ད་ནངས་ཞོགས་པ་ཆུ་ཚོད་དྲུག་པའི་ཅོང་བརྡ་མ་གྲགས་གོང་དུ་ངེད་གཉིས་ཀ་གཉིད་ལས་སད་འདུག ཁང་པའི་ནང་གསལ་ཆ་ཅི་ཡང་མ་མཆིས། ངེད་གཉིས་ཀྱིས་ལག་ཟུང་ཕན་ཚུན་གྱི་ལུས་སྟེང་དུ་བཞག་ནས་མུ་མཐུད་མིག་ཟུང་བཙུམས་ཏེ་ཉལ་ཁྲིའི་ཐོག་ཉལ། 

“ཚུར་ལོག་བྱེད་ཀྱི་པ་སེ་ཐྲོ་ཁེའུ་ནས་ཡིན་པས། ངེད་གཉིས་ངེས་པར་དུ་ཨོ་ས་ཁ་ནས་ཐྲོ་ཁེའུ་དུ་ལོག་དགོས།” མོས་གློ་བུར་དུ་ང་ལ་སྨྲས་བྱུང་། མོས་ཀྱང་ཉི་ཧོང་དུ་བསྐྱོད་པའི་སྐོར་ལ་བསམ་གཞིགས་བྱེད་ཀྱིན་ཉལ་ཡོད་པ་འདྲ། ངས“རེད”ཅེས་ལན་བཏབ་པ་ན། ཚུར་ལོག་བྱེད་ཀྱི་གནམ་གྲུའི་པ་སེ་དེ་ཐྲོ་ཁེའུ་ནས་མངགས་པ་དེ་ནོར་འཁྲུལ་ཞིག་ཨེ་ཡིན། ཨོ་ས་ཁ་ནས་ཚུར་ལོག་ན་ཡག་སྲིད་སྙམ་པའི་ཚོར་སྣང་གློ་བུར་བ་ཞིག་འཁོར། 

“ངེད་གཉིས་ཨོ་ས་ཁ་དང་ཁེ་ཡོའུ་ཐྲོ་ལ་སྐྱོད་སྐབས། ངའི་འདྲུད་སྒམ་ཐྲོ་ཁེའུ་ཡི་འགྲུལ་ཁང་དུ་བཞག་ཨེ་ཆོག” མོས་ལབས་བྱུང་། 

“དེ་ཆོག་རྒྱུ་རེད། ཁྱོད་ཀྱིས་འདྲུད་སྒམ་གང་འཁྱེར་འདོད་དམ།”

“ཆེན་པོ་དེ་འཁྱེར་བསམས་ཡོད། ཆེན་པོ་དེ་ཁྱེར་ན་ཕ་ཡུལ་ནས་ཚུར་ལོག་དུས་འདྲུད་སྒམ་གཞན་ཞིག་འཁྱེར་མི་དགོས།”

“དེ་ཡག་པོ་འདུག” 

ངེད་གཉིས་ཅུང་ཙམ་ཁུ་སིམ་མེར་ཉལ་ཁྲིའི་ཐོག་ཏུ་ཉལ་རྗེས། མོས་ཉི་ཧོང་དུ་འགྲོ་དུས་ངས་ལྷམ་གང་ཞིག་གྱོན་འདོད་ཚུལ་དྲིས་པར། ངས་ཨེ་ཌི་ཌ་སི་རྟགས་ཅན་གྱི་ལྷམ་ཆ་དེ་གྱོན་འདོད་ཚུལ་བཤད། མོས་དེ་འགྲིག་ཚུལ་བརྗོད་རྗེས། ཐྲ་གྷར་རྟགས་ཅན་གྱི་ལྷམ་ཆ་དེའང་འཁྱེར་འདོད་ཟེར། ལྷམ་དེ་མོས་ལོ་འགའ་ཤས་ཀྱི་གོང་དུ་ཉོས་པ་ཞིག་རེད་ལ། ངེད་གཉིས་ལ་ཆ་རེ་ཡོད། 

 དེ་ནས་ཆུ་ཚོད་ཀྱི་བརྡ་གྲགས་སོང་བ་དང་། ངེད་གཉིས་ཅུང་སྒྱིག་ལུག་ངང་ཡར་ལངས། མོ་ཞོགས་པའི་གོམ་འགྲུད་བྱེད་དུ་ཆས་པ་དང་། ངས་ཚོམས་ཆེན་གྱི་ཅོག་ཙེའི་ཐོག་ཏུ་བཞག་པའི་གློག་ཀླད་ཡར་ཉལ་ཁང་དུ་ཁྱེར་བ་ཡིན།།

2018.1.4 ཞོགས་པའི་ཆུ་ཚོད 6:16།

ངལ་བ་འབྲས་མེད།

མདང་ནུབ་དགོང་ཟས་ཟོས་ཚར་མ་ཐག་ཕོར་པའང་མ་བཀྲུས་པར་དྲྭ་ཐོག་ནས་གྲོང་ཁྱེར་ཐྲོ་ཁོའུ་ནང་གི་འགྲུལ་ཁང་ཞིག་མངགས་ཐབས་བགྱིས། ངེད་གཉིས་ཀྱིས་ཨེར་བྷེན་བྷེ(airbnb)ཡི་ནང་ཆ་རྐྱེན་དང་རིན་གོང་འོས་འཚམ་གྱི་འགྲུལ་ཁང་ཞིག་བཙལ་ནས་མངགས་པའི་འབད་བརྩོན་ཐེངས་དུ་མར་བགྱིས་མོད། འོན་ཀྱང་ཅི་ཞིག་མ་འགྲིགས་པའི་དབང་གིས་གཏན་ནས་མངགས་མ་ཐུབ་སྟབས། ཆུ་ཚོད་གཉིས་ལྷག་གི་རྗེས་སུ་སེམས་མི་སྐྱིད་པའི་ངང་སོ་བཀྲུས་ནས་ཉལ་དགོས་ཁེལ། 

 ང་ཚོ་བོད་པ་ཕལ་ཆེ་བ་ལ་ཨེར་བྷེན་བྷེ་ཞེས་པ་འདི་ལ་ཆ་རྒྱུས་ཧ་ལམ་མེད་པས། (དེ་སྔོན་ངས་ཀྱང་མི་ཤེས།) ངོ་སྤྲོད་ཐུང་ངུ་ཞིག་བྱེད་འདོད། ཨེར་བྷེན་བྷེ་ཞེས་པའི་དྲྭ་བ་འདིའི་འགྲོ་སྟངས་ནི། གལ་སྲིད་ས་ཆ་ག་གེད་མོར་གནས་པའི་མི་ཞིག་ལ་ཁང་པ་ལྷག་མ་གཅིག་ཡོད་ན།  ཁོས་དྲྭ་བ་འདིར་ཐོ་འགོད་བྱས་ནས་འགྲུལ་པ་རྣམས་ལ་གཡར་ན་ཆོག དེ་ཡང་གལ་སྲིད་ཁྱོད་རང་རྒྱལ་ས་ལྷ་སར་སྡོད་མཁན་ཞིག་ཡིན་ཞིང་། རྒྱུན་དུ་བཀོལ་སྤྱོད་མི་བྱེད་་པའི་ཁང་མིག་གཅིག་ཡོད་ན། ཁྱོད་ཀྱིས་དྲྭ་བ་འདི་བརྒྱུད་དེ་གནས་སྐོར་བ་གཞན་ལ་གཡར་ནས་གླ་ཆ་བླངས་ན་ཆོག ཁྱོད་ཀྱིས་མགྲོན་ཁང་ངོ་མ་གཉེར་བ་ལྟ་བུའི་རྙོག་ཟིང་དང་འགྲོ་སོང་རྒྱུད་མི་དགོས་པས། ཁང་གླའང་མགྲོན་ཁང་ལས་ལྡབ་ཀྱིས་ཁེ་བ་བྱས་ན་འགྲིག 

 2018.1.9ཉིན། དགོང་མོའི་ཆུ་ཚོད 7:04

ཉི་ཧོང་གི་མེ་འཁོར་པ་སེ་ལག་ཏུ་རག་པ། 

ཆུ་ཚོད་བཞི་པ་ཙམ་ལ་ལས་ཁུངས་ནས་དགོངས་པ་ཞུས་ནས་ཀུ་ཤཱལ་ན་གྷལ་དུ་ཕྱིན། སྔ་དྲོ་ང་ལ་ཁ་པར་ཞིག་ཐོན་ནས“ཁྱོད་ཀྱི་ཅ་དངོས་ཀུ་ཤཱལ་ན་གྷལ་དུ་འབྱོར་སོང་། ལེན་དུ་ཤོག”ཅེས་བརྗོད། ངས་འཕྲལ་མར་དེ་ནི་ཉིན་ཤས་སྔོན་དུ་བསོད་ནམས་སྐྱིད་ཀྱིས་་མངགས་པའི་ཉི་ཧོང་གི་མེ་འཁོར་པ་སེ་ཡིན་པ་རྟོགས། ངེད་གཉིས་ཀྱིས་དེ་ཡོང་རྒྱུར་བསྒུགས་ནས་ཡོད། ཁ་པར་གཏོང་མཁན་དེས་ཧིན་སྐད་ནང་མང་པོ་ཞིག་བཤད་བྱུང་མོད། ངས་ཡག་པོ་ཞིག་མ་གོ་བ་དང་། ཨིན་སྐད་ཀྱིས་ཁོ་ལ་ཡར་གྲོང་ཚོ་དང་པོར་སྐྱེལ་རོགས་ཞེས་རེ་སྐུལ་ཞུས་ཀྱང་ཁོས་གོ་ཡི་མེད་པ་འདྲ། ངེད་གཉིས་གོ་བརྡ་ཡག་པོ་ཞིག་མ་འཕྲོད་སྔོན་དུ་ཁོས་ཁ་པར་བསད་སོང་བ་དང་། ང་རང་ང་ཚོའི་ལས་ཁུངས་ཀྱི་ཐད་དུ་ཚལ་འཚོང་མཁན་རྒྱ་གར་བོད་སྐད་ཤེས་མཁན་དེའི་སར་ཕྱིན་པ་དང་། ཁོ་ལ་སྐད་སྒྱུར་བའི་རེ་བ་ཞུས་ནས་ཕར་ཁ་པར་བཏང་བ་ན། ཁོས་འཇོག་རོགས་མ་བྱས། ཐེངས་འགའ་ལ་བརྒྱབས་ཀྱང་ངལ་བ་འབྲས་མེད་དུ་གྱུར། དེ་བས་ང་རང་ལས་ཁུངས་ནས་དགོངས་འཁྲོལ་ཞུས་ཏེ་འགྲོ་དགོས་ཁེལ། 

