གཉིད་ཉལ་དྲན་ན་གཉིད་ཉལ་ཆོག ངས་གནམ་གྲུའི་འཛིན་བྱང་མ་ཉོས་པར་མེ་འཁོར་ནང་འགྲོ་བའི་རྒྱུ་མཚན་དེ་ཡང་སྒོར་མོ་ཁོ་ནའི་གནད་དོན་མ་ཡིན་པར་འདི་ལ་ཐུག་ཡོད། (གནམ་གྲུ་དང་མེ་འཁོར་དབར་དུ་ཧིན་སྒོར་ཆིག་སྟོང་ཙམ་ལས་ཁྱད་པར་མི་འདུག) གཅིག་པུར་མེ་འཁོར་ནང་འགྲོ་སྐབས། ཅ་ཟིང་ཤོས་ནི་གསང་སྤྱོད་ནང་གཅིན་པ་དང་ཕྱི་ས་གང་མགྱོགས་བཙིར་ནས་ཕྱིར་འཁོར་སྒམ་དུ་ལོག་རྒྱུ་དེ་རེད་ལ། རང་གི་རྒྱབ་ཁུག་ཆེན་པོ་དེ་སྔར་མལ་དུ་ཡོད་པ་མཐོང་བ་ན། གཞི་ནས་སེམས་ལྷོད་དུ་འབབ་ཐུབ། 

 འདི་ལྟར་ཡོམ་ཡོམ་དུ་གཡོ་བའི་མེ་འཁོར་ནང་གཅིག་པུར་རྒྱ་གར་ལྷོ་ཕྱོགས་སུ་ལོག་སྐབས། ངའི་སེམས་སུ་བརྗོད་དཀའ་བའི་གནོང་འགྱོད་ཅིག་དང་རང་ཉིད་ལ་ཡིད་ཆད་པའི་ཚོར་སྣང་ཞིག་ངང་གིས་སྐྱེ་ཡོང་སྟེ། ད་ཐེངས་རྡ་སར་ཧ་ལམ་ཟླ་གཅིག་ཙམ་བསྡད་པའི་རིང་ལ། གྲོགས་པོ་ཚོ་དང་ལྷན་དུ་ཏག་སེ་རྩེ་བ་དང་། ཡར་འཁྱམ་མར་ལྡོམ་བྱས་ནས་བསྡད་སྟབས། ཤོག་ངོས་ཉིས་བརྒྱ་ཙམ་ལྡན་པའི་ཨིན་ཇིའི་བརྩམས་སྒྲུང་གཅིག་ལས་ཀློག་མ་ཐུབ་པ་དང་། སྔ་མོ་ནས་འགོ་བརྩམས་པའི་སྒྲུང་ཐུང་དེའི་མཇུག་སྐྱོང་བའི་འཆར་གཞི་ཡང་མ་གྲུབ་པའི་ཐོག ཐ་ན་ཉིན་ཐོའི་འབྲི་དེབ་ཀྱི་ཁ་ཡང་འབྱེད་མ་ཐུབ། ད་དུང་དེ་དག་ལས་ཀྱང་ལྷག་པའི་གནོང་འགྱོད་སྐྱེ་ས་ཞིག་ནི་དུས་ཡུན་དེའི་ནང་ལྷག་པའི་ལོག་གཡེམ་ཐེངས་གཅིག་དེ་ཡིན། 

 ལོག་གཡེམ་བྱུང་བའི་མཚན་མོ་དེའི་ཆུ་ཚོད་དགུ་དང་ཕྱེད་ཙམ་ལ་ང་རང་གྲོགས་པོ་གཞན་ཞིག་གི་ཁྱིམ་དུ་ཕྱིན། དེ་ནུབ་ང་རང་ནམ་རྒྱུན་འདུག་སའི་གྲོགས་པོ་ཡི་དགའ་རོགས་ཐོན་འདུག་པས། ངས་ཁོ་གཉིས་ལ་བར་ཆད་བྱེད་མི་འདོད། ང་རང་ཁོའི་སྒོ་འགྲམ་དུ་བསླེབས་པ་ན། ཁང་པའི་ཤེལ་ཁྲ་ནག་ཁུང་ངེར་དང་སྒོ་སྟེང་དུ་ཟྭ་ཆེ་རྒྱུ་ཆུང་རྒྱུ་མེད་པ་ཞིག་བརྒྱུས་ནས་འདུག་པ་ལས་ཁོ་རང་མཐོང་ཡུལ་དུ་མ་མཆིས། ངས་སྒོ་མཚམས་སུ་བཞག་པའི་ལྷམ་རྣམས་ཀྱི་ནང་དང་། སྒེ་ཁུང་གི་སྟེང་། གསང་སྤྱོད་ནང་སོགས་རྒྱུན་པར་ལྡེ་མིག་འཇོག་སའི་གནས་ཀུན་ཏུ་བཙལ་རུང་ལྡེ་མིག་མ་རྙེད། ངས་སྐད་འཕྲིན་ཐོག་ཁོ་ལ་སྐད་ཆ་བཞག་ཅིང་ཁ་པར་བཏང་ཡང་འགྱོག་མཁན་མ་རག དེ་བས་ང་རང་སྒོའི་གཡས་ཕྱོགས་ནས་གྱེན་དུ་རྒྱུ་བའི་རྡོ་སྐས་ཐོག་བསྡད་དེ་ཁ་པར་རྩེ་བཞིན་ཁོའི་ཨ་ལན་ཡོང་རྒྱུར་བསྒུགས། 

 དེ་ལྟར་ཁ་པར་རྩེ་བཞིན་ཕལ་ཆེར་ཆུ་ཚོད་ཕྱེད་ཙམ་བསྡད་རུང་ད་དུང་གྲོགས་པོའི་ཨ་ལན་མ་འབྱོར། ད་ནི་ཆུ་ཚོད་བཅུ་པ་ཟིན་ལ་ཉེ་བས་ངའི་སེམས་སུ་དོ་ནུབ་ཁོ་ཁྱིམ་དུ་མི་ལོག་པ་ཨེ་ཡིན་སྙམ་ནས་སེམས་འཚབ་ལངས་འགོ་ཚུགས། གལ་སྲིད་ཁོ་ཁྱིམ་དུ་མ་ལོག་པ་ཡིན་ན། ནམ་རྒྱུན་འདུག་སའི་གྲོགས་པོ་ལ་ཁ་པར་བཏང་ནས་རང་སར་ལོག་རྒྱུ་ལས་ཐབས་གཞན་མེད། ཡང་ན་མེག་ལོར་དུ་ཕྱིན་ན་དགོང་མོ་གཅིག་ལ་འདུག་ས་རག་སྲིད། 

 ངས་དེ་ལྟར་བསམ་བློ་གཏོང་གིན་ཡོད་དུས། གློ་བུར་དུ་གཞོགས་ཀྱི་ཁང་པ་དེའི་སྒོ་ཕྱེ་བྱུང་བ་དང་། བུད་མེད་ཅིག་ཕྱི་རུ་དོན་བྱུང་། མོ་ཐད་ཀར་ཚུར་ཡོང་ནས་རྡོ་སྐེས་ལས་ཡར་ཁང་རྩེར་འཛེགས་སོང་བ་དང་། སྐར་ཆ་ཁ་ཤས་རྗེས་སུ་གྱོན་ཆས་དང་མལ་ཆས་ཀྱི་གཡོགས་འགའ་ལག་གཡས་པའི་ལག་ངར་ཐོག་གཟར་ནས་མར་བབས་བྱུང་། ངས་མོ་ཡར་འགྲོ་དུས་ལྟར་ཡོ་ཙམ་བགྱིས་ནས་མར་འབབ་བདེ་རུ་བཏང་བ་དང་། དེ་ནས་མོ་ལ་ངའི་གྲོགས་པོའམ་མོའི་ཁྱིམ་མཚེས་གང་དུ་ཕྱིན་པ་ཨེ་ཤེས་དྲིས། 

