ཁོའི་གཡག་གི་རྔ་མ་ལྟར་སྟུག་ཅིང་རྩུབ་པའི་སྨ་ར་ཁམ་ཁམ་དེས་ཁོའི་ཨོག་མ་མི་མངོན་པ་བྱས་པ་མ་ཟད། པུས་མོ་བར་སླེབ་པའི་གྱོན་ཆས་དཀར་པོ་དེའི་བྲང་ཁུག་གཡས་གཡོན་ཡང་འགེབས་གྲབས་བྱེད། རྫིག་ཉམས་ཆེ་བའི་ཨ་ཕ་དེ་ལས་ལོ་ན་ཕལ་ཆེར་ལྡབ་ཀྱིས་ཆུང་བར་སྣང་བའི་ཨ་མ་དེས་རྐང་པའང་མི་མངོན་པ་བྱེད་པའི་གྱོན་ཆས་ནག་པོ་ཞིག་གོན་པའི་ཐོག མགོ་ལ་གྱོན་ཆས་དང་མདོག་གཅིག་པའི་རས་ཤིག་དཀྲིས་ནས་མིག་སྤུ་རིང་ཞིང་ཆ་ག་ཆེ་བའི་མིག་གཉིས་ལས་ཅི་ཡང་མི་མཐོང་བ་བྱས་འདུག ད་རུང་ཁོ་གཉིས་ཀྱི་ལོ་ན་བརྒྱད་དགུ་ལ་སོན་པའི་བུ་ཆུང་གཉིས་ཀར་པུས་མོ་བར་ཐོན་པའི་སྲོལ་རྒྱུན་གྱི་གྱོན་ཆས་དཀར་པོ་རེ་གཡོགས་པའི་ཁར། མགོ་ལའང་དེ་དང་ཁ་དོག་གཅིག་པའི་ཞྭ་མོ་རེ་བསྐོན་འདུག ངོ་མ་ཁ་ཆེའི་ཁྱིམ་ཚང་གི་མཚན་གཞི་ཞིག་རེད། 

“རེད། འདི་ཚོ་དངོས་གནས་མཁྲེགས་པོ་རེད།” ངས་འགྲུལ་རོགས་ལ་ལན་བཏབ།  ངས་ཁོའི་མིང་གང་ཡིན་མི་ཤེས་ཏེ། ངེད་གཉིས་ད་ནངས་ཞོགས་པ་རང་ལྡི་ལི་གསར་པའི་མེ་འཁོར་འབབ་ཚུགས་ནས་ཐོག་མར་ཕྲད་བྱུང་།  

ངས་མེ་འཁོར་འབབ་ཚུགས་ནས་རང་ཉིད་འགྲོ་སའི་མེ་འཁོར་དེར་སྒུག་བཞིན་ཡོད་པའི་ཚེ། རྒྱ་གར་ནག་རིལ་ཚོའི་(མེ་འཁོར་འབབ་ཚུགས་ཀྱི་རྒྱ་གར་ཕལ་ཆེ་བ་ནག་རིལ་ཡིན།)འཚང་ཁའི་ཁྲོད་ནས་ཤ་རྩི་ཕྲན་ཙམ་དཀར་བའི་མི་གཉིས་ཀྱིས་མིག་རིལ་རིལ་ངང་ཕར་ལྟ་ཚུར་ལྟ་བྱེད་ཀྱིན་བསླེབས་བྱུང་། ཨ་ཅང་ཅང་། ངས་འཕྲལ་མར་ཁོ་གཉིས་རང་ཉིད་དང་ཤ་རུས་གཅིག་པའི་བོད་པ་ཡིན་པ་ཤེས་སོང་། ཁོ་གཉིས་ཀྱི་གཅིག་ནི་གཟུགས་པོ་སྐམ་ལ་རིང་བའི་ཕོ་སར་ཞིག་རེད་ལ། ཁོས་རྒྱབ་ཁུག་ཆེན་པོ་ཞིག་ཁུར་འདུག་ཅིང་། ཁོའི་ཕྲག་མགོ་གཡོན་པ་ནས་མར་མཆན་འོག་ཏུ་ཐེན་པའི་རྒྱབ་ཁུག་གི་ལུང་ཐག་སྟེང་དུ་ནོར་ཐི་ཧྥ་སི་(Northface)ཞེས་པའི་ཨིན་ཡིག་དཀར་པོ་ཞིག་བྲིས་འདུག གཞན་དེ་ལོ་ན་བཞི་བཅུ་ཡས་མས་ཀྱི་མི་ཅུང་རྒྱགས་པ་ཞིག་རེད་ལ། ཁོའི་དཔྲལ་བ་དང་སྐེ་ལ་རྔུལ་ཆུ་འོད་འཚེར་འཚེར་འཁོར་བ་མ་ཟད།  སྟོད་ཐུང་ཕུ་མེད་ཀྱི་མཆན་འོག་གཡས་གཡོན་ཡང་རྔུལ་ཆུས་ནག་པོར་གྱུར་འདུག ཁོས་ཀྱང་ནོར་ཐི་ཧྥ་སི་རྟགས་ཅན་གྱི་གློ་ཁུག་གསར་པ་ཞིག་སྐེད་པར་དཀྲིས་འདུག་པས། ཁོའི་ལུས་སྟེང་དུ་ལྡི་ལིའི་བོད་ཀྱི་གཞིས་སྒར་ཏེ་མན་ཇུ་ཀྲི་ལའི་སྲང་ལམ་དོག་མོ་ནས་དལ་བུར་ཡར་འགྲོ་མར་འགྲོ་བྱེད་མཁན་གྱི་བོད་པའི་ཚོང་པ་དེ་དག་གི་ཚུགས་གའི་ཆ་ཞིག་མཆིས།

ང་རང་མེ་འཁོར་འབབ་ཚུགས་སུ་ཐོན་མ་ཐག་བོད་པ་རེ་འགྲོ་མཁན་ཨེ་འདུག་མིག་མྱུལ་བྱེད་འགོ་བརྩམས་པ་ཡིན། གལ་སྲིད་འགྲུལ་རོགས་བོད་པ་རེ་རག་པ་ཡིན་ན།མ་མཐར་ཡང་རྒྱབ་ཁུག་ཁུར་ནས་མེ་འཁོར་གྱི་གསང་སྤྱོད་དུ་འགྲོ་མི་དགོས་པ་འོང་ངེས།ཡིན་ན་ཡང་། ང་རང་ཁོ་གཉིས་ཀྱི་གམ་དུ་བཅར་ནས་སྐད་ཆ་འདྲི་རྒྱུར་འཚེར་བས། སྔར་མར་དུ་སྣང་མེད་ངང་བསྡད་དེ་བལྟས། སྔོན་ཆད་ཀྱི་ཉམས་མྱོང་རེ་ཟུང་ལས་ངས་བོད་པ་ཚང་མ་དེ་འདྲའི་ཡ་རབས་དང་། སོ་སོའི་རིགས་ལ་འགྲོག་འདྲིས་བྱེད་ཆོག་ཆོག་ཅིག་མེད་པ་ཤེས་ཡོད། འོན་ཀྱང་། ཁོ་གཉིས་ཐད་ཀར་ང་ལ་གཏད་དེ་བསླེབས་བྱུང་། 

“ཅོ་ཅོ་གང་དུ་འགྲོ་རྒྱུ་ཡིན་ནམ།” ཁོ་གཉིས་ངའི་འཁྲིས་སུ་འབྱོར་བ་དང་ཕོ་གསར་ལོ་ཆུང་བ་དེས་ང་ལ་དྲིས་བྱུང་། 

“བྷེང་ལོར་དུ་འགྲོ་རྒྱུ་ཡིན། རང་གཉིས?”

“ང་འགྲོ་མཁན་མིན། ཁོ་བྷེང་ལོར་དུ་འགྲོ་རྒྱུ་རེད། རང་གི་མེ་འཁོར་ཆུ་ཚོད་ག་དུས་རེད?”

