ང་ཡོད་སའི་སློབ་གྲྭ་ནས་རླངས་འཁོར་ནང་ཆུ་ཚོད་ཕྱེད་ཙམ་སོང་ན་ཁོང་གི་ཕོ་བྲང་མཇལ་ཐུབ། ད་དེའི་སྐོར་ཤོད་མཚགས་ཞོག་མ་གཏོགས། ཡང་ཨ་ཞང་ཚང་གིས་ཉན་ནས་ཁྱོད་ཚོར་དཀའ་ངལ་སྤྲོད་རྒྱུ་རེད། ད་ལྟ་ནང་མི་ཚང་མ་ཁྱིམ་དུ་འཛོམས་ཨེ་ཡོད། ཨ་ཅེ་གང་དུ་བུད་སོང་། ནོར་རྫི་སྔ་པོ་འདི་འདྲ་འགྲོ་དགོས་རེད་དམ། ཨོ། ངས་འདི་གཉིས་བར་ལ་ཆུ་ཚོད་གཉིས་ལྷག་གི་ཁྱད་པར་ཡོད་པ་བརྗེད་སོང་འདུག ང་ཚོས་ཉིན་གུང་ཁ་ལག་ཟོས་ནས་མང་པོ་འགྲོ་མ་སོང་། འབྲས་དང་ལྷན་དུ་ལྡ་ལི་ཞེས་པའི་རྒྱ་གར་གྱི་ཟ་མ་ཞིག་ཡོད་པ་དེ་ཟོས་ཡིན། ཁ་ཞིམ་ཨེན་ཙམ་རེད།  མ་གཞི་འདིའི་རྒྱུན་ཟས་གཙོ་བོ་དེ་རེད། རྩྭམ་པ་དང་གཅིག་པ་ཡིན་པས་ད་ནི་ལོབས་ཚར་གདའ། ཨ? ཨ་མས་ཉན་རྒྱུ་ཟེར་ཨེ། ཡ་ཡ་ཡ། ན་གཟེར་མེད་ཨ་མ། ཨ་མ་རང་གི་ལུས་པོའི་གནས་སྟངས་ཅི་འདྲ་རེད། རུས་ཚིགས་ན་ན་སྐེད་པ་དང་པུས་མོ་གཏན་ནས་འཁྱག་ཏུ་འཇུག་མི་ཉན་མ་གཏོགས་སྡུག་ཏུ་འགྲོ་ངེས། རྒྱུན་དུ་སྐེད་པར་ཚར་རུ་དཀྲིས་ནས་ལུས་པོ་ཚ་བོར་ཉར་དགོས། ད་དུང་དཀའ་ཚེགས་ཆེ་བའི་ཤུགས་ལས་རིགས་བྱེད་མ་ཉན། ནང་ལས་ཙག་ཙིག་ཡིན་ཡང་ཨ་ཞེ་དང་ཨ་བུས་ལས་ངེས་པས། ཁྱོད་ཀྱིས་གཙོ་བོ་ཁ་འདོན་དགེ་སྦྱོར་འདྲ་བྱས་ནས་སྡོད། དེ་འདྲ་ཡིན་རྒྱུ་མ་རེད། ང་ཡིད་ཆེས་ཀྱི་མི་འདུག ལས་རྒྱུ་ཞིག་མེད་ན་འདུག་བཟོད་མེད་པ་ལྟར་བྱེད་མཁན་དེ་ཨ་མ་རང་མ་རེད་དམ། ཧ་ཧ་ཧ། ཨ་ཙི། ཡང་ངུ་བཞིན་ཡོད་དམ། སྐད་ཆ་བཤད་མ་ཐག་ངུས་ནས་ཅི་བྱེད། ཨ་མ་རང་མ་ངུ་དང་གཟུགས་པོར་གནོད་ངེས། རང་འདི་ལྟར་ངུས་ན་ང་ཡང་མི་སྐྱིད་པ་ཞིག་རེད། ཨ་མ་རང་མ་ངུ་དང་། ངུ་ཡི་མེད་ཟེར། ངས་ངུ་སྐད་གོ་ཐུབ་ཀྱི་འདུག མི་འདུག་མི་འདུག ད་ནི་རྒྱ་གར་གྱི་ཟ་མར་གོམས་ནས་ལྟོགས་ཀྱི་མི་འདུག