ཁང་མིག་འདི་དག་གི་ལྡེབས་རིས་ཕལ་མོ་ཆེ་རེ་ཧྥེལ་གྱིས་བཞེངས་པ་ཡིན་པས། མིང་ལ་རེ་ཧྥིལ་གྱི་ཁང་མིག་རྣམས་(Raphaels Rooms)ཞེས་འབོད། འདི་དག་ལས The Stanza della Segnatura ཞེས་པའི་ཁང་མིག་གི་ཤར་ཕྱོགས་ཀྱི་གྱང་ངོས་སུ་བཞེངས་པའི་ལྡེབས་རིས་ནི། ད་ལྟ་གླེང་བཞིན་པའི་<<ཨེ་ཐན་སིའི་གྲུབ་མཐའ་>>འདི་ཡིན་ཞིང་། ལྡེབས་རིས་འདིའི་ཐོག་མའི་མིང་ལ་<<རྒྱུ་མཚན་གྱི་ཤེས་རྟོགས>> (Causarum Cognitio or Knowledge of Causes) ཞེས་འབོད་ཀྱང་། དུས་རབས་བཅུ་བདུན་པ་ནས་<<ཨེ་ཐན་སིའི་གྲུབ་མཐའ་>>ཞེས་པར་བསྒྱུར།

གོང་གསལ་ལྟར། ཁང་མིག་འདིའི་ཤར་གྱང་གི་ངོས་སུ་<<ཨེ་ཐན་སིའི་གྲུབ་མཐའ>> (The school of Athens) ཞེས་པའི་ལྡེབས་རིས་དང་། ལྷོ་གྱང་གི་ངོས་སུ <<ལྷ་ཆོས་རིག་པ>> (The Theology) ཞེས་པའི་ལྡེབས་རིས། ནུབ་གྱང་གི་ངོས་སུ་<<ཁྲིམས་ལུགས>> (The Law) ཞེས་པའི་ལྡེབས་རིས། བྱང་གྱང་གི་ངོས་སུ་<<སྙན་རིག>> (The Poetry)ཅེས་པའི་ལྡེབས་རིས་བཅས་ཁང་པའི་ཕྱོགས་བཞི་ལ་ལྡེབས་རིས་ཆེན་པོ་བཞི་ཡོད། མདོར་དྲིལ་ན། ལྡེབས་རིས་འདི་དག་ནི་མཚན་ཉིད་རིག་པ་དང་། ལྷ་ཆོས་རིག་པ་དང་། ཁྲིམས་ལུགས་རིག་པ། སྙན་ངག་རིག་པ་བཅས་མིའི་རིགས་ཀྱི་རིག་པའི་སྡེ་ཚན་ཆེན་པོ་བཞི་རི་མོའི་སྒྱུ་རྩལ་གྱི་སྨྱན་བྱེད་ལ་བརྟེན་ནས་བཞེངས་སྐྲུན་བྱས་པའི་རླབས་ཆེན་གྱི་བརྩམས་ཆོས་ཤ་སྟག་ཡིན་ལ། དེང་སྐབས་གྲོང་ཁྱེར་རྒྱལ་ཁབ་ཝེ་ཊེ་ཁེན་གྱི་འགྲེམ་སྟོན་ᨮᩏ་(the Vatican Museums in Vatican City)ᨵᨑ་ཆ་ཤས་སུ་འཛམ་གླིང་གི་ཕྱོགས་སོ་སོ་ནས་ཡོང་བའི་ལྟད་མོ་པ་རྣམས་ཀྱི་མིག་གི་དགའ་སྟོན་དུ་བཤམས་ཡོད། 

 
(༢) རིག་རྩལ་བསྐྱར་དར་སྐབས་ཀྱི་རླབས་ཆེ་བའི་རི་མོ་པ་གསུམ།

 1) ཌ་ཝེན་ཆི (Leonardo da Vinci 1452- 1519) 

a) འཁྲུངས་ཡུལ། དབྱི་ཊ་ལེའི་གྲོང་བརྡལ་ཨར་ཁེ་ནོ(Anchiano)

b) ཚབ་མཚོན་བརྩམས་ཆོས།  <<མོ་ན་ལེ་ས།>> (Mona Lisa) སོགས།

 
2) རེ་ཧྥེལ(Raphael 1483-1520) 

a) འཁྲུངས་ཡུལ། དབྱི་ཊ་ལེའི་གྲོང་ཁྱེར་ཨོར་བྷེ་ནོ(Urbino)

