༢༠༡༨/༩/༩ ཉིན། 

“ང་ཚོ་འདི་ལྟར་འགྱུར་བཞིན་ཡོད་ཨང་།”

དོ་ནུབ་ཆུང་མས་དུས་རྒྱུན་ལྟར་ཉལ་ཁང་དུ་བུ་ཆུང་ལ་ནུ་མ་བསྣུན་ཏེ་གཉིད་འགུགས་ཐབས་བྱེད་བཞིན་པའི་ཚེ། ང་རང་ཚོམས་ཆེན་དུ་བསྡད་དེ་སེམས་ནས་དུས་ཚོད་སྟོང་པ་ཕྲན་བུ་དེ་སྤྱད་དེ་ཉིན་ཐོའི་ནང"དེ་རིང་བུ་ཆུང་ལ་མི་ཡུལ་གྱི་ཁ་ཟས་ཐོག་མ་དེ"སྟེར་བའི་སྐོར་ཞིག་འགོད་དགོས་བསམས་མོད། འོན་ཀྱང་ལག་པས་སྨྱུ་གུ་དང་འབྲི་དེབ་ཀྱི་ཚབ་ཏུ་ཁ་པར་བླངས་ཤིང་། མཛུབ་རྩེས་ངོ་དེབ་ཀྱི་མཉེན་ཆས་ཐོག་ཏུ་མནན་ཤོར།

ཉིན་ཐོ། ༢༠༡༧།༧།༢༦ ཉིན་གུང་ལ་བྲིས།

ཉིན་གུང་ཁ་ལག་ཟོས་ནས་ངལ་གསོ་སའི་ཁང་པའི་ནང་འགྲོ་དུས། རྒན་ལགས་ཀྱིས“དཔེ་དེབ་རྣམས་ཚུར་དབོར་རོགས་བྱོས་དང”ཞེས་གསུངས། ཁོང་གིས་གསུངས་བའི་དཔེ་དེབ་རྣམས་ནི་ཉེ་ཆར་སྦྲག་ཁང་བརྒྱུད་དེ་ང་ཚོའི་ལས་ཁུངས་སུ་འབྱོར་བའི་དཔེ་དེབ་ཀྱི་ཤོག་སྒམ་རྣམས་རེད།

ལོ་འདིར་ཀུན་ཕན་སློབ་གྲྭ་ཡི་སྒོ་བརྒྱབས་པ་དང་། དེའི་ནང་ཡོད་པའི་དཔེ་དེབ་ཐམས་ཅད་ང་ཚོ་སྒྲ་སྒྱུར་གླིང་ལ་གནང་འདུག (རྒན་ལུང་རྟོགས་ཀྱིས་བསླངས་ནས་ཐོབ་པ་རེད་ཟེར།) ང་ཚོའི་ལས་རོགས་བོད་སྲུང་རྡ་སར་ཡོད་པས། ཁོས་དེབ་རྣམས་ཤོག་སྒམ་ནང་ལེགས་པར་བཏུམ་ནས་བསྐུར་འདུག་ཅིང་། ཁྱོན་བསྡོམས་ཤོག་སྒམ་ཉེར་གཅིག་ཡོད་ཟེར།

ཉིན་ཤས་གོང་དུ་འབྱོར་ཞིང་ངལ་གསོ་སའི་ཁང་པའི་ནང་བཞག་པའི་ཤོག་སྒམ་རྣམས་ང་ཚོས་ཁ་ལག་ཟ་སའི་ཐོག་ཁར་དབོར་ཞིང་། དེར་ཕྱིའི་རས་ཐུམ་གཤགས་ཤིང་ཤོག་སྒམ་གྱི་ཁ་ཕྱེ་ནས་དཔེ་དེབ་རྣམས་ལས་ཁུངས་སུ་ཁྱེར།