"ཤེས་མ་སོང་། ད་གིན་རང་བསྡད་འདུག ཕོ་སར་ཞིག་དང་ལྷན་དུ་འདུག ཏོག་ཙམ་སྒུགས་དང་འོང་རྒྱུ་རེད་བ།" མོས་དེ་ལྟར་བསྡུས་ལ་རྒྱས་པའི་ལན་ཞིག་བཏབ་ནས་ནང་དུ་འཛུལ་སོང་བ་དང་། མོ་རང་འཛུལ་རྗེས། ངའི་སེམས་སུ་ཁང་པའི་ནང་མོ་རང་གཅིག་པུ་ཨེ་ཡིན་དྲན། གལ་སྲིད་མོ་གཅིག་པུ་ཡིན་ན……། 

 རེད། ཉིན་འདི་དག་གི་རིང་ལ་ངའི་འདོད་ཆགས་ལྡབ་ཀྱིས་འཕར་སོང་། དུས་རྒྱུན་ལས་ཀ་བྱེད་སྐབས། མིག་རིལ་གློག་ཀླད་ཀྱི་འཆར་ཡོལ་ལ་ཅེར་ནས་ཉིན་ཧྲིལ་བོ་བསྐྱལ་རྟིང་། ཐང་ཆད་དེ་བཟི་བཟི་འཐོམ་འཐོམ་དུ་འགྱུར་བར་མ་ཟད། ལུས་སེམས་ཀྱི་ནུས་ཤུགས་ཕྲན་བུ་ལྷག་པ་དེ་ཟས་གཡོ་བ་དང་། གོས་འཁྲུ་བ། ནང་སྦྱོང་བྱེད་པ། ད་རུང་སྒྲུང་འབྲི་བ་སོགས་ཀྱི་ཐོག་ཏུ་གཏོང་དགོས་པས། བུད་མེད་དང་འཁྲིག་སྤྱོད་སྐོར་ལ་བསམ་བློ་དེ་ཙམ་མི་འཁོར། འོན་ཀྱང་ད་ཐེངས་འདི་ལྟར་ཟས་གང་ཞིམ་ཟ་བཞིན་ལས་ཀ་མེད་པར་དལ་ལྷོད་དུ་འདུག་དུས། ངའི་འདོད་ཆགས་འཕེལ་ནས་རྒྱང་རིང་ན་ཡོད་པའི་དགའ་རོགས་འདོད་པས་དྲན་ལ། རྒྱ་སྲང་ན་ཕར་འགྲོ་ཚུར་འོང་བྱེད་པའི་སྒེག་ལྡན་མ་ཚོའི་མདུན་གྱི་མྱོས་བུམ་དང་རྒྱབ་ཀྱི་འཕོངས་ཚོས་ལ་ལྐོག་ལྟ་ཡང་ཡང་ཤོར་ཞིང་། མཛེས་མ་དེ་དག་ཁ་ཁུ་སིམ་པའི་ཁང་པ་ཞིག་གི་ནང་དུ་ནུ་ཁེབས་དང་གསང་དོར་དལ་གྱིས་འབུད་རྒྱུ་བྱུང་ན་ཅི་འདྲའི་སྐྱིད་རྒྱུ་རེད་ཨང་སྙམ། དེའི་ཐོག་ད་རུང་གངས་སྐྱིད་ཀྱི་རྐང་ལམ་དོག་མོ་ནས་ཡར་འགོ་མར་འབབ་བྱེད་སྐབས། བྱིས་པ་ཁྲིད་དེ་འགྲོ་བའི་བུད་མེད་དང་། ཡང་ན་ཐོག་བརྩེགས་ཁང་པའི་ཕྱི་རུ་ལངས་པའི་བུད་མེད་ལོ་ན་ཅུང་ཆེ་བ་རྣམས་མཐོང་ཚེ། ཡིད་ལ་རང་དབང་མེད་པར་ཁྱོ་ག་ཕྱི་རྒྱལ་དུ་ཡོད་པའི་ཨ་ཏྲིན་(ལོ་ན་ཆེ་བའང་ཁྱོ་ག་ཡོད་པའི་བུད་མེད་ལ་གོ)ཚོས་རྡ་སའི་ཕོ་ཧྲེང་འགའ་ལ་བྱམས་པོ་བྱེད་ཚུལ་གྱི་གཏམ་རྒྱུད་དག་དྲན་ཞིང་། རང་ཉིད་ལའང་དེ་འདྲའི་སྟབས་བཟང་པོ་ཞིག་འགྲིགས་ན་ཅི་མ་རུང་སྙམ་ཡོང་། 

 གྲོགས་པོའི་ཨ་ལན་ད་རུང་མ་འབྱོར་སྟབས། ང་རང་རྡོ་སྐེས་ལས་ཡར་ལངས་ནས་འགྲོ་གྲབས་ཡོད། མེག་ལོར་དུ་འདུག་ས་འདི་ཡོད་སྙམ་པ་ཞིག་སེམས་སུ་མ་འཁོར་བས་ཕྱིར་ནམ་རྒྱུན་སྡོད་སར་མ་ལོག་རང་ལོག་རེད། ཡིན་ན་ཡང་ཏག་ཏག་སྐབས་དེར་སྔོན་གྱི་སྒོ་དེ་ཕྱེ་བ་དང་། གྱོན་ཆས་ལག་ཏུ་ཐོགས་ནས་ཡར་འཛུལ་མཁན་གྱི་བུད་མེད་དེས་ངའི་ཕྱོགས་སུ་བལྟས་ཏེ"བུ། ཇ་འཐུང་གི་ཡིན་ནམ། ཏོག་ཙམ་ཇ་འཐུངས་ནས་སྒུགས་དང་ཁོ་ཡོང་རྒྱུ་རེད"ཅེས་བཤད་བྱུང་། རྒྱབ་ཏུ་གློག་འཕྲོས་པའི་སྒོ་སྒྲོམ་ནང་དུ། མོ་ནི་གྲིབ་གཟུགས་ལྟར་ནག་ཡོར་རེར་མངོན་པ་ལས་ངོ་གདོང་གསལ་པོ་ཞིག་མཐོང་མི་ཐུབ། ད་གིན་གྱོན་ཆས་ལེན་དུ་འགྲོ་དུས་ཀྱང་གསལ་པོ་ཞིག་མ་རིག

 "ཨ་་་། ལགས་སོ། རེད། ད་ཁོ་ཡོང་རན་ཡོད་རྒྱུ་རེ་བ།" ངས་དེ་ལྟར་བཤད་དེ་རྡོ་སྐས་ནས་ཡར་སྒོ་ཁར་ལངས་པའི་མོའི་ཕྱོགས་སུ་འགྲོ་སྐབས། སེམས་སུ"མོ་ལ་གཅིག་དགོས་པ་ཨེ་ཡིན"སྙམ་པའི་བསམ་བློ་ངན་པ་ཞིག་འཁོར་བ་དང་། དེ་ནས་ཡང"ཨ་ཙི། བསམ་བློ་དེ་འདྲ་གཏོང་ག་ལ་རུང་། མོས་ལྷག་བསམ་རྣམ་དག་ཡིན་སྲིད"དྲན་ནས་སྐད་ཅིག་གི་བསམ་བློ་ངན་པ་དེ་བཙན་གྱིས་ཀླད་པ་ནས་ཕྱི་རུ་ཕུད། ང་སྒོ་མཚམས་སུ་ཐོན་དུས་མོས་སྒོའི་གཞོགས་སུ་ཡོ་ཙམ་བྱས་ཏེ་ང་རང་སྔོན་ལ་ནང་དུ་འཛུལ་དུ་བཅུག་བྱུང་། 