b) ཚབ་མཚོན་བརྩམས་ཆོས། <<ཨེ་ཐན་སིའི་གྲུབ་མཐའ>> སོགས།

 
3) མེ་ཁི་ལོན་ལྗི་ལོ (Michelangelo 1475-1564)

a) འཁྲུངས་ཡུལ། དབྱི་ཊ་ལེའི་གྲོང་བརྡལ་ཁེབ་རེ་སི་ མེ་ཁི་ལོན་ལྗི་ལོ (Caprese Michelangelo)

b) ཚབ་མཚོན་བརྩམས་ཆོས། << ཌེ་ཝེ་ཌི >>( David) སོགས།

སྒྱུ་རྩལ་གྱི་ལོ་རྒྱུས་སྤྱི་དང་། བྱེ་བྲག་རི་མོའི་སྒྱུ་རྩལ་གྱི་ལོ་རྒྱུས་ལ་རྒྱུས་མངའ་ཡོད་མཁན་ཞིག་ཡིན་ཕྱིན། རི་མོ་པ་འདི་གསུམ་གྱི་དོན་སྤྱི་ཞིག་སེམས་ལ་ཡོད་ངེས་ཡིན་ལ། གླེང་བཞིན་པའི་ལྡེབས་རིས་<<ཨེ་ཐན་སིའི་གྲུབ་མཐའ>>ངོས་སུའང་རི་མོ་པ་འདི་གསུམ་གྱི་སྣང་བརྙན་བཞེངས་ཡོད། འོན་ཀྱང་། དེ་དག་གི་མཚོན་བྱའི་མི་སྣ་གཞན་ཞིག་ཡིན། རི་མོ་པ་འདི་གསུམ་བྱོན་དུས་ཀྱི་དུས་སྐབས་ལ། རིག་རྩལ་བསྐྱར་དར་འཕེལ་རྒྱས་རྩེར་སོན་གྱི་དུས་སྐབས་(The High Renaissance)ཞེས་གྲགས་ཤིང་། རིག་རྩལ་བསྐྱར་དར་ནི་སྒྱུ་རྩལ་གྱི་བསྟན་པ་དགུང་དང་མཉམ་པའི་དུས་སྐབས་ཤིག་ཡིན་པར་མ་ཟད། སྒྱུ་རྩལ་གྱི་རྣམ་པ་གཞན་དག་ལས་ཀྱང་ལྡེབས་རིས་སྒྱུ་རྩལ་གྱི་ཕུལ་བྱུང་བརྩམས་ཆོས་ཆེས་མང་པོ་བྱུང་བའི་དུས་སྐབས་ཤིག་ཡིན། ཁྱད་པར་དུ་དབྱི་ཊ་ལེའི་ནང་གི་ཡེ་ཤུའི་ལྷ་ཁང་རྣམས་ཀྱི་བཟོ་སྐྲུན་ལ་སྒེའུ་ཁུང་ཉུང་བའི་གྱང་ངོས་ཀྱི་མཐུན་རྐྱེན་ཕུན་སུམ་ཚོགས་པོ་ཡོད་པས། གནས་འདིར་རླབས་ཆེ་བའི་ལྡེབས་རིས་སྒྱུ་རྩལ་གྱི་བརྩམས་ཆོས་མང་པོ་བྱུང་ཐུབ་ཡོད། གཞན་དུ་ན་ཡུ་རོབ་ནུབ་མའི་ནང་གི་གྲགས་ཆེ་བའི་གྷོ་ཐེའི་ལུགས་ཀྱི་ཡེ་ཤུའི་ལྷ་ཁང་གི་བཟོ་སྐྲུན་རྣམས་ལ་ཤེལ་གྱི་སྒེའུ་ཁུང་མང་བས། ལྡེབས་རིས་འདི་ལྟ་བུ་འབྲི་བཞེངས་བྱ་བའི་གྱང་ངོས་ཀྱི་མཐུན་རྐྱེན་མེད་པས། རིག་རྩལ་བསྐྱར་དར་སྐབས་ཀྱི་ཡུ་རོབ་ནུབ་མའི་རི་མོ་རྣམས་ཤིང་ལེབ་དང་ཤོག་ངོས་སུ་བྲིས་པ་ཤུགས་ཆེ་བར་བསྙད། 