 བསོད་ནམས་སྐྱིད་དང་ངེད་གཉིས་ཀུ་ཤཱལ་ན་གྷལ་དུ་འབྱོར་རྗེས། སྦྲག་ཁང་དང་ཚོང་ཁང་འགའ་ལ་ཕྱིན་ནས་ཧྥེ་ཌི་ཁི་སི(Fedex)གང་དུ་ཡོད་མེད་སྐད་ཆ་དྲིས་ཀྱང་ཤེས་མཁན་མི་འདུག་ལ། གོང་གི་ཁ་པར་ཨང་གྲངས་དེའི་ཐོག་ཏུ་ཁ་པར་བཏང་ཡང་འཇོག་མཁན་མ་རག ངས་“ང་རང་ཀུ་ཤཱལ་དུ་འབྱོར་ཟིན།ཡོང་སའི་ཁ་བྱང་སྟེར་རོགས”ཞེས་འཕྲིན་ཐུང་བསྐུར་ཡང་། ཡུན་རིང་ཞིག་ལ་ཁ་བྱང་མ་བསྐུར་བས་ཁོང་ཁྲོ་ཚད་མེད་ལངས། 

 ཡར་རྒྱུགས་མར་རྒྱུགས་དང་ཕར་འདྲི་ཚུར་འདྲི་གང་འཚམ་བགྱིས་པའི་མཐར་ངེད་གཉིས་ཀྱིས་ཧྥི་ཌ་ཁི་སི་རྙེད་ཙམ་བྱུང་། དེ་ནི་རླངས་འཁོག་འབབ་ཚུགས་ཀྱི་གཞོགས་ནས་ཕར་ཐེན་པའི་ལམ་སྣེ་སྟེ་ཁུག་ཀྱོག་གི་ཁང་ཆུང་ཞིག་གི་ནང་འདུག་ཅིང་། སྒོ་ཐོག་ཏུ་སྒོ་བྱང་ཡང་མི་འདུག ཡིག་ཆ་སྟེར་མཁན་གྱི་བུད་མེད་ལོ་གཞོན་དེའི་ངོ་གདོང་ལ་ཞབས་ཞུ་བའི་རྣམ་འགྱུར་ཅི་ཡང་མི་འདུག མོས་ཀྱང་ཕལ་ཆེར་ངེད་གཉིས་ཀྱི་ངོ་གདོང་རོག་རོག་ཡིན་པ་མཐོང་ཡོད་ངེས། ངེད་གཉིས་ཀྱིས་ཐུགས་རྗེ་ཆེའང་མ་ཞུས་པར་ཡིག་ཆ་བླངས་རྟིང་། འཕྲལ་མར་ཁ་ཕྱེ་ནས་བལྟས་པ་ན་ཡིག་ཆ་ཏག་ཏག་ཚང་བར་མངོན། 

 མེ་འཁོར་པ་སེ་གཉིས་ལ་ཧིན་སྒོར་ཁྲི་གསུམ་ལྷག་རེད་འདུག འོན་ཀྱང་བསོད་ནམས་སྐྱིད་ཀྱིས་བཤད་པ་ལྟར་ན། ཉི་ཧོང་ནང་འགྲིམ་འགྲུལགྱི་རིན་གོང་ཤིན་ཏུ་མཐོ་བ་དང་། བདུན་གཅིག་རིང་མེ་འཁོར་ཅི་འདྲ་ཞིག་གི་ནང་དུ་ས་ཁུལ་གང་འདྲ་ཞིག་ལ་སོང་ན་ཆོག་པའི་པ་སེ་དེ་ཉོས་ན་ལྡབ་ཀྱིས་ལེགས་པ་ཡོད་ཟེར། གང་ལྟར་དོ་ནུབ་པ་སེ་ལག་ཏུ་འབྱོར་ཟིན་པས་སེམས་བདེ་ལ་བབ་སོང་། ད་ནི་ཉི་ཧོང་དུ་འགྲོ་བའི་སྟ་གོན་ཡོངས་སུ་གྲུབ་ཟིན།།

 2018.1.14 ཉིན། དགོང་མོའི་ཆུ་ཚོད 10:13

ཟིན་བྲིས་ནང་རྩོམ་འཇུག་སྟངས་ཤེས་པ། 

བདུན་ཕྲག་འགའ་ཤས་སྔོན་ནས་རེ་སྐུལ་ཞུས་པ་ལྟར། དེ་རིང་ཉིན་གུང་སུམ་པའི་བྱ་རྟ་མ་ཡོང་ནས་ང་ལ་དྲྭ་རྒྱའི་ནང་རྩོམ་འཇུག་སྟངས་བསླབས་སོང་བས། ཉི་ཧོང་དུ་བསྐྱོད་པའི་ཉིན་ཐོ་འདི་འབྲི་བའི་སྤྲ་སྣང་དང་སེམས་ཤུགས་སྔར་བས་ཀྱང་ཆེ་རུ་གྱུར་སོང་། ད་ནི་རང་གིས་འབྲི་ཐུབ་ན། དྲྭ་རྒྱའི་ནང་འཇུག་མི་ཤེས་པའི་སེམས་ཁྲལ་མེད།

2018.1.18 ཉིན།   ཕྱི་དྲོའི་ཆུ་ཚོད 4:02

དངོས་སུ་ལམ་དུ་ཆས་པ།

མེ་འཁོར་ཆག་སྒྲ་ཁོབ་སྒྲ་དང་བཅས་ཡོམ་ཡོམ་སྐྱོད་བཞིན་མཆིས་ལ། ངའི་ཉེ་འཁོར་གྱི་རྒྱ་གར་ཕོ་མོ་རྣམས་ཀྱི་ངོ་གདོང་ལ་ཉོབ་སྣང་ཞིག་ཤར་ཏེ་ཁ་རོག་བསྡད་འདུག ཁ་གཅིག་ནི་མགོ་བོ་རྐུབ་སྟེགས་ཀྱི་རྒྱབ་སྙེས་ལ་ཁེན་ཞིང་མིག་ཟུང་བཙུམས་ནས་གཉིད་འདུག 

 ང་རང་མེ་འཁོར་ནང་བསྡད་དེ་ཆུ་ཚོད་གཅིག་ཙམ་ཕྱིན་འདུག་ཅིང་། ཐོག་གི་ཉལ་ཁྲི་སྟོང་པ་གཅིག་ལ་ལོག་ནས་གཉིད་ཨེ་ཁུག་བལྟས་མོད། འོན་ཀྱང་སྐར་མ་བཅུ་ཙམ་གྱི་རྗེས་སུ་སད་བྱུང་། གནམ་གྲུ་འགྲོ་བའི་ཆུ་ཚོད་མཚན་དཀྱིལ་ཏག་ཏག་ལ་ཁེལ་འདུག་པས། ད་ལྟ་ཉལ་ནས་ངལ་གསོ་བྱེད་འདོད་རུང་སྔས་མགོ་མེད་པའི་དབང་གི་ལུས་མི་བདེ་བའི་ཐོག སེམས་སུ་གནམ་ཐང་དུ་དཀའ་རྙོག་འདྲ་ཕྲད་དེ་འགྲོ་ཐུབ་ཨེ་ཡོང་སྙམ་པའི་སེམས་ཁྲལ་ཞིག་ངང་གིས་སྐྱེས་ཏེ་གཉིད་མི་ཁུག 

 རེད། ཉེ་བའི་ཉིན་འགའ་ཤས་ཀྱི་རིང་ལ་ངའི་སེམས་སུ་གནམ་ཐང་ནས་ཕྱིར་སྐྱོད་ཆོག་མཆན(Exit Permit)ཞུས་མི་འདུག་ཟེར་ནས་འགོག་མི་ཡོང་ངམ་སྙམ་པའི་སེམས་ཁྲལ་གྱིས་ཁེངས་འདུག སྤྱིར་ཡིན་ན་རྒྱ་གར་གྱི་ཁྲིམས་ཐོག་ནས་བོད་པ་དེབ་སེར་པོ་འཛིན་མཁན་ཚོ་ཕྱི་རྒྱལ་ལ་ཕྱིན་ནས་ཉིན་བཅོ་ལྔའི་ནང་ཕྱིར་ལོག་ན། རྒྱ་གར་གཞུང་ནས་ཕྱིར་སྐྱོད་ཆོག་མཆན་ཞུ་མི་དགོས་ཚུལ་འཁོད་འདུག་པ་མ་ཟད། གནས་ཚུལ་དེ་འདྲ་བཤུས་བགྱིས་ནས་སྟོན་ཆོག་ཆོག་ཏུ་ཉར་ཡོད་མོད། འོན་ཀྱང་སེམས་ཁྲལ་ཞིག་འགོག་ཐབས་མེད་པར་སྐྱེ་ཡོང་། གལ་སྲིད་ང་རང་གནམ་ཐང་ནས་ཕྱིར་སློག་པ་ཡིན་ན། རོགས་པ་ཚོ་ལ་ཇི་ལྟར་བརྗོད་དམ། ངས་ཁོ་ཚོ་ལ་རང་ཉིད་ཉི་ཧོང་དུ་འགྲོ་རྒྱུ་ཡིན་ཚུལ་བརྗོད་དེ་ལམ་དུ་ཆས་པ་རེད།

 ད་ནི་ཉོག་བཤད་མང་པོ་ཞིག་ཆགས་བཞིན་འདུག་སྟབས། འདིར་འབྲི་མཚམས་འཇོག་འདོད་མོད། འོན་ཀྱང་ལམ་དུ་ཆས་ཁའི་གནས་ཚུལ་ཆུང་ཆུང་ཞིག་ཅིས་ཀྱང་བརྗོད་དགོས། 

 ངེད་གཉིས་ཉིན་གུང་གི་ཆུ་ཚོད 1 མ་ཟིན་ཙམ་ལ་ལམ་དུ་ཆས་པ་དང་། གླ་འཁོར་ནང་བསྡད་དེ་འགྲོ་འགོ་བརྩམས་པ་ན་ངས་སྒྲ་མེད་པའི་སྐྱབས་འགྲོ་ཚར་གསུམ་བཏོན་ནས་སྣ་ཁུང་དང་བྲང་ཁར་ཕུ་བཏབ་སྟེ་ལམ་དགྲ་བར་ཆད་མེད་པའི་སྨོན་ལམ་བརྒྱབས། ང་རང་ཆུང་ཆུང་སྐབས། ཉིན་རེར་ཁ་འདོན་ཆད་མེད་སྐྱོར་ཞིང་ལག་ཟུང་ཕྲེང་བ་དང་ལག་འཁོར་ལས་འབྲལ་མྱོང་མེད་པའི་ཨ་མྱེ་ཡིས་རྟག་ཏུ་ལམ་དུ་ཆས་ཁར་སྐྱབས་འགྲོ་ཚར་གསུམ་འདོན་དགོས་པའི་སྐུལ་མ་གནང་བ་དང་། དེ་ལྟར་བྱས་ན་ལམ་དགྲ་བར་ཆད་ཅི་ཡང་མི་འཕྲད་པར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་གསུངས་པས། ཕྱིས་སུ་ང་རང་ས་མཐའི་ཡུལ་གྲུ་འདིར་ལྷུང་རྗེས། ཐག་རིང་གི་ལམ་དུ་ཆས་སྐབས། རང་ཉིད་འདུག་སའི་རླངས་འཁོར་གྱི་འཁོར་ལོ་འགྲིལ་འགོ་རྩོམ་དུས། སྒྲ་མེད་པའི་སྐྱབས་འགྲོ་ཚར་གསུམ་རེ་བཏོན་ནས་མངོན་ཆུང་གིས་སྣ་ཁུང་དང་བྲང་ཁར་ཕུ་འདེབས་པ་དེ་ངའི་གོམས་གཤིས་སུ་གྱུར་སོང་།།