“དགུ་དང་སྐར་མ་ཉི་ཤུ།”

“ཏག་ཏག་རེད། མེ་འཁོར་གཅིག་རེད། སྐུ་མཁྱེན།ཁོ་ལ་རོགས་པ་ཞིག་བྱས་ན་འགྲིག་གམ། ཁོས་སྐད་མི་ཤེས་པས་བོད་པ་ཞིག་འགྲོ་རོགས་ཨེ་རྙེད་ལྟ་བཞིན་ཡོད།” ལོ་ཆུང་བ་དེས་དེ་ལྟར་ང་ལ་རེ་སྐུལ་བྱེད་སྐབས།རྒན་པ་དེ་འཛུམ་ཙམ་རེ་བྱས་ཏེ་འཁྲིས་སུ་ལངས་ནས་བསྡད། ད་ནི་ཁོའི་ལུས་སྟེང་དུ་ད་གིན་ཡར་ཡོང་སྐབས་ཀྱི་ཚོང་པའི་ཚུགས་ག་དེའི་ཤུལ་ཙམ་ཡང་མི་འདུགལོ་ཆུང་དེས་ང་ལ་རེ་བ་འདོན་སྟངས་དང་། རྒན་པ་དེ་གམ་དུ་ལང་ཚུལ་དེ་ནི་ཨ་མ་ཞིག་གིས་རྒྱང་དུ་འགྲོ་མཁན་གྱི་བུ་ཕྲུག་ཅིག་འགྲུལ་རོགས་ཚོ་ལ་མངགས་བཅོལ་བྱེད་ཚུལ་དང་འདྲ། 

ཡིན་དང་ཡིན། ངས་དགའ་སྤྲོའི་ངང་ཁོའི་རེ་བ་དེ་དང་ལེན་བྱས་པ་ཡིན། སྐད་མི་ཤེས་པའི་དཀའ་ངལ་དང་། སྐད་མི་ཤེས་མཁན་ལ་རོགས་བྱེད་པའི་ཕན་ཡོན་དེ་ང་ལ་རྒྱུས་མངའ་ཆེན་པོ་ཡོད། སྔོན་ཆད་ངས་ཨིན་སྐད་(ཧིན་དྷུའི་སྐད་ད་ལྟ་ཡང་མི་ཤེས།)ཅི་ཡང་མི་ཤེས་པའི་སྐབས། རོགས་བྱེད་མཁན་རེ་བྱུང་ན་སེམས་ལ་བརྗོད་ལས་འདས་པའི་དགའ་སྣང་སྐྱེ་མྱོང་། བག་ཆགས་ཟབ་མོ་དེའི་དབང་གིས་ངས་ཀྱང་དེང་སྐབས་གོ་སྐབས་ནམ་བྱུང་ལ་གང་ཐུབ་ཅི་ནུས་ཀྱིས་རོགས་རམ་བྱེད་ཀྱི་ཡོད། ད་ཐེངས་གོ་སྐབས་ཤིག་རག་པ་རེད། དེ་ཡིས་མ་ཚད་བོད་པ་ཞིག་འགྲུལ་རོགས་སུ་ཡོད་ན། སྟབས་བདེ་དང་བློ་བདེ་ཞིག་ཀྱང་རེད། 

བརྗོད་མི་དགོས་པ་ཞིག་ལ། ངེད་གཉིས་ཀྱི་མེ་འཁོར་གཅིག་ཡིན་པ་ལས་མེ་འཁོར་གྱི་འཁོར་སྒམ་གཅིག་དང་རྐུབ་སྟེགས་གཡས་གཡོན་དུ་མ་ཁེལ། དེ་བས་ངས་ཞུ་བ་ཆེན་པོ་བྱེད་མི་དགོས་པའི་ཐོག་ནས་ཁོའི་ཉེ་འཁྲིས་སུ་ཡོད་པའི་རྒྱ་གར་ཕོ་སར་དེ་དང་རྐུབ་སྟེགས་བརྗེ་ཐུབ་པ་བྱུང་བས། ཁོས་“ད་ནི་ཨ་ཧ་ཡག་པོ་ཆགས་སོང་། ད་ཐེངས་ཁྱོད་ཀྱིས་ང་ལ་ཨ་ཧ་ཕན་ཐོགས་སོང”ཞེས་ཡང་ཡང་བཟློས་པ་མ་ཟད། ཁོའི་ངོ་གདོང་སྨུག་པོའི་སྟེང་དུ་བཅོས་མིན་གྱི་འཛུམ་མདངས་ཤིག་རྒྱས་འདུག 

ངེད་གཉིས་ཀྱི་ཁ་བརྡའི་ཁྲོད་ཁོས་ཁོ་རང་མཚོ་སྔོན་ནས་ཡིན་པ་དང་། (ས་ཆ་ཞིག་གི་མིང་ལབས་བྱུང་རུང་ད་ལྟ་མི་དྲན།) རྒྱ་གར་དུ་འབྱོར་ནས་ལོ་ངོ་བཅུ་ཙམ་འགྲོ་ལ་ཉེ་རུང་རྡ་སའི་ཚོགས་པ་ཞིག་གི་མ་བྱན་བྱས་ཏེ་བསྡད་པས། རྒྱ་གར་སྐད་དང་ཧིན་དྷུའི་སྐད“གཏན་ནས་མི་ཤེས”པ་དང་། ད་ལོ་གཞི་ནས་ཕ་ཡུལ་དུ་ལོག་བྱེད་ཀྱི་པ་སེ་རག་པས། ཕ་ཡུལ་དུ་མ་ལོག་གོང་སེ་འབྲས་དགེ་གསུམ་གྱིས་མཚོན་པའི་རྒྱ་གར་ལྷོ་ཕྱོགས་སུ་ཆགས་པའི་བོད་ཀྱི་དགོན་པ་རྣམས་ལ་མཇལ་སྐོར་ཐེངས་ཤིག་བྱེད་ཆེད་བྷེང་ལོར་དུ་སྐྱོད་བཞིན་པའི་གནས་ཚུལ་རྣམས་བརྗོད་བྱུང་། 

ངས་ཀྱང་རང་ཉིད་ཀྱི་ཕ་ཡུལ་འབྲི་རུ་ཡིན་པ་དང་། རྒྱ་གར་དུ་བསླེབས་ནས་ལོ་ངོ་བཅུ་ལྷག་ཕྱིན་ཟིན་པ། ད་ལྟ་སྐུ་སྒེར་ཡིག་ཚང་གི་ཁོངས་སུ་གཏོགས་པའི་ཡིག་སྒྱུར་གྱི་ཚོགས་པ་ཞིག་ཏུ་ྋགོང་ས་མཆོག་གི་ཨིན་ཇིའི་ཕྱག་དེབ་རྣམས་བོད་ཡིག་ཏུ་བསྒྱུར་བའི་ལས་ཀ་ཞིག་བྱེད་ཀྱིན་ཡོད་པ་བཅས་ངོ་སྤྲོད་བྱས་པ་ན། ཁོས“ཨ་ཧ་བཟང་གིབསོད་ནམས་ཆེན་པོ་གསོག་གི་རེད། ཧྲ་ལ་བྱོས་ཨ”ཞེས་ང་ལ་སྔར་བས་ཀྱང་དགའ་དགའ་དང་བརྩེ་བརྩེ་བྱས།ཁོའི“ཧྲ་ལ་བྱོས་ཨ”ཞེས་པའི་བསླབ་བྱ་ཐུང་ངུ་དེའི་ཁྲོད། ངས་ཕ་ཡུལ་གྱི་རྒན་འཁོགས་རྣམས་ཀྱི་ལྷད་མ་འདྲེས་པའི་ཕན་སེམས་ཀྱི་ཆ་ཞིག་ཚོར་བྱུང་། ངོ་མ་དེ་ནི་རྒྱུན་པར་བླ་ཆེན་དཔོན་ཆེན་དང་། ཤེས་ཡོན་ཅན་གྱི་མིང་འཛིན་མཁན་ཚོས་མི་རིགས་དང་རྒྱལ་ཁབ་ཀྱི་ཆེད་དུ་ལྷག་བསམ་རྣམ་དག་བྱེད་དགོས་པའི་བསླབ་བྱ་སྐམ་པོ་དེ་དག་དང་ཅི་འདྲའི་མི་འདྲ་བ་ཞིག་ཨང་། ཁོས་མི་ལོ་བཅུ་ཕྲག་ཙམ་བཙན་བྱོལ་སྤྱི་ཚོགས་ནང་བསྐྱལ་རུང་ཕ་ཡུལ་གྱི་སྐད་དང་སྐད་གདངས་དེ་ཙམ་འགྱུར་མེད་པ་ལྟར། ཕ་ཡུལ་གྱི་སེམས་གཤིས་བཟང་པོའང་ཞེ་ཁོངས་སུ་གནས་ཡོད་པ་འདྲ། ངའི་སེམས་སུ་གློ་བུར་དུ་ཁོ་དང་ཐག་ཉེ་བའི་ཚོར་སྣང་ཁྱད་མཚར་ཞིག་སྐྱེས་བྱུང་།