 
(༣) ལྡེབས་རིས་<<ཨེ་ཐན་སིའི་གྲུབ་མཐའ་>>བཞེང་མཁན་གྱི་མཚམས་སྦྱོར།

སྒྱུ་རྩལ་པ་གྲགས་ཅན་རེ་ཧྥེལ་ནི་སྤྱི་ལོ 1483 ཟླ་ 4 ཚེས་ 6 ལ་དབྱི་ཊ་ལེའི་གྲོང་ཁྱེར་ཨོར་བྷེ་ནོ(Urbino)རུ་འཁྲུངས་ཤིང་། སྤྱི་ལོ་ 1520 ཟླ་ 4 ཚེས 6 ལ་སྐུ་གྲོངས་པས། འཁྲུངས་པའི་ཟླ་ཚེས་དང་གྲོངས་པའི་ཟླ་ཚེས་གཉིས་ཀ་ཟླ་ཚོད་ཚེས་གྲངས་གཅིག་ལ་འཁེལ་བར་གྲགས། (འོན་ཀྱང་། འཁྲུངས་ཚེས་ཐད་བཞེད་པ་མི་མཐུན་པ་ཡོད) ཁོང་ལོ་ན་ཉེར་ལྔར་བུད་པ་ན་སྙན་གྲགས་རྒྱས་པར་མ་ཟད། <<ཨེ་ཐན་སིའི་གྲུབ་མཐའ་>>ཞེས་པའི་ལྡེབས་རིས་གྲགས་ཆེན་འདིའང་དགུང་ལོ་ཉེར་བདུན་སྟེང་འབྲི་བཞེངས་གནང་། མཐར་དགུང་ལོ་སུམ་ཅུ་སོ་བདུན་སྟེང་གློ་བུར་དུ་སྐུ་གྲོངས་ཀྱང་། ཚབ་མཚོན་བརྩམས་ཆོས<<ཨེ་ཐན་སིའི་གྲུབ་མཐའ>> སོགས་མཚར་སྡུག་རྣམ་པར་བཀྲ་བའི་བརྩམས་ཆོས་སུམ་བརྒྱ་ལྷག་མིའི་རིགས་ཀྱི་བགོ་སྐལ་དུ་བསྩལ་ཡོད། 

 
(༤) ལྡེབས་རིས་ཀྱི་བརྗོད་སྙིང་།

 
ལྡེབས་རིས་འདིའི་བརྗོད་སྙིང་ནི། གོང་ཞུས་ལྟར་མཚན་ཉིད་རིག་པ་ཡིན་ལ། དེ་ཡང་བྱེ་བྲག་ཏུ་གནའ་བོའི་གྷི་རི་སིའི་མཚན་ཉིད་རིག་པ་ཡིན། དེ་ལས་བྱེ་བྲག་ཏུ་བཀར་ན་གྲོང་ཁྱེར་ཨེ་ཐན་སིའི་མཚན་ཉིད་རིག་པ་ཡིན་ལ། དེ་ལས་ཀྱང་བྱེ་བྲག་ཏུ་བཀར་ན་ཕི་ལེ་ཊོ་(Plato)ཡབ་སྲས་གཉིས་ཀྱི་མཚན་ཉིད་རིག་པའི་ལྟ་གྲུབ་ཀྱི“འགལ་འདུ”ཡིན། དེ་ཡང་ལྡེབས་རིས་འདིར་མངོན་གྱུར་གྱི་འཇིག་རྟེན་དང་ལྐོག་གྱུར་གྱི་འཇིག་རྟེན་དང་། རྗེས་དཔག་རིང་ལུགས་(Rationalism)དང་མྱོང་རྟོགས་རིང་ལུགས་(Empiricism)། རྩོད་སྒྲུབ་དང་མ་ལག་གསར་འཛུགས་ཀྱི་ལངས་ཕྱོགས་སོགས་མཚན་ཉིད་རིག་པའི་བརྗོད་གཞི་དང་དཔྱད་ཐབས་མང་པོ་ཞིག་གི་ངོས་ནས་འདུམ་ཐབས་མེད་པའི“འགལ་བ”མངོན་གསལ་དུ་ཐོན་ཡོད་ལ། འགལ་བ་འདིའི་དཀྱིལ་སྙིང་ནི་ཕི་ལེ་ཊོ་ཡབ་སྲས་གཉིས་ཡིན་སྟབས། ཕི་ལེ་ཊོའི་རིང་ལུགས་འཛིན་མཁན་རྣམས་གཡོན་ངོས་སུ(ཕི་ལེ་ཊིའི་ཕྱོགས་སུ) མངོན་ཞིང་། ཨ་རེ་སི་ཊོ་ཊོལ་གྱི་རིང་ལུགས་འཛིན་མཁན་རྣམས་གཡས་ངོས་སུ་(ཨ་རེ་སི་ཊོ་ཊོལ་གྱི་ཕྱོགས་སུ)སྣང་། ངང་ཚུལ་འདི་ནི་བདེན་དོན་གྱི་ཆེད་དུ་རང་གིས་གཙུག་ཏུ་བཀུར་བའི་སློབ་དཔོན་ལའང་དམིགས་བསལ་ཁབ་རྩེ་ཙམ་ཞིག་མི་སྤྲོད་པའི་གནའ་བོའི་གྷི་རི་སིའི་མཚན་ཉིད་རིག་པའི་དགག་སྒྲུབ་ཀྱི་ལོ་རྒྱུས་རིང་མོ་ཞིག་གི་སྣང་བརྙན་འོ་སྐོལ་གྱི་ཆུ་བུར་མིག་ལ་རྗེན་གཅེར་དུ་བསྟན་པ་ཞིག་ཡིན་ཨང་།