 དགོང་མོའི་ཆུ་ཚོད 11:59། 

རྒྱ་གར་གྱི་གནམ་ཐང་ནས་ཐར་བ། 

ད་ལྟ་ང་རང་གནམ་ཐང་གི་ངལ་གསོ་ཁང་དུ་བསྡད་དེ་དངོས་སུ་གནམ་གྲུའི་ནང་འཛུལ་རྒྱུ་ལ་སྒུག་བཞིན་ཡོད། ད་ནི་སྔར་གྱི་སེམས་ཁྲལ་དེ་མེད་པས་སེམས་པ་ལྷུད་ཤིག་ཤིག་རེད། 

གནམ་ཐང་ནང་ཡར་འཛུལ་བའི་ཉམས་མྱོང་ཁྱད་མཚར་དེ་ཕྲན་ཙམ་ཞུས་ན། ང་རང་ཐམ་ག་ཞུ་སར་འགྲོ་མཁན་གྱི་སྟར་ཕྲེང་ནང་ལངས་སྐབས། དབུགས་རིང་པོ་འགའ་དང་ལུས་པོ་ལྷོད་ལྷོད་བྱས་རུང་སེམས་པ་ཅུང་འཚབ་འཚུབ་ཏུ་གྱུར་འདུག མི་རྣམས་རེ་རེ་བཞིན་ཕྱིན་ནས་ང་རང་འགྲོ་རེས་སུ་ཁེལ་བ་ན། ངས་ནུས་ཤུགས་ཡོད་དགུ་བཏོན་ནས་ལྷོད་ལྷོད་ཀྱི་ཉམས་ཤིག་བསྟན་ཏེ་ཐམ་ག་རྒྱག་མཁན་གྱི་ཕྱོགས་སུ་ཡར་ཕྱིན། ངས་གནམ་གྲུའི་པ་སེ་དང་དེབ་སེར་པོ་ལྷན་དུ་ཁོའི་ལག་ཏུ་བཞག་པ་ན། ཐམ་ག་རྒྱག་མཁན་གྱི་རྒྱ་གར་དེས་ངའི་དེབ་སེར་པོ་ལག་ནང་དུ་ཕར་སློག་ཚུར་སློག་འགའ་བྱས་ནས་གཞོགས་སུ་བསྡད་པའི་ལས་རོགས་ལ་སྐད་ཆ་འགའ་དྲིས་སོང་བ་དང་། དེ་ནས་ཕྱིར་སྐྱོད་ཆོག་མཆན་དང་ཕྱིར་རྒྱ་གར་དུ་ལོག་པའི་ཆོག་མཆན་གང་དུ་ཡོད་ཅེས་ང་ལ་དྲིས། ངས་ཁོ་ལ་རང་ཉིད་ཉིན་བཅོ་ལྔའི་ནང་ཕྱིར་རྒྱ་གར་དུ་ལོག་རྒྱུ་ཡིན་པ་དང་། དེ་ལྟར་བྱས་ན་གོང་གི་ཆོག་མཆན་གཉིས་ཞུ་མི་དགོས་ཚུལ་འགྲེལ་བརྗོད་བྱས། ངས་དེ་ལྟར་འགྲེལ་བཤད་རྒྱག་སྐབས། རྒྱ་གར་གྱི་ལས་མི་གཞན་ཞིག་ཀྱང་དེར་འབྱོར་བ་དང་། ཁོས་ང་ལ་ཉི་ཧོང་དུ་འགྲོ་བའི་རྒྱུ་མཚན་དྲིས་པ་དང་། ང་རང་གཞོགས་སུ་ལང་དུ་བཅུག་སྟེ་འགྲུལ་བ་གཞན་རྣམས་འགྲོ་རུ་བཅུག ངས་ཁོ་ལ་ང་རང་ཉི་ཧོང་དུ་འགྲོ་བའི་རྒྱུ་མཚན་རྣམས་བརྗོད་པ་ན། ཁོས་མགྲོན་ཤོག་སྟོན་ཤོག་ཟེར། ངས་འཚབ་ལངས་པའི་སེམས་པ་གནོན་ཅི་ཐུབ་བྱས་ནས་ཁ་པར་ནང་བཙལ་བ་ན། མགྲོན་ཤོག་གི་འདྲ་པར་རྣམས་རྙེད། ངས་མགྲོན་ཤོག་གི་འདྲ་པར་རྣམས་ཁོ་ལ་སྟོན་པར་རྩོམ་དུས། ཁོ་ཕྱིན་ཚར་ནས་དེར་མི་འདུག་པ་དང་། དེའི་ཚབ་ཏུ་ལས་མི་རྒན་པ་ལོས་ཡིན་སྙམ་པ་ཞིག་འབྱོར་ནས་འདུག ངས་འདྲ་པར་རྣམས་ཁོ་ལ་བསྟན་པ་ན། ཁོས་ལྟ་ཙམ་ལས་མ་བྱས་པར་འགྲིག་པའི་བརྡ་ཞིག་བསྟན། ཕར་བལྟས་ན་ཁ་གཡོར་ས་ཙམ་ལས་གནད་དོན་ངོ་མ་ཞིག་མེད་པར་སྣང་བས་ངའི་སེམས་པ་ཅུང་ལྷུད་དུ་བབ། 

 དེ་ལྟར་སྐར་མ་ལྔ་དྲུག་ཙམ་ལ་བཀག་རྗེས། རྒྱ་གར་ལས་བྱེད་པ་དེས་དེབ་སེར་པོ་དང་གནམ་གྲུའི་པ་སེ་ལ་ཐམ་ག་བརྒྱབས་ནས་མདུན་གྱི་ཅོག་ཙེའི་ཐོག་ཏུ་གཡུགས་པ་ན། ངའི་ཕྲག་མགོ་ནས་མི་མངོན་པའི་རྡོག་ཁྲེས་ཆེན་པོ་ཞིག་ཕབ་པའི་ཚོར་སྣང་སྐྱེས་པ་དང་། སེམས་ཁྲལ་གྱིས་ངོ་གདོང་ཡོངས་སུ་ཤོར་ནས་སྒུག་བཞིན་པའི་བསོད་ནམས་སྐྱིད་ཀྱི་ཐད་དུ་སོང་། 

 ད་ནི་ང་རང་རྒྱ་གར་གྱི་གནམ་ཐང་ནས་ཐར་བ་རེད་མོད། འོན་ཀྱང་རྒྱ་གར་གྱི་ལས་བྱེད་པ་དེས་ངའི་དེབ་སེར་པོ་བཟུང་ནས་ལས་རོགས་ཚོ་ལ་སྟོན་སྟངས་དེའི་ནང“འདི་ཅི་རེད”ཟེར་བ་ལྟ་བུའི་མཐོང་ཆུང་གི་རྣམ་འགྱུར་ཕྲན་བུ་ཞིག་འདྲེས་ཡོད་པ་དེ་ད་རུང་ཡང་སེམས་སུ་འཁོར་ཡོང་། འདི་ནི་རྒྱལ་ཁབ་མེད་པའི་དྲན་གསོ་གཏོང་བྱེད་ཆུང་ཆུང་རེད།། 

2018.1.20 ཉིན། ཞོགས་པའི་ཆུ་ཚོད 7:05

 གནམ་གྲུའི་ཁ་ལོ་བས“ང་ཚོ་ཐྲོ་ཁེ་ན་འབབ་པའི་གྲ་སྒྲིག་བྱེད་བཞིན་ཡོད། སྲུང་ཐག་གྱོན་རོགས”ཞེས་བསྒྲགས་རྗེས། ངས་གནམ་གྲུའི་སྒེའུ་ཁུང་ཆུང་ངུ་ནས་ཞིབ་ཀྱིས་ཕྱི་ལ་བལྟས། བསོད་ནམས་སྐྱིད་ཀྱིས་གནམ་གཤིས་དྭངས་བའི་སྐབས་སུ་གནམ་གྲུའི་ནང་ནས་ཉི་ཧོང་གི་མཚོན་རྟགས་ཏེ། རི་བོ་ཧྥོ་ཇི(Mt Fuji)མཐོང་ཐུབ་ཚུལ་བརྗོད་མོད། ངས་གནམ་གྲུའི་སྒེའུ་ཁུང་ནས་མཐོང་བ་ནི་ཁྲལ་ཁྲིལ་དུ་འཁྱིལ་བའི་སྤྲིན་པ་དང་། དེའི་འོག་ཏུ་ལྗང་ཏིང་ངེར་ཡོད་པའི་རྒྱ་མཚོ་རེད། ལྗང་ཏིང་ངེར་ཆགས་པའི་རྒྱ་མཚོའི་དཀྱིལ་དུ་དཀར་ཐིག་ཆུང་ཆུང་རེ་གཉིས་མཆིས་པ་ནི་གྲུ་གཟིངས་རེད། 

གནམ་གྲུ་རིམ་གྱིས་ཇེ་དམའ་ནས་ཇེ་དམར་བབ། ངས་མུ་མཐུད་སྒེའུ་ཁུང་ཆུང་ངུ་དེ་ནས་ཕྱི་ལ་བལྟས་ནས་བསྡད། ངའི་སེམས་སུ་ནམ་རྒྱུན་གློག་བརྙན་ནང་ཁོ་ན་མཐོང་བའི་ཤེལ་གྱི་ཐོག་བརྩེགས་མཐོན་པོ་གནམ་ལ་ཟུག་པ་དེ་དག་མཐོང་རྒྱུར་བསྒུགས་མོད། འོན་ཀྱང་ངའི་མིག་ལམ་དུ་རིམ་གྱིས་མངོན་ཡོང་བ་ནི་ཁང་པ་དམའ་མོ་ཞེ་གཅིག་རེད་ལ། དེ་དག་རེ་ཟུང་གི་ཐོག་ལ་རྩི་དམར་པོ་བྱུགས་པ་མ་གཏོགས་ཕལ་ཆེ་བ་སྐྱ་སྐྱ་རེད་འདུག་པས་དམིགས་བསལ་གྱི་བརྗིད་ཉམས་དང་བཀྲག་མདངས་ཅི་ཡང་མི་འདུག འོན་ཀྱང་ཚོན་ཁྲ་ཆུང་བའི་ཁང་པ་དང་སྲང་ལམ་དེ་དག་གི་ཁྲོད་དུ་ནམ་རྒྱུན་རྒྱ་གར་ནང་མཐོང་རྒྱུར་གོམས་པའི་གད་སྙིགས་ཀྱི་ཕུང་པོ་ཅི་ཡང་མི་འདུག་ལ། དེ་རྗེས་ང་རང་གྲོང་ཁྱེར་གྱི་མཐའ་རུ་ཡོད་པའི་འགྲུལ་ཁང་དུ་སྐྱོད་སྐབས། ཆེད་མངགས་ཞིབ་ལྟ་བགྱིས་རུང་སྲང་ལམ་དུ་གཡུགས་པའི་འགྱིག་ཤོག་གཅིག་ཀྱང་མཐོང་མ་སོང་། 