 ནང་དུ་ཡར་འཛུལ་མ་ཐག་ངས་ཐོག་མར་མཐོང་བ་ནི་ཡར་སྦུག་ཁང་དུ་འཛུལ་སའི་སྒོ་དེ་རེད་ལ། དེ་ཕྱེད་ཙམ་ཕྱེས་ནས་འདུག་པ་ལས་སྦུག་ཁང་ནང་བརྒྱབ་པའི་ཉལ་ཁྲིའི་ཟུར་ཙམ་དང་། སྒོ་མཚམས་ཀྱི་ས་གདན་དམར་པོ་མཐོང་ཐུབ། ངའི་མིག་གསར་པ་གཞོགས་གཡས་སུ་འཁོར་བ་ན། སྐེད་པའི་ཚད་དུ་བསླེབས་པའི་ཨར་འདམ་གྱི་ཐབ་ཁྲིའི་སྟེང་དུ་ཐབ་དང་སྣོད་འདུག་ལ། དེའི་ཐོག་སྟེ་མགོ་ཡི་ཚད་ཙམ་ཐོན་པའི་སྟེགས་ཁྲིའི་ཐོག་(དེ་ཡར་ཨར་འདམ་ལས་བཟོས་ཤིང་ཁང་པའི་ཆ་རེད)འགྱིག་དམ་ཆེན་པོ་འགའ་བསྒྲིགས་ནས་གདའ། མོས་ང་རང་ཕྲན་ཙམ་ཐེ་ཚོམ་ངང་ལངས་ཡོད་པ་མཐོང་བས། "སྦུག་ཏུ་ཡར་ཕེབས"ཞེས་ཞེ་སའི་ངང་བཤད་བྱུང་བ་དང་། ངས་ལྷམ་ཕུད་དེ་སྦུག་ཁང་དུ་འཛུལ་དུས། གཞོགས་གཡོན་ཏེ་སྒོ་མཚམས་སུ་བུད་མེད་ཀྱི་ལྷམ་ཆ་འགའ་བཞག་པའི་ལྕགས་ཀྱི་ལྷམ་ཁྲི་ཞིག་ཡོད་པ་མཐོང་། 

 སྦུག་ཁང་ལ་འཛུལ་དུས་ཧ་ལམ་ཁྱིམ་ཚང་གཞན་ཞིག་ཏུ་ཐོན་པ་ལྟ་བུའི་ཚོར་སྣང་སྐྱེས་བྱུང་། ས་གདན་དམར་པོའི་ཐོག་ཏུ་ཕལ་ཆེར་ནག་ཐིག་ཅིག་མེད་པར་སྣང་ལ། ད་གིན་སྒོ་ནས་ཡར་འཛུལ་སྐབས་ཟུར་ཙམ་མཐོང་བའི་ཉལ་ཁྲི་དེའི་ཐོག་བཀྲུས་མ་ཐག་པའི་གྱོན་ཆས་དང་ཉལ་ཆས་ཀྱི་གཡོགས་འགའ(མོས་ཐོག་ཁ་ནས་མར་བླངས་པ་རྣམས་རེད་འདུག)སྤུངས་པའི་ཚུལ་གྱིས་གཡུགས་ཡོད་པ་ལས། གཞོགས་གཞན་ན་བརྒྱབ་པའི་ཉལ་ཁྲི་དང་། དེའི་སྟེང་བརྩེགས་པའི་ཉལ་ཆས། ཉལ་ཁྲི་གཉིས་ཀྱི་བར་དུ་བཞག་པའི་ཤེལ་གྱི་ཅོག་ཙེ། ད་རུང་ཁང་པའི་ཕུགས་ན་བསླངས་པའི་ཤིང་གི་ཆག་སྒམ་མམ་མཆོད་སྒྲོམ(གནས་ངེས་མེད་དུ་ཁང་པ་གླས་ནས་འཚོ་བ་འཁྱོལ་ཐབས་བྱེད་པའི་བོད་པ་ཚོའི་ཁྱིམ་དུ་མཆོད་སྒྲོམ་དེ་འདྲ་མཐོང་རྒྱུ་དཀོན།)་སོགས་ཁྱིམ་ཆས་དང་ཅ་དངོས་ཚང་མ་གྲ་དག་ཅིང་གཙང་བས། བུད་མེད་གཅིག་གི་ཁང་པ་ཟེར་ན་འདི་འདྲ་ཞིག་ལོས་ཡིན་སྙམ་པའི་ཚོར་སྣང་ཞིག་

སྟེར་བྱུང་། 

 ངས་ཅུང་གུས་པའི་ངང་སྒོ་མཚམས་ཀྱི་ཉལ་ཁྲི་དེའི་ཟུར་དུ་སྡོད་གྲབས་བྱས་པ་ན། མོས"དེར་བཞུགས།"ཞེས་ཕར་ཕྱོགས་ཀྱི་ཉལ་ཁྲིའི་ཐད་དུ་མཛུབ་མོ་བཙུགས་པ་དང་། བཀྲུས་མ་ཐག་པའི་གྱོན་ཆས་དེ་ཕར་གྱང་མཚམས་སུ་ཕུད་ཙམ་བགྱིས་སོང་། ང་རང་ཕར་ཕྱོགས་ཀྱི་ཉལ་ཁྲིའི་སྟེང་མར་བསྡད་རྗེས། ད་གཟོད་གཞི་ནས་མོའི་ངོ་གདོང་ཡག་པོ་ཞིག་རིག་བྱུང་། མོའི་ཀྲི་ག་མེད་པའི་མིག་ཟུང་གི་ཟུར་ན་བྱིའུའི་རྗེས་དང་མཚུངས་པའི་རི་མོ་གཅིག་གཉིས་ཙམ་བབས་འདུག་པས་ལས། གཞན་བུད་མེད་ཅུང་སྒེག་ཉམས་ཅན་ཞིག་རེད། ལྷག་པར་མོའི་ཅུང་སྲབ་པའི་མཆུ་ཏོ་དང་མིག་མདངས་ནང་དུ་ཅི་ཡིན་མི་ཤེས་པའི་འགུགས་ཤུགས་ཤིག་གིས་ཁེངས། 

 "ཁྱོད་འདིར་ལྷོད་ལྷོད་བཞུགས་དང་ངས་ཇ་སྐོལ་ཡོང་།" མོས་ངས་མོ་ལ་མིག་བཤེར་བྱེད་བཞིན་པ་ཚོར་བས། ཅུང་དོགས་མི་བདེ་བའི་ངང་དེ་ལྟར་བརྗོད་དེ་མར་ཐབ་ཚང་དུ་ལོག་སོང་། མོའི་ངོ་གདོང་ཅུང་སྐམ་ཞིང་ཕྲ་མོད། འོན་ཀྱང་མོ་ཐབ་ཚང་དུ་འཛུལ་བའི་སྐད་ཅིག་མ་དེར། ངས་མོའི་མཁྲང་བའི་འཕོངས་ཚོས་དང་བརླ་ཤ་ཡིས་ལུས་རྩལ་གོས་ཐུང་དམ་པོ་དེ་གང་ཡོད་པ་མཐོང་བྱུང་བས།  འགྲེལ་མི་ཤེས་པའི་ཟ་འཕྲུག་ཅིག་ངའི་མདོམས་ནས་ལངས་ཏེ་ལུས་ཀྱི་ཆ་ཤས་ཀུན་ཏུ་མཆེད་པར་མ་ཟད། མདོམས་ཀྱི་སྦ་བ་ལ་སྲོག་ཞུགས་པ་ལྟར་ག་ལེར་གོས་ཐུང་གི་རྟ་བར་ནས་དགྱེ་འགོ་བརྩམས། ངོ་མ། མོས་ཇ་སྐོལ་བ་ལ་སྐར་མ་བཞི་ལྔ་ཙམ་འགོར་སོང་བ་དང་། དེའི་རིང་ལ་མོས་ཐབ་ཚང་ནས་ཡར་ང་ལ་"ཇའི་ནང་ཅི་ནི(ཀ་ར)་ག་ཚོད་དགོས་སམ། ཇིན་ཇིར(ལྒ་ཅ)བླུགས་ན་ཨེ་འགྲིག"ཅེས་དེ་དྲིས་པ་ལས་སྦུག་ཏུ་འཛུལ་མ་བྱུང་བ་མ་གཏོགས། ངས་ངོ་ཚ་ཆེན་པོ་ཞིག་ཉོས་ཡོད་པ་གདོན་མི་ཟ།  