གཞན་ཡང་། ལྡེབས་རིས་འདིར་ལྟ་བ་ལངས་ཕྱོགས་མི་འདྲ་བ་དང་། དུས་སྐབས་དང་རྒྱལ་ཁོངས་ཐ་དད་པ། ན་ཚོད་དང་ཡུལ་སྲོལ་མི་གཅིག་པའི་མཚན་ཉིད་རིག་པ་བ་དང་། བསམ་བློ་བ། ཚན་རིག་པ་སོགས་སྐྱེས་ཆེན་བཅུ་ཕྲག་འགའ་ལྷན་ཅིག་ཏུ་འཛོམས་པའི་དགྱེས་འཛོམས་ཆེན་པོ་ཞིག་གི་སྣང་ཚུལ་ལེགས་པར་བྲིས་ཡོད་པས། “འདུ་བ”འི་རང་བཞིན་ཡང་མངོན་གསལ་དུ་ཐོན་ཡོད། “མཚན་ཉིད་རིག་པའི་འབྱུང་ཁུངས་ནི་མཚར་སྣང་ཡིན”པར་བཤད་པ་ལྟར། འདིར་སྐྱེས་བུ་ཁོང་རྣམས་ཀྱིས་རང་རང་གང་ལ་དུང་བའི་ཟབ་པ་དང་རྒྱ་ཆེ་བའི་གནས་རྣམས་ལ་མཚར་ཉམས་དང་སྤྲོ་སྣང་གིས་འཇུག་པའི་རྣམ་པ་ནི་གསོན་ཉམས་སྟོང་གིས་ཕྱུག་པ་ཞིག་གོ །

 
གནའ་བོའི་གྷི་རེ་སིར་མཚན་ཉིད་རིག་པའི་གྲུབ་མཐའ་མི་འདྲ་བ་ཤིན་ཏུ་མང་པོ་བྱུང་ཡོད་ལ། དེ་དག་ཀྱང་འདིར་རགས་ཙམ་མངོན། དཔེར་ན། ལྷོ་དབྱི་ཊ་ལེ་ཡི་གྲུབ་མཐའ(Southern Italian School) སྲོལ་གཏོད་པ་པོ་དང་། རོལ་དབྱངས་རིག་པ་བ། ཆོས་ཐམས་ཅད་ཀྱི་འབྱུང་ཁུངས་གྲངས་ཀ་ཡིན་པར་འདོད་མཁན་གྱི་མཚན་ཉིད་རིག་པ་བ་གྲགས་ཅན་᪙་ཡེ་ཐ་གྷི་ར་སི(Pythagoras c.570 ~ 490 BCE) (ལྡེབས་རིས་གཡོན་ངོས་ཀྱི་མདུན་དུ་ནག་པང་ཡོད་མཁན་དེ)ཡི་ཁྲིས་སུ་གྲངས་རྩིས་གཙིགས་སུ་འཛིན་པའི་དཔུང་ཁག་ཅིག་གྲུབ་ཅིང་། དེའི་ཁ་གཏད་ཀྱི་ལྡེབས་རིས་གཡས་ཕྱོགས་སུ། གྲངས་རྩིས་རིག་པ་བ་དང་། དབྱིབས་རྩིས་རིག་པ་སྲོལ་གཏོད་མཁན་དུ་གྲགས་པའི་ཡོ་ཁི་ལེ་ཌི(Euclid c.400-c.300 BCE) (ལྡེབས་རིས་ངོས་སུ་མགོ་བསྒུར་ནས་ནག་པང་ངོས་ལ་དཔེ་རིས་ཤིག་འབྲི་བཞིན་པའི་མི་དེ)དང་ཁོང་གི་ཁྲིས་སུ་ལྟ་བ་དེ་གཙིགས་སུ་འཛིན་མཁན་གྱི་མཁས་པ་རྣམས་འཛོམས། ད་དུང་བྱ་བཏང་གི་ལྟ་བ་འཛིན་མཁན་ཌེ་ཨོ་གྷེ་ནེ་སི (Diogenes c.412-323 BCE) ཁེར་རྐྱང་ངང་རྡོ་སྐས་སྟེང་བསྡད་ཡོད་ལ།  ཁོང་ནི་ཁྱིར་སྤྱོད་པའི་གྲུབ་མཐའ(Cynic School) སྲོལ་བཏོད་མཁན་དང་། ཁྱི་དང་ལྷན་དུ་ཁེར་རྐྱང་དུ་རྒྱུ་བའི་མཚན་ཉིད་རིག་བ་དམིགས་བསལ་བ་ཞིག་ཡིན། འདི་ལྟ་བུ་མང་ཡང་། ལྡེབས་རིས་ངོས་ཀྱི་མི་སྣ་རྣམས་རྗེས་སུ་ངོ་སྤྲོད་པར་བྱ། 