 དེ་ནས་ཐང་དུ་བབ་ནས་དངོས་སུ་ཉི་ཧོང་གི་ནང་དུ་འཛུལ་དུས། དེ་གའི་ལས་བྱེད་པ་ཚོས་གཞན་དག་དང་མི་འདྲ་བར་ང་རང་ལོགས་སུ་ཕུད་པ་དང་། ཡུད་ཙམ་ལ་ཁང་སྟོང་ཞིག་ཏུ་ཁྲིད་དེ་དེབ་སེར་པོ་ལ་བརྟག་དཔྱད་བྱས་པ་མ་གཏོགས་དམིགས་བསལ་གྱི་དཀའ་ངལ་གང་ཡང་མ་འཕྲད། ང་རང་ཁང་སྟོང་དེ་ནས་མར་དོན་ནས་ཉི་ཧོང་ནང་ཡར་འཛུལ་དུས། བསོད་ནམས་སྐྱིད་ཀྱི་ངོ་གདོང་དུ་འགོག་མི་ཐུབ་པའི་དགའ་སྤྲོའི་རྣམ་འགྱུར་ཞིག་ཤར་ནས“ང་ཚོ་ཉི་ཧོང་དུ་འབྱོར་སོང་། ང་ཚོ་ཉི་ཧོང་དུ་འབྱོར་སོང”ཞེས་སྐད་བརྒྱབས་པ་མ་ཟད། ང་ལ་འཐམ་འཁྱུད་དམ་པོ་ཞིག་ཀྱང་བྱས། 

 ད་ནི་ང་རང་དངོས་སུ་ཉི་ཧོང་དུ་ཐོན་པ་ཡིན་པས། ལམ་སེང་གནམ་ཐང་གི་སྐུད་མེད་དྲྭ་བ་བཀོལ་ནས་སྐད་འཕྲིན་ཐོག་ཏུ་ཉི་ཧོང་དུ་འབྱོར་བའི་པར་འགའ་བཀོད། ང་རང་ཉི་ཧོང་དུ་སྤྲོ་འཆམ་དུ་སྐྱོད་བཞིན་པ་དེ་དྲྭ་གྲོགས་ཚོ་ལ་ཤིན་ཏུ་སྟོན་འདོད་ཆེ། སྤྱིར་ཡིན་ན་ཧན་ཁང་གྲོང་ཁྱེར་དུ་འབྱོར་མ་ཐག་པར་འགའ་འགོད་འདོད་སྐྱེས་མོད། འོན་ཀྱང་གནམ་གྲུའི་ཞབས་ཞུ་མ་ཞིག་གིས་ངེད་གཉིས་འཕྲལ་དུ་ཉི་ཧོང་དུ་འགྲོ་མཁན་གྱི་གནམ་གྲུའི་ནང་ཁྲིད་པས་སྟབས་མ་འགྲིགས། 

 དེ་རྗེས་གནམ་ཐང་ནས་མེ་འཁོར་པ་སེ་དང་ལག་འཁྱེར་སྐུད་མེད་དྲྭ་བ་ཉོས་རྗེས། ཟ་ཁང་ཞིག་ནས་དགོང་ཟས་ཟོས་ནས་འགྲུལ་ཁང་དུ་ཕྱིན། གནམ་ཐང་ནས་འགྲུལ་ཁང་བར་ཆུ་ཚོད་གཅིག་ཙམ་འགོར་བ་དང་། འགྲུལ་ཁང་ཏག་ཏག་ཅིག་མ་རག་བར་སྲང་ལམ་ནས་འཁོར་ལོ་ཅན་གྱི་འདྲུད་སྒམ་དྲུད་དེ་ཡུད་ཙམ་ལ་ཉུལ་དགོས་ཁེལ།

 གོང་དུ་བརྗོད་པ་ལྟར་སྲང་ལམ་རྣམས་ཤིན་ཏུ་གཙང་ཞིང་གྲ་འགྲིག་པ་དང་། དེའི་ཐོག་ཏུ་ཡར་མར་འགྲོ་མཁན་གྱི་རླངས་འཁོར་དང་ལྕགས་རྟ་རྣམས་དལ་བུར་རྒྱུ་བས། ཁོར་ཡུག་ཧྲིལ་བོ་ལྷིང་འཇགས་གེར་དང་འཇམ་ཐིང་ངེར་འདུག དེ་ལྟར་ཁོར་ཡུག་ཁ་ཁུ་ཤིན་ཏུ་སིམ་སྟབས། སྲང་ལམ་ཐོག་ཏུ་འཁོར་ལོ་ཅན་གྱི་འདྲུད་སྒམ་་དྲུད་པའི་འུར་སྒྲས་ཀྱང་ཁོར་ཡུག་གི་ལྷིང་འཇགས་དཀྲོག་མི་འགྲོའམ་སྙམ་པའི་སེམས་འཚབ་ཅིག་ངང་གིས་སྐྱེ་ཡོང་། 

 ཉིན་ཞག་གཅིག་ལ་འགྲུལ་བཞུད་བགྱིས་ནས་ཐང་ཤིན་ཏུ་ཆད་པས། འགྲུལ་ཁང་དུ་འབྱོར་མ་ཐག་གཟུགས་པོ་བཀྲུས་ནས་ཉལ་བ་ཡིན། གཉིད་ཤིན་ཏུ་སྐྱིད་པོ་ཞིག་ཁུགས་བྱུང་།། 

(དུས་ཐོག་ཏུ་མ་ཚར་བས་མེ་འཁོར་ནང་སྐྱོད་སྐབས་ཁ་སྣོན་བྱས།)

2018.1.22 ཉིན། ཉིན་གུང་ཆུ་ཚོད 12:37

ཁ་བ་བབ་པ།

 ང་རང་ད་ལྟ་མེ་འཁོར་ནང་བསྡད་དེ་ཐྲོ་ཁེའུ་ནས་ཧ་ཁོན་ནི(Hakoni)ཞེས་པའི་གྲོང་ཁྱེར་དུ་སྐྱོད་བཞིན་ཡོད། ས་ཆ་དེར་ཉི་ཧོང་གི་མཚོན་དོན་དུ་གྱུར་པའི་རི་བོ་ཧྥོ་ཇི་ཡོད། མེ་འཁོར་གྱི་རྐུབ་སྟེགས་གཡས་གཡོན་ཐོག་ཏུ་བསྟར་ནས་བསྡད་པའི་མི་ཕལ་ཆེ་བའི་མིག་ཟུང་ཁ་པར་གྱི་འཆར་ཡོལ་ལ་ཅེར་ནས་འདུག་ཅིང་། ཁ་པར་ལག་ཏུ་མ་བཟུང་བ་རེ་ཟུང་མཆིས་པ་རྣམས་གཉིད་དུ་ཡུར་འདུག 

 ཕྱི་ལ་ཁ་འབབ་བཞིན་འདུག་སྟེ། མེ་འཁོར་གྱི་སྒེའུ་ཁུང་ལས་མཐོང་བའི་ཁང་བརྩེགས་རྣམས་ཀྱི་ཐོག་དང་། ལྗོངས་ཤིང་གི་ཡལ་འདབ་སྟེང་། ཐང་གཞུང་གྱི་ངོས། རླངས་འཁོར་གྱི་ཐོག་བཅས་ལ་ཁ་བ་ཆགས་ནས་དཀར་ཤིག་གེར་གྱུར་འདུག་པའི་ཐོག འབབ་ཚུགས་རེ་ཡི་སར་མེ་འཁོར་དལ་དུ་འགྲོ་སྐབས། ཁ་བའི་འདབ་མ་རྣམས་ལྷབ་ལྷུབ་ཏུ་བར་སྣང་ནས་མར་ལྷུང་བཞིན་པ་མཐོང་ཐུབ་པས། ངའི་སེམས་ལ་འགྲེལ་མི་ཤེས་པའི་སྤྲོ་སྣང་ཞིག་གིས་གང་འདུག 

 རེད། ང་རང་ཕ་ཡུལ་དང་བྲལ་ནས་རྒྱ་གར་ཚ་བའི་ཡུལ་དུ་འབྱོར་རྗེས། ཆེས་དྲན་ཆེ་ཤོས་དེ་ཁ་བ་རེད། ཐ་ན་ཕ་མ་དང་སྤུན་མཆེད་ལས་ཀྱང་དྲན་ཆེ་བ་ནི་ཁ་བ་རེད། ང་རང་ས་རཱ་མཐོ་སློབ་ཏུ་སློབ་གཉེར་བྱེད་སྐབས། མཚམས་རེར་ཞོགས་པ་ཡར་ལངས་ནས་ཉལ་ཁང་གི་ཕྱི་ལ་དོན་དུས། ཁ་བ་བབ་ནས་ཁོར་ཡུག་ཧྲིལ་བོ་དཀར་ཤིག་གེར་གྱུར་ཡོད་ན་ཅི་མ་རུང་སྙམ་མྱོང་མོད། འོན་ཀྱང་ང་རང་དེར་འདུག་པའི་ལོ་གསུམ་རིང་ས་རཱ་ལ་ཁ་བ་ཐེངས་གཅིག་ཀྱང་མ་བབ་པས། ངའི་རེ་བ་དེ་རེ་བ་རང་དུ་ལུས། 

 དེར་བརྟེན་ཟླ་གཅིག་ཙམ་གྱི་སྔོན་དུ་ཉི་ཧོང་དུ་འགྲོ་བའི་ཐོན་མཆན་རག་མ་ཐག ཆེས་མཐོང་འདོད་པ་རྣམས་ཀྱི་ཁྲོད་ནས་གཅིག་ནི་ཁ་བ་རེད་ལ། འདས་པའི་ཉིན་གཉིས་ནང་གནམ་དྭངས་ནས་ཁ་བ་མ་བབ་སྟབས། ང་རང་ཉི་ཧོང་དུ་འདུག་པའི་རིང་ལ་ཁ་བ་འབབ་ཨེ་ཡོང་སྙམ་པའི་སེམས་ཁྲལ་བྱུང་། ད་ནི་འདི་ལྟར་ཁ་བ་ལྷབ་ལྷུབ་ཏུ་བཞུར་བཞིན་པ་མཐོང་བས། ང་རང་སྤྲོ་བས་བརྟས་ནས་ཡོད། 

