བྱིས་སྒྲུང་འདི་ཐོག་མར་སྤྱི་ལོ་ ༡༨༨༡ ལོའི་ཟླ་ ༧ ཚེས་ ༧ ནས་མགོ་བཙུགས་ཏེ་ཨི་ཊ་ལིའི་བདུན་རེའི་བྱིས་པའི་དུས་དེབ་སྔ་ཤོས་གྲས་ཀྱི་གྷེ་ནར་ལ-བྷམ་བྷིན (Giornale per i bambini) ཞེས་པའི་ནང་མུ་འབྲེལ་གྱི་ངོ་བོའི་ཐོག་ནས་པར་སྐྲུན་བྱས་པ་དང་། དེ་ནས་ཟླ་བ་བཞི་མ་ཟིན་ཙམ་གྱི་རྗེས་སུ་ལེའུ་བཅོ་ལྔའི་ཐོག་འབྲི་མཚམས་བཞག ཡིན་ན་ཡང་། ཀློག་པ་པོ་ཚོའི་ཕྱོགས་ནས་དགའ་མོས་ཚད་མེད་ཐོབ་སྟེ་འབོད་སྐུལ་ཞུས་སྟབས། སྤྱི་ལོ་ ༡༨༨༢ ལོའི་ཟླ་ ༢ ཚེས་ ༡༦ ནས་མགོ་ཚུགས་ཏེ་མུ་མཐུད་འབྲི་རྩོམ་བྱས་ཤིང་། དེ་ནས་སྤྱི་ལོ་ ༡༨༨༣ ལོའི་ཟླ་ ༢ པའི་ནང་དངོས་སུ་དཔེ་དེབ་གཅིག་གི་གཟུགས་སུ་པར་སྐྲུན་བྱས། དུས་དེ་ནས་བཟུང་<<ཕེ་ནོ་ཁོ>>འཛམ་གླིང་གི་བྱིས་སྒྲུང་ཁྲོམ་རའི་ནང་རྒྱུན་དང་མཚམས་མེད་པར་ཁྱབ་གདལ་ཕྱིན་པའི་ཁར། འཛམ་གླིང་གང་སའི་དཔྱད་བརྗོད་པ་ཚོའི་དགའ་བསུ་ཆེན་པོ་ཐོབ།
 སྙན་གྲགས་ཆེ་ཞིང་འགྲོ་བ་མིའི་གཤིས་སྤྱོད་ཀྱི་དཔེ་མཚོན་དུ་གྱུར་བའི་སྒྲུང་གཏམ་འདི་ནི་འཛམ་གླིང་གི་སྐྱེ་བོ་ཚང་མས་ཁས་ལེན་བྱེད་པའི་བྱིས་པའི་རྩོམ་རིག་གི་བརྩམས་ཆོས་ཤིག་ཡིན་ལ། འདིས་འཛམ་གླིང་སྤྱིའི་རིག་གཞུང་ལ་ཤུགས་རྐྱེན་དཔག་མེད་ཐེབས་ཡོད། ཨེ་ཊ་ལིའི་མཚན་ཉིད་རིག་པ་གྲགས་ཅན་བྷ་ན་ཌི-ཁོ་རོ་སི་(Benedetto Croce)ཡིས་འདི་ནི་ཨི་ཊ་ལིའི་རྩོག་རིག་གི་ཆེས་ཕུལ་དུ་བྱུང་བའི་བརྩམས་ཆོས་ཁྲོད་ཀྱི་གཅིག་ཡིན་ཞེས་གསུངས་ཡོད་ལ། སྒྲུང་དེབ་འདི་ཐོག་མར་པར་སྐྲུན་བྱས་པ་ནས་བཟུང་། འདིའི་རྣམ་པ་གསར་པ་[རྒྱས་བསྡུས]བརྒྱ་ཕྲག་མང་པོ་བྱུང་བའི་ཐོག