དེར་བརྟེན་ཕྱོགས་གཅིག་ནས་བལྟས་ན། ང་ཚོའི་ཁང་པའི་ནང་དང་ཁྱིམ་མིའི་གཏམ་གླེང་ལྟ་བུའི་ཁྲོད་དུ་དགེ་འདུན་ཆོས་འཕེལ་ལགས་རྟག་ཏུ་ཡོང་གི་རེད། ངའི་གཅུང་པོ་ནི་ཚོར་སྣང་ཤིན་ཏུ་སྐྱེན་པའི་མི་ཞིག་དང་། དཔེ་ཀློག་བྱེད་རྒྱུར་དགའ་ཞིང་། ཞི་ལྷོད་དང་ཤེས་འདོད་ཆེན་པོ་ཅན་ཞིག་རེད། ཁོང་བོད་ཡིག་ལ་མཁས་པའི་ཐོག རྒྱ་ཡིག་དང་ཨིན་ཡིག་ལའང་མཁས་པོ་ཡོད། ཁོང་ཕལ་ཆེར་ང་ཚོའི་སྤུད་མཆེད་ཧོར་ཁང་བསོད་ནམས་དཔལ་འབར་བརྒྱུད་ནས་དགེ་འདུན་ཆོས་འཕེལ་ལགས་དང་མཇལ་བ་ཡིན་ངེས། ཧོར་ཁང་བསོད་ནམས་དཔལ་འབར་ནི་ཧོར་ཁང་གཞིས་ཁང་ནང་བཞུགས་མཁན་གྱི་སོག་པོའི་དགེ་བཤེས་ཆོས་གྲགས་ལགས་ཀྱི་སྤྱིན་བདག་རེད་ལ། དགེ་བཤེས་ཁོང་ནི་དགེ་འདུན་ཆོས་འཕེལ་ལགས་ཀྱི་གྲོགས་པོ་རེད། བསོད་ནམས་དཔལ་འབར་ཡང་ཤེས་ཡོན་ཅན་ཞིག་དང་། དགེ་འདུན་ཆོས་འཕེལ་ལགས་དང་གཅུང་པོ་གཉིས་ཀའི་འགྲོ་རོགས་འདུག་རོགས་བཟང་པོ་ཞིག་རེད། 

ངས་དགེ་འདུན་ཆོས་འཕེལ་ལགས་རྒྱ་གར་དུ་མ་ཕེབས་སྔོན་ལ་ཐོག་མར་མཇལ་བྱུང་། ཁོང་ང་ཚོའི་ནང་དུ་གཅུང་པོ་གཟིགས་སུ་ཕེབས་བྱུང་། ཁོང་གིས་གྲྭ་ཆས་མནབས་མི་འདུག་པས། དེ་དུས་ཕལ་ཆེར་གྲྭ་པ་བསྡད་མེད་པ་འདྲ། ཁོང་གིས་བལ་གྱི་ཕྱུ་པ་སྔོ་ནག་ཅིག་གྱོན་ཞིང་། སྐེད་རགས་ཅུང་ལྷུག་ལྷུག་ཅིག་བསྡམས་འདུག ཁོང་གི་དབུ་སྐྲ་ཤིན་ཏུ་ཐུང་ཡང་བཞར་བ་ཞིག་མ་རེད། ཁོང་ལ་ཅུང་ཟད་སྐྱོ་ཉམས་དོད་པའི་ངོ་གདོང་ཕྲ་བོ་ཞིག་ཡོད་ཅིང་། དེ་ནི་མདོག་ཉེས་པོ་ཞིག་མ་ཡིན་པར་དེས་ཁོང་གི་ཞི་འཇམ་གྱི་གཤིས་སྤྱོད་སྟོན་གྱི་འདུག ཁོང་གི་གཟུགས་ཚད་འབྲིང་ཙམ་ཡིན་ཞིང་། གསུང་གླེང་གནང་སྐབས་སྐད་ངག་འཇམ་ཞིང་ཁེངས་པ་ཆུང་། 

གཅུང་པོས་དགེ་འདུན་ཆོས་འཕེལ་དང་ལྷན་དུ་ཤེས་ཡོན་དང་འབྲེལ་བའི་བགྲོ་གླེང་ངམ་ཉན་ན་འདོད་པའི་གཏམ་གླེང་གནང་སྟེ་ཕྱི་དྲོ་ཧྲིལ་པོ་སྐྱེལ་བ་དང་། དེའི་སྐོར་ཁོང་གིས་ང་ལ་རྗེས་སུ་གསུང་གི་རེད། དགེ་འདུན་ཆོས་འཕེལ་ལགས་ང་ཚོའི་ཁང་པའི་ནང་ལ་དེ་ཙམ་མི་ཡོང་མོད། གཅུང་པོ་ཡང་ཡང་ཁོང་མཇལ་བ་དང་བགྲོ་གླེང་བྱེད་དུ་འགྲོ་ཡི་རེད། དེ་བས་ངས་གཅུང་པོའི་ས་ནས་ཁོང་གི་སྐོར་མང་པོ་ཞིག་གོ་ཐོས་བྱུང་བ་དང་། གཅུང་པོས་ཁོང་ལ་བསྟོད་བསྔགས་ཚད་མེད་བྱས་སྟབས། ང་ཡང་ཁོང་ལ་གུས་བརྩི་ཆེན་པོ་ཡོད་པར་གྱུར་སོང་། 

ངས་གཅུང་པོས་ང་ལ་དགེ་འདུན་ཆོས་འཕེལ་ལགས་ཀྱི་ཡབ་མཐུ་ནུས་ཆེ་བའི་སྔགས་པ་ཞིག་སྟེ། ཉམས་རྟོགས་ཀྱི་རྟགས་མཚན་མངོན་སུམ་དུ་སྟོན་ཐུབ་མཁན་ཞིག་ཡིན་ཚུལ་གསུངས་པ་གསལ་པོར་དྲན་སོས་ཀྱི་འདུག ངས་ད་རུང་དགེ་འདུན་ཆོས་འཕེལ་ལགས་ལ་རྭ་ཅོ་ཅན་གྱི་སེམས་ཅན་ཞིག་གིས་བདས་ནས་དབུས་སུ་བརྫངས་པའི་རྨི་ལམ་ཁྱད་མཚར་འགའ་ཡང་ནས་བསྐྱར་དུ་རྨིས་རྗེས། ཁོང་ཨ་མདོ་ནས་ལྷ་སའི་འབྲས་སྤུང་དགོན་ལ་ཞུགས་པར་ཕེབས་པའི་སྐོར་གོ་བྱུང་། ཁོང་གིས་རྭ་ཅོ་ཅན་གྱི་སེམས་ཅན་དེ་དགེ་ལུགས་ཀྱི་སྲུང་མ་དམ་ཅན་ཆོས་རྒྱལ་དུ་ངོས་འཛིན་གནང་ཞིང་། རྨི་ལམ་དེའི་རྟགས་མཚན་ནི་ཁོང་ཨ་མདོ་ནས་ལྷ་སར་ཕེབས་ཏེ་དགེ་ལུགས་པའི་མཁས་པ་ཞིག་གནང་དགོས་ཚུལ་དུ་དགོངས་ཡོད་འདུག དེར་བརྟེན་ཕ་མེས་ཀྱི་ཆོས་བརྒྱུད་རྙིང་མ་ཤུགས་ཆེ་བའི་དགེ་འདུན་ཆོས་འཕེལ་ལགས་ད་ནི་དགེ་ལུགས་པ་ཞིག་ཏུ་གྱུར་བ་རེད། 