 མོས་ཐབ་ཚང་དུ་ཇ་སྐོལ་བའི་གོ་སྐབས་དེ་དང་བསྟུན་ནས་ངས་སྦུག་ཁང་ནང་མིག་ཉུལ་ཞིབ་མོ་ཞིག་བྱས། ཕུགས་ཀྱི་མཆོད་སྒྲོམ་ནང་དུ་༧རྒྱལ་བ་རིན་པོ་ཆེ་མཚོན་པས་བླ་མ་འགའི་སྐུ་པར་བཤམས་པའི་ཐོག་ཏུ་ཁ་བཏགས་སེར་པོ་ཞིག་བསྒྲོན་འདུག་པ་དང་། དེ་དག་གི་མདུན་དུ་སྟོན་པའི་རྡོ་སྐུ་ཆུང་ཆུང་ཞིག་བཞག་འདུག་པ་དེའི་དབུ་མཐོང་ཙམ་མ་གཏོགས་གློག་གི་མཆོད་མེ་སྟར་བ་དེས་བསྐུངས་གདའ།(དེ་དུས་གློ་སྤར་མི་འདུག) མཆོད་སྒྲོམ་གྱི་ཤེལ་སྒོའི་གཤམ་ཟུར་ན་པར་ཅུང་ཆེན་པོ་ཞིག་སྦྱར་འདུག་པའི་ནང་། སྐེ་ལ་ཁ་བཏགས་གྱོན་ཞིང་ལག་ཟུང་བྲང་ཁར་སྦྱར་བའི་སྐྱེས་ཕོ་མོ་(བྱིས་པ་རེ་གཉིས་ཀྱང་མདུག)ཁྱུ་གཅིག་གི་དབུས་སུ༧སྐྱབས་མགོན་རིན་པོ་ཆེ་ཞལ་འཛུམ་པས་བཞེངས་ནས་པར་ཆས་ཀྱི་མིག་ལ་གཟིགས་འདུག ངས་ཞིབ་ཏུ་བལྟས་པ་ན། ཁོང་གི་མདུན་དུ་པུས་མོ་བཙུགས་ནས་བསྡད་པའི་བུད་མེད་དེ་མོ་ཡིན་པ་ཤེས། མོས་གོས་ཆེན་ཕྱུ་པ་དམར་པོ་ཞིག་གྱོན་འདུག་པ་དང་། ངོ་གདོང་དོ་ནུབ་ལས་དཀར་ཞིང་གཞོན་ཤ་དོད་པར་མ་ཟད། གང་འཚམ་རྒྱགས་པར་སྣང་། པར་ཆེན་པོ་དེའི་མཚམས་སུ། བུ་མོ་ཆུང་ཆུང་གཉིས་མདུན་དུ་བཟུང་བའི་སྐྱེས་པ་ཞིག་གི་པར་ཆུང་བ་ཞིག་ཀྱང་འདུག་པ་དེ་མོའི་བྱིས་པ་དང་ཁྱོ་ག་ཡིན་པར་མངོན་རུང་ངས་འདྲི་ག་ལ་ཕོད། 

 མོས་ཧ་ཡང་ནང་ཇ་ཆུ་འོ་གསུམ་བླུགས་ཏེ་ཐབ་མིག་ཐོག་བསྐྱོན་ནས་ཁོལ་རྒྱུར་སྒུག་བཞིན་པའི་སྐབས་སུ་སེམས་ནང་ཅི་ཞིག་འཁོར་བཞིན་པ་ཤེས་ཐབས་བྲལ་རུང་། ངས་དེ་ལྟར་མཆོད་སྒྲོམ་གྱི་ཤེལ་སྒོའི་སྟེང་སྦྱར་བའི་པར་དང་། ཐད་ཀྱི་གྱང་ངོས་སུ་བཀལ་བའི"མཐུན་པ་སྤུན་བཞིའི"རི་མོ། ཤེལ་གྱི་ཅོག་ཙེའི་ཐོག་བཞག་པའི་ཁ་པར་གྱི་གློག་སྤྱད་ཀྱི་སྐུད་པ(ཁ་པར་གློག་གསོག་སྤྱད་ཀྱི་སྐུད་པ)་དཀར་པོ(ཅོག་ཙེའི་ཐོག་དེ་མ་གཏོགས་མི་འདུག"་ལ་སོགས་ཁྱིམ་ནང་ཞིབ་ལྟ་བྱེད་པའི་ཚེ། སེམས་སུ"མོ་ལ་ཏན་ཏན་གཅིག་དགོས་པ་རེད། གོ་སྐབས་བཟང་པོ་འདི་འཆོར་དུ་འཇུག་མི་ཉན།"ཞེས་དང་། ཡང"གཅིག་བྱས་ན། མོ་ལྷག་བསམ་རྣམ་དག་ཡིན་ཅི་ཤེས། ཀུན་སློང་དེ་འདྲ་མེད་པ་ཡིན་ན། ཧུར་རྒྱུགས་བྱས་ན་དཔེ་བསགས་པ་མ་རེད་དམ། ཨ་ཙི། ཏན་ཏན་གཅིག་དགོས་པ་རེད་མ་གཏོགས། ངོ་མ་ཤེས་པའི་ཕོ་གསར་ཞིག་ལ་མཚན་མོར་འདི་འདྲའི་སྣེ་ལེན་བྱ་ཨེ་སྲིད།"ཅེས་རེ་བ་དང་ཐེ་ཚོམ་སྣ་ཚོགས་རྒྱ་མཚོའི་རླབས་རིས་ལྟར་གཅིག་འཇགས་གཉིས་ལངས་ཀྱིས་གཡོས་སོང་། 

གང་ལྟར་སྐར་མ་བཞི་ལྔ་ཙམ་གྱི་རྗེས་སུ་མོས་ཇ་ཕོར་དཀར་པོ་ཞིག་ཁྱེར་ནས་སྦུག་ཁང་དུ་འཛུལ་ཡོང་དུས། ངའི་མདོམས་ཀྱི་སྦ་བ་ཕུ་ཤོར་བའི་ལྒང་བུ་བཞིན་ཕྱིར་བརླ་བར་དུ་བསྡུས་ཡོད་པས་ངོ་ཚ་དེ་མྱོང་མ་དགོས་ཙམ་བྱུང་། མོས་ལག་གི་དཀར་ཡོལ་དེ་ཤེལ་གྱི་ཅོག་ཙེའི་ཐོག་བཞག་རྟིང་། སླར་ཐབ་ཚང་དུ་ལོག་སོང་བ་དང་། དེ་ནས་ཡང་ལག་གཡས་སུ་དཀར་ཡོལ་གཞན་ཞིག་དང་གཡོན་དུ་ཏན་ཤིང་སྒོར་སྒོར་འགའ་ཤས་བླུགས་པའི་སྡེར་མ་ཞིག་ཐོགས་ནས་ཐོན་བྱུང་། 