ད་ལྟ་ཉིན་གུང་ཟ་མ་ཟོས་མ་ཐག་ཡིན་པས་དགོང་ཟས་གྲ་སྒྲིག་བྱེད་ག་ལ་རན། ཨ་མ་རང་གིས་མི་ཤེས། ལྡ་ལི་ཞེས་པའི་རྒྱ་གར་གྱི་ཟ་མ་ཞིམ་ལ་བཅུད་ཆེ་བ་ཞིག་ཡོད་པ་དེ་ཟོས་པ་ཡིན། ག་བ་ག་བ། རྒྱ་གར་ཚ་བའི་ལུང་པ་ཡིན་པ་ཨ་མ་རང་གིས་གོ་མ་མྱོང་ངམ།  ཧ་ཧ་ཧ། ཚ་བ་ཆེ་དྲགས་པའི་དཀའ་ངལ་མ་གཏོགས་གྲང་བའི་སྡུག་བསྔལ་མྱོང་མི་དགོས། ཨ་མ་རང་གིས་འདི་ཕྱོགས་ལ་སེམས་ཁྲལ་གཏན་ནས་བྱེད་མི་དགོས། ད་ནི་ས་ཆུ་དང་སྐད་ཡིག ཟ་མ་དང་ཡུལ་སྲོལ་གོམས་གཤིས་སོགས་ཚང་མར་གོམས་ཚར་བས་དཀའ་ངལ་གང་ཡང་མི་འདུག ཡོད་ཡོད། མ་གཞི་སློབ་གྲྭའི་ནང་སྒོར་མོའི་དགོས་མཁོ་དེ་འདྲ་མེད། ཟ་ས་དང་ཉལ་ས་ཚང་མ་སློབ་གྲྭས་སྤྱིན་པ་མ་ཟད་སློབ་ཡོན་ཡང་སྟེར་མི་དགོས་པས་ཡོད་མེད་ལ་ཁྱད་པར་མེད། ཡོད། ཨ་མ་རང་གི་ཁ་ལ་ཉན་ནས་བླ་མ་དཀོན་མཆོག་ལ་དད་གུས་དང་གསོལ་བ་སྨོན་ལམ་འདེབས་ཀྱི་ཡོད། དངོས་གནས་ལབས་ཡིན། ཡ་ཡ་ཨ་མ། མ་གཞི་ངས་ཆང་རག་དང་ཐ་མག་ཁར་མ་བླངས་ནས་ཡུན་རིང་ཕྱིན་སོང་། དེ་ལོས་ཡིན། སེམས་ཁྲལ་བྱེད་མི་དགོས། ཨ་ཙི། ཁྱོད་ཀྱིས་རང་ཉིད་ཀྱི་བུ་ལ་འཁྲུག་འཛིང་བྱེད་པའི་བློ་ཁོག་མེད་པ་མི་ཤེས་སམ། ཧ་ཧ་ཧ། སྐྱོན་མེད། སེམས་ཁྲལ་མ་བྱེད་དང་། འདི་ནས་མར་ཁ་པར་བརྒྱབས་ན་སྒོར་མོ་མང་པོ་མི་འགྲོ་བའི་སྐོར་ངས་རྒྱུན་པར་ཁྱོད་ལ་བཤད་མ་བྱུང་ངམ། ཡ་ཡ། སེམས་ཁྲལ་བྱེད་མི་དགོས། སྐུར་ས་ཡག་པོ་ཞིག་རྙེད་དུས་ངས་རིན་ཆེན་ལ་ཁ་པར་བཏང་ཆོག སྐྱོན་མེད། ངས་ད་ལྟ་རང་འདི་ནས་ཁ་པར་བཏང་ན་སྒོར་མོ་མང་པོ་མི་འགྲོ་ཞེས་བཤད་པ་མ་ཡིན་ནམ། ད་དུང་ཨ་མ་རང་དང་ལྷན་དུ་སྐད་ཆ་ལབས་ནས་ཕྲན་ཙམ་སྡོད་འདོད། ཨ་མ་རང་ནི། ཡང་ངུས་ནས་ཅི་བྱ། ངེད་གཉིས་ཀས་བླ་མ་དཀོན་མཆོག་དང་ཡིད་བཞིན་ནོར་བུ་ལ་གསོལ་བ་སྨོན་ལམ་བཏབས་ན་ཤི་ཐུག་མི་ཡོང་བ་ག་ལ་སྲིད། སྲིད་ཇུས་ཕྲན་བུ་ཡང་དུ་ཕྱིན་མ་ཐག་ང་ཕྱིར་ལོག་ཡོང་། མིན། ཨ་མ་རང་གིས་ངུ་མཚམས་ག་དུས་བཞག་ན་དེ་དུས་ཁ་པར་འཇོག་གི་ཡིན། ཧ་ཧ་ཧ། ཡ་ཡ། ཨ་མ་རང་ཡང་གཟུགས་པོར་གཅེས་སྤྲས་བྱོས། ཡ་ཡ་ཨ་མ། སེམས་ཁྲལ་མི་དགོས། ངས་བླ་མ་དཀོན་མཆོག་ལ་གསོལ་འདེབས་བྱས་ཆོག