དགེ་འདུན་ཆོས་འཕེལ་ལགས་ཀྱིས་ད་རུང་གཅུང་པོ་ལ་ཁོང་གྲྭ་པ་ཡིན་པའི་སྐབས། སྐྱབས་རྗེ་ཕ་བོང་ཁ་ཁོང་ལ་ཤིན་ཏུ་མཉེས་པོ་ཡོད་ཚུལ་ཡང་བརྗོད་འདུག མཚམས་རེར་དགེ་འདུན་ཆོས་འཕེལ་ལགས་ཕ་བོང་ཁ་ཡི་མཚམས་ཁང་དུ་བླ་ཆེན་ཁོང་མཇལ་དུ་ཕེབས་པ་དང་། ཕ་བོང་ཁས་ཁོང་བརྩེ་བ་ཟབ་མོས་འཁྱུད་དེ་བྱིན་རླབས་གནང་བ་མ་ཟད། ད་རུང་ཁོང་གིས་ཀུ་རེའི་ངང་དགེ་འདུན་ཆོས་འཕེལ་གྱི་རྒྱབ་ལ་བྱིལ་བྱིལ་གནང་སྟེ་དཔེ་ཆ་བ་རྣམས་སློབ་གཉེར་ལ་ཐིམ་དྲགས་པ་དང་། སོ་སོའི་བདེ་ཐང་སྣང་མེད་དུ་བསྐྱུར་དྲགས་པས་ཉེན་ཁ་ཆེན་པོ་འགྱུར་སྲིད་ཅེས་གསུང་གི་ཡོད་པའི་ཐོག ཕ་བོང་ཁ་རིན་པོ་ཆེས་ད་དུང་ཁོང་ལ་དངུལ་དང་ཡོ་བྱད་ཀྱི་རྔན་པ་སྟེར་ནས་ཁོང་ལ་རྒྱབ་སྐྱོར་གནང་གི་ཡོད་འདུག དེ་མིན་ད་དུང་དགེ་འདུན་ཆོས་འཕེལ་ལགས་ཀྱིས་སྐྱབས་རྗེ་ཁྲི་བྱང་རིན་པོ་ཆེ་(༧རྒྱལ་དབང་སྐུ་ཕྲེང་བཅུ་བཞི་པའི་ཡོངས་འཛིན།)ཡང་ཁོང་ལ་ཤིན་ཏུ་བརྩེ་བ་དང་། ཁོང་ལ་རོགས་སྐྱོར་གནང་གི་ཡོད་ཚུལ་གསུང་གི་རེད། 

མཚམས་རེར་གཅུང་པོས་དེང་གི་དུས་སུ་སྔོན་ཆད་ཀྱི་ལོ་ཙཱ་བ་དང་འདྲ་བའི་ལོ་ཙཱ་བ་ཚད་ལྡན་གཅིག་རང་ཡོད་ཅིང་། དེ་ནི་དགེ་འདུན་ཆོས་འཕེལ་ལགས་རེད་ཅེས་གསུང་གི་རེད། ཁོང་རྒྱ་གར་གྱི་འགྲུལ་བཞུད་ནས་ཕྱིར་ཕེབས་རྗེས། པཱ་ལི་ནས་ནང་པའི་ཆོས་ཀྱི་ཚིགས་སུ་བཅད་པ་བསྒྱུར་གནང་བ་དང་། ང་ཚོའི་ཁྱིམ་ཚང་གིས་འགྱུར་འདི་དཔར་བའི་སྤྱིན་བདག་བྱེད་པའི་ཐག་བཅད་པ་རེད། ང་ཚོས་སྲོལ་རྒྱུན་ལྟར་དཔེ་ཆ་དེ་པར་ཤིང་གིས་དཔར་ཞིང་། ལྷག་པར་དུ་ཤིང་ལེབ་མང་པོ་ཞིག་གྲ་སྒྲིག་དང་བརྐོ་བའི་བཀོད་མངགས་བྱས་པ་རེད། ང་ཚོས་བླ་མ་དང་མཁས་པ། གྲྭ་ཚང་བཅས་ལ་རྒྱ་ཆེར་སྤེལ་བའི་ཆེད་གྲངས་ཀ་མང་པོ་ཞིག་དཔར་བ་རེད། དགེ་འདུན་ཆོས་འཕེལ་ལགས་ཀྱི་འགྱུར་དེ་ཤིན་ཏུ་སྙན་ཞིང་འཇིབས་ལ་ཡིད་སེམས་འགུལ་བ་ཞིག་ཡིན་པའི་ཐོག ཏན་ཏན་པཱ་ལིའི་མ་ཡིག་དང་མཐུན་པ་ཞིག་ཡིན་ངེས་རེད། ངས་འགྱུར་དེ་ཐེངས་གྲངས་མེད་ལ་བཀླགས་པ་ཡིན་ལ། ད་རུང་ཡང་ཚིགས་བཅད་འདི་དྲན་སོས་ཀྱི་འདུག་སྟེ། 

གཉིད་མེད་པ་ལ་མཚན་མོ་རིང་།།

ངལ་བར་གྱུར་ལ་དཔག་ཚད་རིང་།།

དམ་པའི་ཆོས་ནི་མི་ཤེས་པའི།།

བྱིས་པ་རྣམས་ལ་འཁོར་བ་རིང་།།

ང་ཚོའི་ཁྱིམ་ཚང་གིས་བདུད་འཇོམས་རིན་པོ་ཆེའི་དག་ཡིག་དཔེ་ཆ་དང་། ༧རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་ཐུན་མིན་རྣམ་ཐར་ལྟ་བུའི་བརྩམས་ཆོས་གཞན་རྣམས་ཀྱང་དཔར་བ་རེད། མཁས་དབང་བཀྲ་ཤིས་ཚེ་རིང་ལགས་ཀྱིས་ང་ལ་ཚངས་དབྱངས་རྒྱ་མཚོའི་རྣམ་ཐར་དེ་ཉེ་ཆར་བོད་ནས་སླར་ཡང་པར་སྐྲུན་བྱས་ཡོད་པའི་སྐོར་བརྗོད་བྱུང་། ཡིན་ན་ཡང་། ང་ཚོས་དཔར་བའི་ཆོས་ཀྱི་ཚིགས་སུ་བཅད་པའི་འགྱུར་དེའི་པར་མ་གཅིག་ཀྱང་ལྷག་མེད་པ་འདྲ། པར་མ་གཞན་ཞིག(ལྕགས་པར)ཀ་བློན་སྦུག་གི་བྷ་བྷོ་མཐར་ཕྱིན་ལགས་གྱིས་པར་བ་རེད་ལ། དེ་མིན་བྱང་ཆུབ་ཆེན་མོའི་ཆོས་ཚོགས་(Mahabodhi)ཀྱིས་ཀྱང་གཅིག་དཔར་བ་རེད།  

