Details

རྩོམ་པ་པོ། : རང་ཐར།

སྡེ་ཚན རང་ཉིད་ངོ་སྤྲོད།

འགྲེམས་སྤེལ Tue 27 Oct 2020

ཀློག་གྲངས། 1694

ང་ནི་ལོ་གསུམ་ལ་འཛིན་རིམ་གཅིག་ནང་ལུས་པའི་སློབ་ཆུང་སློབ་མ་ཞིག་ཡིན། ང་ནི་མི་སུ་གཅིག་གི་ཡིད་ཆེས་དང་གདེང་འཇོག་འཐོབ་མ་མྱོང་བའི་བྱིས་པ་སྐྲ་སུ་ལུ་ཅན་ཞིག ང་ནི་རང་ཉིད་ཀྱི་ལ་རྒྱ་དང་ཁ་ཕོའི་ཆེད་དུ་ཧེ་མ་ལ་ཡའི་གསེག་ལམ་དུ་ཞུགས་མཁན་གྱི་འགྲུལ་པ་ཞིག་ཡིན། ང་ནི་རོགས་པ་ཞིག་གིས“ཁྱོད་རང་རིག་པ་སྤྱང་པོ་འདུག ཨང་རྩིས་དང་ཚོང་ལས་སྦྱངས་ན་ཡག་པོ་ཡོད། རྩོམ་པ་པོ་ཆགས་མཁན་གྱི་རིགས་མ་རེད།”ཅེས་བཤད་པར་ཡིད་ཆེས་ནས་བདུན་ཕྲག་འགའི་རིང་སེམས་ཁྲལ་གྱིས་གཉིད་ཀྱང་མ་ཁུག་པའི་བླུན་པོ་ཞིག་ཡིན། ང་ནི་གྲོགས་པོ་དང་ངོ་ཤེས་འགས་ངོ་དེབ་ཐོག་བོད་ཡིག་གི་འཕྲིན་ཐུང་སྐུར་རེས་བྱེད་པ་མཐོང་དུས། ཡིད་སྨོན་ཤོར་ཞིང་རང་ཉིད་ནམ་ཡང་ཁོ་ཚོ་དང་འདྲ་བོ་ཞིག་ཆགས་མི་སྲིད་སྙམ་མཁན་གྱི་ཡིག་རྨོངས་བ་ཞིག་ཡིན། ང་ནི་ས་རཱའི་སློབ་མ་རྣམས་དང་རང་ཉིད་ལ་གནམ་སའི་ཧེ་བག་ཤོར་བས། དགེ་སློབ་ཚོས་ཅི་ཞིག་བསམ་འོང་སྙམ་ནས་སེམས་ཁྲལ་བྱེད་བཞིན་མཐོ་སློབ་ཏུ་འཛུལ་མཁན་གྱི་སློབ་མ་གསར་པ་ཞིག་ཡིན། ང་ནི་<<དུས་བབ>>དང་<<བང་ཆེན>>ཆག་བཤིག་ནས་མིག་ཉུལ་བྱེད་དུས། འགོ་བརྗོད་རེ་གཉིས་ཀྱི་དོན་རྟོགས་ན་དགའ་སྤྲོ་སྐྱེ་མཁན་གྱི་ཚགས་པར་ཀློག་མཁན་ཞིག་ཡིན། ང་ནི་ཁ་བ་གསར་པའི་ཐོག་རྡོག་པ་སྤོས་པའི་ཧྲག་སྒྲ་དྲན་བཞིན་གཞན་ཡུལ་ལ་འཚོ་བའི་ཡུལ་གྱལ་བ་ཞིག་ཡིན། ད་ལྟ་ང་ནི་རང་ཉིད་ཀྱི་རྨི་ལམ་མམ་ཕུགས་བསམ་ལ་ཡི་ཆད་དང་ཡིད་ཆེས་སྤེལ་མས་སྙེག་མཁན་གྱི་མི་ཞིག་ཡིན་ཞིང་། འདི་ནི་ང་རང་ཕུགས་བསམ་དེར་སྙེག་སའི་ལམ་བུ་ཞིག་ཡིན།།

༢༠༡༧།༩།༡༡ཉིན།