སེམས་ཁྲལ་མི་དགོས། ངས་གཟབ་གཟབ་བྱས་ཆོག ཨ་མ་ཚེ་རིང་ལོ་བརྒྱ། ད་རིན་ཆེན་གྱི་ལག་ཏུ་ཞོག་དང་། སྐར་མ་གཅིག་གཅིག་པུ་ཡིན། དེ་ནས་གཅིག་ཤོད་དང་། ཡ་ཡ། ངས་ལབ་ཡོང་། ཁ་ཉིན་བསྐུར་བ་དེ་ད་རུང་ཕྲན་ཙམ་ལྷག་ཡོད། སྐུར་ས་ཡག་པོ་ཞིག་རག་མ་ཐག་ཁྱོད་ལ་ཁ་པར་གཏོང་ཡོང་། དེ་ནས་དེང་སང་གྲོང་ཚོའི་ནང་དུ་གནས་ཚུལ་གསར་པ་ཅི་འདུག གང་ཡང་མེད་པ་མི་སྲིད། བསྟན་པ་ཚང་གི་མེ་ཏོག་སྒྲོལ་མ་ལ་དགའ་རོགས་ཨེ་འདུག དངོས་གནས? སུ་རེད། ཁོ་ཨེ། རྫུན་མ་ལབ། དེ་ངོ་མ་ཆུ་ངོགས་གཏམ་རྒྱུད་ནང་ཝུ་ཚང་གི་བུ་རྒན་པར་ནག་མོ་མཛེས་མ་དེ་རག་དུས་མི་རྣམས་ཀྱིས"ལུག་ཤ་ཚོན་པོ་ཞིག་ཁྱིའི་ཁ་ལ་འཕངས་འདུག"ཅེས་བཤད་པ་ལྟར་མ་རེད་དམ། མ་གཞི་ཁོ་ལ་མོ་ཇི་ལྟར་རག་པ་རེད། ཨ? ཡ་ཡ་ཡ། ཨ་མ་རྩ་རུ་ཡོད་ན་རྗེས་ལ་ཡིན། རྗེས་སུ་ཁྱོད་ཀྱིས་དེའི་སྐོར་ལ་ཞིབ་ཕྲ་ཞིག་བཤད་དགོས་ཨ། མ་ཤེས་ནའང་གཞན་ལ་དྲིས་ནས་གང་ལྟར་ཤོད་རྒྱུ་ཡོད་པ་བྱོས་ཨ། ཧ་ཧ་ཧ། དེ་ནས་དེའི་གནམ་གཤིས་ཅི་འདྲ་འདུག ཨ? འོ་ཡ་ཡ། མ་ཨ་རྟག་པར་དེ་འདྲ་ཞིག་རེད། ངས་འདི་ནས་མར་བཏང་ན་སྒོར་མོ་དེ་འདྲ་མི་འགྲོ་ཇི་ལྟར་བཤད་ཀྱང་ཡིད་མ་ཆེས། ཡ་མོས་འདུག་ཏུ་མི་འདུག་ན་འདིར་མཚམས་འཇོག ཨ་ཕ་མེད་པ་ཆགས་ནས་ད་ལྟ་ང་ཚོ་ལ་ཡོད་པ་ནི་ཨ་མ་གཅིག་པུ་ཡིན་པ་དང་། ཁོང་ཡང་ལ་ཁའི་ཉི་མ་ལྟར་ནམ་བཞུད་ལ་ངེས་པ་མེད་པས། ཁྱོད་ཚོ་དེར་ཡོད་པ་ཚོས་ཁོང་ལ་ལྟ་སྐྱོང་ཡག་པོ་ཞིག་བྱོས། གོ་ཨེ་སོང་། ཡ་ཡ། ཡར་གཏན་ནས་སེམས་ཁྲལ་མི་དགོས། ད་ཚེ་རིང་། རྗེས་ལ་རྒྱག་ཡོང་། གནས་ཚུལ་དེའི་སྐོར་ཞིབ་ཕྲ་ལབ་རྒྱུ་ཡོད་པ་བྱོས་ཨ། ཧ་ཧ་ཧ། ཡ་ཡ། ཚེ་རིང་།”

༢༠༡༦/༡/༡ ཉིན།