ངོ་དེབ་ཀྱི་ཁ་ཕྱེ་བ་ན། གྲོགས་པོའི་རེ་སྐུལ་སླེབ་སར་རེ་སྐུལ་བསླེབས་པའི་རྟགས་དམར་པོ་ཞིག་ཤར་འདུག ངའི་མཛུབ་རྩེས་སླར་ཡང་རྟགས་དམར་པོ་དེའི་ཐོག་ལ་མནན་པ་ན། དེ་ནི་སློབ་གྲོགསxxxརེད། (ཁོ་རང་དགའ་མོས་ཡོད་མེད་མི་ཤེས་པས་མིང་དངོས་འགོད་མ་ཕོད།) མི་ལོ་བཅུ་ལྷག་གི་ཡར་སྔོན་ཏེ་ང་རང་གསོག་སྒར་སློབ་གྲྭར་སློབ་གཉེར་བྱེད་སྐབས། xxxདང་ངེད་གཉིས་ཉལ་ཁང་གཅིག་ཏུ་འདུག་མྱོང་ལ། ང་རང་ཐོག་མར་སློབ་གྲྭ་ལ་འབྱོར་བའི་ཉིན་དེར་ཁོས་ང་རང་སློབ་གྲྭའི་གམ་གྱི་རྒྱུགས་ཆུ་ལ་ཁྲུས་རྒྱག་ཏུ་ཁྲིད་པ་དང་། ཚུར་ལོག་ཞོར་ངས་སྒོར་མོ་ལ་ཐོགས་པ་མེད་མདོག་ཅིག་བསྟན་ནས་ཉིན་དེ་རང་ལ་ཕྲད་པའི་ཁོ་ལ་སྤྱིན་བདག་དོན་པ་ཡིན། བགྲང་བྱ་བཅུ་ལྷག་གི་ཡར་སྔོན་གྱི་ལོ་ན་གཞོན་པའི་ང་རང་སྒོར་མོ་ཡོད་མདོག་དང་ཕྱུག་པོ་ཡིན་ཉམས་སྟོན་རྒྱུར་ཤིན་ཏུ་དགའ་ལ། མང་པོ་ཞིག་གིས་ངའི་ཚུལ་འཆོས་དེར་ཡིད་ཆེས་པ་འདྲ། ཡང་ན་ཁོ་ཚོས་ཀྱང་ཡིད་ཆེས་མདོག་བསྟན་པ་ཡིན་སྲིད། 

ངས་ཁོའི་རེ་སྐུལ་ངོས་ལེན་བྱས་ཚར་མ་ཐག་ཁོའི་ངོ་དེབ་ཀྱི་པར་མཛོད་དུ་སོང་། ཁོ་རང་དེང་སྐབས་ཅི་འདྲ་ཞིག་ཆགས་ཡོད་དམ། བཤད་མ་དགོས་པ་ཞིག་ལ། ཁོའི་པར་མཛོད་དུ་པར་མང་པོ་བཞག་འདུག སྔོན་ཆད་ཤེས་རབ་དགའ་ཚལ་སློབ་གླིང་ན་ཡོད་དུས་ལྟར། ད་ཐེངས་ཀྱང་ཁོའི་ངོ་གདོང་དེས་ང་ལ<<ཆུ་ངོགས་གཏམ་རྒྱུད>>ནང་གི་ཏུང་ཅིང་འབུམ་དམག་གི་དྲག་རྩལ་དགེ་རྒན་གཟིག་མགོ་ཅན་ལེན་ཁྲུང་དྲན་དུ་བཅུག་བྱུང་། གློག་བརྙན་ནང་གི་མི་སྣ་དེ་ལྟར། ཁོའི་ཅུང་ཟད་ནར་བའི་ངོ་གདོང་གི་སྟེང་ལ་ཆ་ག་ཆེ་བའི་མིག་ཟུང་དང་། བཟོ་དབྱིབས་ལེགས་པའི་རྒྱ་དང་ཁ་སྤུ་ཡོད། ཡིན་ན་ཡང་། སྔོན་ཆད་དང་མི་འདྲ་བར་ཁོ་རང་ཅུང་རྒྱགས་པ་ཆགས་པའི་ཁར། དཔྲལ་བའི་སྐྲ་མཚམས་ཀྱང་གང་འཚམ་གྱེན་དུ་ཤོོར་འདུག ཁོའི་ལུས་སྟེང་གི་འགྱུར་ལྡོག་དེས་ངའི་སེམས་ཀྱི་གཏིང་རིམ་གང་ཞིག་ལ་འགྲེལ་དཀའ་བའི་བྲེལ་འཚབ་ཅིག་ལང་དུ་བཅུག ཁོའི་དཔྲལ་བའི་སྒང་གི་འགྱུར་བ་དེས་ངའི་དཔྲལ་བའི་སྒང་གི་འགྱུར་བ་ཙམ་མ་ཟད། ད་རུང་དང་ལེན་བྱེད་དཀའ་བའི་མི་ཚེའི་རང་བཞིན་མཚོན་པ་མ་ཡིན་ནམ། 