 "ཇ་དང་ལྷན་དུ་བྷི་སི་ཀི་ཏྲི་མཆོད་དང་" མོས་སྡེར་མ་ངའི་ཕྱོགས་སུ་བསྲིངས་ནས་སྨྲས་བྱུང་བ་དང་། ངས་ཅུང་གུས་ཚུལ་ངང་མཐེ་བོང་དང་ལྡབ་མཛུབ་ཀྱིས་སྡེར་ཐོག་ནས་ཏན་ཤིང་གོར་མོ་གཅིག་བླངས་རྗེས་མོས་སྡེར་མ་དེ་ཤེལ་གྱི་ཅོག་ཙེའི་ཐོག་ཏུ་བཞག་སོང་བ་དང་། དེ་ནས"དགོང་ཟས་མཆོད་ཚར་རམ"ཞེས་བཤད་དེ་ཟོས་མེད་ན་ཧ་ལམ་བཟོ་དགོས་པའི་རྣམ་འགྱུར་ཞིག་བསྟན་བྱུང་། སྐད་ཆ་དང་རྣམ་འགྱུར་དེས་ང་ལ་སྐྱོ་སྣང་ངམ་ཡིད་ཆད་འདྲ་བའི་གློ་བུར་གྱི་ཚོར་སྣང་ཁྱད་མཚར་ཞིག་སྟེར་བྱུང་སྟེ། བྱིས་པ་དང་ཁྱོ་ག་ལྡན་པའི་བུད་མེད་ཅིག་གི་མཚན་མོར་ངོ་མི་ཤེས་པའི་མི་ཞིག་ལ་འདི་ལྟར་སྣེ་ལེན་བྱེད་སྲོལ་ག་ལ་ཡོད། འདི་ལྟར་བྱས་ན་་་། མ་རེད། ཡང་ཕྱོགས་གཅིག་ནས་བཤད་ན་སྣེ་ལེན་དེ་ངས་རེ་ཞིང་སྒུག་པའི་སྣེ་ལེན་དེ་མ་ཡིན་ནམ། དེ་བས་ངས་ཟོས་ཚར་བ་ཡིན་ཞེས་སྨྲས་ནས་བཟོ་མི་དགོས་པའི་རྣམ་འགྱུར་ཞིག་བསྟན། (དགོང་ཟས་ང་རང་ནམ་རྒྱུན་འདུག་སའི་གྲོགས་པོའི་ནང་ཟོས་པ་ཡིན།) 

 "འདིར་ཁྱོད་གཅིག་པུ་བཞུགས་ཀྱི་ཡོད་དམ།" ངས་ཇ་ཕོར་ནང་ཏན་ཤིང་སྦང་ཙམ་བྱས་ནས་ཇ་འཐུང་ཞོར་མོ་ལ་དྲིས། 

"ཡིན། པུ་གུ་གཉིས་སློབ་གྲྭ་ཕྱིན་ཟིན་པས་ང་གཅིག་པུ་ཡིན།" མོས་ལན་བཏབས་བྱུང་ལ། མོས་དཀར་ཡོལ་བརླ་ཐོག་ཏུ་བཟུང་ནས་ཐད་ཀྱི་ཉལ་ཁྲིའི་ཐོག་འདུག་ཚུལ་ནི། མོ་རང་གསར་དུ་ཐོན་པའི་མགྲོན་པོ་ཡིན་པ་ལས་ཁྱིམ་བདག་མིན་པ་དང་མཚུངས། 

"ཁྱོ་ག?" ངས་དྲི་བ་འདིའི་ནང་གོ་རྒྱུ་ཞིག་ཡོད་སྙམ། 

"ཕྱི་རྒྱལ་ལ་ཡོད།" མོས་དེ་ལྟར་སྨྲས་པ་དང་ཡང་ངའི་དྲི་བ་ཡི་དོན་རྟོགས་སོང་བ་ལྟར"ཁྱོ་ག་དང་མ་ཐུག་ནས་ཟླ་བ་བཅུ་གཅིག་ཕྱིན་སོང་། ན་ནིང་སྤྱི་ཟླ་གཉིས་པའི་ནང་ཚུར་ཡོང་ནས་ཟླ་བ་གཅིག་ཙམ་བསྡད་དེ་ཕར་ཕྱིན་སོང་། དེ་ནས་ཐུག་མེད"ཅེས་བསྣན་བྱུང་། 

"ཡུན་དེ་འདྲའི་རིང་པོ་ཨེ། ཁྱོད་སུན་གྱི་མི་འདུག་གམ" ངས་མོའི་དགོས་མེད་ཀྱི་འགྲེལ་བཤད་ཞིབ་མོ་དེའི་ནང་ལ་ཏན་ཏན་་གོ་རྒྱུ་ཞིག་འདུག་བསམས་པས། ཡང་བསྐྱར་གོ་རྒྱུ་ཅན་གྱི་དྲི་བ་ཞིག་དྲིས། (ཕྱིས་སུ་"སུན་རྒྱུ་མི་འདུག་གམ"ཞེས་པ་ལས"ཁྱོ་ག་དྲན་གྱི་མི་འདུག་གམ"ཞེས་པའི་དྲི་བ་དེ་ལེགས་པའི་ཚོར་སྣང་བྱུང་རུང་། སྐབས་དེ་དུས་"སུན་གྱི་མི་འདུག་གམ་ལས"མ་དྲན།) 

"སྐྱོན་མི་འདུག ད་གོམས་འདུག"

 མོས་དངོས་གནས་སྐྱོན་མེད་པའི་ཚུལ་གྱི་དེ་ལྟར་བརྗོད་རྗེས། ངས"རེད་རེད"ལས་ཅི་ཞིག་སྨྲ་དགོས་པའམ་འདྲི་དགོས་པ་མ་ཤེས། ཇི་ཙམ་བསམ་བློ་བཏང་ཡང་། མོའི་སྐད་ཆ་དེའི་ནང་སྔོན་གྱི་གོ་རྒྱུ་དེ་འདྲ་མེད་པར་སྣང་བའི་ཐོག གལ་སྲིད་གོ་རྒྱུ་ཞིག་ཡོད་ན་སྐྱེས་པ་མེད་ཀྱང་སྐྱོན་མི་འདུག་ཟེར་བ་དེ་རེད་གདའ་བས། རེ་ཞིག་ངས་ཅི་ཞིག་བརྗོད་དགོས་མ་ཤེས་པར་ལུས་ལ། ཇི་ལྟར་སྐད་ཆའི་རྒྱུན་དེ་གོ་རྒྱུ་ཅན་དུ་བསྒྱུར་ཏེ་འཕྲོ་མཐུད་ན་བཟང་བའི་ཐད་ལ་བསམ་བློ་བཏང་རུང་འོས་འཚམ་གྱི་ཚིག་ཅིག་ཀླད་པའི་ནང་ཡོང་རོགས་མ་བྱས། 

 ཏག་ཏག་སྐབས་དེར་མོས་ང་ལ་བརྗོད་རྒྱུ་མི་རྙེད་པའི་དཀའ་ངལ་འཕྲད་པ་མཐོང་བ་བཞིན་ཐད་ཀྱི་ཉལ་ཁྲིའི་སྟེང་ནས་ཡར་ལངས་ཏེ"ཁོའི་པར་བསྟན་དགོས"ཟེར་ནས་ཅུང་བྲེལ་བའི་ངང་ཕྱིར་ཐབ་ཚང་དུ་འཛུལ་སོང་བ་དང་། སྐར་ཆ་གཅིག་མ་ཕྱིན་གོང་ཤུབས་དམར་པོ་ཅན་གྱི་ཀུ་ཤུ་ཐོན་དྲུག་པ་ཞིག་ལག་ཏུ་ཐོགས་ནས་ཡར་ལོག་བྱུང་། ད་ཐེངས་མོ་ཐད་ཀྱི་ཉལ་ཁྲིའི་སྟེང་མ་ཙོག་པར་ངའི་འགྲམ་དུ་བསྡད་དེ་ཁ་པར་ནང་གི་པར་རྣམས་རེ་རེ་བཞིན་སྟོན་འགོ་བརྩམས་པས། ངའི་བརླ་གཡོན་པ་དང་མོའི་བརླ་གཡས་པའི་བར་དུ་ཧ་ལམ་མཛུབ་མོ་མི་ཐར། 