 ང་ཚོས་པར་ཤིང་རྣམས་ལྷ་སའི་གཞིས་ཁང་དུ་ཡོད་པའི་བཀའ་འགྱུར་ལྷ་ཁང་ནང་ཉར་ཚགས་བྱས་པ་ཡིན། ལྷ་ཁང་དེ་ཀ་བཞི་གདུང་དྲུག་ཅིག་རེད། ང་ཚོས་པར་ཤིང་རྣམས་གྱང་ངོས་གཅིག་ལ་ཡོད་པའི་བང་ཁྲིའི་ཐོག་ཏུ་བརྩེགས་པ་དང་། མཚམས་རེར་སོ་སོའི་དགོས་མཁོའི་ཆེད་དུ་དཔེ་ཆ་དེ་དག་དཔར་འདོད་མཁན་གྱི་མི་གཞན་རྣམས་ལ་པར་ཤིང་དེ་དག་གཡོར་གྱི་ཡོད། ཐེངས་གཅིག་ལ་ང་རང་[ཡུལ་གཞན་ནས་]ལྷ་ས་ལ་ཕྱིར་ལོག་པ་ན། ངས་ཆོས་ཀྱི་ཚིགས་སུ་བཅད་པའི་པར་ཤིང་འདུས་པའི་པར་ཤིང་ཡོད་ཚད་མེད་པར་གྱུར་བ་མཐོང་། ངས་ང་རང་ཐག་རིང་དུ་འགྲོ་སྐབས་ཁྱིམ་གྱི་འགན་འཁུར་མཁན་ཨ་ཞང་ཀུན་མཁྱེན་ལ་དྲིས་པ་ཡིན།  ཁོང་གིས་པར་ཤིང་རྣམས་དཔར་མཁན་ཞིག་ལ་གཡར་ཡང་མི་དེའི་མིང་དྲན་གྱི་མི་འདུག་ཟེར། དེ་ནས་བཟུང་པར་ཤིང་རྣམས་མེད་པར་གྱུར་བ་རེད།  

ངའི་གཅུང་པོ་གཞུང་གི་ལས་དོན་སྒྲུབ་པར་ཕྱིན་ནས་ང་རང་གཅིག་པུར་ལྷ་ས་ལ་ཡོད་པའི་ཉིན་གཅིག་ལ། ངས་དགེ་འདུན་ཆོས་འཕེལ་ལགས་ལྷ་སའི་ཉེན་རྟོག་པས་འཛིན་བཟུང་བྱས་ཤིང་། ལྷ་ས་གྲོང་ཁྱེར་གྱི་ཁྲིམས་ཁང་དང་བཙོན་ཁང་སྣང་རྩེ་ཤག་ཏུ་བཙོན་འཇུག་བྱས་པའི་སྐོར་ཐོས་བྱུང་། སྣང་རྩེ་ཤག་ནི་ཇོ་ཁང་གི་ཉེ་འཁོར(བྱང་ཕྱོགས་ཀྱི་མཚམས་རང་རེད།)ན་ཡོད། 

ངས་འཕྲལ་མར་བློ་འཁེལ་བའི་གཡོག་པོ་གཉིས་མངགས་ཏེ་ཁོང་གི་གནས་སྟངས་ལ་འདྲི་རྩད་དང་། ཁོང་ལ་མལ་ཆས་དང་ཞལ་ལག་ཕྲན་ཙམ་བསྐྱལ་བ་ཡིན། གཡོག་པོ་གཉིས་ཚུར་ལོག་ནས་ང་ལ་སྐབས་དེར་གནས་སྟངས་དེ་འདྲའི་སྐྱོ་བོ་མེད་པ་དང་། བཙོན་སྲུང་བ་ཚོས་དགེ་འདུན་ཆོས་འཕེལ་ལགས་ཐོག་བརྩེགས་གོང་མའི་ཁང་མིག་ཅིག་གི་ནང་དུ་བཅུག་ཅིང་། དེ་ལ་སྒེའུ་ཁུང་ཡོད་པ་མ་ཟད། གནས་སྟངས་ཀྱང་ཨེན་ཙམ་ཡོད་པའི་སྐོར་བཤད་བྱུང་། བཙོན་པ་ཕལ་ཆེ་བ་ཐོག་བརྩེགས་འོག་མའི་ནང་བཅུག་ཡོད། སྣང་རྩེ་ཤག་ནི་ཐོག་སོ་གསུམ་ལྡན་གྱི་ཁང་བརྩེགས་ཤིག་ཡིན་ཞིང་། དེ་ནི་དགོན་པའམ་བླ་བྲང་རྙིང་པ་ཞིག་དང་འདྲ་ལ།སྔོན་ཆད་ཕལ་ཆེར་ཡིན་པའང་འདྲ། 

ངས་དགེ་འདུན་ཆོས་འཕེལ་ལགས་ལ་རྒྱ་གར་ནས་ཉོས་པའི་སྲིན་བལ་གྱི་ཕོ་ཁེབས་གསར་རྐྱང་ཞིག་དང་དེའི་གཡོགས་སོ་མ་ཞིག་བསྐུར་བ་ཡིན་ལ། ད་རུང་ཁོང་ལ་ཇ་ཇ་དེམ་གང་དང་དཀར་ཡོལ་(ཁ་གཅོད་དང་བཅས་པ་)ཞིག་བསྐུར་བའི་ཐོག གཡོག་པོ་ཚོར་ཁོང་ལ་རྒྱུན་དུ་ཞལ་ལག་སྐྱེལ་དུ་བཅུག་པ་ཡིན། ངས་ང་ཚོའི་མ་བྱན་ལ་ཁོང་གི་ཆེད་དུ་མོག་མོག་དང་། དེ་མིན་གྱི་ཟས་ཞིམ་པོ་འགའ་གཡོ་རུ་བཅུག་པ་ཡིན། དེ་ཡིས་མ་ཚད་ངས་ཁོང་ལ་གང་བསྐུར་བ་ཐམས་ཅད་གཙང་མ་དང་ཡག་པོ་བཟོས་པ་ཡིན། ངས་འདི་དག་ཐམས་ཅད་བརྒྱ་ཆ་བརྒྱར་བློ་ཁེལ་བའི་གཡོག་པོ་ཚོ་བརྒྱུད་ནས་ཁོང་ལ་བསྐུར་བ་ཡིན་། ཁོ་ཚོའི་ཁྲོད་ནས་གཅིག་ནི་ང་ཚོའི་མ་མ་སོ་ན་(Sona)ཡི་ཁྱོ་ག་དོན་གྲུབ་ཡིན་པ་ཡོད་ལ། གཞན་དེ་ཁྱོད་(འཇམ་དབྱངས་ནོར་བུ)ཀྱི་མ་མ་རྒན་མོ་པད་མ་ཚེ་དབང་གི་ཁྱོ་ག་ཟླ་བ་ཚེ་རིང་རེད། 

