གོམ་པ་དང་པོ་སྤང་རིའི་ཞོལ་ནས་སྤོས། །
གངས་རིའི་ཉག་ཀའི་རྐང་རྗེས་སོ་ཡང་། །
དུས་འདིར་ད་དུང་ཁ་བས་མ་བསྣོག་པར། །
བདག་གི་སེམས་སུ་ཅི་འདྲ་གསལ་བ་ལ། །
གཙང་ཆབ་སྔོན་མོས་ཁ་ཁོག་མངར་ནས་ཡོད། །
སྤྲིན་དཀར་འཇའ་རིས་ཐོད་ལ་བླངས་ནས་ཡོང་། །
རྒྱང་རིང་རྒྱ་མཚོའི་འགྲམ་གྱི་རྐང་རྗེས་ལ། །
མཚོ་མོའི་བླངས་རིས་ཤུགས་ཀྱིས་ཡོང་བ་རིག །
གངས་རླུང་ཇི་ལྟར་འཚུབ་ཀྱང་འཚུབ་ཏུ་ཆུགས། །
མཚོ་རླབས་ཅི་ཙམ་འཁྲུག་ཀྱང་འཁྲུག་ཏུ་ཆུགས། །
བདག་གི་གོམ་ཆུང་འདེག་པར་མི་ཐོགས་ན། །
གང་གི་རྐང་རྗེས་ནོག་པར་ཅི་ཕྱིར་འཇིགས། །
མདུན་གྱི་རི་རབས་འགྱིངས་པའི་ཁ་ངོ་ལ། །
བདག་གི་ངོ་རིས་ཐེངས་གཅིག་འབྲི་བ་ལ། །
སོ་དང་སན་མོ་ཟད་ནས་རྫོགས་གྱུར་ཀྱང་། །
བདག་གི་སྙིང་གི་རུས་པས་འབྲད་ངེས་ཡིན། །
རྒྱབ་ཀྱི་ཁུར་ཆེན་འདཉག་པའི་གོང་ཐག་ལ། །
བདག་གི་ལག་རིས་ཐེངས་ཤིག་དཔར་བ་ལ། །
ཤ་འཇམ་པགས་པའི་ལང་ཚོ་ཡལ་གྱིར་ཀྱང་། །
ལུས་ཀྱི་རྩ་ཆེན་ཤུགས་ཀྱིས་འཐེན་ངེས་ཡིན། །
བདག་ལ་རེ་དང་དོག་པའི་གྲོགས་མཆེད་དག །
བདག་གི་འཚོ་བའི་གཏན་ཚིག་མ་གླེང་རོགས། །
བདག་ནི་སྟོང་ཁམས་སྒྱུ་མའི་རྒྱལ་ཁམས་ནས། །
བདག་གི་ཨ་མཆོག་སྙིང་དུ་ཉར་མཁན་ཡིན། །
གནམ་ནས་རླུང་བུ་གཡུག་པའི་འུར་སྒྲ་དང་། །
ས་ནས་གཙང་བོ་བཞུར་བའི་ཤག་སྒྲ་སོགས། །
བདག་གི་སྙིང་ལ་འཛུལ་བའི་གོ་སྐབས་མེད། །
དེ་བས་བརྩེ་བའི་མི་རྣམས་བདེ་བར་མཛོད། །
དཔྱད་མཆན་འགོད་ས།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེངས་དགོས།