 མོས་སྐད་འཕྲིན་ནང་འཛུལ་ནས"འདི་ངའི་ཁྱོ་ག་རེད། ལྡི་ལི་ན་རེད། འདི་ངའི་བྱིས་པ་གཉིས་རེད། སློབ་གྲྭའི་ནང་ཡོད། འདི་ཤིམ་ལ་ན་རེད། ཁ་བ་མཐུག་པོ་མི་འདུག་གམ། འདི་ང་རེད། ད་ག་ཙམ་རྒྱ་གར་སཱ་རས་གྱོན་ནས་བརྒྱབ་པ་རེད།"ཅེས་མཐེབ་རྩེ་ཀུ་ཤུའི་འཆར་ཡོལ་ལ་འཐེན་ཙམ་འཐེན་ཙམ་བྱས་ཏེ་པར་རེ་བརྗེ་བ་དང་སྦྲགས། འགྲེལ་བཤད་སྙིང་བསྡུས་རེ་བྱེད་པའི་ཚེ་ན། ངས་ངག་ནས་"ཨ་ཙི། ཕོ་གསར་རྫིག་པོ་འདུག ཕྲུ་གུ་གཉིས་དེ་འདྲ་ཤ་ཚ་བ་ལ། ཁྱོད་ཀྱིས་རྒྱ་གར་གྱི་ཆས་གོས་གྱོན་ན་དཔེ་ལན་པོ་འདུག པར་འདིའི་ནང་ཁྱོད་ཤིན་ཏུ་སྙིང་རྗེ་མོ་གདའ"ཞེས་མོས་བསྟན་པའི་པར་རེ་རེ་དང་མོའི་སེམས་ཁམས་ལ་འཚམ་པའི་ཁ་ཡག་ངོ་བསྟོད་ཅི་ཐུབ་བྱས་པ་དང་སྦྲགས། སེམས་སུ་ཏན་ཏན་མོ་ལ་གཅིག་དགོས་པ་འདྲ་སྙམ་ཞིང་"གོམ་པ་གཉིས་པ་དེ"ཇི་ལྟར་བརྒྱབ་ན་བཟང་བའི་ཐད་ལ་ཡུན་རིང་བསམ་མནོ་བཏང་། མཐར་ངས་པར་ཞིག་ལ་ཞིབ་པར་ལྟ་བའི་ཚུལ་གྱིས་འགུལ་ཙམ་བྱས་ནས་བརླ་གཡོན་པ་མོའི་བརླ་གཡས་པར་གཏུགས་པ་ན། བསམ་ཡུལ་ལས་འདས་པ་ཞིག་ལ་མོས་ག་ལེར་བརླ་གཡས་པ་ཕར་ཙམ་ཐེན་ནས་སྔར་བཞིན་ངེད་གཉིས་ཀྱི་བར་ལ་མཛུབ་མོ་ཐར་ཙམ་གྱི་བར་སྟོང་བཞག་སོང་། དེས་ནི་མོས་ངའི་སེམས་སུ་བསམ་བློ་བཙོག་པ་ཅི་ཞིག་བཅངས་ཡོད་པ་ཤེས་པར་མ་ཟད། དེ་དང་ལེན་བྱེད་འདོད་མེད་པ་གསལ་པོར་བསྟན་པས། ངས་གློ་བུར་དུ་རང་གིས་བླུན་རྟགས་རི་ལས་ཆེ་བ་ཞིག་བསྟན་པ་རྟོགས་ཤིང་ངོ་གནོང་ནས་དཔྲལ་བ་དང་མཆན་ཁུང་ན་རྔུལ་ཆུ་སྡུད་གྲབས་བྱེད་པ་ཚོར་མོད། འོན་ཀྱང་ཅི་མི་སྙམ་པའི་ཉམས་ཤིག་བསྟན་ནས་མུ་མཐུད་པར་ལ་བལྟས་ནས་བསྡད། ཡིན་ན་ཡང་སྔར་གྱི་རེ་བ་དེ་དང་ལྷན་དུ་ཁ་ཡག་བརྗོད་པའི་འདུན་པ་དེའང་ཡལ་སོང་བས། མོས་བརྒྱབ་པའི་པར་རིས་རེ་རེའི་འགྲེལ་བཤད་ཀྱི་ལན་དུ་"ཨ་ལེ། ཨ་ལེ"ཞེས་པའི་ཚིག་གཉིས་ཀྱིས་འཐུས་པ་བྱས། 

 ད་ནི་ངས"མོ་ལ་གཅིག་དགོས་པ་འདྲ"སྙམ་པའི་བསམ་བློ་དེ་ནོར་འཁྲུལ་ཡིན་པ་རྟོགས་པར་མ་ཟད། བླུན་རྟགས་ཆེན་པོ་ཞིག་བསྟན་ཚར་བས། མུ་མཐུད་མོའི་ཁྱིམ་གྱི་མགྲོན་པོ་གལ་ཆེན་བྱེད་མི་འདོད་པ་དང་ཡིད་ལ་གྲོགས་པོ་ཁྱིམ་དུ་འབྱོར་ཨེ་ཡོད་དྲན། ཡིན་ན་ཡང་རེ་བ་ངན་པ་ལེགས་འགྲུབ་མི་ཡོང་བ་ཤེས་མ་ཐག་སྒོ་རུ་དོན་སོང་ན། ངའི་དམིགས་ཡུལ་ཐ་ཤལ་དེ་དངོས་གནས་ལྷང་དུ་བུད་འགྲོ་བར་སྣང་། ངོ་མ། ངས་མོ་ལ་ལུས་པོའི་འགུལ་སྟངས་ཤིག་གིས་ངའི་བརླ་གཡས་པ་མོའི་བརླ་གཡོན་པར་ཁེལ་བ་མ་གཏོགས་དམིགས་ཡུལ་ངན་པ་གང་ཡང་མེད་ཚུལ་སྟོན་འདོད་པ་འདྲ། དེ་བས་ངས་མུ་མཐུད་མོའི་སྐད་འཕྲིན་ནང་གི་པར་རྣམས་མ་རྫོགས་བར་བསྡད་ཅིང་། དེ་རྗེས་སྤྱིར་བཏང་གྱི་གླེང་མོལ་འགའ་བྱས་པ་ལས་གོ་རྒྱུ་ཅན་གྱི་སྐད་ཆའི་ཟུར་ཙམ་ལ་མ་ཕྱིན། ངས་ཡང་བསྐྱར"ཞབས་འདྲེན"ཞིག་ཞུ་མི་འདོད། 

 དེ་ལྟར་ང་རང་འགྲོ་རྒྱུར་བྲེལ་བཞིན་ཡོད་མོད། འོན་ཀྱང་མོས་མོ་རང་རྒྱ་གར་གྱི་མེ་ལཱ(འདུས་ཁྲོམ)ལ་ཕྱིན་ནས་ཕོར་པ་སྤུས་ལེགས་འགའ་གོང་ཁེ་པོའི་ཐོག་ཉོས་པའི་སྐོར་དང་། གལ་སྲིད་ངས་ཅ་དངོས་ཙག་ཙིག་འགའ་ཉོ་དགོས་ན། སང་ཉིན་མེ་ལཱར་ཕྱིན་ནས་ཉོས་ན་ཁེ་བ། མེ་ལཱ་ནི་འདུས་ཁྲོམ་ཁོ་ན་མ་ཡིན་པར་སྲོལ་རྒྱུན་ལྟ་བ་མཁྲེགས་པའི་རྒྱ་གར་སྤྱི་ཚོགས་ནང་གཞོན་ནུ་ཕོ་མོ་རྣམས་མཉམ་འཛོམས་བྱེད་སའི་ཁོར་ཡུག་གམ་གོ་སྐབས་བཟང་པོ་ཞིག་ཡིན་ཚུལ་སོགས་མང་པོ་ཞིག་བཤད་དེ་ང་རང་འགོག་ཅི་ཐུབ་བྱེད། ངས་ད་ནི་རང་གི་དམིགས་ཡུལ་བཙོག་པ་དེ་འགྲུབ་རེ་མེད་པ་རྟོགས་པས། མོ་ལ་ཁ་ཡག་ངོ་དགའ་ཡང་བྱེད་འདོད་མེད་པར་གྱུར། ངོ་མ་མ་གཞི་མི་ཞེས་པ་དེ་འདྲ་ཞིག་ཨེ་ཡིན། མོས་སྐད་ཆ་ཅི་ཞིག་བརྗོད་རུང་"ངས་རེད་རེད། རེད་རེད"ཅེས་པའི་ཚིག་འབྲུ་གཉིས་ཀྱིས་མོས་མཐུན་བྱས། གལ་སྲིད་མོ་རང་མི་གཞན་གྱི་རྣམ་འགྱུར་ལ་ཅུང་བརྟག་ཤེས་མཁན་ཞིག་ཡིན་ན། ངའི་ངོ་གདོང་ལ་སུན་སྣང་གི་རྣམ་འགྱུར་གྱིས་ཁེངས་ནས་འགྲོ་རྒྱུར་བྲེལ་ཡོད་པ་མཐོང་སྲིད་མོད། འོན་ཀྱང་མོས་སྐད་ཆའི་རྒྱུན་མཐུད་ཅི་ཐུབ་བྱེད། 

 དེ་ལྟར་མོས་སྐད་ཆ་གཅིག་རྗེས་གཉིས་མཐུད་བཤད་དེ་ང་རང་ཧ་ལམ་མཚན་ཧྲིལ་བོར་ཉར་འདོད་པ་ལྟར་བྱེད་པས། མཚམས་ཤིག་ལ་ངའི་སེམས་སུ་མོ་རང་སླུ་བྲིད་བྱེད་མཁན་གྱི་འདྲེ་མོ་ཞིག་མ་ཡིན་ནམ་སྙམ་པའི་བྱིས་བློའི་ཚོར་སྣང་ཁྱད་མཚར་ཞིག་འཁོར་བ་དང་། དེ་ནས་ཡང་གློ་བུར་དུ་ཁྱད་མཚར་བའི་ཚོར་སྣང་དེ་འདྲ་ཞིག་སྐྱེས་པར་ཕྲན་བུ་ཡ་མཚན་སྐྱེས། ངོ་མ་ང་ཚོ་ཇི་ལྟར་ཆེན་པོ་ཆགས་རུང་བྱིས་བློའི་ཤོག་དཀར་ངོས་སུ་བྲིས་པའི་བག་ཆགས་ཀྱི་རི་མོ་རྣམས་ནམ་ཡང་བསུབ་ཏུ་མེད་པ་འདྲ།  

 ངས་ཡུད་ཙམ་ལ་བསམ་བློ་དེ་འདྲ་ཞིག་བཏང་ནས་སླར་སེམས་པ་ཚུར་ས་གདན་དམར་པོ་བཏིངས་པའི་ཉལ་ཁང་དུ་ཁུག་དུས། མགྲོན་བདག་བུད་མེད་དེས་ཉེ་བའི་ཉིན་འགའ་ལ་རྣ་བ་ན་བར་ཟ་འཕྲུག་ལངས་ནས་བཟོད་བསྲན་ཐུབ་དཀའ་ཚུལ་ཞིག་བརྗོད་བཞིན་འདུག་པར་མ་ཟད། རྣ་བའི་བུ་ག་ལས་ཅི་ཞིག་ཕྱིར་འདོན་འདོད་པ་ལྟར་མཛུབ་མོ་རྒྱུད་ཙམ་དང་སྐེ་ཡོ་བྱེད་ཞོར། ང་ལ་བལྟས་ནས་"རྣ་ཁུང་ནང་རྨ་ཆགས་ཨེ་འདུག་ཅིག་ལྟ་རོགས་"ཞེས་རེ་བ་བྱས་བྱུང་། 

 མོའི་རེ་བ་ལྟར་ངས་མོའི་རྣ་ཁུང་གཡས་པར་ལྟ་བར་རྩོམ་དུས། ལག་པས་མོའི་མགོའམ་མ་ནེ་གང་ཞིག་ནས་འཛིན་དགོས་མ་ཤེས་པས། སྐད་ཅིག་ཙམ་ལ་ཐེ་ཚོམ་ངང་ལུས། ཡིན་ན་ཡང་སྐབས་དེར་མོས་ཤུབས་དམར་པོ་ཅན་གྱི་ཀུ་ཤུའི་ཁ་པར་དེའི་གློག་སྒྲོན་སྤར་ནས་ངའི་ལག་ཏུ་བཞག་པར་མ་ཟད། ཕ་ཡུལ་ན་ཤིག་ལྟ་སྐབས་མགོ་སྟོན་པའི་ཚུལ་གྱིས་མགོ་བོ་ངའི་བྲང་ཁའི་ཐད་དུ་ཡོ་ནས་རྣ་བ་གཡས་པ་ངའི་ཐད་དུ་བསྟན་བྱུང་། 

 ངས་ལག་གིས་མོའི་མགོ་བོ་བསྐྱོར་ཞིང་ཁ་པར་གྱི་གློག་མོའི་རྣ་ཁུང་ལ་བསྒྲོན་ནས་བལྟས་པ་ན། རྣ་ཁུང་ལ་རྨ་ཆགས་མེད་པར་མ་ཟད། རྣ་སྤབས་རྣམས་གཙང་མར་ཕྱིས་ནས་རྨ་ཆགས་བཟོ་མི་འདུག་པས། གློ་བུར་དུ་སྔོན་གྱི་རེ་ངན་དེ་སླར་ཡང་ཀླད་པའི་ནང་འཛུལ་བྱུང་། ཨ་ཙི། མ་གཞི་མོ་ལ་གཅིག་དགོས་པ་ཨེ་ཡིན། མོས་རྣ་བར་ཟ་འཕྲུག་ལངས་ཁུལ་གྱིས་མགོ་བོ་ང་ལ་བསྟན་པ་ཡིན་ནམ། སྐབས་དེར་ངས་ལོ་འགའི་སྔོན་དུ་བུད་མེད་ཀྱི་ཆགས་པའི་ལྟེ་བ་གཅིག་རྣ་རྒྱབ་ཏུ་ཡོད་ཚུལ་བཀླགས་པའང་དྲན་བྱུང་བ་དང་།རྨ་ཆགས་མེད་པ་གསལ་པོར་མཐོང་ཡང་མོའི་མགོ་བོ་ཚུར་ཙམ་ཐེན་པར་མ་ཟད། གློག་སྒྲོན་རྣ་ཅོག་གི་སྟེང་ནས་མར་དང་འོག་ནས་ཡར་བརྒྱབ་པ་དང་སྦྲགས། གཟབ་གཟབ་མངོན་ཆུང་གིས་མཛུབ་མོས་མོའི་རྣ་རྒྱབ་ལ་འཕུར་ཅི་ཐུབ་བྱས། 

 རྣ་རྒྱབ་ལ་འཕུར་འཕུར་བཏང་བ་དེས་ཡིན་ནམ་ཡང་ན་མོ་ལ་སྔ་མོ་ནས་འཆར་གཞི་དེ་འདྲ་ཞིག་ཡོད་མི་ཤེས་ཀྱང་། གང་ལྟར་མོས་མགོ་བོ་ངའི་བྲང་ཁ་ནས་ཕར་མ་ཁྱེར་བར་མུ་མཐུད་ན་འགྲིག་པའི་རྣམ་འགྱུར་ཞིག་བསྟན་པ་དང་། ངས་ཀྱང་གོ་སྐབས་དམ་འཛིན་གྱིས་ལག་པ་མོའི་མགོ་སྐེ་ནས་བྲང་སྟེང་དུ་ཕབ་ཅིང་། དེ་ནས་ད་རུང་མར་ཁོག་སྨད་དུ་ཕབ་པ་ཡིན། 