དགེ་འདུན་ཆོས་འཕེལ་ལགས་ཀྱིས་ཕྱིར་ང་ལ་ཐ་མག་སྒམ་ཆུང་གི་ནང་ངོས་སུ་བྲིས་པའི་ཡི་གེ་བསྐུར་བྱུང་། ཁོང་གིས་ད་རུང་སོ་སོས་བརྩམས་པའི་སྙན་ངག་ཀྱང་བསྐུར་གྱི་ཡོད་པའི་ཁྲོད་ནས་མང་པོ་ཞིག་ལ་ཆོས་དད་ཀྱི་རང་བཞིན་ཤུགས་ཆེན་ཡོད། ཡི་གེ་གཅིག་གི་ནང་དུ་ཁོང་གིས་ཐོག་ཁའི་སྒེའུ་ཁུང་ནས་ཐ་མག་གི་རྐུབ་རྟིང་ཞིག་གཤམ་གྱི་བཙོན་རའི་ནང་གཡུགས་པ་ན། བཙོན་པ་ཚོས་དེ་ལེན་ཆེད་ཕན་ཚུན་ཕུད་རེས་འཐེན་རེས་བྱས་པའི་སྐོར་འཁོད་འདུག ཁོང་གིས་ཉམ་ཐག་པའི་བཙོན་རོགས་ཚོ་ལ་གློ་བུར་གྱི་སྙིང་རྗེ་དྲག་པོ་ཞིག་སྐྱེས་བྱུང་ཚུལ་བྲིས་འདུག ངས་ཏག་ཏག་ཅིག་མི་དྲན་ཡང་། ཉིན་མ་བཞིའམ་ལྔ་ཙམ་གྱི་རྗེས་སུ་ཁོང་གིས་ཆེས་མཐའ་མའི་ཡི་གེ་དེ་ཨིན་ཇིའི་ནང་བྲིས་ནས་བསྐུར་བྱུང་བ་དང་། དེའི་ནང“སྐུར་མི་དགོས”ཞེས་པའི་ཚིག་འབྲུ་འདི་དག་ལས་མི་འདུག ཁོང་གིས་ཕལ་ཆེར་ང་ཚོ་འབྲེལ་བ་ཆེན་པོ་ཡོད་པ་མངོན་ན། གཞུང་གིས་བཀྲས་མཐོང་ཁྱིམ་རྒྱུད་ལ་དོགས་པ་ཟ་སྲིད་དགོངས་པ་ཡིན་ངེས་རེད། དེ་བས་ངས་བཙོན་ཁང་ལ་ཞལ་ལག་སྐུར་མཚམས་བཞག་རུང་། ཁོང་གི་ཡི་གེ་རྣམས་ཉར་ཚགས་བྱས་པ་ཡིན།  

མཚམས་དེར་ཁྱིམ་ཚང་གི་འགན་ལེན་མཁན་གཅུང་པོ་བསོད་ནམས་སྟོབས་འབྱོར་བྱང་ནགས་ཚང་(Nagtsang)གི་རྫོང་དཔོན་དུ་བསྐོ་བཞག་བྱས་ཏེ་དེར་ཕྱིན་ནས་མེད་སྟབས། ངས་ལས་དོན་དེ་དག་སྒྲུབ་དགོས་བྱུང་བ་རེད། ངས་དགེ་འདུན་ཆོས་འཕེལ་ལགས་རྒྱ་ནག་གོ་མིན་ཏང་གི་གསང་མྱུལ་བ་ཡིན་པའི་ཉེས་པ་བཅད་པའི་་སྐོར་གོ་དུས། དགེ་འདུན་ཆོས་འཕེལ་ལགས་དང་མཛའ་འབྲེལ་ཟབ་མོ་ཡོད་པར་བརྟེན་ནས་ངའི་གཅུང་པོར་ཡང་ཉེས་པ་འཕོག་སྲིད་པ་མ་ཟད། གལ་སྲིད་ཁོང་ལྷ་སར་ཡོང་བ་ཡིན་ན་འཛིན་བཟུང་ཡང་ཐེབས་སྲིད་སྙམ་པའི་སེམས་ཁྲལ་ཚད་མེད་བྱུང་། 

ངས་འཕྲལ་དུ་གཉེར་པ་མགྲོན་ཆེན་ཉི་མ་བྱང་ནགས་ཚང་ལ་བཏང་བ་ཡིན། གཡོག་པོ་རྒན་པོ་དེ་ངའི་གཡོག་མོ་ཟླ་བ་བུ་ཁྲིད་ཀྱི་ཕ་རྒན་རེད་ལ། ཁོ་ང་ཚོའི་ཁྱིམ་ཚང་ལ་ལྷག་བསམ་རྣམ་དག་ཅིག་ཡིན། ངའི་ཕ་མ་གཉིས་འདས་རྗེས། ཁོས་སྤུན་མཆེད་རྒན་པ་ཞིག་ལྟར་ང་དང་ངའི་གཅེས་གཅུང་རྣམས་ལ་ལྟ་སྐྱོང་བྱས་པ་རེད། ཁོ་ཛ་དྲག་ཆེན་པོའི་ངང་རྟ་བཞོན་ནས་གཅུང་པོ་མར་ལྷ་སར་ཡོང་མི་ཉན་ཚུལ་བརྗོད་དུ་ནགས་ཚང་དུ་ཕྱིན་པ་རེད། ཏག་ཏག་སྐབས་དེར་གཅུང་པོ་ཚུར་རྒྱལ་ས་ལ་ཡོང་བཞིན་ཡོད་ཅིང་། ཁོང་ནགས་ཚང་དང་ལྷ་སའི་བར་གྱི་ལམ་ཕྱེད་ཙམ་དུ་ཆགས་པའི་ཡངས་པ་ཅན་འབྲོག་ཐང་དུ་འབྱོར་ཡོད་འདུག འོན་ཀྱང་། ང་ཚོའི་གཡོག་པོ་དེར་འབྱོར་ཏེ་ཁོང་དང་འཕྲད་ཐུབ་པ་བྱུང་ཞིང་། ཁོང་མུ་མཐུད་ལྷ་སར་མི་བསྐྱོད་པ་བཟོས་པ་རེད།  