 འོན་ཀྱང་བསོད་ནམས་སྐྱིད་ཁ་བ་འབབ་བཞིན་པ་དེར་དེ་འདྲའི་སྐྱིད་པོ་བྱེད་ཀྱི་མི་འདུག མོས”ཁ་བ་བབ་ན་རི་བོ་ཧྥོ་ཇི་མཐོང་མི་ཐུབ”ཟེར།། 

 2018.1.23ཉིན། ཞོགས་པའི་ཆུ་ཚོད 7:12

ཁ་བའི་རས་གོས་བཀླུབས་པའི་ཞོགས་པ། 

 བསོད་ནམས་སྐྱིད་ངའི་གཞོགས་སུ་བདེ་བར་གཉིད་འདུག ཁོར་ཡུག་ཧྲིལ་བོ་འཇམ་ཐིང་ངེར་གནས་པས་ཁང་པའི་ནང་གི་ཚ་གློག་གི་སྒྲ་སྙོམས་པོ་དེ་དང་གློག་ཀླད་ཀྱི་མཐེབ་གཞོང་གྱི་ཚག་སྒྲ་གཉིས་ཅུང་མཐོ་བའི་ཚོར་སྣང་ཞིག་སྐྱེ་ཡོང་། 

 ང་རང་གཉིད་ལས་སད་མ་ཐག་ཡར་ལངས་ནས་སྒེའུ་ཡོལ་ཕྱེ་སྟེ་ཕྱི་ལ་བལྟས་པ་ན། མདང་དགོང་གི་ཁ་བའི་འབབ་མཚམས་ཆད་འདུག ཕར་ཕྱོགས་ཀྱི་ཐག་མི་རིང་བའི་རི་ངོས་ཡོངས་རྫོགས་ཁ་བས་གཡོགས་ནས་དཀར་ཤིག་གེར་སྣང་ལ། ཉེ་འཁོར་གྱི་ཁང་པའི་ཐོག་དང་། རླངས་འཁོར་སྟེང་། ད་རུང་རབ་ཏུ་མཛེས་པའི་ལྗོན་ཤིང་གི་ཡར་འདབ་སྒང་དུ་ཁ་བ་གྲུ་གང་མ་ཟིན་ཙམ་ཆགས་འདུག 

 ངས་སྒེའུ་ཁུང་ནས་ཤིན་ཏུ་མཛེས་པའི་ཞོགས་པ་དེར་ཡུད་ཙམ་བལྟས་རྟིང་། རྒྱབ་ཁུག་ནས་གློག་ཀླད་བླངས་ཏེ་སླར་ཡང་མལ་ས་དྲོན་མོའི་ནང་དུ་འཛུལ་བ་དང་། དུས་རྒྱུན་ལྟར་ཁ་སྦུག་ཏུ་ལོག་ནས་གློག་ཀླད་ཀྱི་ཁ་ཕྱེ།

 མདང་དགོང་ངེད་གཉིས་འགྲོན་ཁང་དུ་འབྱོར་དུས། ཁང་མིག་གི་ཕྱོགས་གཅིག་ན་ཤིང་གི་ཆག་སྒམ་ཅུང་ཆེན་པོ་ཞིག་འདུག་པ་ལས་ཅོག་ཙེ་དང་རྐུབ་སྟེགས་ཅི་ཡང་མ་མཆིས། ཤིན་ཏུ་ཚགས་དམ་པའི་རྩྭ་གདན་བཏིང་པའི་པང་གཅལ་སྟེང་དུ་ལྟེབ་བརྩེགས་བརྒྱབས་པའི་རས་དཀར་པོ་འགའ་བཞག་འདུག མགྲོན་ཁང་ཞབས་ཞུ་བ་ཕོ་སར་རྫིག་པོ་དེས་ཚ་གློག་སྤར་ཞིང་ལྡེ་མིག་ངེད་གཉིས་ཀྱི་ལག་ཏུ་བཞག་སྟེ་ཕྱིར་ཕྱིན་རྗེས། ངེད་གཉིས་ཀྱིས་ལྷམ་སྒོ་མཚམས་སུ་ཕུད་དེ་ནང་དུ་འཛུལ་ནས་ཉལ་ཆས་བཙལ་བ་ན། སྒོ་མཚམས་སུ་འཐེན་སྒོ་ཞིག་ཡོད་པ་མཐོང་། འཐེན་སྒོ་དེ་སྒྲ་དང་བཅས་ཚུར་ཐེན་པ་ན། ནང་དུ་གཡོགས་མེད་པའི་གདན་དང་། ཉལ་ཆས། སྔས་མགོ་བཅས་བརྩེགས་འདུག པང་གཅལ་ཐོག་ཏུ་བཞག་པའི་རས་དཀར་པོ་དེ་རྣམས་ཉལ་ཆས་ཀྱི་གཡོགས་རེད་འདུག 

 ངེད་གཉིས་ཀྱིས་པང་གཅལ་ཐོག་ཏུ་གདན་བཏིངས་ནས་ལ་ཉལ་ཆས་རྣམས་ལ་གཡོགས་བརྒྱབས་ཏེ་ཉལ་པས། ཉལ་ཁྲིའི་ཐོག་ཏུ་ཉལ་བ་དང་མི་འདྲ་བར་ཤིན་ཏུ་བདེ་པོ་ཞིག་རེད། འདི་ནི་ཉི་ཧོང་གི་སྲོལ་རྒྱུན་ཁང་པ་བཟོ་སྟངས་དང་ཉལ་སྟངས་ཤིག་རེད་ཟེར་ལ། ཐྲོ་ཁོའུ་ལ་འདུག་སའི་འགྲུལ་ཁང་དེའང་འདི་དང་གཅིག་མཚུངས་རེད།

དགོང་མོའི་ཆུ་ཚོད 5:13

རི་བོ་ཧྤོ་ཇི་མཐོང་མ་ཐུབ་པ། 

 མྱུར་འགྲོད་མེ་འཁོར་(Bullet Train)མདའ་འཕངས་པ་ལྟར་སྐྱོད་བཞིན་མཆིས་ལ། ཚོན་མདོག་གིས་དབེན་པའི་ཁང་བརྩེགས་མཐའ་བོ་རྣམས་དང་། སྔོ་ལྗང་གི་འདབ་མ་བྲལ་བའི་ལྗོན་ཤིང་དག་སྐད་ཅིག་སྐད་ཅིག་གིས་རྒྱབ་ཏུ་མཆེད་ཀྱིན་འདུག ཟངས་ཀྱི་སྡེར་མ་ཆེན་པོ་ཞིག་དང་མཚུངས་པའི་ཉི་མ་དམར་པོ་དལ་གྱིས་རྒྱང་རིང་གི་སྨྱུག་སྤྲིན་གསེང་དུ་ཡོལ་སོང་། ངས་དགོང་ཁའི་ཉི་མ་དེ་ལ་ལྟ་བཞིན་སེམས་སུ་ཉི་ཧོང་བ་ཚོས་རྟག་ཏུ་དེ་འདྲའི་ཉི་མ་ཞིག་མཐོང་བས། མཐོ་རྒྱལ་དར་ནས་དམའ་ཏན་ཤིང་(biscuit)གི་སྐོགས་ལྤགས་སྟེང་དུ་ཉི་མ་དམར་པོའི་པར་རིས་བཀོད་པ་ཨེ་ཡིན་སྙམ་པའི་ཚོར་སྣང་ཞིག་སྐྱེས། 

 ངེད་གཉིས་ཧ་ཀོ་ནོ་(Hakone)ནས་ཁེ་ཡོ་ཐྲོ(Kyoto)རུ་འགྲོ་བཞིན་ཡོད། ད་ནངས་ཆུ་ཚོད་དགུ་པ་ཡས་མས་སུ་འགྲོན་ཁང་ནས་ཐོན་པ་དང་། ཁ་བ་ཆགས་པའི་སྲང་ལམ་ཐོག་ཏུ་འཁོར་ལོ་ཅན་གྱི་འདྲུད་སྒམ་དྲུད་དེ་མེ་འཁོར་འབབ་ཚུགས་སུ་ཕྱིན། དེ་རིང་ཁ་བ་འབབ་མཚམས་ཆད་དེ་ཉི་མ་ཕྲན་ཙམ་ཤར་འདུག་པས། ངེད་གཉིས་ཀྱིས་རི་བོ་ཧྤོ་ཇི་ཡག་པོ་ཞིག་མཐོང་ཐུབ་ངེས་དྲན། ཡིན་ན་ཡང་། མེ་འཁོར་འབབ་ཚུགས་སུ་འབྱོར་དུས། དེ་གའི་ལས་ཁུངས་ཀྱི་་སྒེའུ་སྟེང་དང་རྩིག་ངོས་སུ་“གནམ་གཤིས་ཀྱི་དབང་གིས་གློག་སྒམ་(cable Cars)རྣམས་གནས་སྐབས་རིང་མཚམས་འཇོག་བྱས་ཡོད”ཅེས་པའི་གསལ་བསྒྲགས་བཀོད་འདུག ངེད་གཉིས་དེར་ཅུང་ཙམ་བསྒུགས་ནས་ཞབས་ཞུ་བ་ལ་སང་ཉིན་འགྲོ་ཐུབ་མིན་དྲིས་པར། མོས་མགོ་བོ་གཡུག་བཞིན་བརྗོད་ཚོད་མི་ཐིག་ཟེར། 

 དེར་བརྟེན་ངེད་གཉིས་ཀྱིས་གྲོས་བསྡུར་ཕྲན་ཙམ་བྱས་རྟིང་། ཐོག་མར་ཁེ་ཡོ་ཐྲོ་དང་ཨོ་ས་ཀ(Osaka)རུ་ཕྱིན་ནས་དེ་རྗེས་སླར་རི་བོ་ཧྤོ་ཇི་ལྟ་བར་ལོག་རྒྱུའི་གྲོས་ཐག་ཆོད། ངེད་གཉིས་རི་བོ་ཧྥོ་ཇི་མ་མཐོང་བར་ཉི་ཧོང་ནས་ལོག་མི་འདོད།།

 2018.1.27 ཉིན། ཞོགས་པའི་ཆུ་ཚོད 5:55། 

གློ་ཁུག་བོར་བ། 

 ཉེ་བའི་ཉིན་གསུམ་བཞིའི་ནང་ཁེ་ཡོའུ་ཐྲོ་དང་ཨོ་ས་ཁར་འཆམ་ཉུལ་བྱེད་རྒྱུ་ལ་བྲེལ་ནས་ཉིན་ཐོ་འབྲི་བའི་དུས་ཚོད་དང་ནུས་པ་གཏན་ནས་མ་རག ཉིན་ཧྲིལ་པོར་གྲོང་ཁྱེར་དེ་གཉིས་ཀྱི་སྐད་གྲགས་ཆེ་བའི་ལྷ་ཁང་མཇལ་བ་དང་སྲང་ལམ་དུ་ཉུལ་རྗེས། ཕྱིར་མགྲོན་ཁང་དུ་འབྱོར་དུས་གཉིད་ཉལ་བ་ལས་ཐ་ན་སྐད་འཕྲིན་རྒྱབ་ཏུ་དྲྭ་གྲོགས་ཚོས་བཀོད་པའི་མཆན་ལའང་ལན་འདེབས་མ་ཐུབ། 

 དེ་རིང་ཞོགས་པ་གཉིད་ལས་སད་མ་ཐག་ངས་དུས་ཚོད་དམ་འཛིན་གྱིས་ཁ་སང་ཉིན་གུང་ལ་ལྷག་པའི་གནས་ཚུལ་ཆུང་ཆུང་དེ་འབྲི་བའི་ཐག་བཅད། རྒྱུ་མཚན་ནི་གནས་ཚུལ་ཆུང་ཆུང་དེས་ཤར་མཐའི་རྒྱལ་ཁབ་ཆུང་ཆུང་འདིའི་ཁྱད་དུ་འཕགས་པའི་རིག་གཞུང་དང་། ཉི་ཧོང་བ་རྣམས་ཀྱི་མི་གཞི་གང་འཚམ་སྟོན་ཐུབ་ཀྱི་འདུག་པས་ཡིན། 

 ཁ་སང་ཞོགས་པར་ངེད་གཉིས་ཨོ་ས་ཁའི་རྒྱལ་ཁང་ལ་ལྟ་བར་ཕྱིན། མཛེས་སྡུག་ལྡན་པའི་རྒྱལ་ཁང་དེའི་མདུན་ནས་པར་འགའ་ཤས་བརྒྱབས་རྟིང་། ཡུན་རིང་མ་བསྡད་པར་མེ་འཁོར་འབབ་ཚུགས་སུ་སོང་། ངེད་གཉིས་ཀྱིས་ཨོ་ས་ཁ་ནས་མྱུར་བགྲོད་མེ་འཁོར་ལ་བསྡད་དེ་ཧ་ཁོ་ནི་ལ་སྐྱོད་པ་དང་། དེར་ཉིན་ཞག་གཅིག་བསྡད་དེ་ཁ་ཉིན་མ་མཐོང་བའི་རི་བོ་ཧྥོ་ཇི་དང་མཚོ་མོ་ཨ་ཤིར་ལ་བལྟས་ནས་རྒྱལ་ས་ཐྲོ་ཁེའུ་དུ་ལོག་པའི་འཆར་གཞི་བཏིངས་ཡོད། ཡིན་ན་ཡང་། ངེད་གཉིས་ས་འོག་གི་མེ་འཁོར་འབབ་ཚུགས་གཉིས་ཙམ་བརྗེས་ནས་དངོས་སུ་ཧ་ཁོ་ནི་རུ་འགྲོ་སའི་འབབ་ཚུགས་ཏེ་ཤིན་ཨོ་ས་ཁ་ཞེས་པ་རུ་འབྱོར་དུས། གློ་བུར་དུ་མོའི་གློ་ཟུར་ན་པར་ཆས་ལས་གློ་ཁུག་མེད་པ་ཚོར། ངེད་གཉིས་ཀྱིས་གློ་ཁུག་གར་སོང་ཆ་མེད་དུ་གྱུར་བ་ཚོར་མ་ཐག མོའི་ངོ་གདོང་ཡོངས་སུ་ཤོར་ནས་ངུ་གྲབས་བྱེད་ཀྱིན་འདུག་ལ། ང་ཡང་ཅི་བྱ་གཏོལ་མེད་དུ་གྱུར། ངེད་གཉིས་ཀྱི་དངོས་པོ་རྩ་ཆེན་རྣམས་གློ་ཁུག་དེའི་ནང་དུ་ཡོད། 

 གློ་ཁུག་དེའི་ནང་ངེད་གཉིས་ཉི་ཧོང་དུ་འགྲོ་གྲོན་གཏོང་བྱེད་ཀྱི་སྒོར་མོ་ཕལ་ཆེ་བ་དང་།(ངའི་དངུལ་ཁུག་ནང་ཕྲན་ཙམ་ཞིག་ཡོད།) དངུལ་ཁང་གི་བྱང་བུ་ལྔ། (ངེད་གཉིས་ཀའི་ཅན་ཡོད།) མོའི་གསེར་གྱི་སྐེ་རྒྱན་དང་རྣ་མཛེས། ཨར་མེ་སི་(Hermes)རྟགས་ཅན་གྱི་དངུལ་ཁུག  སྐུད་མེད་དྲྭ་བའི་མ་ལག ཁ་པར་གློག་གསོག་བྱེད། མོའི་བྱུགས་རྫས་བཅས་ཡོད་པའི་ཐོག མོས་གློ་ཁུག་དེའང་རྩ་ཆེན་པོ་རེད་ཟེར། 

 མེ་འཁོར་ནི་ས་འོག་གི་འབུ་སྲིན་ལྟར་ཕར་འགྲོ་ཚུར་འགྲོའི་རྒྱུན་མི་ཆད་པས། ངེད་གཉིས་འདུག་སའི་མེ་འཁོར་དེ་རྙེད་པའི་སྐབས་མ་མཆིས་ལ། གལ་སྲིད་རྙེད་པའི་དབང་དུ་བཏང་ཡང་གློ་ཁུག་ག་ལ་འདུག་སྲིད། དེར་བརྟེན་ངེད་གཉིས་ཐད་ཀར་བོར་རྙེད་ལས་ཁུངས(lost and found)སུ་ཕྱིན་ནས་གནས་ཚུལ་རྣམས་ཡར་ཞུ་བྱས། ངེད་གཉིས་ཀྱི་ཡར་ཞུ་བྱེད་སའི་བུད་མེད་ལས་བྱེད་དེས་ངེད་གཉིས་འདུག་སའི་མེ་འཁོར་གྱི་མིང་དང་། ཐོན་པའི་དུས་ཚོད། འདུག་སའི་ཁང་མིག་བཅས་ཞིབ་པར་དྲིས་མོད། འོན་ཀྱང་ངེད་གཉིས་ཀྱིས་དེ་དག་གང་ལ་དོ་སྣང་མ་སྤྲད་པས་ལན་གསལ་པོ་ཞིག་འདེབས་མ་ཐུབ་ལ། ཐ་ན་ཐོན་པའི་དུས་ཚོད་ཀྱང་རུབ་ཙམ་ལས་བརྗོད་མ་ཐུབ། མོས་སྐར་མ་བཅུ་ཙམ་ལ་ཁ་པར་ནང་ཡར་བཤད་མར་བཤད་དང་གློག་ཀླད་ནང་བཙལ་རྟིང་། “མེ་འཁོར་འགྲོ་མཁན་ཤིན་ཏུ་མང་བས་ང་ཚོས་རྙེད་མ་སོང་། ཁྱོད་གཉིས་ཨོ་ས་ཁ་ཡི་བོར་རྙེད་ལས་ཁུངས་སུ་སོང་དང་གཅིག་བྱས་ན་དེ་རུ་ཡོད་སྲིད། གལ་སྲིད་མི་འདུག་ན་ཆུ་ཚོད་གསུམ་གྱི་རྗེས་སུ་འདི་ལ་ཁ་པར་ཐོངས་ཤོག”ཟེར་ནས་ཤོག་ལྷེ་ཞིག་སྟེར་བྱུང་། ངེད་གཉིས་ཀྱིས་མོ་ལ་ཁ་པར་བྱང་བུ་མེད་ཚུལ་བརྗོད་པ་ན། མོས་སྤྱི་སྤྱོད་ཁ་པར་བཀོལ་ན་ཆོག་ཚུལ་བརྗོད་པའི་ཐོག ངེད་གཉིས་ཀྱི་སྒོར་མོ་ཆིག་སྟོང་ལྕགས་སྒོར་དུ་བརྗེ་རོགས་བྱས་ནས་ཁ་པར་བཀོལ་སྐབས་ལྕགས་སྒོ་བཅུ་རེ་བཅུ་རེ་བླུག་དགོས་ཚུལ་བཤད། 

 ངེད་གཉིས་ཨོ་ས་ཁར་འགྲོ་བའི་ལམ་བར་དུ་མོས་སེམས་ཁྲལ་ཚད་མེད་བྱེད་ཀྱིན་འདུག་པས། ངས་མོ་ལ་ངེད་གཉིས་བདེ་བདེ་ཐང་ཐང་ཡིན་ཚུལ་དང་། བོད་པ་ཚོས་ཅ་དངོས་ཤིག་བརླགས་ན་དེས་བགེགས་བར་ཞི་འགྲོ་བའི་ཡིད་ཆེས་བྱེད་ཚུལ་སྨྲས་ནས་སེམས་གསོ་གང་ཐུབ་བགྱིས། ང་ལ་གློ་ཁུག་དེ་ཚུར་རག་པའི་ཚོར་སྣང་ཁྱད་མཚར་ཞིག་སྐྱེས་ནས་སེམས་ཁྲལ་དེ་ཙམ་མ་བྱུང་ཡང་། གློ་ཁུག་ནང་དངུལ་དམར་མང་པོ་ཡོད་པས་གཏན་དུ་བོར་སྲིད་པའང་གསལ་པོར་རྟོགས་ཡོད། 

 ངེད་གཉིས་ཨོ་ས་ཁ་ཡི་བོར་རྙེད་ལས་ཁུངས་སུ་འབྱོར་ནས་ཡར་ཞུ་བྱེད་སྐབས། ཕྱི་རྒྱལ་མགོ་སེར་ཕོ་མོ་གཉིས་ཀྱང་དེར་འབྱོར་འདུག ཁོ་གཉིས་ཀྱིས་ངེད་གཉིས་ཀྱི་ཡར་ཞུ་ལ་ཉན་རྗེས། བུད་མེད་དེས་ཐེངས་གཅིག་ལ་མོའི་གློག་ཁུག་ཕེ་ར་སིའི་ནང་རྐུ་ལ་ཤོར་བའི་སྐོར་དང་། ཉེན་རྟོག་པར་ཡར་ཞུ་བྱས་ན་ལེགས་ཚུལ་བརྗོད། སྐྱེས་པ་དེས”སེམས་ཁྲལ་བྱེད་མི་དགོས། དུས་ཚོད་ཀྱི་སྔ་ཕྱི་མ་གཏོགས་ཁྱོད་ཀྱི་གློ་ཁུག་རག་ངེས། ཉི་ཧོང་གི་མི་རྣམས་ཤིན་ཏུ་ལེགས། ཡོད་ཚད་བདེ་འཇགས་རེད”ཟེར་བ་ན། བོར་རྙེད་ལས་ཁུངས་ཀྱི་མི་དེའི་ངོ་གདོང་ལ་འཐད་པའི་འཛུམ་ཞིག་རྒྱས་འདུག 