ངེད་གཉིས་མེ་འཁོར་ནང་འཛུལ་ནས་བདེ་རུ་བབ་པ་ནས་བཟུང་ཁ་བརྡ་སྣ་ཚོགས་བྱས་ནས་བསྡད་པ་དང་། འཁོར་སྒམ་དེའི་ནང་བོད་པ་ངེད་གཉིས་ལས་མེད་སྟབས། ངེད་གཉིས་ཀྱིས་རང་ཉིད་གཉིས་ལས་གཞན་སུས་ཀྱང་མི་གོ་བའི་སྐད་ཅིག་གི་ནང་རང་དབང་གིས་ཁ་བརྡ་སྣ་ཚོགས་བྱེད་ཆོག ཡང་གཅིག་བཤད་ན། ཁོས་ཁ་སྤྲོད་ཀྱི་ཁ་ཆེའི་ཁྱིམ་ཚང་དེ་ལ་ལྟ་བཞིན་འཛེམ་ཟོན་མེད་པར“འདི་ཚོ་ཨ་ཧ་ངར་བ་རེད་ཡ”ཞེས་བརྗོད་ཐུབ་པའི་རྒྱུ་མཚན་ཡང་དེ་ལ་ཐུག་ཡོད། ངས་མི་ཚོགས་ཀྱི་ཁྲོད་དུ་གཞན་གྱིས་གོ་བའི་དོགས་པ་མེད་པར་ཡིད་ལ་གང་འཆར་གླེང་ཆོག་པ་དེའང་བྲོ་བ་དམིགས་བསལ་ཞིག་ཡིན་པ་ཚོར། 

དེ་བས་ངས་ཁོ་ལ་གསར་འགྱུར་རྩོམ་ཡིག་ཅིག་ཏུ་ལོ་ངོ་ལྔ་བཅུའི་རྗེས་སུ་འཛམ་གླིང་ནང་མི་འབོར་མང་ཤོས་ཀྱི་ཆོས་ལུགས་དེ་ཁ་ཆེ་ཆགས་རྒྱུ་ཡིན་ཚུལ་འཁོད་འདུག་པའི་སྐོར་བཤད་དེ་ཁ་བརྡ་དེའི་འཕྲོ་མཐུད་ཐབས་བྱས། ཡིན་ན་ཡང་། མཚམས་དེར་ཁོའི་ངག་ནས་“ཡིན་ནི་རེད་ཡ། བརྒྱ་ཆ་བརྒྱ་ཡིན་ནི་རེད”ཟེར་བ་ལས་མིག་ཟུང་ཁ་ཆེའི་བུད་མེད་དེ་ལ་བལྟས་ནས་བསྡད། དེ་རིང་སྔ་དྲོར་འབབ་ཚུགས་ཆུང་ཆུང་ཞིག་ནས་ཁ་ཆེའི་ཁྱིམ་ཚང་དེ་ང་ཚོའི་མེ་འཁོར་ནང་འཛུལ་བ་ནས་བཟུང་། ཁོས་དེ་ལྟར་ཕལ་ཆེར་མིག་ཀྱང་མི་མཐོང་བའི་བུད་མེད་དེ་ལ་ཡང་ནས་ཡང་དུ་ལྟ་བ་ངས་དོ་སྣང་བྱུང་བས། སྐབས་རེར་ང་རང་ཡང་ཅུང་དོགས་མི་བདེ་བར་གྱུར་རུང་། ངེད་གཉིས་འདྲིས་རྒྱུས་མེད་པའི་དབང་གིས་དེའི་སྐོར་ལབ་ཐབས་མ་རག ཁོའི་མིག་ཟུང་མངོན་ཆུང་ངང་བུད་མེད་དེ་ལ་འཆོར་ཚུལ་དང་། དེ་ནས་ཁོ་རང་ཡུད་ཙམ་གྱི་བསམ་གཞིགས་ཁྲོད་དུ་ལྷུང་སྟངས་ལ་བལྟས་ན། ཁོས་སྔོན་ཆད་མིག་ཟུང་མ་གཏོགས་ལུས་ཡོངས་རས་ནག་པོས་གཡོགས་པའི་བུད་མེད་དེ་འདྲ་ཞིག་གཏན་ནས་མཐོང་མྱོང་མེད་པར་ཧ་ལས་པ་དང་མཚུངས། ངས་ཁ་ཆེའི་བུད་མེད་དེ་དང་མོའི་གཏུམ་དྲག་ཆེ་བའི་ཁྱོ་ག་གཉིས་ཀྱིས་ཁོའི་གུས་ཞབས་བྲལ་བའི་ལྟ་སྟངས་དེ་ཚོར་ཨེ་འགྲོ་དྲན་ནས་སེམས་ཁྲལ་ལངས་མོད། ཁོ་ལ“ཨ་རོགས།དེ་ལྟར་མ་ལྟ”ཟེར་མ་ཤེས་པར་ལུས། དེ་བས་ངས་མ་མཐོང་བའི་ཁུལ་གྱིས་ཁོ་རང་ཅི་དགར་བཞག

“ངའི་ཨ་ཅེ་ཞིག་འདི་ཚོས་ཁྲིད་སོང་ནི་རེད།” ཅུང་ཙམ་གྱི་རྗེས་སུ་ཁོས་ཁ་ཚུར་ང་ལ་བསྐོར་ཏེ་སྨྲས། ཁོས་དེ་ལྟར་ཟེར་ཚུལ་ལ་བལྟས་ན།གནས་ཚུལ་དེ་ཁོའི་སེམས་སུ་གློ་བུར་དུ་འཁོར་བ་ཞིག་ཡིན་པ་དང་། “འདི་ཚོ”ཟེར་བ་དེས་འཁྲིས་ཀྱི་ཁྱིམ་ཚང་དེ་སྟོན་པ་དང་འདྲ་ཡང་། དེ་ལྟར་ག་ལ་ཡིན། ངས་ད་གཟོད་གཞི་ནས་ཁོས་བུད་མེད་དེ་ལ་ཡང་ཡང་ལྟ་བའི་རྒྱུ་མཚན་རྟོགས་སོང་། ངས་ཧ་ལས་པའི་ངང“ཨ། ག་འདྲ་བྱས་ནས་ཁྲིད་པ་རེད”ཅེས་དྲིས་པ་དང་། སེམས་སུ་བོད་པའི་བུད་མེད་ཅིག་བཙན་གྱིས་འཁྲིད་བཞིན་པའི་སྣང་བརྙན་རབ་རིབ་ཅིག་འཁོར། དེང་སྐབས་གློག་བརྙན་དང་གསར་འགྱུར་ནང་བུད་མེད་བཙན་ཁྲིད་བྱས་པའི་གནས་ཚུལ་གྱིས་གང་ཡོད་པས་ངའི་སེམས་སུ་དེ་འདྲའི་སྣང་བརྙན་མག་མོག་ཅིག་འཁོར་བྱུང་། 

“དེང་སང་མོས་ཀྱང་འདི་འདྲའི་གོས་ནག་པོ་ཞིག་གོན་འདུག” ཁོས་ངའི་དྲི་བར་ལན་མ་བརྒྱབ་པར་དེ་ལྟར་བཤད་དེ་འཛུམ་ཙམ་བྱས། ཡིན་ན་ཡང་། ཁོའི་སྐད་ཀྱི་གདངས་དང་འཛུམ་པའི་རྣམ་འགྱུར་གྱི་ཁྲོད་དུ་ངོ་ཚ་འདྲེས་པའི་སྐྱོ་སྣང་ཟབ་མོ་ཞིག་གིས་གང་འདུག ད་ནི་ང་ལ་གནས་ཚུལ་དེའི་བརྒྱུད་རིམ་ཆ་ཚང་ཤེས་འདོད་དྲག་པོ་ཞིག་སྐྱེས་ཀྱང་། ཁོ་ལ་ཇི་ལྟར་འདྲི་དགོས་མ་ཤེས། དེ་བས་ངས་ཁོའི་ངོ་གདོང་ལ་བལྟས་ཏེ་མུ་མཐུད་བཤད་རྒྱུར་རེ་ཞིང་སྒུག་བཞིན་ཡོད་པའི་རྣམ་པ་བསྟན། 

