ནད་ངན་འདི་དྲག་སྐྱེད་མ་བྱུང་བར་འདི་ལྟར་མུ་མཐུད་ཇེ་སྡུག་ཇེ་ཞན་དུ་ཕྱིན་ན། ངས་བཟོད་བསྲན་མི་ཐུབ་པར་རང་མེད་བྱེད་དགོས་འཁེལ་ས་རེད། དངོས་གནས་གནམ་ཐག་རྒྱག་པ་དང་ཐོག་བརྩེགས་མཐོན་པོའི་རྩེ་ནས་མཆོང་བ། ད་དུང་ཆུ་ལ་ལྕེབ་པ་སོགས་ནི་ཤིན་ཏུ་འཇིགས་གཡེར་བ་དང་བྲེད་ཤ་ལངས་བ་ཞིག་རེད་འདུག་པས། སྡུག་བསྔལ་དང་ན་ཟུག་མྱོང་མི་དགོས་པར་འཆི་བའི་ཐབས་ལམ་བཟང་ཤོས་དེ་གང་ཡིན་ནམ། རེད། སྨན་ཟོས་ན་ཡག་ཤོས་རེད། ན་ཟུག་དང་སྡུག་བསྔལ་ཅི་ཡང་མྱོང་མི་དགོས་པར་གཉིད་ཁུག་པ་ལྟར་གསོད་བྱེད་ཀྱི་སྨན་ཞིག་ཡོད་ཚུལ་ངས་གང་ཞིག་ན་མཐོང་མྱོང་། འོན་ཀྱང་སྨན་དེ་གང་ཞིག་ནས་རག་སྲིད་དམ། ནམ་རྒྱུན་གྱི་སྨན་རྫས་ཚོང་ཁང་དག་གི་ནང་འཚོང་རྒྱུ་ཡོད་མི་སྲིད། ཨ་ཙི། ངས་བསམ་བློ་ཅི་ཞིག་གཏོང་བཞིན་འདུག་གམ། དངོས་གནས་རང་ཤི་རྒྱག་འཆར་ཡོད་པ་ལྟར་བྱེད་ཀྱི་འདུག ཅིས་ཀྱང་སེམས་ཤུགས་མ་ཆག་པར་ནད་ངན་འདི་དང་འཐབ་དགོས། སེམས་ཤུགས་ཆག་པའི་ཉིན་དེ་ནས་བཟུང་དྲག་སྐྱེད་ཡོང་བའི་དུས་ཤིག་གཏན་ནས་ཡོང་མི་སྲིད། དྲག་རྒྱུ་ལོས་ཡོད།" ཁོས་དེ་ལྟར་བསམ་བཞིན་གཞོགས་བརྗེས་པ་དང་ལག་ཡ་སྔས་མགོ་བྱས་ཏེ་བདེ་རུ་འབབ་ཐབས་བགྱིས།
ལུས་པོ་ནད་ཀྱིས་མནར་ནས་གཉིད་མི་ཁུག་པའི་སྐབས་སུ། དྲོད་འཇམ་གྱི་མལ་སའི་ཐོག་ཇི་ལྟར་གཞོགས་བརྗེ་བ་དང་འགྲེ་ལྡོག་བརྒྱབས་ཀྱང་ས་མཁྲིགས་རྡོ་རྩུབ་ཀྱི་སྒང་དུ་ཉལ་བ་བཞིན་གཏན་ནས་མི་བདེ་སྟབས། ཁོས་ཧ་ལམ་སྐར་མ་རེ་རེའི་ནང་དུ་འགྲེ་ལྡོག་རེ་བརྒྱབས་པས། ལུས་ཐོག་ཏུ་བཀབ་པའི་ཉལ་ཆས་ཕྱི་ནང་གཉིས་ལས་ཕྱི་མའི་ཕྱེད་ཀ་ཙམ་ཉལ་ཁྲིའི་ཟུར་ནས་ལྷུང་སྟེ་ཞ་ལའི་སྟེང་འཁྱིལ་འདུག ཁོས་ཐེངས་འགའ་ལ་ལག་ཡ་བསྲིངས་ཏེ་ཉལ་ཆས་དེ་ཡར་ཐེན་ནས་ལུས་སྟེང་དུ་བཀབ་མོད། འོན་ཀྱང་གཏན་ནས་དྲག་རྒྱུ་མེད་པའི་ན་ཚ་དང་ཡོང་རྒྱུ་མེད་པའི་གཉིད་ལྟར། ཉལ་ཆས་དེས་ཀྱང་ཁོའི་བཀོད་འདོམས་ལ་མི་ཉན་པར་རིམ་གྱིས་སླར་ཡང་ཞ་ལའི་སྟེང་དུ་བཞུད་འགྲོ་བས་ཁོས་ཀྱང་དེ་ལྟར་བསྐྱུར་དགོས་བྱུང་།