འདི་ལ་གཞི་བཞག་པའི་ཟློས་གར་དང་། རི་མོ། གློག་བརྙན། བྱིས་པའི་འགུལ་རིས། ཚོང་རྫས(ཨ་ལད་པད་ཀོ་ལྟ་བུ)སོགས་བགྲང་ལས་འདས་པ་བྱུང་བ་མ་ཟད། ཐ་ན་རྫུན་ལབས་ན་སྣ་རིང་དུ་འགྲོ་བ་ལྟ་བུའི་སྤྱིར་བཏང་གི་ལྟ་ཚུལ་འགའ་ཡང་བྱུང་ཡོད། 

     ཁར་ལོ-ཁོ་ལོ་ཌི་རྒྱལ་ཡོངས་ཐེབས་རྩ་ཁང་ (Fondazione Nazionale Carlo Collodi) ནས་ཕྱི་ལོ་ ༡༩༩༠ གོང་གྲངས་ནང་ཞིབ་འཇུག་གཏིང་ཟབ་བྱས་པའི་གྲུབ་དོན་དང་། རྒྱལ་སྤྱིའི་ཤེས་རིག་དང་ཚན་རྩལ་འཛིན་སྐྱོང་སྤེལ་གསུམ་གྱི་ཚོགས་པ་UNESCOཡི་ཡིག་ཆར་གཞིགས་ན། སྒྲུང་དེབ་འདི་ལ་སྐད་ཡིག་མི་འདྲ་བ་ ༢༦༠ ཡི་འགྱུར་ཡོད་མོད། ༢༠༡༨ ལོར་དུས་སྒྲུང་དེབ་འདི་སྐད་ཡིག་ ༣༠༠ ལྷག་གི་ནང་ཕབ་སྒྱུར་བྱས་ཟིན་ཡོད། དེར་བརྟེན་སྒྲུང་དེབ་འདི་ནི་འཛམ་གླིང་གི་ཆོས་ལུགས་དང་མ་འབྲེལ་བའི་བརྩམས་ཆོས་འགྱུར་གྲངས་ཆེས་མང་ཤོས་དེ་ཆགས་ཡོད་ལ། ཉེ་བའི་ལོ་དག་གི་ནང་ཁ་གྲངས་ས་ཡ་ ༨༠ བརྒལ་བ་བྲིན་ཡོད་པས། དཔེ་དེབ་ཀྱི་ལོ་རྒྱུས་ཁྲོད་དུ་ཆེས་བྲིན་རྒྱུག་ཆེ་ཤོས་ཀྱི་དེབ་ཅིག་ཀྱང་ཡིན། (ཕྱི་ལོ་ ༡༩༤༠ ལོར་དེབ་འདིའི་བདག་དབང་མི་དམངས་ལ་དབང་བར་གྱུར་ནས་དཔེ་སྐྲུན་ཁང་སྣ་ཚོགས་ནས་པར་མགོ་བརྩམས་པར་བརྟེན། བྲིན་རྒྱུག་བྱུང་བའི་ཁ་གྲངས་ཏག་ཏག་ཅིག་ཤེས་ཐབས་བྲལ་ཡོད།) ཨ་རིའི་སློབ་དཔོན་ཆེན་པོ་དང་བྱིས་སྒྲུང་རྩོམ་པ་པོ་གྲགས་ཅན་ཧྥ་རིན་སི་ཡ-བྷ་ཊི་ལར་(Francelia Butler)གསུངས་པ་ལྟར་ན། སྒྲུང་དེབ་འདི་ནི“ཆེས་འགྱུར་གྲངས་མང་ཤོས་ཀྱི་ཨི་ཊ་ལིའི་དཔེ་དེབ་དང་། ཡེ་ཤུའི་གསུང་རབ་(Bible)རྗེས་སུ་འཛམ་གླིང་ནང་ཆེས་གློག་གྲངས་མང་ཤོས་ཀྱི་དེབ་དེ་ཆགས་ཡོད།”