མདུན་གྱི་རི་རབས་འགྱིངས་པའི་ཁ་ངོ་ལ། །
བདག་གི་ངོ་རིས་ཐེངས་གཅིག་འབྲི་བ་ལ། །
སོ་དང་སན་མོ་ཟད་ནས་རྫོགས་གྱུར་ཀྱང་། །
བདག་གི་སྙིང་གི་རུས་པས་འབྲད་ངེས་ཡིན། །
རྒྱབ་ཀྱི་ཁུར་ཆེན་འདཉག་པའི་གོང་ཐག་ལ། །
བདག་གི་ལག་རིས་ཐེངས་ཤིག་དཔར་བ་ལ། །
ཤ་འཇམ་པགས་པའི་ལང་ཚོ་ཡལ་གྱིར་ཀྱང་། །
ལུས་ཀྱི་རྩ་ཆེན་ཤུགས་ཀྱིས་འཐེན་ངེས་ཡིན། །
བདག་ལ་རེ་དང་དོག་པའི་གྲོགས་མཆེད་དག །
བདག་གི་འཚོ་བའི་གཏན་ཚིག་མ་གླེང་རོགས། །
བདག་ནི་སྟོང་ཁམས་སྒྱུ་མའི་རྒྱལ་ཁམས་ནས། །
བདག་གི་ཨ་མཆོག་སྙིང་དུ་ཉར་མཁན་ཡིན། །
གནམ་ནས་རླུང་བུ་གཡུག་པའི་འུར་སྒྲ་དང་། །
ས་ནས་གཙང་བོ་བཞུར་བའི་ཤག་སྒྲ་སོགས། །
བདག་གི་སྙིང་ལ་འཛུལ་བའི་གོ་སྐབས་མེད། །
དེ་བས་བརྩེ་བའི་མི་རྣམས་བདེ་བར་མཛོད། །