“ངའི་ཨ་ཅེ་ཁྲིད་པའི་སྐོར་བཤད་ན།ད་གཟོད་འདི་ཚོ་ཨ་ཧ་ཡིན་པ་ཤེས་ནི་རེད་ཡ།” ཁོས་གདོང་ལ་གཟབ་ནན་གྱི་རྣམ་འགྱུར་ཞིག་བསྡུས་ཏེ་མུ་མཐུད་བཤད་བྱུང་། “ངའི་ཨ་ཅེ་དེ་ང་ཚོའི་ས་ཕྱོགས་ན་ལམ་ཁ་ལས་པར་ཡོང་མཁན་གྱི་མྱི་རྐྱང་ཞིག་དང་ཁ་ཐུག་པ་རེད། ཐོག་མར་ཨ་ཕ་དང་ནང་མི་ཚོས་དེ་ལ་འཐད་པ་མ་བྱས་ནས་ཁོ་གཉིས་ལྷན་དུ་སྡོད་མི་ཆོག་བཤད་པ་རེད། ཐེངས་གཅིག་ལ་ཨ་ཕས་ཨ་ཅེ་ཨ་ཧ་ཞིག་གཅར་སོང་། ཡིན་ན་ཡང་། དེས་ཅི་ལ་ཕན། མོ་ལ་བྱིས་པ་འཁོར་ནས་བཀོད་པ་མེད་པར་གྱུར་བ་རེད། དེ་ནས་ཕ་མ་གཉིས་ཀྱིས་ཁོ་གཉིས་ལ་ཁང་པ་ཐེབས་ཆག་ཅིག་བརྒྱབ་ནས་ཟུར་དུ་བཞག་པ་དང་། ཉེ་ས་དགའ་ས་ཚོས་སེམས་ཅན་ཆ་རེ་སྟེར་བས། འཚོ་བར་དཀའ་ངལ་མེད་པར་གྱུར་བ་རེེད། དེ་ནས་ལོ་ཤས་རྗེས་སུ་ཨ་ཅེས་ཡང་བསྐྱར་བུ་ཞིག་སྐྱེས་པ་དང་། ཁོ་གཉིས་ཀྱི་འཚོ་བ་དེ་ཨ་ཧ་ཞིག་མེད་ཀྱང་འགྲིག་ནི་ཞིག་ཆགས་པ་རེད། དེ་ལྟར་ཁོ་གཉིས་ཀྱིས་ལོ་མང་པོར་འཚོ་བ་མཉམ་དུ་བསྐྱལ་རྗེས། ༡༩༩༩ ལོའི་དགུན་ཁར་ཁོས་ཁྱིམ་ཚང་ཧྲིལ་པོ་ཁྲིད་དེ་གར་སོང་ཆ་མེད་དུ་གྱུར་བ་རེད། ཁོས་དེ་ལྟར་མི་ལོ་མང་པོའི་རིང་ལ་མྱི་ལྡོམ་བདག་མེད་ཅིག་ཡིན་ཁུལ་བྱས་པ་མ་ཟད། ང་ཚོའི་ཕྱོགས་ཀྱི་ལྷ་ཁང་དང་བླ་མ་རྩ་ཆེན་གང་ཡག་ལ་མཇལ་ཁ་ཞུ་བ་དང་། མ་ཎི་འདོན་པ་སོགས་བྱས་ནས་ང་ཚོའི་ནང་མི་ཚོའི་ཡིད་ཆེས་ཐོབ་རྗེས། མ་བུ་གསུམ་ཀ་ཁྲིད་དེ་ཕྱིན་པ་རེད།ངོ་མ་སྐྲག་ནི་ཞིག་མ་རེད་དམ།”  ཁོས་ང་ལ་ཕུར་ཚུགས་སུ་བལྟས་བྱུང་བ་དང་། ཁོའི་ངོ་གདོང་སྟེང་ཤིན་ཏུ་ཡིད་ཆེས་མི་ཐུབ་པའི་རྣམ་འགྱུར་ཞིག་གིས་ཁྱབ་འདུག ང་རང་ཡང་གཏམ་རྒྱུད་དེས་ཧ་ལས་སུ་བཅུག་སྟེ་དེའི་འཕྲོ་ཅི་ཞིག་བྱུང་བ་ཤེས་འདོད་ཆེན་པོ་སྐྱེས། 

“ལོ་ངོ་ཆ་རེ་མ་རེད། བཅུ་ལྷག་རེད།” ཁོས་ངས་ཧ་ལས་པའི་ངང་མགོ་བོ་གཡུགས་པར་ལྟ་བཞིན་ཡང་བསྐྱར་དོ་ནན་གྱིས་བསྣན། “ལོ་ངོ་བཅུ་ཁ་དེའི་རིང་ཁོས་ཕ་ཡུལ་དང་ཕ་མ་ཅི་ཡང་མེད་པའི་མྱི་ལྡོམ་ཁེར་རྐྱང་ཞིག་ཡིན་མདོག་བསྟན་པ་དང་། བོད་སྐད་ཀྱང་ཆུ་བཞུར་བཞུར་ཆགས་པ་རེད། འོན་ཀྱང་། དེ་ནས་མཚན་མོ་ཞིག་ལ་ཁོའི་རོགས་པ་འགའ་ཐོན་ནས་མ་བུ་ཆ་བོ་ཚང་མ་ཁྲིད་ཕྱིན་པ་རེད། སྡེ་བས་གསང་བའི་ངང་སྔ་མོ་ནས་ཕ་ཡུལ་ལ་འབྲེལ་བ་བྱས་ནས་གྲ་སྒྲིག་ཆ་ཚང་བྱས་འདུག ཁོ་དེ་ལྟར་ལོ་ངོ་བཅུ་ཁ་ལ་བསྡད་པ་རེད། ཨ་ཧ་མ་རེད་དམ།” ཁོས་སླར་ཡང་མིག་ཆེ་ཆེ་དང་ཁ་བགྲད་བགྲད་ཀྱི་རྣམ་འགྱུར་ཞིག་བསྟན་བྱུང་། ངས“དངོས་གནས་རེད།དངོས་གནས་རེད”ཅེས་ལན་བྱིན་པ་དང་། སེམས་གཏིང་དུའང་ཁོས་བཤད་པ་ལྟར་“ངོ་མ་ཨ་ཧ་རེད་ཨང”བསམས་བྱུང་།

མེ་འཁོར་མུ་མཐུད་ཆག་སྒྲ་ཁོག་སྒྲའི་ངང་རྒྱུ་བཞིན་མཆིས་ལ། དེའི་རྒྱུ་ཕྱོགས་དང་བསྟུན་ནས་ངེད་གཉིས་ཀྱི་ཁ་གཏད་དུ་བསྡད་པའི་ཁ་ཆེའི་བཟའ་མི་དེ་གཉིས་ཀྱི་ཕྲག་མགོ་དང་མགོ་བོ་གཡོ་ཙམ་གཡོ་ཙམ་བྱེད། ད་ནི་ཁོ་གཉིས་ལ་ཁ་བརྡ་རྫོགས་སོང་བ་ལྟར་ཉོབ་སྣང་ངང་ཁུ་སིམ་མེར་མདུན་དུ་ཅེར་ནས་བསྡད་འདུག བུ་གཉིས་ཀྱི་ཆུང་བ་དེས་མགོ་བོ་ཨ་མའི་པང་དུ་བསྔས་ཤིང་རྐང་པ་ཨ་ཕའི་པང་དུ་བཞག་སྟེ་གཉིད་དུ་ཡུར་འདུག་ལ །ཆེ་བ་དེའང་སྟེང་ཁྲིའི (upper seat) ཐོག་ཏུ་ཉལ་ནས་མཆིས། 

ནུབ་མཐའི་དུ་ཞག་ཁྲོད་ཀྱི་དམར་གོར་གོར་གྱི་ཉི་མ་དེ་མེ་འཁོར་གྱི་སྒེའུ་ཁུང་དང་ལྷན་དུ་རྒྱུ་ལ། གསལ་ཆ་ཤོར་བའི་འོད་ཟེར་གཉོམ་པོ་མེ་འཁོར་གྱི་སྒེའུ་ཁུང་བརྒྱུད་ནས་ནང་དུ་འཕྲོས་པས། བུད་མེད་དེའི་གྱོན་ཆས་དང་མགོ་རས་ནག་པོའི་སྟེང་དུའང་འགྲེལ་དཀའ་བའི་དམར་མདངས་ཤིག་ཆགས་པ་དང་། གཏུམ་དྲག་ཆེ་བའི་སྐྱེས་པའི་དེའི་སྨ་ར་ཁམ་ཁམ་དེ་སྔར་བས་ཀྱང་དམར་བར་སྣང་། 