གློ་བུར་གློ་བུར་དུ་ལྡང་ཡོང་བའི་རླུང་འཚུབ་ལྗོན་ཤིང་གི་ལོ་མའི་གསེབ་ནས་རྒྱུ་བའི་ཤུགས་སྒྲ་དང་། ཉལ་ཁང་གི་ཟུར་གཞན་དུ་ཉལ་བའི་ཤག་རོགས་ཀྱི་མཚམས་མཚམས་སུ་གྲག་འོང་བའི་སྔུར་སྒྲ་སྙོམ་པོ་དེ་མ་གཏོགས། མཚན་མོ་ཧ་ཅང་ཁུ་སིམ་ཞིང་ལྷིང་འཇགས་པས་ནམ་ཕྱེད་ཡོལ་ཟིན་པ་ཤེས་ཐུབ། ཉལ་ཁང་གི་སྒེའུ་ཁུང་ལས་མཚན་མོའི་མཁའ་དབྱིངས་ཀྱི་ཟུར་ཙམ་དང་འོད་ཆེམ་ཆེམ་འཚེར་བའི་སྐར་མ་འགའ་མཐོང་ཐུབ། ད་ལྟ་ནོར་བུ་མ་གཏོགས་ས་རཱ་མཐོ་སློབ་ཀྱི་དགེ་སློབ་ཚང་མ་གཉིད་ཀྱི་བདེ་བ་ལ་རོལ་བའམ་རྨི་ལམ་གྱི་ཞིང་ཁམས་སུ་འགྲིམ་བཞིན་ཡོད་པས། ཁོང་ཚོའི་སློབ་གླིང་ཆུང་ཆུང་ནང་དུ་ཉམ་ཆུང་གི་སློབ་མ་ཞིག་ནད་ཀྱིས་མནར་ནས་འགྲེ་ལྡོག་རྒྱག་བཞིན་མཚན་མོ་འཁྱོལ་ཐབས་བྱེད་ཀྱིན་ཡོད་པ་གཏན་ནས་ཤེས་མི་སྲིད།
"ངོ་མ་འདི་ལྟར་མུ་མཐུད་སྡུག་ཏུ་ཕྱིན་ན་སླར་ཡང་སྨན་ཁང་ཞིག་ལ་སོང་ན་དགའ་འམ།" ནོར་བུའི་བྲང་ཁ་མི་མངོན་པའི་སྐམ་པ་ཞིག་གིས་བཅིར་བ་བཞིན་དམ་ཤིག་གེར་དང་། ཕོ་བ་ན་ལྷང་ལྷང་། ད་དུང་གཉིད་མ་ཁུགས་པའི་དབང་གིས་མིག་ཟུང་ནང་སུར་པན་བླུགས་པ་ལྟར་ཚ་ཞིང་ཆུ་མེད་པར་གྱུར་བས། ཁོས་ཡང་བསྐྱར་ཐེངས་གཅིག་ལ་སྨན་ཁང་དུ་འགྲོ་དགོས་མིན་ནམ་སྙམ་པའི་བསམ་བློ་ཞིག་འཁོར། "འོན་ཀྱང་སྨན་པ་དེ་ཚོས་ཀྱང་ནད་ངོས་ཡག་པོ་ཞིག་ཟིན་མི་ཐུབ་པར་ཕན་ཐོགས་མེད་པའི་སྨན་དང་བསླབ་བྱ་འགའ་བྱིན་ནས་ཕྱིར་སློག་ངེས་པས། སོང་ཡང་དུས་ཚོད་དང་སྒོར་མོ་འཕྲོ་བརླག་ལས་ཅི་ཡང་ཡོང་མི་སྲིད། ཁོང་ཚོས་སེམས་པ་སྐྱིད་སྐྱིད་དང་བློ་ལྷོད་ལྷོད་བྱོས་ཟེར། འདི་ལྟ་བུའི་བསྲན་དཀའ་བའི་ན་ཟུག་དང་མི་བདེ་བས་མནར་དུས། ཇི་ལྟར་སེམས་པ་སྐྱིད་སྐྱིད་དང་བློ་ལྷོད་ལྷོད་བྱེད་དགོས་སམ། ད་དུང་ཚལ་དང་ཤིང་འབྲས་རིགས་མང་ཙམ་ཟ་དགོས་ཟེར། སློབ་གླིང་འདི་ནས་སྤུས་ཀ་ཞན་པའི་འབྲས་དང་ལྡ་ལི་མ་གཏོགས་ཤིང་འབྲས་དང་ཚལ་རིགས་ངས་གང་ཞིག་ནས་འཁྱེར་དགོས་སམ། རེད་ཡ། རྡ་སར་བསྡད་དེ་རང་གི་ཕོ་བར་འཕྲོད་པའི་ཟས་སྤྱོད་ལ་བསྟེན་ན། ནད་འདི་དྲག་སྐྱེད་ཡོང་བའི་རེ་བ་ཆེ། ཡིན་ན་ཡང་རྡ་སར་སྡོད་སྤྱད་ཀྱི་སྒོར་མོ་གང་ཞིག་ནས་རྙེད་དམ། དམ་དྲག་ཆེ་བའི་གནས་སྟངས་འདིའི་འོག་ཏུ་ཕ་ཡུལ་ནས་སྒོར་མོ་ཞིག་ཐོན་རྒྱུ་ཧ་ལམ་མི་སྲིད་པ་ཞིག་རེད། རོགས་པ་ཞིག་གིས་ཕ་ཡུལ་ན་ཕུའང་འགྲོ་ས་མེད་ཅེས་བཤད་བྱུང་བ་དེ་ཅི་འདྲའི་བདེན་ཨང་། རྒྱ་དམར་གཞུང་གིས་ང་ཚོ་བོད་མི་རིགས་ལ་སྟེར་དང་སྟེར་མུས་སུ་ཡོད་པའི་གྱོང་གུད་དང་སྡུག་བསྔལ་ནི་ནམ་ཡང་སྐྱིན་ཚབ་འཇལ་མི་ཐུབ་པ་ཞིག་རེད། ཁོ་ཚོས་བོད་མཐོ་སྒང་དེར་ཐོག་མར་ཁྱིམ་གཞི་བཙུགས་ཏེ་མི་ལོ་སྟོང་ཕྲག་ལྷག་གི་ལོ་རྒྱུས་དང་རིག་གནས་ལྡན་པའི་མི་རིགས་འདི་རྩ་མེད་དུ་ཡལ་བའི་ལམ་དུ་བརྫངས་པ་རེད། འཛམ་གླིང་འགྱུར་བའི་མྱུར་ཚད་དང་བོད་ས་རྒྱ་ཡུལ་དུ་འགྱུར་བཞིན་པའི་གནས་ཚུལ་འདི་ལ་བལྟས་ན། མི་རིང་བར་བོད་འདི་ཡང་ལོ་རྒྱུས་ཀྱི་དེབ་ཐེར་ཁོ་ནས་ནང་གནས་པའི་ལུང་པ་ཞིག་དང་མི་རིགས་ཤིག་ཏུ་འགྱུར་རྒྱུ་ཡིན་པར་མངོན། རང་གི་མེས་པོ་དམ་པ་ཚོས་ལྷོད་མེད་ཀྱི་འབད་བརྩོན་དང་ཕུལ་བྱུང་གི་ཤེས་རབ་ལ་བརྟེན་ནས་བསྐྲུན་པའི་ཁྱིམ་གཞི་དང་འོད་སྟོང་འཕྲོ་བའི་རིག་གནས། ད་དུང་སྐད་ཡིག་སོགས་ཡོད་ཚད་འདི་ལྟར་རིམ་གྱིས་གཞན་གྱི་ངོ་བོར་ཐིམ་བཞིན་པ་འདི་ལས་ཕངས་པ་དང་ཡིད་སྐྱོ་བ་ཞིག་གང་ན་ཡོད་དམ། མི་རིགས་ཤིག་གི་སྐྱོ་གར་ཟེར་ན་འདི་ལས་ཅི། ངོ་མ་སྤྱིར་འཛམ་གླིང་སྤྱི་དང་སྒོས་སུ་བོད་མི་རིགས་འདི་མ་འོངས་པའི་ལོ་ཡུན་ཇི་ཙམ་ལ་གནས་ཐུབ་བམ། ཨ་ཙི་མི་འགའ་རེ་ད་དུང་ཡང་ཉལ་མེད་པ་འདྲ།" ནོར་བུ་དེ་ལྟར་བསམ་གཞིགས་ཟབ་མོའི་ཁྲོད་དུ་ལྷུང་ནས་ཡོད་པའི་སྐབས་སུ་གློ་བུར་དུ་ཐོག་བརྩེགས་ཀྱི་བར་ཁྱམས་ནས་གྲགས་པའི་རྡོག་སྒྲ་ཞིག་རྣ་བར་ལྷུང་། རྡོག་སྒྲ་དེ་བར་ཁྱམས་ཀྱི་མཐའ་ན་ཡོད་པའི་གསང་སྤྱོད་ཀྱི་ཕྱོགས་སུ་ཕྱིན་སོང་བ་དང་། དེ་ནས་གསལ་ལ་མི་གསལ་བའི་ཤགས་སྒྲ་ཞིག་སྐར་ཆ་སུམ་ཅུ་ཡས་མས་ཤིག་ལ་གྲགས་རྗེས། རྡོག་སྒྲ་དེ་ཧ་ལམ་བར་ཁྱམས་ནང་དུ་བྲག་ཅ་འཁོར་བཞིན་ཚུར་ཡོང་ཞིང་། སྒོ་རྒྱག་པའི་ཙིར་སྒྲ་སྙོམ་པོ་ཞིག་དང་ལྷན་དུ་ཡལ་སོང་བས་མཚན་མོ་སླར་ཡང་ཁུ་སིམ་མེར་དང་ལྷིང་འཇགས་སེར་གྱུར།
ལུས་པོའི་ན་ཟུག་དང་མི་བདེ་བ་དེས་ནོར་བུ་ད་དུང་ཡང་གཉིད་ཁུག་ཏུ་མ་བཅུག་པས། ཁོ་སླར་ཡང་བསམ་གཞིགས་སྣ་ཚོགས་ཀྱི་འཇིག་རྟེན་དུ་ཉུལ་འགོ་བརྩམས། "ཁོར་ཡུག་བརྗེས་ན་ཕོ་བའི་ན་ཚ་འདི་དྲག་སྐྱེད་ཡོང་སྲིད། ཕྱི་རྒྱལ་ལ་ཕྱིན་ན་ཁོར་ཡུག་དང་མཁའ་དབུགས་གཙང་ཞིང་། ཟ་མ་དང་སྡོད་ཁང་ཡང་བཟང་བས་ཏན་ཏན་དྲག་སྐྱེད་ཡོང་ངེས་མོད། འོན་ཀྱང་དེར་ཇི་ལྟར་སླེབ་ཐབས་བྱ་དགོས་ཨང་། དེང་སང་ཨ་རི་དང་ཁ་ནཱ་ཊ་ཕར་ཞོག