ་འདྲ། 

ཨ་ཙི། ཡང་སློབ་གྲོགས་ཁྱོད་ཚོ་དྲན་ཚུལ་གྱི་གཏམ་ལས་འདས་ཏེ་བསླབ་བྱ་དང་སྐུལ་མར་འགྱུར་བཞིན་འདུག་པ་མ་ཟད། ད་ནི་ཡི་གེ་འདི་ཅུང་རིང་དྲགས་སོང་བས། མཚམས་མ་བཞག་ནས་ཁྱོད་ཚོར་སུན་སྣང་སྐྱེ་བའི་འགོ་རྩོམ་བཞིན་ཡོད་སྲིད།  

བརྩེ་བའི་སློབ་གྲོགས་རྣམ་པ། ངས་ཅིས་ཀྱང་ཁྱོད་ཚོ་ལ་བཤད་འདོད་པ་གཅིག་ཡོད།  གལ་སྲིད་ང་ཚོ་མེག་ལོར་གྱི་སྲང་ལམ་ནས་ཐུག་ན། ངས་མགོ་བོ་གཅུས་ནས་མ་མཐོང་བ་དང་མ་རིག་པའི་ཁུལ་གྱིས་འགྲོ་སྲིད་ན་ཡང་། ངས་ཁྱོད་ཚོ་དྲན་བཞིན་ཡོད། ངས་ཁྱོད་ཚོ་བརྗེད་མེད། དེའི་རྒྱུ་མཚན་ནི་ཁྱོད་ཚོ་ངའི་སྡུག་ལ་སྐྱིད་པའི་འདས་པའི་འཚོ་བ་ཞིག་གི་འགྱུར་དུ་མེད་པའི་ཆ་ཤས་སུ་གྱུར་ཟིན་པས་ཡིན། 

མཇུག་མཐར། ངས་འཚོ་བ་དང་མི་ཚེས་ཁྱོད་ཚོར་བྱམས་པོ་དང་མཉེས་པོ་བྱེད་ཀྱི་ཡོད་པའི་སྨོན་འདུན་ཞུ། ། 

 
ཕྱི་ལོ་ ༢༠༢༢ ཟླ་ ༡ ཚེས་ ༩ ཉིན།