 ཁོའི་པར་མཛོད་ཀྱི་འདྲ་པར་ཁྲོད་དུ་ཁོ་རང་ཉིད་དང་ཕྱི་རྒྱལ་གྱི་བུད་མེད་ཅིག ད་རུང་ཤིན་ཏུ་ཤ་ཚ་བའི་བྱིས་པ་ཆུང་ཆུང་ཞིག་བཅས་མཉམ་དུ་བརྒྱབས་པའི་པར་མང་པོ་འདུག་པས། ངས་ཁོ་རང་ཡང་རང་ཉིད་ལྟར་སྤྲེའུ་དང་བྲག་སྲིན་གྱི་རྒྱུད་པ་མ་ཡིན་པའི་བུད་མེད་ཅིག་ལ་གཉེན་སྒྲིག་བྱས་ཡོད་པའི་ཚོད་དཔག་བྱེད་ཐུབ། ངས་འདྲ་པར་དེ་དག་ལ་ལྟ་བཞིན་རང་ཉིད་ཀྱི་ངོ་ཤེས་དང་གྲོགས་པོ་མང་པོ་ཞིག་གི་དགའ་རོགས་དང་ཆུང་མའང་སྤྲེའུ་དང་བྲག་སྲིན་ལས་མཆེད་པ་མ་ཡིན་པའི་གནས་ཚུལ་དེ་དྲན་བྱུང་། ངའི་སེམས་ལ་སླར་ཡང་འགྲེལ་མི་ཤེས་པའི་བྲེལ་འཚབ་ཅིག་ལངས།  འདི་ཡང་ང་ཚོ་འགྱུར་སྟངས་ཤིག་དང་། ལོ་རྒྱུས་ཀྱི་ཆུ་རྒྱུན་རིང་པོའི་ནང་གཏན་དུ་འཐིམ་ཚུལ་ཞིག་ཡིན་ནམ། 

 དེ་ནས་ཅི་ཞིག་འབོར་བཞིན་པའི་སྐྱོ་སྣང་དང་ཕངས་སེམས་མག་མོག་དེའི་ཁྲོད་ནས་ངས<<རྡ་སའི་མཚན་མོ་དང་རྡ་སའི་ཉིན་མོ>>ཞེས་པའི་ཨིན་ཇིའི་དེབ་ཅིག་ཏུ་བཙན་བྱོལ་བོད་མིའི་སྤྱི་ཚོགས་དང་། ལྷག་པར་དུ་བོད་ནས་གསར་དུ་འབྱོར་བ་ཚོའི་ནང་སྐྱེས་པའི་གྲངས་འབོར་དེ་བུད་མེད་ལས་བརྒྱ་ཆ་མང་པོ་ཞིག (ད་ལྟ་ཏག་ཏག་ཅིག་དྲན་མི་ཐུབ) མཐོ་བས། གསར་འབྱོར་ཕོ་སར་ཚོས་མི་རིགས་གཞན་དང་མཉམ་དུ་འགྲོག་འབྲེལ་གཉེན་སྒྲིག་བྱེད་པ་དེ་འཚོ་བའི་དགོས་མཁོ་ཙམ་མ་ཟད། ལུས་པོའི་དགོས་མཁོ་ལའང་འབྲེལ་བ་ཡོད་སྐོར་འཁོད་པ་རབ་རིབ་ཅིག་དྲན། ངས་ངང་ངམ་ཤུགས་ཀྱིས་ཆུང་ལ་ཆེ་ཞིང་ཆེ་ལ་ཆུང་བའི་གནད་དོན་འདིའི་རྒྱུ་རྐྱེན་ཅི་ཡིན་འཚོལ་ཁ་བྱས་པ་འདྲ། ངས་ཇི་ཙམ་བསམ་བློ་བཏང་ན་དེ་ཙམ་གྱིས་འདི་ལ་བདེན་ཁ་སྟེར་དགོས་ཁེལ་སོང་། 

 ངས་འདི་ལྟར་བསམ་གཞིགས་བྱེད་ཀྱིན་མུ་མཐུད་མཛུབ་རྩེ་ཁ་པར་གྱི་འཆར་ཡོལ་ལ་བརྡར་ཙམ་རེ་བྱས་ཏེ་ཁོའི་པར་མཛོད་བསྔོགས། ཁོའི་ཉེ་ཆར་གྱི་པར་རྣམས་ཀྱི་ནང་། ཁོའི་ངོ་གདོང་དང་ཚུགས་ག་ལ"འདི་རེད”ཅེས་མཛུབ་མོ་འཛུགས་ས་མེད་པའི་རྒས་ཉམས་ཤིག་དོད་འདུག་པ་དེས་ངའི་སེམས་སུ་སླར་ཡང་ཟུག་གཟེར་ཁྱད་མཚར་ཞིག་བསླངས་བྱུང་། ང་ཚོའང་འདི་ལྟར་འགྱུར་བཞིན་ཡོད་ཨང་། །