ཡུ་རོབ་ཏུ་འགྲོ་བར་ཡང་ཧིན་སྒོར་འབུམ་བཅུ་གཉིས་བཅུ་གསུམ་དགོས་ཟེར་བ་དེ་གང་ཞིག་ནས་རྙེད་དམ། དངོས་གནས་དེང་སང་གི་འཇིག་རྟེན་འདིར་སྒོར་མོ་ཞིག་མེད་ན་འགུལ་སྐྱོད་བྱེད་སྤྱད་ཀྱང་མི་འདུག ཨ་ཙི། དཀའ་སྡུག་འདི་དག་ཡོངས་རྫོགས་རྒྱ་གཞུང་གིས་ང་ཚོ་ལ་སྟེར་བ་ཞིག་ཡིན་པས། མི་རབས་ཇི་ཙམ་སོང་ཡང་ཤ་འཁོན་འདི་རྗེད་ག་ལ་ཉན། ང་ཚོས་ཅིས་ཀྱང་རྒྱ་ནག་གིས་སྟེར་བའི་བསམ་བརྗོད་ལས་འདས་པའི་དཀའ་བ་དང་སྡུག་བསྔལ་འདི་དག་ཡིད་ལ་མ་བརྗེད་པར་ཉར་ནས་ཤ་འཁོན་རྩོད་དགོས། རེད། སྲོག་ལེན་སྲོག་དང་ཁྲག་ལེན་ཁྲག་གིས་འཇལ་དགོས། འཇིགས་སྐུལ་རིང་ལུགས་དེ་དག་གི་ནང་དུ་འཛུལ་ཞུགས་བྱས་ནས་རྒྱ་ནག་ལ་ཕར་རྒོལ་བྱེད་ཐུབ་ན་བྱེད་དགོས་པ་འདྲ་སྟེ། གང་ལྟར་འཛམ་བུ་གླིང་གི་མི་སུ་དང་རྒྱལ་ཁབ་གང་ཡིན་ཡང་སོ་སོ་ལ་ཁེ་ཕན་དང་ལྟ་ས་ཞིག་མེད་ན། ཉམ་ཆུང་ལ་རོགས་པ་བྱེད་མཁན་ཞིག་དང་དྲང་བདེན་ལ་བརྩི་སྲུང་བགྱིད་མཁན་ཞིག་ཉུང་བས་འཇིགས་སྐུལ་རིང་ལུགས་ནང་ཞུགས་ན་མི་ཆོག་རྒྱུ་ཅི་ཡོད། ཡིན་ཡང་ང་ཚོ་ཞུགས་པའི་གོ་སྐབས་ཧ་ཅང་ཆུང་བ་དེ་ནི་དངོས་ཡོད་ཅིག་རེད། ངོ་མ་དགྲ་ཤ་འདི་ཇི་ལྟར་ལེན་དགོས་སམ། ང་ཚོ་མི་འབུར་ཉུང་ཞིང་གོས་མཚོན་མེད་པའི་ཁར། གོས་མཚོན་ཉོ་སྤྱད་ཀྱི་སྒོར་མོའང་མེད་པས་དགྲ་ཤ་འདི་ལེན་རྒྱུ་ཁག་ཙམ་ཡོང་བ་འདུག རྨ་ཆུ་དང་འབྲི་ཆུ། རྫ་ཆུ་སོགས་བོད་ནས་རྒྱ་ཡུལ་དུ་བཞུར་བའི་གཙང་བོ་དག་གི་ནང་དུ་དུག་རྫས་བླུགས་ནས་རྒྱ་མི་གཅིག་ཀྱང་མ་ལུས་པ་བསད་ན་དགྲ་ཤ་འདི་ལེན་ཐུབ་ངེས། འོན་ཏང་དེ་ལྟར་བྱས་ན་ང་ཚོ་བོད་རིགས་ཚོའང་ལྷན་དུ་འཆི་བ་ལས་གསོན་པོར་སྡོད་པའི་་གནས་ཤིག་ག་ལ་ཡོད་སྲིད། མ་གཞི་ང་ཚོ་རྒྱ་གཞུང་གིས་འཆི་ལམ་དུ་བརྫངས་དང་རྫོང་མུས་སུ་ཡོད་པ་འདི་ལས་ཀྱང་སྡུག་པ་ཞིག་ཅི་ཡོད། དེ་ལྟར་བྱས་ན། མ་མཐར་དུས་རྫས་རླངས་འཁོར་བརྒྱ་ཉིས་བརྒྱ་དགོས་རྒྱུ་རེད་ལ། རང་སྲོག་བློས་གཏོང་ཕོད་མཁན་གྱི་མི་ཡང་མང་པོ་དགོས། རང་ལུས་ཕངས་མེད་དུ་མེ་སྲེག་གཏོང་མཁན་གྱི་ཁ་གྲངས་ལ་བལྟས་ན། མིས་མི་འདང་བ་ཡོང་མི་སྲིད་ཀྱང་དེ་ལྟ་བུའི་དུག་རྫས་འབོར་ཆེན་ཞིག་མཁོ་སྒྲུབ་བྱེད་རྒྱུར་ཅུང་དཀའ་རྒྱུ་རེད། དུག་རྫས་དེ་ལྟ་བུ་ཞིག་མཁོ་སྒྲུབ་བྱས་ཏེ་བླུག་ཐུབ་ན་དགྲ་བོ་རྒྱ་མི་ཙམ་མ་ཟད་རྨ་འབྲི་རྫ་གསུམ་ནང་དུ་འཚོ་གནས་བྱེད་པའི་ཉ་དང་སྦལ་བ། ཆུ་སྲིན་དང་ཉ་ཆེ། རུས་སྦལ་དང་ཆུ་འབུ་སོགས་སྲོག་ཆགས་ཆེ་ཕྲ་ཆུང་གསུམ་ཡོངས་རྫོགས་རྩ་སྟོངས་སུ་གཏོང་ངེས། ད་དུང་ཆུ་སྣེ་རྒྱ་མཚོ་ཆེན་པོ་དང་འབྲེལ་ཡོད་པས། རྒྱ་མཚོའི་ནང་གི་སྲོག་ཆགས་གྲངས་ཀྱིས་མི་ལོང་བ་ཡོངས་རྫོགས་གསོད་ངེས་ལ། སའི་གོ་ལའི་བརྒྱ་ཆ་བདུན་ཅུ་ལྷག་རྒྱ་མཚོ་ཡིན་ཞིང་རྒྱ་མཚོ་དང་མ་འབྲེལ་བའི་རྒྱལ་ཁབ་ཉུང་སྟབས། སའི་གོ་ལའི་སྟེང་གི་མི་དང་སྲོག་ཆགས་ཡོད་དོ་ཅོག་དུས་རྫས་དང་དེ་ལས་བྱུང་བའི་ནད་ཡམས་ཀྱིས་བསད་དེ་ཤི་རོས་ས་གཞི་དང་རྒྱ་མཚོ་བཀབ་ཅིང་། རུལ་དྲིས་བར་སྣང་ཁེངས་པའི་སྐྱི་གཡའ་བ་དང་བྲེད་ཤ་ལངས་པའི་སྣང་ཚུལ་ཞིག་འབྱུང་རྒྱུ་རེད། དེ་འདྲ་ཞིག་བྱུང་ན་ངོ་མ་ནམ་མཁར་མི་ཤོང་བ་དང་ས་གཞིས་མི་ཁྱོག་པའི་སྡིག་ཉེས་ཞིག་བསགས་པ་རེད་ཨང་། དེ་ལྟ་བུའི་སྡིག་ཉེས་ཤིག་བསགས་ན་དམྱལ་བ་རྡོ་རྗེ་ལྡན་ཡང་ཆུང་དྲགས་པའམ་ཡང་དྲགས་རྒྱུ་རེད། སྔོན་ཆད་དེ་ལྟ་བུའི་སྡིག་ཉེས་གསོག་མཁན་བྱུང་མྱོང་མེད་པས་དངོས་གནས་དེ་འདྲ་ཞིག་བྱུང་ན་དམྱལ་བའི་མནར་སྤྱོད་སྔོན་ཆད་གཏན་ནས་མེད་པ་ཞིག་གསར་དུ་སྣོན་དགོས་ཁེལ་རྒྱུ་རེད་ཨང་། ཨ་ཙི། ངས་བསམ་བློ་ཅི་ཞིག་གཏོང་བཞིན་འདུག་གམ། འདི་ཡོད་ཚད་ཡིད་ཀྱི་ཉེས་པ་གསོག་བཞིན་པ་མ་ཡིན་ནམ། ད་ནི་ཆོ་མེད་ཀྱི་བསམ་བློ་མི་གཏོང་བར་ཅིའི་ཀྱང་གཉིད་ཐབས་བྱ་དགོས།" ནོར་བུས་སླར་ཡང་འགྲེ་ལོག་ཅིག་བརྒྱབས་ནས་གཉིད་ཨེ་ཁུག་ལ་རེ་བ་བྱས་རུང་། གཉིད་ནི་ཁོ་དང་ཐག་རིང་བའི་ས་ཆ་གང་ཞིག་ཏུ་ཕྱིན་སོང་བ་ལྟར་གཏན་ནས་ཡོང་རོགས་མ་བྱས་སྟབས། ཁོའི་སེམས་ཀྱི་རྒོད་པོ་སྲབ་མེད་ནི་ཡང་བསྐྱར་འཆར་ཡན་དང་། བསམ་གཞིགས། ཕྱིར་དྲན་དང་དོགས་འདྲི་སོགས་ཀྱི་རྩྭ་ཐང་མཐའ་མེད་སྟེང་དུ་ཅི་དགར་རྒྱུག་འགོ་བརྩམས།
"ང་རྒྱ་གར་དུ་ཡོང་མེད་ན་དྲག་རྒྱུ་མེད་པའི་ནད་ངན་འདི་ཏན་ཏན་ན་ཡོད་རྒྱུ་མ་རེད་ཨང་། དངོས་གནས་ང་རྒྱ་གར་དུ་ཡོང་མེད་ན་ད་ལྟ་ཅི་འདྲ་ཞིག་ཆགས་ཡོད་ངེས་མ་རེད་ཨང་། ཕ་ཆེར་ཁ་ཡ་ན་ཟླ་ཚོ་ལྟར་འཁོར་བ་བཟུང་ནས་བྱིས་པ་གཉིས་གསུམ་གྱི་ཕ་རྒན་ཆགས་ཡོད་རྒྱུ་རེད། གཅིག་བྱས་ན་ཚོང་བརྒྱབས་ཏེ་སྒོར་ཁྲི་བརྒྱ་སྐོར་གཉིས་གསུམ་ཡོད་མཁན་གྱི་ཕྱུག་པོ་ཞིག་ཏུ་གྱུར