“མཚན་མོ་དེ་ངས་ཨ་ཧ་གསལ་པོ་ཞིག་དྲན་གྱི་འདུག” ངས་དེ་ལྟར་རིག་པ་བསྒྲིམས་ནས་ཉེ་འཁོར་གྱི་རྣམ་པར་དོ་སྣང་སྤྲོད་བཞིན་ཡོད་པའི་ཚེ། (བརྩམས་སྒྲུང་གི་རྒྱུ་ཆར་ལོ་སྲིད་པའི་དོན་རྐྱེན་དང་གཏམ་རྒྱུད་རེ་དང་འཕྲད་དུས། ངས་གང་ནུས་ཀྱིས་ཉེ་འཁོར་ལ་དོ་སྣང་སྤྲོད་ཀྱི་ཡོད།) ཁོས་བསྐྱར་དུ་སྨྲས་བྱུང་། “མཚན་མོ་དེར་ང་རང་ཁོ་ཚང་ལ་ནུབ་ཆུ་འཐུང་དུ་ཕྱིན་པ་ཡིན། ངེད་ཚང་གི་ནང་མིའི་ནང་ནས་ཨ་ཅེས་ང་ལ་འདང་ཆེ་ཤོས་རེད། ད་རུང་ཁོ་ཚང་ལ་གསར་དུ་ཐོན་པའི་ཉི་གློག་ཅིག་ཀྱང་ཡོད་པས། དགོང་མོ་ང་རང་ཁོ་ཚང་ལ་འགྲོ་རྒྱུར་ཨ་ཧ་དགའ། དེ་ནུབ་ང་རང་ནུབ་ཆུ་བཏུངས་ནས་ཕྱིར་ཁྱིམ་དུ་ལོག་སྐབས།ཁ་བ་སྲབ་མོ་ཞིག་འབབ་བཞིན་འདུག ངོ་མ་མི་ཟེར་བ་ཁྱད་མཚར་ཞིག་རེད། དེ་ནུབ་ཨ་ཅེས་ནམ་རྒྱུན་དང་མི་འདྲ་བར་ང་རང་ཁོ་ཚང་གི་ལྷས་རྩ་བར་བསྐྱལ་བྱུང་། མོས‘ད་ལོའི་དགུན་ཁ་འདི་ཤིན་ཏུ་གྲང་མོ་འདུག ལོ་འདིར་ཡོང་སྒོ་ཏོག་ཙམ་བྱུང་ན་ལོ་གཞུག་མར་ཨ་ཅེས་ཁྱོད་ལ་ཚར་ལྭ་ཞིག་བཟོ་དགོས’ཟེར། ལོ་འདི་འདྲའི་མང་པོ་ཞིག་ཕྱིན་རུང་མོའི་མཇུག་མཐའི་སྐད་ཆ་དེ་ད་རུང་ཡང་ངའི་རྣ་ལམ་དུ་གྲག་བཞིན་འདུག ཁོ་ཚང་གི་ནང་དུ་ངས་རྒྱུན་ལྡན་མ་ཡིན་པའི་གནས་ཚུལ་ཅི་ཡང་དོ་སྣང་མ་བྱུང་རུང་། ང་རང་ཨ་ཅེ་དང་ཁ་བྲལ་ནས་ཚུར་ངེད་ཚང་དུ་ལོག་བཞིན་པའི་སྐབས། སེམས་མི་བདེ་བ་ཁྱད་མཚར་ཞིག་རེད། ངོ་མ་ང་ཚོའི་ཚོར་སྣང་ལ་ནུས་པ་དམིགས་བསལ་ཞིག་ཡོད་པ་གཏན་ཁེལ་རེད།ཁྱོད་ལ་དེ་འདྲའི་ཚོར་སྣང་སྐྱེ་མྱོང་ངམ།” 

ཨ་ཅང་ཅང་། ངས་རྒྱུན་པར་ང་ཚོ་འགྲོ་བ་མི་ལ་ཚོར་ཤེས་ཀྱི་ནུས་པ་དཔག་ཏུ་མེད་པ་ཞིག་ཡོད་པའི་ཡིད་ཆེས་བྱེད་ཀྱི་ཡོད། ཡིན་ན་ཡང་། ཁོས་དེ་ལྟར་གློ་བུར་དུ་དྲིས་པ་ན། ངའི་སེམས་སུ་རང་ཉིད་ཀྱི་ཚོར་ཤེས་ཀྱིས་གནས་ཚུལ་ངེས་གཏན་ཞིག་དུས་སྐབས་ངེས་གཏན་ཞིག་ལ་རྟོགས་པའི་སྐོར་མ་འཁོར། འོན་ཀྱང་ངས“ཡོད།ལོས་ཡོད”ཅེས་བཤད་དེ་ཁོས་གཏམ་རྒྱུད་དེའི་མུ་མཐུད་རྒྱུར་རེ། ངས་ཁ་བ་འབབ་བཞིན་པའི་མཚན་མོ་དེར་ཁོ་རང་ཞེ་མི་བདེ་བའི་ངང་ཁྱིམ་དུ་ལོག་རྗེས། ཡང་སྙིང་གནས་ཚུལ་ཅི་ཞིག་ལྷགས་པ་ཤེས་འདོད་རབ་ཏུ་ཆེ། 

“དེ་ནུབ་ཁོས་ངའི་ཨ་ཅེ་དང་བུ་གཉིས་ཁྲིད་དེ་གར་སོང་ཆ་མེད་དུ་གྱུར་བ་རེད། ཁོ་ཚང་གི་སྒོ་རྭའི་ཕྱི་ཡི་ཁ་བའི་ཁྲོད་དུ་རླངས་འཁོར་གྱི་འཁོར་ལོའི་རྗེས་ཤུལ་ཞིག་བབ་ཡོད་པ་ལས་ཅི་ཡང་ལྷག་མི་འདུག དེ་ལྟར་ལབས་ན། ཕྱིའི་ཟོགས་རྡོག་ཆ་བོ་དང་ཁྱིམ་གྱི་ཅ་དངོས་གང་ཡང་ཁྱེེར་མི་འདུག དང་ཐོག་ང་ཚོའི་ཕ་མ་གཉིས་ཀྱིས་སེམས་ཁྲལ་བྱེད་རྒྱུའི་ཚབ་ཏུ་ཨ་ཅེ་ལ་སྡིགས་དམོད་བྱས་སོང་། ཕ་མ་གཉིས་ཀྱི་སེམས་སུ་ཨ་ཅེས་ཁྱིམ་དང་ཟོགས་རྡོག་ཆ་བོ་བསྐྱུར་ནས་གང་ཞིག་ཏུ་ཕྱིན་པ་ལས་མོ་བཙན་ཁྲིད་ཐེབས་པ་གཏན་ནས་འཁོར་མི་འདུག ཨ་ཅེའང་འདུག་རྒྱུ་མེད་ནི་ཞིག་རེད། སྔོན་ཆད་མོ་ཆུང་ཆུང་སྐབས་ལྷ་སར་ཐེངས་གཉིས་ཙམ་འབྲོ་མྱོང་ཡོད། ཡིན་ན་ཡང་། དེ་ནས་ང་ཚོས་གནས་ཚུལ་དངོས་དེ་ཤེས་ནས་མོ་འཚོལ་འགོ་བརྩམས་པ་ཡིན། ང་ཚོས་ཉེན་རྟོག་པ་ལ་ཡར་ཞུ་དང་། ཐག་ཉེ་རིང་གི་ངོ་ཤེས་ཚང་མར་སྐད་ཆ་འདྲི་བ་སོགས་བྱས་རུང་མོ་གཏན་ནས་རྙེད་མེད། དེ་ལྟར་ལོ་ངོ་བཅུ་ཁ་ལ་ང་ཚོའི་ནང་མི་ཉེ་འབྲེལ་ཚོས་ཇི་ལྟར་བཙལ་རུང་མོའི་ཤི་གསོན་གྱི་གནས་ཚུལ་ཙམ་ཡང་མ་ཐོས། དེའི་སེམས་ནད་ལ་བརྟེན་ནས་ཨ་ཕ་ཡུན་རིང་ཞིག་བསྡད་མ་སོང་།  ངོ་མ་ཨ་ཕ་འཆི་ཁའི་ཉལ་སར་ལྷུང་ནས་ཡོད་སྐབས་ཀྱང་། བུད་མེད་སུ་ཞིག་ཁོའི་འཁྲིས་སུ་བཅར་ཡང‘ཁྱོད་ལྷ་མོ་མཚོ་ཨེ་ཡིན’ཟེར་གྱི་འདུག སེམས་ཀྱིས་བཟོད་ནི་ཞིག་མ་རེད།”

མཚམས་འདིར་ཁོས་དབུགས་རིང་ཞིག་བཏང་ནས་མགོ་བོ་ཅུང་ཟད་དུད་དེ་མིག་ཟུང་སྐྱོ་བའི་ངང་མདུན་དུ་ཅེར་སོང་། ད་ལྟ་ཁོའི་མིག་ལམ་དུ་མེ་འཁོར་གྱི་འཁོར་སྒམ་ནང་བསྡད་པའི་ཁ་ཆེའི་ཁྱིམ་ཚང་དེ་དང་ངའི་ཚབ་ཏུ་ཕལ་ཆེར་ལོ་ངོ་དུ་མའི་སྔོན་གྱི་ཨ་ཕའི་ཉམ་ཐག་པའི་སྣང་བརྙན་དེ་ཤར་ཡོད་པར་མངོན། ཁོའི་ངོ་གདོང་ལ་སྐྱོ་གདུང་དང་ན་ཟུག་གིས་གང་འདུག ངས་ཅི་ཞིག་བཤད་དེ་ཁོ་ལ་སེམས་གསོ་བྱེད་དགོས་མ་ཤེས། ང་རང་རྩོམ་འབྲི་མཁན་ཞིག་ཡིན་རུང་། རྒྱུན་ལྡན་མ་ཡིན་པའི་གནས་སྟངས་ཁྱད་མཚར་ཅན་འདི་ལྟ་བུའི་ནང་འོས་འཚམ་གྱི་སྐད་ཆ་ཁྱོན་ནས་བཤད་མི་ཤེས་མཁན་ཞིག་ཡིན། 