 དེ་ནས་ངེད་གཉིས་ཀྱིས་ཉེན་རྟོག་ལས་ཁུངས་སུ་ཕྱིན་ནས་ཡར་ཞུ་བགྱིས་པ་ན། ཉེན་རྟོག་པ་དེ་གཉིས་ཀྱིས་དོ་ཁུར་ཆེན་པོས་དངོས་པོ་རྣམས་ཀྱི་ཐོ་ཞིབ་མོ་ཞིག་བཀོད་པ་དང་། ངེད་གཉིས་འབྲེལ་གཏུག་བྱེད་སའི་ཁ་པར་ཨང་གྲངས་མེད་པས། མགྲོན་ཁང་ཞིག་བཙལ་ནས་དེའི་ཁ་པར་ཨང་གྲངས་ཁྱེར་ཤོག་ཟེར། 

 ཉེན་རྟོག་ལས་ཁུངས་ནས་དོན་རྗེས། ངེད་གཉིས་ཀྱིས་ཉེ་འགྲམ་གྱི་ཚོང་ཁང་དག་གི་ནང་ཕྲན་ཙམ་ཉུལ་ནས་ཉིན་གུང་ཁ་ལག་ཟོས། ཁ་ལག་ཟོས་ཚར་དུས་ཆུ་ཚོད་བཞི་པ་ཟིན་ལ་ཉེ་བས། ངེད་གཉིས་ཀྱིས་ཤིན་ཨོ་ས་ཁའི་བོར་རྙེད་ལས་ཁུངས་སུ་ཁ་པར་གཏོང་རྒྱུའི་ཚབ་ཏུ་ཐད་ཀར་འགྲོ་བའི་ཐག་བཅད། འོན་ཀྱང་མ་སོང་སྔོན་དུ་ཨོ་ས་ཁ་ཡི་བོར་རྙེད་ལས་ཁུངས་སུ་ཕྱིན། 

 མོ་ལས་ཁུངས་ཀྱི་ནང་དུ་འཛུལ་ནས་ལས་བྱེད་ལ་སྐད་ཆ་བྱེད་སྐབས། ང་རང་ཕྱི་ལ་བསྒུགས་ནས་བསྡད། ངས་ཤེལ་གྱི་སྒོ་ནས་མོས་ལས་བྱེད་ལ་ཅི་ཞིག་འགྲེལ་བཞིན་པ་མཐོང་ཐུབ། ཕྲན་ཙམ་གྱི་རྗེས་སུ་མོས་ཤེལ་གྱི་སྒོ་ཕྱེ་ནས་ང་རང་ནང་དུ་བོས། ང་རང་ནང་དུ་འབྱོར་དུས། མོའི་ངོ་གདོང་ལ་དགའ་སྤྲོའི་འཛུམ་མདངས་ཀྱིས་གང་འདུག་པས། ངས་གློ་ཁུག་རྙེད་ཡོད་པ་ཤེས། ལས་བྱེད་པ་དེས་ངེད་གཉིས་ཀྱི་གློ་ཁུག་དེ་ཨོ་ས་ཁའི་རྒྱལ་ཁང་གི་ཉེ་འགྲམ་གྱི་འབབ་ཚུགས་ཤིག་ཏུ་ཡོད་ཚུལ་བརྗོད་དེ་ཤོག་ལྷེབ་ཅིག་སྤྲད་བྱུང་། ངེད་གཉིས་ཀྱིས་ཁོ་ལ་ཡང་ཡང་ཐུགས་རྗེ་ཆེ་ཞུས་ནས་དགའ་སྤྲོའི་ངང་གློ་ཁུག་ལེན་དུ་ཕྱིན། 

 དེ་གའི་ལས་བྱེད་ཀྱིས་མོ་ལ་མིང་དང་ལོ་ཚད་འགོད་དུ་བཅུག་རྗེས། ཡུས་དང་ངོ་སོའི་རྣམ་འགྱུར་ཅི་ཡང་མེད་པར་གློག་ཁུག་ལག་ཏུ་བཞག་ནས་ནང་དུ་ལྟ་དགོས་པའི་བརྡ་ཞིག་བསྟན། མོས་གློ་ཁུག་གི་ཁ་ཕྱེ་ནས་ནང་ལ་ལྟ་ཙམ་བགྱིས་ནས་ཚང་ཡོད་པའི་རྣམ་འགྱུར་ཞིག་བསྟན་ནས་གློ་ཁུག་གི་སྒོ་བརྒྱབས། ངེད་གཉིས་ཀྱིས་སྔར་ལྟར་ལས་བྱེད་དེ་ལ་ཐུགས་རྗེ་ཆེ་ཞུས་ནས་ཕྱི་ལ་དོན། 

 དེ་རྗེས་ངེད་གཉིས་མེ་འཁོར་ལ་བསྡད་དེ་ཧ་ཁོ་ནི་ལ་ཡོང་སྐབས། མོས་ཉི་ཧོང་ནང་ཨ་སྒོར་དུང་ཕྱུར་གཅིག་ལྷག་རྙེད་པ་བདག་པོ་ལ་ཕྱེར་སྟེར་བ་དང་། ༢༠༡༡ལོར་ས་ཡོམ་དང་ཆུ་ལོག་རྒྱུགས་ནས་གཏོར་སྐྱོན་ཆེན་པོ་བྱུང་སྐབས། མི་རྣམས་ཀྱིས་སོ་སོས་རྙེད་པའི་ཆ་དངོས་རྣམས་བདག་པོ་ལ་ཕྱིར་སྟེར་བའི་གནས་ཚུལ་དྲྭ་ཐོག་ཏུ་འདུག་པའི་སྐོར་ལབས་བྱུང་། ངས་དེ་དག་ཉན་བཞིན་བསམ་གཞིགས་བྱེད་སྐབས། ང་ཚོ་བོད་པའི་སྤྱི་ཚོགས་ནང་མཚམས་རེར་མི་ཞིག་གིས་སྒོར་མོ་འབོར་ཆེན་ཞིག་རྙེད་དེ་བདག་པོ་ལ་ཕྱིར་བྱིན་པའི་གནས་ཚུལ་བྱུང་དུས། དྲྭ་ཐོག་ཏུ་ས་ཁྱབ་རྡོ་ཁྱབ་གཏོང་བའི་གནས་ཚུལ་དེ་དྲན་བྱུང་།།

2018.2.1ཉིན། ཞོགས་པའི་ཆུ་ཚོད 6:06

ཁྱིམ་དུ་འབྱོར་བ། 

ནམས་གསལ་པོ་ཞིག་ལངས་མི་འདུག ཕྱི་ན་ཀྱ་ཀའི་སྒྲ་བར་མཚམས་མེད་པར་གྲག་བཞིན་མཆིས་ལ། ཀྱ་ཀའི་བར་མཚམས་མེད་པའི་སྐད་ཅོར་གྱི་ཁྲོད་དུ་གྲོང་པའི་ཁྱི་རེ་ཟུང་གི་ཟུག་སྐད་གྲགས་ནས་སླར་འཇགས་འགྲོ། ངས་ཉལ་ཁང་གི་མལ་ཁྲིའི་སྟེང་དུ་ཁ་སྦུབ་ཏུ་<<ཉི་ཧོང་དུ་བསྐྱོད་པའི་ཉི་ཐོ>>ཡི་མཇུག་སྐྱོང་ཐབས་བྱེད་ཀྱིན་ཡོད། ངས་སོ་སོའི་ལག་ཟུང་གི་མཛུབ་མོས་གློག་ཀླད་ཀྱི་མཐེབ་གཞོང་གནོན་བའི་ཚག་སྒྲ་ཐོས་ཐུབ། 

 ང་རང་ཁ་སང་ཕྱིར་བྷེལ་ཀོབ་ཏུ་བདེ་བར་འབྱོར་སོང་བ་དང་། འདིའི་ཡོད་ཚད་ལ་རྒྱུས་མངའ་ཕྲན་ཙམ་ལྡན་པས་སེམས་པ་ལྷོད་ལྷོད་དང་བློ་བདེ་བདེ་ཞིག་རེད། ངས་གང་མགྱོགས་ཉི་ཧོང་དུ་བསྐྱོད་པའི་སྐོར་གྱི་ཉིན་ཐོའམ་ཟིན་བྲིས་འདིའི་མཇུག་བསྐྱངས་ནས་སོ་སོའི་དྲྭ་བའི་ཐོག་ཏུ་འགོད་འདོད་པ་དང་སྦྲགས། རང་ཉིད་ཀྱི་ཉིན་ཐོ་འདི་གྲགས་ཅན་གྱི་རྩོམ་པ་པོ་གཞན་རྣམས་ཀྱིས་བྲིས་པ་ལྟར་ཤིན་ཏུ་ཟབ་ཅིང་རྒྱས་ལ། ཉི་ཧོང་གི་ལོ་རྒྱུས་དང་། རིག་གཞུང་། མི་གཞི། སྤྱི་ཚོགས་སོགས་གསལ་པོར་སྟོན་ཐུབ་པ་ཞིག་མ་ཡིན་པས། འདིའི་རིན་ཐང་ལ་ཐེ་ཚོམ་ཕྲན་ཙམ་ཞིག་ངང་གིས་སྐྱེ་ཡོང་། ཡིན་ན་ཡང་། རང་གིས་འདི་ལ་དུས་ཚོད་དང་ནུས་ཤུགས་གང་འཚམ་བཏང་ཟིན་སྟབས།  མཇུག་ལེགས་པོ་ཞིག་བསྡུ་བའི་འབབ་བརྩོན་བགྱིད་དགོས་པ་འདྲ།།