་ཡོད་སྲིད། དེ་འདྲ་ཞིག་ཆགས་ཡོད་ན་བོད་ཀྱི་ཚོང་དཔོན་བྱིངས་དང་མི་འདྲ་བར་ངས་བལ་ཡུལ་དང་རྒྱ་གར་གྱིས་གཙོས་པའི་ཕྱི་རྒྱལ་ཁག་ལ་ཚོང་འབྲེལ་བཙུགས་ཏེ་སོ་སོའི་མ་རྩ་སྲ་བརྟན་དང་ཚོང་རྒྱ་བསྐྱེད་དེ་ཡག་པོ་ཆགས་རྗེས། སློབ་གྲྭ་དང་སྨན་ཁང་། ལུས་རྩལ་ཁང་དང་ཞབས་བྲོ་ཁང་། ད་དུང་རྒན་གསོ་ཁང་སོགས་བཙུགས་ཏེ་གཞོན་སྐྱེས་ཚོ་ལ་སོ་སོའི་ཐུན་མིན་གྱི་འཇོན་ནུས་སྔོག་འདོན་བྱེད་སའི་སྡིངས་ཆ་ཞིག་བསྐྲུན་ན། ཕ་ཡུལ་འཛུགས་སྐྲུན་དང་ལག་རྗེས་དེ་ལས་ཆེ་བ་ཞིག་ཅི་ཡོད་ཨང་། རེད། རྒན་གསོ་ཁང་འཛུགས་པའི་དགོས་པ་མ་མཆིས་ཏེ། ཕ་མ་བརྩི་བཀུར་དང་གསོ་སྐྱོང་བྱེད་པའི་སྲོལ་བཟང་ཐད་མི་རིགས་གཞན་གང་གིས་ཀྱང་བོད་པ་དོ་མི་སྲིད། དངོས་གནས་བོད་སྤྱི་ལ་ཕན་ཐོགས་མཁན་གྱི་ཚོང་པ་དེ་འདྲ་ཞིག་ཆགས་ན། ཡང་རྒྱ་ནག་གིས་སྐྱོན་འཛུགས་ཅི་ཞིག་བགྱིས་ནས་པཎ་ཆེན་རིན་པོ་ཆེ་དང་། སྤྲུལ་སྐུ་བསྟན་འཛིན་དགེ་ལེགས་སོགས་ཀྱིས་གཙོས་པའི་བོད་ལ་ཤ་ཚ་ཞིང་ཕན་ཐོགས་པའི་མི་སྣ་དག་ལྟར་རྩ་མེད་གཏོང་བ་གཏན་ཁེལ་རེད་ཨང་། དངོས་གནས་རྒྱ་ནག་གིས་བོད་ལ་སྟེར་དང་སྟེར་མུས་སུ་ཡོད་པའི་གྱོན་གུད་ནི་ནམ་ཡང་གསབ་མི་ཐུབ་པ་ཞིག་རེད་དེ། ཁོང་ཚོས་བོད་འདི་འཆི་བའི་ལམ་དུ་བརྫངས་པ་རེད། ཡང་གཅིག་བཤད་ན། བལ་ཡུལ་དང་འབྲུག་སོགས་རྒྱལ་ཁབ་ཆུང་ཆུང་ལག་མཐིལ་འདྲ་བ་འགའ་ད་ལྟ་རང་དབང་རང་བཙན་གྱིས་གནས་བཞིན་ཡོད་པས། བོད་ལ་ཅི་ཞིག་བྱུང་བ་ཡིན་ནམ། ངོ་མ་བོད་འདི་ཕྱི་དགྲ་དང་ནང་དགྲའི་གཙོ་ཕལ་འབྱེད་མི་ཤེས་མཁན་གྱི་བླུན་རྨོངས་ཤིག་ཡིན་སོང་བས་རེད། ཡུན་རིང་འདས་པའི་རྒྱལ་རབས་ལོ་རྒྱུས་ནང་གི་སྐྱུག་བྲོ་བའི་ནང་དམེ་དག་ཕར་ཞོག ཆིག་སྟོང་དགུ་བརྒྱ་བཞི་བཅུའི་ནང་ཨུ་རུ་སུ་དང་རྒྱ་ནག་གིས་གཙོས་པའི་ཁྱིམ་མཚེས་རྒྱལ་ཁབ་ཚོས་བོད་ཡུལ་ཤ་རྡོག་ཅིག་ཏུ་བརྩིས་ནས་གྲི་རྡོར་བཞིན་ཡོད་དུས། བོད་པའི་ཆབ་སྲིད་འཛིན་མཁན་སྐུ་དྲག་ཚོ་ནང་ཁུལ་མེད་པ་བཟོ་རེས་བྱེད་པར་བྲེལ་ནས་ཡོད། དེ་བས་ཀྱང་བློ་འཚབ་སྐྱེ་དགོས་པ་ཞིག་ནི་ནད་རྙིང་དེས་ད་ལྟ་ཡང་བོད་མིའི་ཆབ་སྲིད་པ་དང་སྣེ་འཁྲིད་པ་ཡིན་ཟེར་མཁན་ཚོ་མནར་ཡོད་པ་འདི་རེད། རྡོག་རྩ་གཅིག་སྒྲིལ་གྱིས་ཕ་ཡུལ་འཕྲོག་མཁན་དང་། ཕ་མ་གསོད་མཁན། དགོན