ཀ་ལོ་ཁོས་མ་ལ་ཡི་ཇ་ཤིང་གཞིས་ཀ་ནི་རྒྱ་གར་ལྷོ་ཕྱོགས་ཏ་མིལ་ན་ཏུ(Tamil Nadu)མངའ་སྡེའི་ནང་ཆགས་ཡོད་ཅིང་། མཐོ་ཚད་ལ་རྒྱ་མཚོའི་ངོས་ནས་རྨིད་7,130ཡོད། འདི་ནི་འཛམ་གླིང་ནང་གི་ཇ་ཤིང་གཞིས་ཀ་ཆེས་མཐོ་ཤོས་དེ་ཡིན་པར་གྲགས་ལ། མཁའ་དབུགས་ཀྱི་མཐོ་ཚད་ལ་བརྟེན་ནས་འདིར་སྐྱེས་པའི་ཇ་ལ་དམིགས་བསལ་གྱི་བྲོ་ཞིམ་ལྡན་པར་བཤད། ཀ་ལོ་ཁོས་མ་ལ་ཡི་སྙན་གྲགས་འཛམ་གླིང་དུ་ཁྱབ་གདལ་གཏོང་མཁན་ནི་དེར་སྐྱེས་པའི་ཇ་ཤིང་ཁོ་ན་མ་ཡིན་ཏེ། ས་དེའི་རང་བྱུང་ཁོར་ཡུག་གི་མཛེས་སྡུག་ནི་རྒྱ་གར་ཙམ་མ་ཟད། འཛམ་གླིང་ཧྲིལ་བོའི་ནང་སྐད་གྲགས་ཆོད་འདུག ལྷག་པར་ཞོགས་པའི་ཉི་མ་གསར་དུ་འཆར་བ་དང་། དགོང་ཁའི་ཉི་མ་རྒས་པའི་རྣམ་པ་ནི་ཕུལ་དུ་བྱུང་བའི་རི་མོ་བ་ཞིག་གི་སྒྱུ་རྩལ་བརྩམས་ཆོས་དཔེ་མེད་ཅིག་དང་གཉིས་སུ་མ་མཆིས།
དེ་ལྟ་བུའི་ཕུལ་དུ་བྱུང་བའི་རང་བྱུང་གི་མཛེས་སྡུག་ལ་ལོངས་སུ་སྤྱོད་ཆེད། ང་དང་བསོད་ནམས་སྐྱིད་གཉིས་ཞོགས་པའི་ཆུ་ཚོད༤ཙམ་ནས་ལངས་ཏེ་མོས་ནར(Munnar)གྲོང་བརྡལ་གྱི་འགྲོན་ཁང་ནས་ལམ་དུ་ཆས་པ་ཡིན། ངེད་གཉིས་ཀྱིས་གླས་པའི་ཇིབ་འཁོར་དེ་ཆུ་ཚོད་གཅིག་མ་ཟིན་ཙམ་བར་ནམ་རྒྱུན་གྱི་སྣུམ་ནག་གཞུང་ལམ་ཐོག་བདེ་ལྷོད་ངང་བསྐྱོད་ཅིང་། དེ་ནས་ས་འབུར་རྡོ་འབུར་གྱིས་ཁེངས་པའི་རི་ལམ་དོག་མོ་ཞིག་གི་ཐོག་ངེད་གཉིས་ཀྱི་ནང་འཁྲུལ་བཀྲུགས་སོང་སྙམ་པ་དང་། རུས་སྒྲོམ་གཏོར་སོང་བསམ་པའི་ཚོར་སྣང་སྟེར་བཞིན་ཆུ་ཚོད་གཅིག་ལྷག་འགོས་མཐར། ཏག་ཏག་ཉི་མ་ཤར་བ་དང་ལྷན་དུ་རི་གདོང་གི་རྩེ་མོར་འབྱོར་སོང་། ངེད་གཉིས་ལམ་སེང་ཇིབ་འཁོར་ལས་བབས་པ་དང་། པར་ཆས་ཀྱི་མཆུ་ཏོ་དམར་སེར་གྱི་མཚམས་སྤྲིན་དང་། དེའི་གསེང་ནས་དལ་བུར་ཡར་འཕག་བཞིན་པའི་ཉི་མ་ཡི་ཕྱོགས་སུ་བཏད་པར་ཆས་ཀྱི་མཐེབ་གནོན(Button)གནོན་ཅི་ཐུབ་བྱས།
ནམ་རྒྱུན་ཡིན་ན། པར་ནང་གི་བུ་མོ་དེ་བུ་མོ་དངོས་ལས་ཕྲན་བུ་མཛེས་པ་དང་། པར་ནང་གི་ཕོ་སར་དེ་ཕོ་གསར་དངོས་ལས་ཅུང་ཙམ་རྫིག་པ། ཡང་པར་ནང་གི་ཁོར་ཡུག་དེ་དངོས་སུ་མཐོང་བ་ལས་ཏོག་ཙམ་ཡིད་དབང་འཕྲོག་པར་མངོན་མོད། འོན་ཀྱང་ཞོགས་པར་དེར་ངེད་གཉིས་ཀྱིས་མིག་གིས་མཐོང་ཞིང་སེམས་ཀྱིས་མྱངས་པའི་རང་བྱུང་ཁམས་ཀྱི་མཛེས་སྡུག་དེ་པར་ཆས་གང་དང་པར་པ་སུ་ཡིས་ཀྱང་པར་དུ་ལེན་ཐུབ་པ་ཞིག་མ་རེད། དེ་ནི་ཞོགས་པ་དེར་ངོ་མཚར་བའི་མི་ཟུང་མཚམས་སྤྲིན་ལ་ཅེར་ནས་རི་གདོང་དེའི་སྒང་དུ་ལངས་པའི་མི་ཉུང་ཤས་དེས་མཐོང་ཞིག་མྱངས་པའི་བླ་མེད་ཀྱི་མཛེས་སྡུག་འབའ་ཞིག་ལས་པར་དུ་ལེན་ཐུབ་པ་ཞིག་གཏན་ནས་མ་རེད།
དཔྱད་མཆན་འགོད་ས།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེངས་དགོས།