“དེ་ནས་ང་རང་རྒྱ་གར་དུ་ཡོང་བ་རེད།” ཅུང་ཙམ་གྱི་རྗེས་སུ་ཁོས་མགོ་བོ་ཡར་བཀྱགས་ཏེ་ངའི་ཕྱོགས་སུ་བལྟས་པ་དང་གཏམ་རྒྱུད་ཀྱི་འཕྲོ་བསྟུད་བྱུང་། “ང་རང་རྒྱ་གར་དུ་འབྱོར་ནས་ལོ་འགའ་ཤས་ཕྱིན་པའི་རྗེས། ང་ཚོའི་ནང་མི་ཚོས་གཞི་ནས་ཨ་ཅེ་གང་ཡོད་ཀྱི་གནས་ཚུལ་དེ་ཐོས་པ་རེད། མོ་ཅན་ཙའི་ཕྱོགས་ཀྱི་ཁ་ཆེའི་རྫོང་ཞིག་ཏུ་ཉར་འདུགགྲོང་པ་དེའི་ཁ་ཆེ་རྒན་པ་ཞིག་གིས་མོ་ལ‘ཁྱོད་ཀྱིས་ལོ་འདི་འདྲའི་མང་པོ་ཞིག་ལ་ནང་མིར་འབྲེལ་བ་ཐུབ་མེད། ད་འབྲེལ་བ་ཞིག་བྱས་ན་ཆོག’ཟེར་ནས་འབྲེལ་བ་བྱེད་སའི་ཁ་བྱང་དང་ཆོག་མཆན་སྟེར་བ་རེད་འདུག་མ་གཏོགས་ད་རུང་ཡང་ཤེས་ཡོད་རྒྱུ་མ་རེད། དེ་འདྲའི་ལོ་མང་པོ་ཞིག་གི་རིང་ལ་གཡས་གཡོན་དུ་ཡང་ཡག་པོ་ཞིག་འགྲོ་རུ་མ་བཅུག་པར་ཉར་བས། ཨ་ཅེས་རང་ཉིད་སའི་གོ་ལའི་ཕྱོགས་གང་དུ་ཡོད་མེད་ཀྱས་ཤེས་མི་འདུག ཁོ་ཚོས་དེ་འདྲའི་ཨ་ཧ་ཉར་འདུག 

“དེ་ནས་ད་རུང་རྗེས་སུ་བལྟས་ནས་ཡོང་དུས། ང་ཚོའི་ཕྱོགས་ལ་ལས་ཀ་བྱེད་དུ་ཡོང་མཁན་གྱི་ཕོ་སར་འགའ་ངའི་ཨ་ཅེ་ཉར་སའི་གྲོང་པ་དེ་ནས་རེད་འདུག་ཟེར། ཕོ་སར་དེ་ཚོ་ལོ་མང་པོའི་རིང་ང་ཚོའི་ཡུལ་ལ་ལས་ཀ་བྱེད་དུ་ཡོང་ནས་ཡུལ་མི་དང་བཟང་ས་ཆགས་ཡོད། ཡིན་ན་ཡང་། ཁོ་ཚོའི་ཁ་ནས་ཁོ་ཚོའི་གྲོང་པ་ན་ང་ཚོའི་ཕྱོགས་ཀྱི་བུད་མེད་ཅིག་ཡོད་སྐོར་ཚིག་འབྲུ་གཅིག་ཀྱང་དོན་མེད། ཁོ་ཚོ་དེ་འདྲའི་ཁ་དམ་པོ་དང་ངར་བ་འདུག ཨ་ཧ་མ་རེད་དམ།ང་ཚོ་བོད་པའི་ཕོ་སར་འགའ་ཡིན་ན།ཡིན་མདོག་མདོག་གིས་བཤད་ཚར་བ་གཏན་ཁེལ་རེད། དེ་ལ་བསམས་ན་འདི་ཚོ་ཨ་ཧ་ངར་བ་ཡིན་པ་ཤེས་ཐུབ།” ཁོས་སླར་ཡར་ཁ་གཏད་ཀྱི་ཁྱིམ་ཚང་དེ་ལ་ལྟ་ཙམ་བྱས། ང་ཡང་ཁོའི་སྐད་ཆར་མོས་མཐུན་བྱུང་། གལ་སྲིད་ང་ཚོའི་བོད་པའི་ཕོ་གསར་འགའ་དེ་འདྲའི་གནས་སྟངས་ཤིག་ཏུ་ལྷུངས་ན། ཕལ་ཆེར“ཡིན་མདོག་མདོག”བྱས་ཡོད་རྒྱུ་རེད། ཧ་ལམ་གསང་བ་དེ་ཕྱི་ལ་ཤོར་ཡོད་རྒྱུ་རེད །འོན་ཀྱང་།  ད་ལྟ་ངའི་སེམས་ལ་དེ་དག་ལས་ཀྱང་ཤེས་འདོད་ཆེ་བའི་གནས་ཚུལ་གཅིག་ནི་ཁོའི་ཨ་ཅེའི་སྐོར་རེད། མོ་ཕྱིར་ཕ་ཡུལ་དུ་ལོག་ནས་ནང་མི་ལྷན་འཛོམས་བྱུང་ཨེ་ཡོད།

“དེ་ནས?” ངས་རེ་བ་ཆེན་པོས་ཁོ་ལ་དྲིས། 

“དེ་ནས་ངའི་སྤུན་ཆེ་བ་གྲྭ་པ་ཞིག་ཡོད་པ་དེ་དང་ཉེ་ས་འགའ་མོའི་སར་ཕྱིན་འདུག ཁོ་ཚོ་མོ་དང་ཐུག་ནས་མོ་ཡར་ཡུལ་དུ་འཁྲིད་གྲབས་བྱས་ཀྱང་། མོ་ཡོང་མི་འདུག ཁོ་ཚོ་མཐོང་མ་ཐག མོ་ངུས་ནས་བརྒྱལ་གྲབས་བྱེད་ཀྱི་འདུག་ཟེར་ཡང་། ཁོ་ཚོ་དང་ལྷན་དུ་ཕྱིར་ཡུལ་ལ་ལོག་མི་འདུག མོས‘ང་འདི་ལྟར་ཕྱིར་འགྲོ་སྲོལ་ཞིག་ཡོད་དམ’ཟེར་ཏེ་ངུས་ནས་སྡོད་པ་ལས་སྐད་ཆ་གཞན་མང་པོ་བཤད་ཀྱི་མི་འདུག་ཟེར། སྐབས་དེ་དུས་མོ་ལ་བྱིས་པ་གཞན་གསུམ་ཡང་སྐྱེས་འདུག་པས། བྱིས་པ་རྣམས་བསྐྱུར་ནས་ཁྲིད་ག་ལ་ཐུབ། སྡེ་བས་[ཁྱོ་ག་དང་ཡུལ་མི]བྱིས་པ་རྣམས་གཏན་ནས་གཏོང་གི་མ་རེད། ཁོ་ཚོས་མོ་ལ་གཤེ་གཤེ་དྲག་པོ་བཏང་ནས་འབྲེལ་ཐག་གཅོད་རྒྱུ་ཡིན་ཞེས་བཤད་འདུག་ལ། དེང་སྐབས་ངའི་སྤུན་འཇགས་ཕལ་ཆེ་བས་མོ་ལ་ཁ་ཡང་གྲག་གི་མེད། ཡུལ་གྱི་མི་རྣམས་ཀྱིས་ཁ་ཆེ་ཟེར་ན་ཨ་ཧ་སྡུག་པོ་བརྩི་ཡི་རེད་མོ། འདིར་༧རྒྱལ་བ་རིན་པོ་ཆེ་ཁ་ཆེའི་ཞྭ་དཀར་པོ་དེ་གྱོན་ནས་ཁ་ཆེའི་ལྷ་ཁང་དུ་ཕེབས་ཀྱི་ཡོད། མོ་སྡེ་བའི་མགོ་སྐོར་བསླུ་བྲིད་འོག་ཚུད་ནས་དེ་འདྲའི་གནས་སྟངས་ཤིག་གི་ནང་ལྷུངས་པ་རེད། སྡིགས་མོ་དང་འབྲེལ་ཐག་གཅོད་དགོས་དོན་མེད་ཀྱང་ཡུལ་བ་ཚོ་དེ་འདྲ་ཞིག་རེད།”