་པ་བཤིག་མཁན། བླ་མ་དཀྲོང་མཁན། དཔེ་ཆ་སྲེག་མཁན། རྒྱུ་ནོར་རྐུ་མཁན། གཏེར་ཁ་སྔོག་མཁན། སྐད་ཡིག་གཏོར་མཁན་སོགས་མདོར་ན་མི་རིགས་འདི་འཆི་ལམ་དུ་རྫོང་མཁན་གྱི་གཏན་དགྲ་(གཏན་གྱི་དགྲ་བོ)རྒྱ་དམར་ལ་འཐབ་རྩོད་བྱེད་རྒྱུའི་ཚབ་ཏུ། འཐབ་རྒོལ་གྱི་མདུང་རྩེ་སྤུན་ཟླ་ནང་ཁུལ་ལ་བཏད་དེ་དབུ་མ་རྩོད་མཁན་གྱིས་རང་བཙན་རྩོད་མཁན་དགྲ་བོར་བརྩི་བ་དང་། དེ་བཞིན་རང་བཙན་རྩོད་མཁན་གྱིས་དབུ་མ་རྩོད་མཁན་རྒྱལ་འཚོང་དུ་མཐོང་བའི་ཡིད་སྐྱོ་བའི་གནས་ཚུལ་འདི་ལྷགས་བཞིན་ཡོད། ངོ་མ་འདི་ཡོངས་རྫོགས་ཅི་ཞིག་གིས་ལེན་པ་ཡིན་ནམ། རེད། ཤེས་ཡོན་གྱིས་མ་འདང་ཞིང་ལྟ་རྒྱ་ཐོས་རྒྱ་ཆུང་དྲགས་པ་ལས་བྱུང་བའི་ཇུས་ཉེས་རེད་ཨང་། ཨ་ཤི། ད་ནི་འདི་ལྟར་བསམ་བློ་མང་པོ་ཞིག་བཏང་ཡང་རང་ཉིད་ཀྱི་སེམས་པའི་ན་ཟུག་ཇེ་ཆེར་འགྲོ་བ་ལས་ཕན་འབྲས་ཅི་ཡང་མེད། དེ་ལས་གཉིད་ཅིག་ཁུག་རོགས་བྱས་ན་དེ་བཟང་།" ནོར་བུས་ཡང་བསྐྱར་མལ་སའི་ནང་འགྲེ་ལོག་གཅིག་བརྒྱབས་པ་དང་གླལ་སྒྱིང་རིང་པོ་ཞིག་བྱས་ཏེ་ཉལ་བས། རིམ་གྱིས་སེམས་པ་མག་མོག་དང་རབ་རིབ་ཏུ་གྱུར་ནས་ཡུན་རིང་བསྒུགས་པའི་གཉིད་དེ་གཞི་ནས་བསླེབས་སོང་།
རྨི་ལམ་ནང་ཁོ་ཕ་ཡུལ་དུ་འབྱོར་བ་རྨིས་ཤིང་ཕ་མ་སྤུན་མཆེད་དང་ནང་མི་ཚང་མ་ཁོ་ཚང་གི་ཁང་པ་ཀ་གཉིས་ནང་ལྷན་དུ་འཛོམས་འདུག ཐ་ན་ལོ་དུ་མའི་གོང་དུ་ཚེ་ལས་འདས་པའི་ཨ་ཡེ་དང་ཨ་མྱེ། ད་དུང་ཁོ་རང་ཆུང་ཆུང་ཡིན་དུས་མཉམ་དུ་ཆུ་རྩེད་རྩེ་བཞིན་པའི་སྐབས་ཆུ་རླབས་ཀྱིས་མིད་པའི་སྤུན་ཆུང་བ་ཡང་དེར་འཛོམས་འདུག འོན་ཀྱང་ཡ་མཚན་པ་ཞིག་ལ། ཁོང་ཚོ་སུ་གཅིག་གིས་ཀྱང་ཁོ་ལ་ཁ་ཡ་མི་བྱེད་པ་དང་མིག་གིས་ལྟ་ཙམ་ཡང་མི་བྱེད། ཁོས་ནང་མི་རེ་རེའི་མདུན་དུ་ཕྱིན་ནས"ང་ནོར་བུ་ཡིན། ངོ་ཤེེས་ཀྱི་མི་འདུག་གམ། ང་ནོར་བུ་ཡིན།"ཞེས་སྐད་རྒྱག་པ་དང་ལམ་འགོག་པ་སོགས་ཅི་དང་གང་བྱས་ཀྱང་། ཁོང་ཚོས་ཉན་ཙམ་དང་ལྟ་ཙམ་ཡང་མི་བྱེད་པར་སོ་སོའི་ལས་ཀར་བྲེལ་བཞིན་འདུག་པས། ཁོ་རང་ཡ་མཚན་ཆེན་པོ་སྐྱེས་ཏེ་ནང་མི་ཚོ་ལ་ཞིབ་ཏུ་བལྟས་པ་ན། ཁོང་ཚོ་རེ་རེའི་ངོ་གདོང་སྐྱོ་སྣང་གིས་ཁེངས་ཡོད་པ་མཐོང་བ་མ་ཟད། ཁང་པའི་ནང་དུ་མཆོད་མེ་སྟོང་མཆོད་ཅིག་ཙམ་ཁྲ་ལམ་མེར་སྤར་ཡོད་པ་དང་། ལྷ་ཁང་ནང་ནས་དགེ་འདུན་འགས་སྨོན་ལམ་འདོན་པའི་སྒྲ་སོགས་གཅིག་ཅར་དུ་དོ་སྣང་བྱུང་སྟབས། ད་གཟོད་ཁོས་ནང་མི་གཅིག་གིས་ཀྱང་ཁོ་ལ་ཁ་ཡ་དང་ལྟ་ཙམ་ཡང་མི་བྱེད་པའི་གནས་ཚུལ་དེའི་མཐིལ་རྟོགས་སོང་། མ་གཞི་ཁོ་ཤི་ཚར་ནས་རྣམ་ཤེས་སུ་གྱུར་བས་ནང་མི་ཚོས་ཁོ་མ་མཐོང་བ་དང་། སྨོན་ལམ་དང་མཆོད་མེ་དེ་དག་ཁོའི་འདས་མཆོད་རེད་འདུག སྐབས་དེར་ཁོའི་ཁོག་ན་བཟོད་གླག་མེད་པའི་སྐྱོ་སྣང་དང་བྲེད་ཤ་ཞིག་ལངས་ནས་རང་ཉིད་དངོས་གནས་ཤི་ཡོད་མེད་བརྟག་སླད་སྒྲོན་མེའི་འོད་ཀྱི་མདུན་དུ་ཕྱིན་ནས་བལྟས་པ་ན། དངོས་གནས་དེ་སྔོན་ཁོ་རང་ཆུང་ཆུང་སྐབས་སུ་ཨ་མྱེ་མི་ཤི་རྗེས་གྲིབ་མ་མེད་ཅེས་བཤད་མྱོང་བ་ལྟར་གྲིབ་མ་མེད་པས། སྔར་བའི་འཇིགས་ཤིང་སྐྲག་པ་དང་སྐྱོ་ཞིང་ཞེད་པ་སོགས་ཀྱི་མི་སྡུག་པའི་ཚོར་སྣང་ཅི་རིགས་བྱུང་བའི་ཁྲོད་ནས་ཆེས་བཟོད་ཐབས་བྲལ་བ་ནི་ཁེར་རྐྱང་གི་ཚོར་སྣང་དེ་རེད། ད་ལྟ་ཁོས་མི་ནི་གསོན་པོར་སྡོད་པའི་དུས་ཡུན་ཐུང་ཐུང་དེའི་རིང་མ་གཏོགས་ཤིན་ཏུ་ཁེར་རྐྱང་དང་གྲོགས་མེད་ཡིན་པ་རྟོགས་ཤིང་། ཐ་ན་གང་ཞིག་ཏུ་འགྲོ་དགོས་པའང་མི་ཤེས་པར་གྱུར། མཚམས་དེར་ཁོས་ཨ་མྱེ་བཤད་པ་ལྟར་དམྱལ་བ་ཞེས་པའི་འགྲོ་ས་དང་ལེ་མཁན་ཞེས་པའི་འཁྲིད་མཁན་ཞིག་ཨེ་ཡོད་སྙམ་པའི་འཇིགས་སྐྲག་དང་ཐེ་ཚོམ་སྐྱེ་བཞིན་པའི་ཚེ་ན། ཏག་ཏག་གང་ཞིག་ནས་གྲགས་འོངས་བ་མ་ཤེས་པའི་སྒྲ་ཞིག་གིས"ཁོ་རེ། ཁོ་རེ"ཞེས་འབོད་པ་ཐོས་པས། ཁོས་དེ་ནི་ལེ་མཁན་རེད་བསམ་ནས་མགོ་བོ་གཡས་གཅུ་གཡོན་གཅུས་ཕྱོགས་ཐམས་ཅད་ལ་བལྟས་ཀྱང་བར་སྣང་སྟོང་བ་ལས་ཅི་ཡང་མ་མཐོང་། སྐབས་དེར་སླར་ཡང་“ཁོ་རེ། ཡར་ལངས། ཞལ་འདོན་འགྲོ་རན་འདུག"ཅེས་གྲགས་བྱུང་བས་ཁོ་རང་གཉིད་ལས་སད་པ་དང་། དེ་ནི་ཤོག་རོགས་ཀྱི་སྐད་ཡིན་པ་ཤེས། ཁོས་དེ་དག་རྨི་ལམ་ཡིན་པ་ཤེས་རྗེས། ད་དུང་གཉིད་ཀྱི་རིམ་པ་གཞན་ཞིག་སད་དེ་ད་ལྟ་འདི་ཡང་རྨི་ལམ་ཡིན་པའི་ངེས་པ་མི་འདུག་ཨང་སྙམ་པའི་ཚོར་བ་ཡ་མཚན་ཅན་ཞིག་གིས་སེམས་སྟོང་ལྷང་ལྷང་དང་། རྨི་ལམ་ནས་རྟོགས་པའི་གནས་ཚུལ་ཏེ་མི་ནི་ཧ་ཅང་ཁེར་རྐྱང་ཡིན་པའི་ཚོར་སྣང་དེས་ཁོའི་ཁོག་པ་འཁྱག་ཤུར་ཤུར་བྱས། དེ་ལྟར་སླར་ཡང་རྨི་ལམ་ཡིན་མིན་ཐག་མི་ཆོད་པའི་ཉིན་མ་གསར་པ་ཞིག་གི་འགོ་བརྩམས་སོང་།།
༢༠༡༥/༡༢/༡༨ཉིན