སྐབས་དེའི་གཡས་གཡོན་ལ། ང་རང་ལས་དོན་གཞན་འགའི་ཆེད་དུ་བཀའ་བློན་སྐྱིད་ཤོད་པའི་ཤག་ཏུ་འགྲོ་དགོས་ཁེལ་བྱུང་། ངས་ཚོམས་ཆེན་ནང་བཀའ་བློན་ཁོང་ལ་སྒུག་བཞིན་ཡོད་དུས། ཁོང་གི་ལྕམ་ནང་དུ་ཡོང་ནས་ང་ལ་གཅུང་པོ་གང་དུ་ཡོད་མེད་དྲིས་བྱུང་། ང་དེ་འཕྲལ་དོགས་པ་ལངས་ཤིང་། མོས་ངས་གཡོག་པོ་མངགས་ནས་གཅུང་པོར་ཉེན་བརྡ་བཏང་བའི་སྐོར་ཤེས་ཡོད་པ་རྟོགས་སོང་། དེ་ནས་བཀའ་བློན་ཁོང་ནང་དུ་ཕེབས་ནས་ང་ལ་བཀའ་མོལ་གནང་བྱུང་བ་དང་། ཁོང་གིས་གུས་ཞབས་དང་སེམས་ཁུར་ཡོད་མདོག་གིས་བཀའ་མོལ་གནང་བྱུང་། ཁོང་གིས་ཀྱང་ང་ལ་གཅུང་པོ་གང་དུ་ཡོད་མེད་དྲིས་བྱུང་བས། ངས་ཁོང་གི་ལྕམ་ལ་བཤད་པ་ལྟར་ཁོང་ལ་གཅུང་པོ་བྱང་ནགས་ཚང་དུ་ཡོད་ཚུལ་སྨྲས་པ་ཡིན། དེ་ནས་ཁོང་གིས“སྲས་སྐུ་ཞབས་ཀྱིས་གྲོགས་པོ་བསྟེན་ཚུལ་ལ་གཟབ་གཟབ་བྱོས་མ་གཏོགས། ཕ་ལྷ་ཙན་དམ་སྡོང་པོ་ལ་བུ་ཆུ་ཤིང་ཡན་པོ་ཟེར་བ་བྱེད་ཡོང”ཞེས་བཤད་བྱུང་། ངས་ཁོང་ཚོས་གཅུང་པོ་ལ་དོགས་པ་ཟ་བཞིན་ཡོད་པ་རྟོགས་རུང་ཅི་ཡང་མ་བཤད།

ངའི་གཅུང་པོའི་སར་ཁོང་གི་གྲོགས་པོ་སྤོམ་མདའ་ཚང་གི་རབ་དགའ་ཡོང་ནས་ཁོང་བོད་ཡར་རྒྱས་ཚོགས་པ་ཞེས་པའི་གསང་བའི་གསར་བརྗེ་ཚོགས་པར་(དེ་ནི་གོ་མིན་ཏང་ལ་མིག་དཔེ་བལྟས་པ་དང་དེས་སྤྱིན་བདག་བྱས་པ་ཞིག་རེད།)ཞུགས་དགོས་ཚུལ་བཤད་ཡོད། འོན་ཀྱང་གཅུང་པོ་དེ་ལ་ཞུགས་མེད། ངའི་གཅུང་པོས་གོ་མིན་ཏང་ལ་ཡིད་ཆེས་མེད་པའི་ཐོག ཁོང་ལས་རིགས་དེ་འདྲ་ལ་དགའ་མོས་མེད། ཐ་ན་གོ་མིན་ཏང་གི་ལས་བྱེད་མཐོན་པོ་ཞིག་གིས་ཀྱང་ཁོང་ལ་ལྷ་སར་རྒྱ་ཡིག་གི་སློབ་གྲྭ་ཞིག་འཛུགས་དགོས་པའི་རེ་སྐུལ་ཞུས་ཤིང་། དེའི་འགྲོ་གྲོན་གོ་མིན་ཏང་གཞུང་གིས་གཏོང་གི་ཡིན་ཚུལ་བཤད་པར། ངའི་གཅུང་པོས་གུས་ཞབས་ལྡན་པའི་ཐོག་ནས་དང་ལེན་བྱས་མེད། གོ་མིན་ཏང་གི་ལས་བྱེད་དེ་སྔོན་ཆད་གྲྭ་པ་བྱས་ནས་ལྷ་སར་ཡོང་ཞིང་།(འབྲས་སྤུང་དུ་སློབ་གཉེར་བྱས།)ང་ཚོའི་གཞིས་ཁང་གི་འོག་ཁང་ནས་ཁང་མིག་འགའ་གཡར་བ་རེད། ང་ཚོས་ཁོང་ལ་བྷེ་སིན་(Besung)ཞེས་འབོད་ཅིང་དེ་ནི་ཁོའི་ཆོས་མིང་རེད། ཁོས་ལོ་ཤས་རིང་སློབ་གཉེར་བྱས་རྗེས་བོད་ཀྱི་ལྷོ་ཕྱོགས་ཀྱི་ཆེས་མི་མེད་ལུང་སྟོང་གི་ས་ཆར་ཆགས་པའི་གནས་ཆེན་ཙ་རི་བསྐོར་དུ་ཆས་སོང་། ཁོ་ཕྱིར་རྒྱ་ནག་ཏུ་ལོག་སྟེ་སོ་སོའི་འགྲུལ་བཞུད་ཀྱི་སྐོར་ལ་དེབ་ཅིག་བྲིས་པས། རྒྱ་ནག་གི་སྲིད་འཛིན་ཅང་ཆེ་ཧྲི་ཡིས་ཁོ་ལ་མཐོང་ཆེན་བྱས་ཏེ་ལས་བྱེད་ཀྱི་གོ་གནས་བྱིན་འདུག 

དེའི་རྗེས་དགེ་འདུན་ཆོས་འཕེལ་ལགས་ལ་བཀལ་བའི་ཉེས་སྐྱོན་རྣམས་ཕྱིར་བསྒྲགས་བྱས་པ་རེད། ཁོང་གི་ནག་ཉེས་རྣམས་ཆབ་སྲིད་དང་འབྲེལ་བ་མ་ཟད། ཁོང་སྒེར་གྱི་གནད་དོན་དང་འབྲེལ་ཞིང་ཧ་ཅང་སྐྱུག་བྲོ་བོ་ཞིག་རེད། སྐབས་དེ་དུས་ངས་ཁོང་གི་ཉེས་པ་དེ་དག་ལ་ཡིད་ཆེས་བྱེད་མྱོང་མེད་ལ། ད་ལྟའང་དེ་བཞིན་ཡིན། ངའི་གཅུང་པོས་དགེ་འདུན་ཆོས་འཕེལ་ལགས་དོན་དམ་པའི་ནང་པའི་མཁས་དབང་ཞིག་ཏུ་བརྩིས་ཡོད་དེ། སྔར་ནང་ཆོས་ཐོག་མར་བོད་དུ་གདན་འདྲེན་ཞུ་སྐབས་སུ་བྱུང་བའི་སྐྱེས་ཆེན་དམ་པ་རྣམས་ལྟར་བརྩིས་ཡོད། ངས་ཀྱང་སེམས་ཀྱི་གཏིང་ནས་དགེ་འདུན་ཆོས་འཕེལ་ལགས་དེ་ལྟ་བུའི་སྐྱེས་ཆེན་ཞིག་ཡིན་པའི་ཡིད་ཆེས་བྱེད་ཀྱི་ཡོད། 