ཁོས་སྐད་ཆའི་ཤོད་མཚམས་བཞག་སྟེ་མེ་འཁོར་གྱི་སྒེའུ་ཁུང་ཕྱི་ལ་བལྟས་སོང་། ད་ནི་ད་གིན་གྱི་དམར་གོར་གོར་གྱི་ཉི་མ་བཞུད་དེ་ས་རུབ་བཞིན་འདུག་སྟེ། མེ་འཁོར་གྱི་ལྕགས་ལམ་གཡས་གཡོན་ནས་བར་མཚམས་དང་རྒྱུན་ཆད་མེད་པར་མངོན་ཡོང་བའི་ཁང་པ་ངན་ངོན་རྣམས་ཀྱི་ཕྱི་ལ་གློག་སྒྲོན་རེ་ཟུང་སྤར་བ་མཐོང་བ་མ་ཟད། མེ་འཁོར་གྱི་སྒེའུ་ཁུང་ངོས་སུ་ནང་དུ་བསྡད་པའི་ང་ཚོའི་ལྡོག་གཟུགས་རབ་རིབ་ཅིག་འཆར་བའི་འགོ་ཚུགས་བཞིན་འདུག 

“རྗེས་སུ་ང་ལ་མོའི་སྐད་འཕྲིན་རག་བྱུང་བ་དང་ངས་མོ་ལ་འབྲེལ་བ་བྱས་པ་ཡིན།” ཁོས་མུ་མཐུད་གཏམ་རྒྱུད་དེའི་འཕྲོ་མཐུད་བྱུང་། “ངེད་གཉིས་ཐོག་མར་ཁ་བརྡ་བྱེད་དུས། མོས’ང་བུད་མེད་ལས་ཟད་ཅིག་རེད’ཟེར་ནས་ཡུན་རིང་ངུས་ནས་སྡོད་པ་ལས་སྐད་ཆ་མང་པོ་བཤད་ཐུབ་ཀྱི་འདུག ང་རང་ཡང་ཅི་ཞིག་བཤད་དགོས་མི་ཤེས་པ་ཞིག་རེད། དེ་ནས་ག་ལེར་རིམ་པས་ཁ་བརྡ་བྱས་ཡོང་དུས། མོའི་ཁྱོ་གས་མོ་ཡར་མར་འགྲོ་རུ་མ་བཅུག་པར་ཚོད་འཛིན་བྱས་པ་མ་གཏོགས། གཅར་རྡུང་བྱེད་པ་སོགས་སྡུག་པོ་གཞན་བྱས་མི་འདུག མོ་ལ་བརྩེ་གདང་ཡང་ཆེ་ཟེར། དེ་ཡང་ཨེན་ཙམ་རེད་མོ།” ཁོས་དེ་ལྟར་བཤད་དུས་ངའི་ངོ་གདོང་ལ་མ་བལྟས་པས། སྐད་ཆ་དེས་རང་ཉིད་ལ་སེམས་གསོ་བྱེད་པ་དང་མཚུངས།

“མོས་ཕ་ཡུལ་དང་བྲལ་བའི་མཚན་མོ་དེ་ནས་བཟུང་ཕ་ཡུལ་དུ་ལོག་པའི་རེ་བ་རྒྱག་མཚམས་འཇོག་མྱོང་མི་འདུག འོན་ཀྱང་། ངའི་སྤུན་འཇགས་རྣམས་མོ་ལ་ཐུག་ཏུ་སོང་ནས་མོ་ཡར་འཁྲིད་རྒྱུ་ཡིན་ཟེར་དུས་ཡོང་མེད། མོས་ང་ལ‘ཕ་མ་གཉིས་མེད་པར་གྱུར་བ་དང་། ཁྱོད་རྒྱ་གར་དུ་སོང་བ་ཤེས་རྗེས། ང་རང་ཕྱིར་ལོག་དང་མ་ལོག་མི་འདུག མ་གཞི་ང་རང་འདི་ལྟར་ཕྱིར་ལོག་སྲོལ་ཞིག་ག་ལ་ཡོད’ཟེར་ནས་སོ་སོའི་ངོ་གདོང་ལ་མཛུབ་མོ་འཛུགས་ཀྱི་འདུག མོས་ཀྱང་ལཱ་བ་ནག་པོ་འདི་འདྲ་ཞིག་གྱོན་འདུག” ཁོས་ཁ་གཏད་དུ་བསྡད་པའི་ཁ་ཆེའི་བུད་མེད་དེའི་ཕྱོགས་སུ་མཆུ་བརྡ་ཞིག་བསྟན་བྱུང་། 

“དེ་ལྟར་བཤད་དུས། མོས་ཨ་ཧ་ཡུན་རིང་ཞིག་ལ་གདོང་པ་སྟོན་པ་དང་པར་སྐུར་བ་བྱས་མ་བྱུང་། ངས་གང་ཡང་མེད་ཚུལ་བཤད་དེ་ཡུན་རིང་ཨུ་ཚུགས་བྱས་རྗེས། ད་གཟོད་གཞི་ནས་པར་ཞིག་བསྐུར་བྱུང་བ་དང་དེའི་ནང་མོས་གྱོན་ཆས་འདི་དང་ཨ་ན་མ་ན་ཞིག་གྱོན་འདུག ཐོག་མར་ལྟ་དུས་ཨ་ཧ་མི་བདེ་བ་དང་འཇིགས་སློང་བ་ཞིག་རེད་མོ། རིམ་གྱིས་གོམས་འགྲོ་བ་ཞིག་རེད།  དེང་སྐབས་ངེད་གཉིས་ཕན་ཚུན་གདོང་པ་སྟོན་རེས་ཀྱིས་ཁ་བརྡ་བྱེད་ཀྱི་ཡོད། ངས་མོ་ལ་ལེ་བདའ་མེད་པར་དང་ལེན་བྱས་པ་དེར་མོ་ཧ་ཨ་དགའ་འདུག མོས‘ཁྱོད་ཀྱིས་དང་ལེན་བྱས་ན་འགྲིག་ཡོད’ཟེར་གྱི་འདུག ངོ་མ་མོ་རང་སྡེ་བའི་གཡོ་འོག་ཏུ་ཚུད་སོང་བ་ཡིན་པས་ངས་དང་ལེན་མ་བྱས་ཀྱང་ཕན་ཐོགས་ཅི་ཡོད། འོན་ཀྱང་། ངའི་སྤུན་འཇགས་ཕལ་ཆེ་བ་དེ་འདྲ་ཞིག་མ་རེད། ད་ལྟ་མོ་དང་འབྲེལ་ཐག་རྦད་དེ་བཅད་འདུག”

མཚམས་འདིར་ངས་བུད་མེད་དེར་སྙིང་རྗེ་དྲག་པོ་ཞིག་སྐྱེས་པ་དང་། མོའི་སྤུན་མཆེད་ཚོས་མོ་དང་འབྲེལ་ཐག་གཅོད་པ་དེར་རྒྱུ་མཚན་ཞིག་མི་འདུག་སྙམ་བྱུང་། ཁོས་བཤད་པ་ལྟར། མོ་གཞན་གྱི་གཡོ་འོག་ཏུ་ཚུད་ནས་དེ་ལྟ་བུའི་ཡ་ང་བའི་གནས་སྟངས་ཤིག་ཏུ་ལྷུངས་པ་ཡིན་པས། མོ་ལ་སྙིང་རྗེ་བྱེད་འོས་ཨང་། 

“མོ་ངོ་མ་བུད་མེད་ལས་ཟད་ཅིག་རེད།” ཁོས་ངའི་བསམ་ཚུལ་རྟོགས་སོང་བ་ལྟར་མུ་མཐུད་ནས་བཤད་བྱུང་། “སྔོན་ཆད་ངེད་ཚང་གི་འཚོ་བ་ཞན་པ་དང་མོ་རང་བྱིས་པ་རྒན་ཤོས་དེ་ཡིན་པས། མོས་ང་ཚོའི་ཁྱིམ་ཚང་ཆེད་དུ་སྡུག་མང་པོ་ཞིག་མྱངས་ཡོད། དེ་ནས་ང་ཚོའི་འཚོ་བ་ཡག་ཏུ་འགྲོ་དུས་དེ་ལྟར་སྡེ་བས་ཁྲིད་སོང་བ་རེད། སྐྱེ་བ་སྔོན་མར་ལས་ངན་པ་ཅི་ཞིག་བསགས་པ་ཡིན་ནམ།” ཁོས་མདུན་དུ་ཅེར་བཞིན་དེ་ལྟར་བརྗོད་དུས། ངོ་གདོང་ལ་འགྲེལ་དཀའ་བའི་སྐྱོ་སྣང་ཞིག་གིས་ཁེངས་འདུག 