 ངས་མཚན་མོ་དེར་གློ་བུར་དུ་ལྷག་པའི་ལོག་གཡེམ་དེའི་བྱུང་རིམ་རྣམས་རེ་རེ་བཞིན་ཞིབ་མོར་འབྲི་མི་འདོད། དེ་ནི་འདོད་རྩོམ་འབྲི་མཁན་ཚོའི་ལས་རེད། འོན་ཀྱང་དགོང་མོ་དེར་ངས་མོའི་གོས་ཐུང་མར་སྒྱིད་ཁུག་ཏུ་ཐེན་ནས་མོའི་ནག་སྔོ་ཤུལ་ཤུལ་གྱི་བརླ་མཚམས་དང་། དཀར་ཤུལ་ཤུལ་གྱི་རི་མོ་དོད་པའི་བརླ་ཤ(ཤ་ཤོར་ཤུལ་རེད)དང་། ད་རུང་འདོད་པས་མྱོས་པའི་རྣམ་འགྱུར་སོགས་མཐོང་བའི་ཚེ་ན། ང་ལ་གློ་བུར་དུ་ཅུང་ཞེ་ལོག་པའི་ཚོར་སྣང་ཁྱད་མཚར་ཞིག་སྐྱེས་ནས་ངེད་གཉིས་ཀ་ལ་སྙིང་རྗེ་ཞིག་སྐྱེས་བྱུང་། མོ་ལ་བྱིས་པ་དང་ཁྱོ་ག་ཡོད་ལ། ངའི་དགའ་རོགས་ཀྱིས་ཐག་རིང་ནས་ང་ལ་རེ་བ་དང་ཡིད་ཆེས་ཀྱིས་སྒུག་ཡོད། ཡིན་ན་ཡང་ཁྱད་འཚར་བའི་སྐྱོ་སྣང་དེས་འདོད་པའི་མེ་ལྕེ་གསོད་མ་ཐུབ། ངས་མོ་ལ་འཁྲིག་སྤྱོད་བརྒྱུད་དེ་འགོ་བའི་ན་ཚ་མེད་པའི་རེ་བ་བརྒྱབ་ནས་བཅུག་ལ། མོས་ང་ལ་འཁྲིག་སྤྱོད་ཀྱི་ན་ཚ་མེད་པའི་རེ་བ་བྱས་ཏེ་བསྟན། དེ་ལྟར་ཡུད་ཙམ་ལ་ས་གདན་དམར་པོ་གཏིང་བའི་ཁང་ཆུང་དེའི་ནང་ངེད་གཉིས་ཀྱི་འཁུན་སྒྲ་གཉོམ་པོས་ཁེངས་སོང་། 

 གློ་བུར་གྱི་ལོག་གཡེམ་དེ་ལྷག་ཚར་ནས་ང་རང་མོའི་གཞོགས་སུ་ལོག་སྐབས། ངས་རང་གི་མིག་ཟུང་འཁྲུལ་སོང་བ་རྟོགས། རང་གི་འཁྲིས་སུ་ཉལ་བའི་བུད་མེད་དེའི་ངོ་གདོང་གི་སྒག་བརྩི་རྣམས་རྔུལ་ཆུས་ཤར་ཤུར་དུ་བཤལ་ནས་ལྷག་པར་རྒས་ཉམས་དོད་པར་མ་ཟད། སྣ་ཁུང་དུ་སྔར་མེད་པའི་དྲི་ངན་ཞིག་ཀྱང་འཐུལ་ཡོང་བས། ངས་འགོག་རྒོལ་མ་བྱས་པར་རང་གི་འདོད་ཆགས་ཀྱི་རྗེས་སུ་འབྲངས་བར་གནོང་འགྱོད་སྐྱེ་འགོ་བརྩམས་པར་མ་ཟད། བུད་མེད་དེ་དང་ལྷན་དུ་སྐད་ཅིག་ཀྱང་འདུག་སྙིང་མི་འདོད་པར་གྱུར། 

 དེ་བས་མོས་དེ་ནུབ་མོའི་ནང་དུ་ཉལ་ན་ཆོག་ཚུལ་སྨྲས་ཏེ་འགོག་ཅི་ཐུབ་བྱས་པ་ལ་མ་ལྟོས་པར་མགྱོགས་མྱུར་གྱོན་ཆས་གོན་ནས་ཕྱི་རུ་དོན་དུས། སྟབས་ཡག་པ་ཞིག་ལ་གྲོགས་པོའི་ཁང་པའི་སྒེའུ་ཁུང་སྔར་བཞིན་ནག་ཁུང་ངེར་མ་ཡིན་པར་གློག་འཕྲོ་འདུག ངས་སྒོ་ཡར་ཕུད་དེ་ནང་དུ་འཛུལ་སྐབས། ཁོས་དུས་རྒྱུན་ལྟར་ཁ་པར་རྩེད་བཞིན་ཉལ་ཁྲིའི་སྟེང་ལོག་འདུག ཁོས"འཕྱི་བོ་འདི་འདྲར་གང་ནས་ཡོང་བ་ཡིན"ཞེས་དྲིས་བྱུང་བར། ངས་ནམ་རྒྱུན་འདུག་སའི་གྲོགས་པོའི་དགའ་རོགས་གློ་བུར་དུ་ཡོང་བས། ང་ཁོའི་ཁང་པའི་ནང་ཉལ་དུ་ཡོང་ཚུལ་བཤད་པ་ལས། ཁོའི་ཁྱིམ་མཚེས་ཀྱི་ནང་དུ་སོང་བར་གསང་བ་བྱས། 

 གྲོགས་པོ་དང་ངེད་གཉིས་ཅི་འཕྲོས་མོལ་འཕྲོས་བཤད་དེ་སྐར་མ་ཉི་ཤུ་ཙམ་ལྷག་སོང་བས་ནམ་ཕྱེད་ཟིན་ལ་ཉེ། ངས་མལ་ས་བཅས་ནས་ཉལ་བའི་སྟ་གོན་བྱེད་དུས། ཁོ་རང་ཉལ་ཁྲིའི་སྟེང་ནས་ཡར་ལངས་པར་མ་ཟད། ཁ་པར་དང་རྣ་ཉན་དཀར་པོ་གོས་ཐུང་གི་གློ་ཁུག་ནང་བཅུག་པ་དང་འབྲེལ"ཁྱོད་རང་འདིར་ལྷོད་ལྷོད་ཉོལ་ཨ"ཞེས་སྨྲས་ཏེ་ཁོ་ཁང་པའི་ནང་ཉལ་རྒྱུ་མིན་པའི་རྣམ་པ་ཞིག་བསྟན་བྱུང་། 

 "ཁྱོད་གང་དུ་འགྲོ་རྒྱུ་ཡིན།" ངས་ཅུང་འཐོམ་པའི་ངང་དྲིས། 

"ཁྱིམ་མཚེས་ཨ་ཏྲིན་སར་འགྲོ་རྒྱུ་ཡིན།" ཁོས་མ་རབས་དང་ངོ་ཚ་། སྤོབས་པ་སོགས་འདྲེས་པའི་འཛུམ་ཁྱད་མཚར་ཞིག་བསྟན་ནས་ལན་དེ་འདྲ་ཞིག་བཏབ་བྱུང་བ་དང་། ཕྱི་རུ་དོན་ཞོར"སྒོ་ལ་གཏན་བུ་མ་རྒྱག ང་ཞོགས་པ་སྔ་པོར་ལོག་གི་ཡིན"ཞེས་སྨྲས་ཏེ་སྒོ་ནས་ཡལ་སོང་། 

ང་རང་སྔར་བས་ཀྱང་ཧང་སང་བར་ལོས་འགྱུར། གློག་བསད་དེ་ཉལ་ཆས་ནང་འཛུལ་རྗེས། ང་རང་ཡུན་རིང་བསམ་གཞིགས་ཀྱི་ཁྲོད་དུ་ལུས་ནས་གཉིད་མ་ཡུར།།

 ༢༠༡༧/༦/༡༥ཉིན་རྫོགས།