2018.2.5ཉིན། དགོང་མོའི་ཆུ་ཚོད 8:16

མཇུག་བསྡུ་བ། 

ང་རང་ཉི་ཧོང་ནས་ཕྱིར་རྒྱ་གར་ལྷོ་ཕྱོགས་སུ་འབྱོར་ཏེ་བདུན་ཕྲག་གཅིག་འགྲོ་ལ་ཉེ་བ་དང་། ངས་ཉི་ཧོང་ནང་མཐོང་ཐོས་མྱོང་གསུམ་བྱུང་བ་ཡོད་དོ་ཅོག་སེམས་ཀྱི་དྲན་འཆར་ཙམ་དུ་གྱུར་ཟིན། ངོ་མ་གནམ་གྲུའི་སྒེའུ་ཁུང་ནས་མཐོང་བའི་ཚོན་མདོག་དབེན་པའི་ཐྲོ་ཁེའུ་གྲོང་ཁྱེར་དང་། གདོང་ལ་དཀར་དམར་གྱི་རྫས་ལེགས་པར་བྱུགས་ཤིང་གྱོན་ཆས་ལྷུག་ལྷུག་གྱོན་པའི་ཉི་ཧོང་གི་སྒེག་ལྡན་མ་རྣམས་དང་། ལྷམ་དང་གྱོན་ཆས། ཐ་ན་རྒྱབ་ཁུག་ཀྱང་རྙིང་ནས་ཐད་ཀྱང་ད་རུང་གཙང་མར་བཀྲུས་ནས་གྱོན་པའི་ཉི་ཧོང་གི་སྐྱེས་པ་དག་དང་། ངོ་གདོང་ལ་ངལ་དུབ་དང་གཉིད་ཀྱིས་ཁེངས་ཤིང་། གཡས་གཡོན་ལ་ལྟ་ཙམ་ཡང་མི་བྱེད་པར་སོ་སོའི་ཁ་པར་གྱི་འཆར་ཡོལ་ལ་ཅེར་བའམ། དཔེ་ཀློག་བྱེད་པ། ཡང་ན་མིག་ཟུང་བཙུམས་ནས་ས་འོག་མེ་འཁོར་ནང་སྐྱོད་བཞིན་པའི་ཉི་ཧོང་གི་མི་རྣམས་དང་། རླངས་འཁོར་གཅིག་ཀྱང་འགྲོ་མཁན་མེད་ཀྱང་མི་རྣམས་གློག་སྔོན་པོ་འཆར་རྒྱུར་སྒུག་བཞིན་ཡོད་པའི་ཉི་ཧོང་གི་ལམ་མདོ་དང་། གྲོང་ཁྱེར་གྱི་དཀྱིལ་བཤགས་ནས་རྒྱུ་ཡང་། ནང་དུ་གད་སྙེགས་དང་འབགས་བཙོག་ཅི་ཡང་མེད་པར་ཧ་ལམ་གངས་ཆུ་ལྟར་དྭངས་པའི་ཉི་ཧོང་གི་རྒྱུགས་ཆུ་དང་། སྣ་འཛོམས་ཚོང་ཁང་རེ་རེའི་ཕྱོགས་གཅིག་ན་བཤམས་པའི་ཉི་ཧོང་གི་འདོད་སྲེད་དུས་དེབ་རྣམས་དང་། རབ་ཏུ་མཛེས་པའི་ལྗོན་ཤིང་གིས་བརྒྱན་པའི་ཉི་ཧོང་གི་ཡུལ་ལྗོངས་སོགས་ཡོད་ཚད་སེམས་ཀྱི་གློག་ཀླད་ནང་དུ་ཉར་བའི་པར་རིས་རེ་རེར་གྱུར་འདུག 

ད་ནི་ཉིན་མ་རེ་རེ་ཕར་འདས་པ་དང་ལྷན་དུ་ཉིན་ཐོ་འདིའི་མཇུག་སྐྱོང་བའི་སྤྲོ་སྣང་ཇེ་ཆུང་ནས་ཇེ་ཆུང་དང་། ཉིན་ཐོ་འདིར་དོན་སྙིང་ཅི་ཡོད་ཀྱི་དོགས་པ་ཇེ་ཆེ་ནས་ཇེ་ཆེ་རུ་འགྲོ་བཞིན་འདུག་པས།གང་མགྱོགས་མཇུག་བསྡུ་ཐབས་བྱེད་པ་ལས་སྔར་གྱི་འཆར་གཞི་ལྟར་ཐོག་མར་ཆུང་ཆུང་སྐབས་སུ་རྒྱ་ནག་གིས་བཟོས་པའི་གློག་བརྙན་གྱིས་རང་ཉིད་ཀྱི་བྱིས་པའི་སེམས་ཁམས་ལ“རི་པིན་འདྲེ་དམག་ལྕགས་ཞྭ་ཅན”གྱི་བག་ཆགས་ཅི་འདྲ་ཞིག་བཞག་ཚུལ་དང་། དེ་ནས་རྒྱ་གར་དུ་འབྱོར་ནས་ཨིན་སྐད་ཕྲན་ཙམ་ཀློག་ཐུབ་པར་གྱུར་རྟིང་། ཉི་ཧོང་གི་སྙན་ངག་པ་གྲགས་ཅན་མཱ་ཙོ་བྷ་ཤོ(Matsuo Basho)ཡི་སྙན་ངག་དང་ལྗོངས་རྒྱུའི་ཉིན་ཐོ་བཀླགས་ནས་ཉི་ཧོང་ལ་ལྟ་ཚུལ་གསར་པ་སྐྱེས་པའི་སྐོར། དེ་རྗེས་དངོས་སུ་ཉི་ཧོང་ལ་སྐྱོད་པའི་གོ་སྐབས་ཐོབ་དུས་ཡང་ཇི་ལྟར་ཉི་ཧོང་དང་འབྲེལ་བའི་མྱོང་ཚོར་གསར་པ་གསར་རྐྱང་བྱུང་བའི་སྐོར་ཅུང་རྒྱས་པོ་ཞིག་འབྲི་ཐུབ་མ་སོང་། 

མཇུག་མཐར་དུས་རབས་བཅུ་བདུན་པའི་ནང་བྱུང་བའི་ཉི་ཧོང་གི་སྙན་ངག་པ་གྲགས་ཅན་བྷ་ཤོ་ཡི་ཕུལ་བྱུང་བརྩམས་ཆོས་<<ནུབ་མཐའ་རུ་ཟུག་པའི་ལམ་བུ་དོག་མོ>>ལས་དུམ་བུ་ཞིག་བསྒྱུར་ནས་འགོད་རྒྱུ་ཡིན། དེའི་རྒྱུ་མཚན་ནི་ངས་ཁོང་གི་བརྩམས་ཆོས་འགའ་ཤས་དང་སྙན་ངག་ཁ་གཅིག་བཀླགས་ནས་ཉི་ཧོང་ལ་ལྟ་སྟངས་གསར་པ་ཞིག་སྐྱེས་པས་ཡིན་ལ། ང་རང་དངོས་སུ་ཉི་ཧོང་ནང་དུ་ཕྱིན་ནས་མི་རྣམས་ལ་ལམ་འདྲི་བ་དང་། དེ་མིན་གྱི་རོགས་རམ་དགོས་པའི་རེ་སྐུལ་བྱེད་སྐབས་ཁོ་ཚོའི་ཡ་རབས་སྤྱོད་ཚུལ་གྱིས་བྷ་ཤོའི་བརྩམས་ཤོས་ནང་བཀོད་པའི་ཉི་ཧོང་གི་མི་གཤིས་ཡང་ཡང་དྲན་དུ་བཅུག་པས་ཡིན། 

གཤམ་དུ་བཀོད་པ་ནི་དུམ་བུ་ཐུང་ཐུང་དེ་རེད། 

“བདག་གི་གྲོགས་པོ་ཞིག་ནཱ་སོ་(Nasu)ཞིང་ཆེན་གྱི་ཁོ་རོ་བྷན(Kurobane)གྲོང་བརྡལ་དུ་བཞུགས་བཞིན་ཡོད། གྲོང་བརྡལ་དེ་ནི་ན་ཐང་གཞི་རྒྱ་ཆེན་པོ་ཞིག་འདུག་པ་དེའི་ཕར་ཕྱོགས་སུ་ཡོད། བདག་གིས་ན་ཐང་དེའི་དཀྱིལ་ནས་ཐད་ཀར་རིང་དུ་ཐེན་པའི་མགྱོགས་ལམ་དེ་དེད་ནས་འགྲོ་བའི་ཐག་བཅད་པ་ཡིན། བདག་གིས་ཐག་རིང་གི་ས་ན་གྲོང་ཚོ་ཆུང་ཆུང་ཞིག་ཡོད་པ་མཐོང་མོད། འོན་ཀྱང་དེར་མ་འབྱོར་གོང་དུ་ཆར་པ་འབབ་འགོ་བརྩམས་ཤིང་མུན་པ་འཐིབས་སོང་བས། ཞག་གཅིག་ལ་ཁེར་རྐྱང་དུ་ལུས་པའི་ཞིང་པའི་ཁང་པ་ཞིག་ཏུ་བསྡད་དེ་ཕྱི་ཉིན་སྔ་མོ་ནས་སླར་ཡང་ལམ་དུ་ཆས། བདག་རྩྭ་གསེང་ནས་རྐང་ཐང་དུ་སྐྱོད་བཞིན་པའི་ཚེ་ན། ལམ་གྱི་གཞོགས་སུ་རྟ་ཞིག་རྩྭ་ལ་རོལ་བཞིན་པ་དང་། ཞིང་པ་ཞིག་གིས་ཟོར་བ་ཡིས་རྩྭ་འབྲེག་བཞིན་པ་དོ་སྣང་བྱུང་། ངས་ཞིང་པ་དེར་རྟ་གཡོར་རོགས་ཞེས་རེ་བ་ཞུས་པ་ན། ཁོ་ཡུད་ཙམ་ཐེ་ཚོམ་ངང་ལངས་ནས་མཐར་ངོ་གདོང་ལ་ཤ་ཚ་བའི་རྣམ་འགྱུར་ཞིག་དང་བཅས“ན་ཐང་འདིར་ལམ་མདོ་བརྒྱ་ཕྲག་དུ་མ་ཡོད་པས། ཁྱོད་ལྟ་བུའི་མི་རྒྱུས་མེད་ཅིག་ལམ་སེང་ལམ་ནོར་ཐེབས་ངེས། རྟ་འདིས་ལམ་ཤེས་ཀྱི་ཡོད། རྟ་འདི་མུ་མཐུད་མདུན་དུ་མི་འགྲོ་བའི་མཚམས་སུ་ཐོན་སྐབས་ཁྱོད་ཀྱིས་ཕྱིར་ཐོངས་ཤོག”ཅེས་སྨྲས་བྱུང་། དེ་བས་བདག་གིས་རྟ་ལ་བཞོན་ནས་སྐྱོད་འགོ་བརྩམས་པ་ན། བྱིས་པ་ཆུང་ཆུང་གཉིས་བདག་གི་རྗེས་སུ་རྒྱུགས་བྱུང་། ཁོ་གཉིས་ཀྱི་གཅིག་ནི་ཁེ་སན(Kasane)ཞེས་པའི་བུ་མོ་ཞིག་རེད་ལ། དེའི་གོ་དོན་ནི་སྣ་འཛོམས་རེད། བདག་གིས་མོའི་མིང་དེ་ཅུང་ཁྱད་མཚར་བོ་དང་ཐུན་མོང་མ་ཡིན་པའི་སྙན་པོ་ཞིག་རེད་དྲན་བྱུང་། 

མཐར་བདག་གྲོང་ཚོ་ཆུང་ཆུང་ཞིག་ཏུ་འབྱོར་སྟབས། རྟ་སྒའི་ཐོག་ཏུ་དངུལ་ཕྲན་ཙམ་ཞིག་བཏགས་ནས་རྟ་དེ་ཕྱིར་མངགས་པ་ཡིན།”