ང་ཚོས་གཅུང་པོ་ལ་ཉེས་སྐྱོན་མེད་པ་གཏན་འཁེལ་བཟོས་རྗེས། ཁོང་མཇུག་མཐར་ལྷ་སར་ལོག་པ་རེད། ངས་དགེ་འདུན་ཆོས་འཕེལ་ལགས་ཀྱིས་བསྐུར་བའི་ཡི་གེ་རྣམས་ཁོང་ལ་བསྟན་པ་ན། ཁོང་སེམས་འཚབ་ལངས་ནས་ང་ལ་དེ་དག་མེ་རུ་སྲེག་ཅིག་གསུངས་བྱུང་། ངས་ཁོང་གི་རྒྱུ་མཚན་རྣམས་ཤེས་ཐུབ་མོད། འོན་ཀྱང་དེ་དག་མེ་རུ་བསྲེགས་པ་ལ་ད་ལྟའང་གནོང་འགྱོད་འོང་གི་འདུག 

དེ་ནས་ལོ་ཁ་ཤས་ཀྱི་རྗེས་སུ། ང་རང་ལྷ་ས་དང་བྲལ་ནས་ང་ཚོའི་གཞིས་ཁ་རྩེའི་་གཞིས་ཁང་དུ་ཕྱིན་པ་དང་། དེ་ནས་ང་རང་གཅུང་པོ་ཆུང་ཤོས་དང་གཅུང་མོ་གཉིས་ཨིན་ཇིའི་སློབ་གྲྭར་འཇོག་ཏུ་རྒྱ་གར་ལ་ཡོང་བ་ཡིན། ང་རང་རྒྱ་གར་ནས་ཕྱིར་འབྱོར་བ་ན། དགེ་འདུན་ཆོས་འཕེལ་ལགས་བཙོན་ཁང་ནས་གློད་གྲོལ་བཏང་འདུག བསམ་ཡུལ་ལས་འདས་པ་ཞིག་ལ། ཉིན་གཅིག་ལ་ཁོང་ང་ཚོའི་ཁང་པའི་མདུན་སྒོའི་འགྲམ་དུ་ཕེབས་བྱུང་། ཁོང་ཅུང་སྐུ་ར་བཟི་ཡོད་པར་སྣང་ལ། ཕྱུ་པ་ལུག་ལུག་ཏུ་གྱོན་འདུག གཅུང་པོས་མྱུར་བར་སྐས་ལས་བབ་ནས་ཁོང་བསུས་སོང་། ཁོང་གིས་གཅུང་པོ་གཟིགས་མ་ཐག་མདུན་དུ་འཁྱུར་ཙམ་བྱས་ཤིང་རང་ཚོ་མི་ཕེར་བའི་ངང་གཅུང་པོ་ལ་འཐམས་པ་དང་། གཅུང་པོས་ལམ་སེང་ཁོང་ང་ཚོའི་ཁང་པའི་ནང་དང་། དེ་ནས་གཟིམ་ཁང་སྦུག་མར་གདན་འདྲན་ཞུས་སོང་། 

དེ་ལྟར་གཅུང་པོས་སླར་ཡང་སོ་སོའི་སློབ་དཔོན་དང་གྲོགས་པོ་དགེ་འདུན་ཆོས་འཕེལ་དང་ལྷན་དུ་དགོང་དྲོ་སྐྱེལ་འགོ་བརྩམས་སོང་། སྐབས་དེར་གཅུང་པོ་སྔར་བཞིན་ནགས་ཚང་གི་རྫོང་དཔོན་མ་ཡིན་པས། ཁོང་ལ་གཞུང་གི་ལས་འགན་ཆེན་པོ་མེད། ཁོང་གིས་ཉིན་རེ་ལ་ལྷ་སའི་གཞུང་ལས་ཁང་དུ་ཆུ་ཚོད་གཉིས་ཙམ་ལས་སྐྱེལ་མི་དགོས་པ་དང་། དེའི་རྗེས་ཀྱི་དུས་ཚོད་གང་ཡོད་ཁོང་རང་ཉིད་ལ་དབང་ཡོད། ཁོང་བར་སྐོར་གྱི་བྱང་སྣེ་ན་ཡོད་པའི་སྒོ་མང་ཁང་གསར་དུ་བསྐྱོད་པ་དང་། དེར་དགེ་འདུན་ཆོས་འཕེལ་ལགས་ཀྱིས་ཁང་ཆུང་ཞིག་གཡར་ནས་བཞུགས་ཡོད།  ཁང་བརྩེགས་དེ་ཕལ་ཆེར་སྒོ་མང་གྲྭ་ཚང་ལ་དབང་ཡོད་པ་འདྲ། ཁོང་གཉིས་(སྐབས་རེར་གྲོགས་པོ་གཞན་ཡང་ཡོད།)ཀྱིས་ཆང་དམ་བེ་གང་(རིན་ལ་དངུལ་སྲང་ལྔ་རེད།)དང་། དེ་དང་ལྷན་དུ་མཆོད་རྒྱུའི་ཨ་རིའི་དམག་གི་རྒྱགས་ཟས་སྒམ་ཆུ་འགའ་མངགས་ངེས་པ་དང་། དེ་ནས་མར་བཞུགས་ཏེ་བརྗོད་བྱ་སྣ་ཚོགས་ཀྱི་སྐོར་ལ་གླེང་མོལ་བྱེད་ཀྱི་རེད། དེ་ལྟར་ཁོང་ལོ་གཅིག་ཙམ་ལ་བཞུགས་སོང་། 