དེ་ནས་ཁོས་གློ་བུར་དུ་སྐྱོ་སྣང་འདྲེས་པའི་ཁྲེལ་དགོད་ཅིག་བྱས་པ་དང་མགོ་བོ་ཡར་དགྱེ་ནས་སླར་ཡང་ངའི་ཕྱོགས་སུ་བསྐོར་བྱུང་། “དེང་སང་མོས་ཕག་པ་ལ‘ཨམ་ཅོག་ཆེན་པོ་ཅན’ལས་མིང་ཡང་འབོད་ཀྱི་མི་འདུག ངས་ཕག་ཤ་ཟ་བཞིན་པའི་སྐོར་བཤད་དུས། མོས‘ང་ཚོས་ཨམ་ཅོག་ཆེན་པོ་ཅན་དེ་མི་ཟ’ཟེར་གྱི་འདུག འོན་ཀྱང་། མོས་ད་དུང་ཡང་མ་ཎི་དང་སྐྱབས་འགྲོ་འདོན་གྱི་ཡོད་ཟེར། ལོ་འདི་འདྲའི་མང་པོ་ཞིག་ཕྱིན་རུང་ད་དུང་ཡང་འདོན་གྱི་འདུག ངོ་མ་ཁྱད་མཚར་ཞིག་མ་རེད་དམ། འདིའི་ཐོག་ལ་བསམ་བློ་བཏང་ན་སེམས་ལྷག་ཏུ་སྐྱོ་བ་ཞིག་རེད། འདིས་མོ་ཅི་འདྲའི་ཁེར་རྐྱང་ཡིན་པ་སྟོན་གྱི་འདུག ད་ཐེངས་ང་རང་ཕ་ཡུལ་དུ་ལོག་པའི་རྒྱུ་མཚན་གཙོ་བོ་གཅིག་ནི་མོ་ཐུག་ཆེད་ཡིན། ཕ་མ་གཉིས་མེད་པར་གྱུར་རྗེས། འཇིག་རྟེན་འདིར་ང་ལ་བརྩེ་འདང་དང་བཀའ་དྲིན་ཆེ་ཤོས་དེ་ཨ་ཅེ་ཡིན། དེང་སྐབས་ཀྱང་མོས’ཨ་ཅེས་ཁྱོད་ལ་ཚར་ལཱ་ཞིག་བཟོ་རྒྱུ་ལྷག་ཡོད’ཅེས་ཀུ་རེ་རྩེ་ཡི་འདུག” 

ངོ་མ་སྐད་ཆ་དེ་ཅི་འདྲའི་སེམས་འགུལ་ཐེབས་པ་ཞིག་རེད་ཨང་། ལོ་ངོ་ཅི་འདྲའི་མང་པོ་ཞིག་ཕྱིན་ན་ཡང་། ཁོའི་སེམས་ནས་ཨ་ཅེ་བོར་བརླག་ཏུ་འགྲོ་བའི་དགོང་མོ་དེའི་རྣམ་པ་གཏན་ནས་ཡལ་མྱོང་མེད་པ་ལྟར། ཨ་ཅེས་ཀྱང་དགོང་མོ་དེར་གཅུང་པོ་ལ་ཁས་བླངས་པའི་དམ་བཅའ་དེ་གཏན་ནས་བརྗེད་མྱོང་མེད་པ་འདྲ།

མཚམས་འདིར་མེ་འཁོར་གྱི་ཞབས་ཞུ་བ་རྒྱ་གར་ནག་རིལ་གཉིས་འབྱོར་ནས་ངའི་བསམ་གཞིགས་དང་ཁོའི་གཏམ་རྒྱུད་ལ་བར་ཆད་བཏང་སོང་། ཁོ་གཉིས་ཀྱིས་ང་ཚོའི་འཁོར་སྒམ་ནང་བསྡད་པའི་འགྲུལ་བ་རེ་ལ་དགྱིག་གི་སྡེར་མ་གྲུ་བཞིའི་ནང་བཞག་པའི་དགོང་ཟས་རེ་དང་། འཁྱག་ཞོ་དགྱིག་གི་ཕོར་ཆུང་གང་རེ་སྟེར་རྗེས་འཁོར་སྒམ་གཞན་དུ་ཕྱིན་སོང་། 

དགོང་ཟས་ཟོས་རྗེས། ངའི་འགྲུལ་རོགས་ལ་སུ་ཞིག་གི་ཁ་པར་འབྱོར་སོང་བ་དང་། ཁོས་ཅུང་སྐད་ཤུགས་ཆེན་པོས་(མཐོ་སྒང་ནས་ཡོང་བའི་མི་ཕལ་ཆེ་བ་གོམས་གཤིས་ཀྱི་དབང་གིས་སྐད་ཤུགས་ཅུང་ཆེ་བ་འདྲ།)ཁོ་ལ་འགྲུལ་རོགས་བོད་པ་ཞིག་རག་ནས“ཨ་ཧ་ཡག་པོ བྱུང་སོང”བའི་སྐོར་སོགས་བཤད་དེ་གང་འཚམ་རིང་ཁ་བརྡ་བྱས་སོང་བས། ངས་ཀྱང་ཁ་པར་ནང་དུ་ཕབ་ལེན་བྱས་པའི་གློག་བརྙན་ཞིག་ལ་ལྟ་འགོ་བརྩམས་པ་ཡིན། 

མེ་འཁོར་མུ་མཐུད་ཡོམ་ཡོམ་དུ་འགུལ་ཏེ་སྐྱོད་བཞིན་འདུག་ཅིང་། ང་རང་འཁོར་སྒམ་གྱི་ཉལ་ཁྲི་སྟེང་མའི་(upperseat)སྒང་གན་རྐྱལ་དུ་ལོག་སྟེ་འཁོར་སྒམ་གྱི་ལྕགས་ཀྱི་ཐོག་དང་། དེ་ལ་བསྒར་བའི་རླུང་འཁོར་ལ་ཅེར་ནས་ཡོད། སྐབས་དེར་དགོང་མོའི་ཆུ་ཚོད་ ༩:༣༠ ཙམ་ལས་མིན་ཡང་། ཉལ་ཁྲི་འོག་མའི་རྒྱ་གར་དམག་མི་དེ་ཉལ་དགོས་ཟེར་བས། ངེད་གཉིས་ཀྱང་སོ་སོར་དབང་བའི་ཉལ་ཁྲིའི་ཐོག་ཏུ་མེ་འཁོར་གྱི་ཞབས་ཞུ་བས་སྟེར་བའི་གདན་དཀར་པོ་དྲི་མ་བྲལ་བ་དེ་བཏིང་ནས་ཉལ་བ་དང་། ངས་ཉལ་ཁྲི་བར་མའི་འོག་ཏུ་ཉལ་བའི་འགྲུལ་རོགས་ཀྱིས་ད་དུང་ཡང་སྐད་ཤུགས་ཅུང་ཆུང་ཆུང་བྱས་ཏེ་སྐད་འཕྲིན་ནང་རོགས་པ་ཚོར་ཁ་བརྡ་བྱེད་བཞིན་པ་ཐོས་ཐུབ། 

ང་རང་དེ་ལྟར་འཁོར་སྒམ་གྱི་ཉལ་ཁྲི་ཕྲ་བོ་དེའི་ཐོག་ཏུ་གཉིད་ཁུག་རྒྱུར་སྒུག་བཞིན་པའི་ཚེ། ངས་སླར་ཡང་འགྲུལ་རོགས་ཀྱིས་བཤད་པའི་གཏམ་རྒྱུད་དང་། གཏམ་རྒྱུད་དེའི་ནང་གི་བུད་མེད་དེའི་ཐོག་བསམ་གཞིགས་བྱས། ངས་མོའམ་མོའི་འདྲ་པར་དངོས་སུ་མཐོང་མྱོང་མེད་པས། སེམས་སུ་མོའི་གཟུགས་ཀྱི་རིང་ཐུང་དང་། ཁ་ངོའི་བཟོ་དབྱིབས། ངོ་གདོང་གི་རྣམ་འགྱུར་སོགས་མ་ནོར་བར་འཆར་མི་ཐུབ་ཀྱང་། ཁ་ཆེའི་བུད་མེད་ཀྱི་གྱོན་ཆས་ནག་པོ་གྱོན་ཞིང་། “ཨམ་ཅོག་ཆེན་པོ་ཅན”གྱི་ཤ་མི་ཟ་བ་དང་། རྒྱུན་དུ་ཁ་ཆེའི་ལྷ་ཁང་དུ་འགྲོ་ཡང་མ་ཎི་དང་སྐྱབས་འགྲོ་རྗེད་མི་ཐུབ་པའི་བོད་ཀྱི་བུད་མེད་ཅིག་གི་སྣང་བརྙན་རབ་རིབ་ཅིག་འཁོར་སོང་། །

ཕྱི་ལོ་ ༢༠༢༠ ལོའི་ཟླ་ ༡ ཚེས ༣༡ ཉིན།