འཛམ་གླིང་དམག་ཆེན་གཉིས་པའི་རྗེས་སུ། བོད་ཀྱི་ཚོང་པ་འཇོན་ཐང་ཆེ་བ་ཚོས་བོད་ཁམས་ཡོངས་ལ་དམག་མིའི་ཡོ་བྱད་ལྷག་མ་རྣམས་ཉོ་ཚོང་ཆེན་པོ་བྱས་སོང་བ་དང་། ཆེས་བྲིན་ཆེ་ཤོས་ཀྱི་ཡོ་བྱད་ཁྲོད་ནས་གཅིག་ནི། འགྱིག་ཁུག་ནང་བླུགས་པའི་ཨ་རིའི་དམག་གི་རྒྱགས་ཟས་རེད། བོད་མི་མང་པོ་ཞིག་གིས་དེ་ནི་སྟབས་བདེའི་ཁ་ཟས་སྤུས་ལེགས་ཤིག་ཏུ་བརྩི་ཡི་རེད། འགྱིག་ཁུག་རེ་རེའི་ནང་དུ་ཤ་བླུགས་པའི་ལྕགས་ཀྲིན་ཆུང་ངུ་རེ་ཡོད་དེ། ལྕགས་ཀྲིན་ནང་དུ་ཨ་ཤོམ་བརྒྱབ་པའི་གླང་ཤའམ། ཡང་ན་ལ་ཕུག་དམར་པོ་དང་སྲན་མ། དེ་བཞིན་ཚལ་རིགས་གཞན་དག་བསྲེས་པའི་ཕག་ཤ་ཡོད་ལ། དེ་དང་ལྷན་དུ་ཀ་ར་མེད་པའི་ཏན་ཤིང་ལེབ་ལེབ་མཐུག་པོ་གསུམ་ཡོད་པ་མ་ཟད། ད་རུང་འཚིག་ཇ་ཤོག་ཁུག་གཅིག་དང་། ཀ་ར་རྡོག་པོ་བཞི། ཐ་མག་རྐང་ལྔ་ཡི་སྒམ་ཆུང་གཅིག (Lucky Strike, Camels,Old Gold བཅས་ཀྱི་ཚོང་རྟགས་གང་རུང་ཞིག་རེད།) ཙག་སྒྲ་སྒམ་ཆུང་གཅིག་བཅས་ཡོད་པའི་ཐོག ཅོག་ལེ་(Chocolate)ལེབ་ལེབ་གཅིག ཤིང་ཚའི་བྲོ་བ་ལྡན་པའི་འགྱིག་བྱི་རིལ་རྐང་འགའ་ཤས། ད་རུང་གཙང་ཤོག་རེ་ཟུང་ཡང་ཡོད་ཅིང་། དེ་དག་ཚང་མ་སྦྱར་རྩིས་སྦྱར་བའི་ཤོག་སྒམ་ཆུང་ཆུང་ཞིག་གི་ནང་དུ་བླུགས་ནས་ཡོད། 

དགེ་འདུན་ཆོས་འཕེལ་ལགས་ཀྱིས་གཅུང་པོར་ཁོང་རྒྱ་གར་དང་བལ་ཡུལ་གྱི་ནང་པའི་གནས་ཆེན་མང་པོར་ཕེབས་པའི་སྐོར་གྱི་གཏམ་རྒྱུད་གསུང་གི་རེད། ཁོང་གིས་གར་ཞ་འཕགས་པ་མཇལ་བའི་སྔ་ནུབ་ལ། དངོས་སུ་སྐུ་བརྙན་དེ་མཇལ་བའི་རྨི་ལམ་བྱུང་ཚུལ་གསུངས་པ་མ་ཟད། ད་རུང་དངོས་སུ་སྐུ་བརྙན་མཇལ་བའི་སྐབས། འུར་སྒྲ་དྲག་པོ་ཞིག་ཀྱང་གསན་ཚུལ་གསུངས་འདུག དགེ་འདུན་ཆོས་འཕེལ་ལགས་ཀྱིས་རྒྱ་གར་གནས་ཆེན་ཁག་ལ་བགྲོད་པའི་ལམ་ཡིག་ནང་དུ་གནས་ཚུལ་འདི་བཀོད་ཡོད་སྙམ། ངས་འདི་བཤད་དགོས་པའི་རྒྱུ་མཚན་ནི། དེང་སང་གོ་རྟོགས་ཞན་པའི་མི་འགའ་ཤས་ཀྱིས་ཐེ་ཚོམ་མེད་པར་དགེ་འདུན་ཆོས་འཕེལ་ལགས་ཆོས་ལ་དད་པ་མེད་པ་དང་། ལྷ་མེད་སྨྲ་བ་ཞིག་རེད་ཟེར་རྐྱང་བྱེད་ཀྱི་འདུག་པས་ཡིན། དོན་ངོ་མ་བཤད་ན། ཁོང་ནི་ཆོས་པ་རྣམ་དག་ཅིག་རེད། ཁོང་གིས་གཅུང་པོ་ལ་བླ་མ་དང་སྤྲུལ་སྐུ་ལ་མཚན་དམས་ཞུ་མི་ཉན་པའི་བསླབ་བྱ་ཡང་གནང་མྱོང་། ཁོང་གིས་བླ་མ་ཞིག་དང་ནམ་མཇལ་རུང་། སྔ་ནུབ་ལ་སྤྱས་རས་གཟིགས་མཇལ་བའི་རྨི་ལམ་ཞིག་རྟག་ཏུ་རྨི་ཡི་ཡོད་ཚུལ་གསུངས་འདུག 

སྐབས་དེར་ངའི་གཅུང་པོ་ཆུང་ཤོས་ཀྱི་གོང་མ་སྟེ་རཀ་ར་རིན་པོ་ཆེའང་དགེ་འདུན་ཆོས་འཕེལ་ལགས་དང་འདྲིས་པོ་ཆགས་ནས་མཚམས་རེར་ཁོང་གི་འོག་ཏུ་སློབ་གཉེར་བྱེད་ཀྱི་ཡོད། ཉིན་གཅིག་ལ་རཀ་ར་རིན་པོ་ཆེས་དགེ་འདུན་ཆོས་འཕེལ་ལགས་ཀྱི་རེ་སྐུལ་ཞིག་ཁྱེར་ནས་ངའི་སར་ཕེབས་བྱུང་། ཁོང་གིས་ང་ལ་རྗེ་བཙུན་སྒྲོལ་མའི་སྐུ་ཐང་ཞིག་འབྲི་རོགས་ཟེར། ངས་དུས་སྟོང་སྐབས་ཚོན་རིས་འབྲི་ཡི་ཡོད་ཚུལ་རག་ར་རིན་པོ་ཆེས་དགེ་འདུན་ཆོས་འཕེལ་ལགས་ལ་གསུངས་པས། དགེ་འདུན་ཆོས་འཕེལ་ལགས་ཀྱིས་ངས་ཁོང་ལ་ཐང་ག་ཞིག་འབྲི་ཐུབ་ངེས་རེད་དགོངས་པ་འདྲ། ངས་ཆ་ཚད་དང་བཟོ་བཀོད་ནོར་སྲིད་པས་འབྲི་མི་ཐུབ་ཞུས་པ་ཡིན། ཁྱོད་ཀྱིས་ཤེས་གསལ་ལྟར། དེ་ནོར་ན་སྡིག་པ་ཆེན་པོ་རེད། ཡིན་ན་ཡང་། དགེ་འདུན་ཆོས་འཕེལ་ལགས་ཀྱིས་ང་ལ་ཁོང་གི་ཆེད་དུ་ཅིས་ཀྱང་སྒྲོལ་མའི་སྐུ་ཐང་ཞིག་འབྲི་དགོས་གསུངས་བྱུང་། ཁོང་གི་ཐུགས་སྣང་ལ་བུད་མེད་ཅིག་ལ་ཆོས་ཀྱི་ཉམས་རྟོགས་ལ་ཕན་པའི་ནུས་མཐུ་དམིགས་བསལ་ཞིག་ཡོད་པས། བུད་མེད་ཀྱིས་བྲིས་པའི་རྗེ་བཙུན་སྒྲོལ་མའི་སྐུ་འདྲ་ཞིག་དགོས་གསུངས་བྱུང་། དེར་བརྟེན་ངས་ཐང་ག་དེ་འབྲི་བའི་མོས་མཐུན་བྱས་ཤིང་། བྲིས་ནས་ཚར་བ་དང་ཁོང་ལ་བསྐུར་བ་ཡིན། ཅང་མ་འགོར་བར་ཁོང་ང་ཚོའི་ཁང་པའི་ནང་དུ་ཕེབས་ནས་ང་ལ་སྐུ་ཐང་བྲིས་པར་ཐུགས་རྗེ་ཆེ་གསུངས་ཤིང་། ང་ལ་ཁ་བཏགས་ཤིག་དང་རྒྱ་ནག་གི་དངུལ (རྡ་ཡང་)ཞིག་གནང་བྱུང་། དངུལ་རྡ་ཡང་དེ་ནི་ཟི་ཁྲོན་ཞིང་ཆེན་ནང་བཀོལ་སྤྱོད་བྱེད་པའི་སྒོར་མོ་དེའི་རིགས་རེད་ལ། ངོས་སུ་བྱ་སྲེག་པའི་མཇུག་སྒྲོ་ལྡན་པའི་རྒྱ་ཞྭ་གྱོན་པའི་གོང་མ(འམ་སུ་རུང་ཞིག་གི)ཡི་འདྲ་པར་ཡོད། ངས་དོང་ཙེ་དེ་དྲན་རྟེན་གྱི་ཚུལ་དུ་ཉར་བ་དང་། དེ་ནི་ངའི་མན་ཌལ་ཁྲོད་ཀྱི་རྒྱུ་དངོས་རྩ་ཆེན་ཞིག་ཡིན་པས་དེང་སང་ཡང་ཉར་ནས་ཡོད།

སྤྱི་ལོ ༡༩༤༨ ལོར་ང་རང་རྒྱ་གར་དུ་ཕྱིན་ཞིང་། དེ་ནས ༡༩༤༩ ལོར་ལྷ་སར་ལོག་ནས་གཅུང་མོ་བཀྲ་ཤིས་ཀྱི་གཉེན་སྟོན་(ཅན་གོ་པ་རྡོ་རྗེ་ལགས་དང་ལྷན་དུ་རེད)བཀོད་སྒྲིག་བྱས་པ་ཡིན། སྐབས་དེའི་གཡས་གཡོན་དུ་ངས་དགེ་འདུན་ཆོས་འཕེལ་ལགས་བུད་མེད་ཅིག་དང་ལྷན་དུ་བཞུགས་ཀྱི་ཡོད་ཚུལ་གོ་བྱུང་། མཚམས་རེར་ང་རང་ཨ་ཁུ་བཀྲས་ཟུར་(དཔལ་ལྡན་རྒྱ་མཚོ)ལ་སྐོར་བ་བྱེད་དུ་འགྲོ་ཡི་ཡོད། ཁོང་བསྟན་རྒྱས་གླིང་དགོན་པའི་ཉེ་འཁོར་དུ་ཡོད་པའི་ཏར་ཁང་གི་ལས་བྱེད་པ་ཞིག་རེད། ཨ་ཁུའི་ལས་ཤག་ནས་མར་བལྟས་ན། ལོ་མང་སྣང་མེད་དུ་བསྐྱུར་བའི་ལྡུམ་རྭ་རྙིང་པ་ཞིག་ཡོད། (དེ་ཕལ་ཆེར་སྔོན་གྱི་བསྟན་རྒྱས་གླིང་པ་ལ་བདག་པ་འདྲ།) ཨ་ཁུས་སྒེའུ་ཁུང་ནས་མཛུབ་མོ་བཙུགས་ཏེ་ལྕང་སྡོང་ཞིག་གི་འོག་ཏུ་ཡོད་པའི་སྤང་ཐང་ཆུང་ཆུང་ཞིག་ན་བསྡད་པའི་མི་གཉིས་བསྟན་བྱུང་། དེ་ནི་དགེ་འདུན་ཆོས་འཕེལ་ལགས་ཀྱིས་ཁམས་པའི་བུད་མེད་ཅིག་དང་ལྷན་དུ་ཆང་དམ་བེ་གང་ལ་རོལ་བཞིན་པའི་རྣམ་པ་རེད། ཨ་ཁུས་ང་ལ་ཁོང་གཉིས་ལྡུམ་རྭ་དེར་ཡང་ཡང་ཡོང་ནས་ཆང་ལ་རོལ་གྱི་འདུག་ཅེས་གསུངས་བྱུང་། 

དེ་ནི་ངས་ཁོང་མཇལ་བ་མཐའ་མ་དེ་རེད། སྐབས་དེ་དུས་ཁྱོད་རང་(འཇམ་དབྱངས་ནོར་བུ)ལོ་གཅིག་ཙམ་རེད་ལ། རྒྱ་ནག་གིས་ཁམས་ཕྱོགས་སུ་བཙན་འཛུལ་བྱས་ཏེ་ཆབ་མདོ་བཙན་བཟུང་བྱས་ཚར་ཙམ་གྱི་རྗེས་སུ་རེེད། དེའི་རྗེས་ཅང་མ་འགོར་བར་ང་ཚོ་ལྷ་ས་དང་བྲལ་བ་རེད། 

ལོ་ཙཱ་བ་རིན་ཆེན་བཟང་པོ་(དུས་རབས་བཅུ་གཉིས)ནས་བཟུང་བོད་ལ་དགེ་འདུན་ཆོས་འཕེལ་ལྟ་བུའི་ལོ་ཙཱ་བ་ཆེན་པོ་ཞིག་ཕལ་ཆེེར་གཏན་ནས་བྱུང་ཡོད་རྒྱུ་མ་རེད། ཁོང་ལ་གང་བྱུང་བ་དེ་དངོས་གནས་བློ་ཕམ་པོ་ཞིག་རེད། ང་ཚོའི་རྒྱལ་ཁབ་དང་མི་མང་ལ་མཚོན་ན་དེ་ནི་བརྗོད་ལས་འདས་པའི་གྱོན་གུད་ཅིག་རེད། །