 
(༥) མི་སྣ་གཙོ་བོ་གཉིས་དང་འབྲེལ་བའི་མཚོན་དོན།

སྤྱིར་ལྡེབས་རིས་འདིར་གནའ་བོའི་གྷི་རེ་སི་དང་རོམ་གྱི་བཟོ་སྐྲུན་སྒྱུ་རྩལ་གྱི་ཆ་དང་། རིག་རྩལ་བསྐྱར་དར་སྐབས་ཀྱི་རི་མོའི་ལྟ་གྲུབ་སོགས་དངོས་ཤུགས་ཀྱི་མཚོན་དོན་མང་དུ་ཡོད་ཀྱང་། ཐེངས་འདིར་གཙོ་བོ་རི་མོའི་དངོས་བསྟན་གྱི་མི་སྣ་དང་མཚོན་དོན་གཙོ་བོ་རེ་ཟུང་ཞིག་ཟུར་ཙམ་གླེང་བས་འཐུས་པར་བྱ། ཐོག་མར་མི་སྣ་གཙོ་བོ་ཕི་ལེ་ཊོ་(Plato)དང་ཁོང་གི་དངོས་སློབ་ཨ་རེ་སི་ཊོ་ཊོལ་(Aristotle)གཉིས་ཀྱི་རྣམ་འགྱུར་དང་ན་བཟའ་སོགས་ཀྱི་མཚོན་དོན་ཅུང་ཙམ་ཞིག་ངོ་སྤྲོད་པར་བྱ།

 ལྟ་བ་མཚོན་པའི་བརྩམས་ཆོས: ཕུ་ལེ་ཊོའི་ཕྱག་ཏུ་དུས་རབས་བར་མ་དང་རིག་རྩལ་བསྐྱར་དར་སྐབས་ཀྱི་བསམ་བློ་པ་ཚོས་ཁོང་གི་ཚབ་མཚོན་བརྩམས་ཆོས་སུ་ངོས་འཛིན་པའི་<<རྩོད་སྒྲུབ>> (Timaeus) ཞེས་པའི་དཔེ་ཆ་དེ་སྣམ་ཞིང་། འདི་ནི་བདག་ཅག་ལ་སྣང་བ་མཐའ་དག་སྒྱུ་རྩལ་གྱི་འཇིག་རྟེན་ལྟ་བུའི་འཁྲུལ་སྣང་བན་བུན་ཞིག་ལས་མ་འདས་ཤིང་། རྩོད་སྒྲུབ་དང་དཔྱོད་ཤེས་ཀྱི་ལམ་ནས་འཁྲུལ་སྣང་གི་འཇིག་རྟེན་འདི་ལས་འདའ་འགོང་བྱས་ཏེ། ཡང་དག་པའི་འདུ་ཤེས་ཀྱི་འཇིག་རྟེན་ཤེས་རྟོགས་བྱེད་དགོས་པའི་ལྟ་གྲུབ་མཚོན་བྱེད་དུ་གྱུར་ཡོད།

 
ཨ་རེ་སི་ཊོ་ཊོལ་གྱི་ཕྱག་ཏུ་སྐབས་དེར་ཁོང་གི་ཚབ་མཚོན་བརྩམས་ཆོས་སུ་ངོས་འཛིན་བྱེད་པའི་<<ཀུན་སྤྱོད>> (Ethics) ཅེས་པའི་དཔེ་དེབ་དེ་བཟུང་། འདི་ནི་དངོས་འབྲེལ་མངོན་འགྱུར་གྱི་འཇིག་རྟེན་འདི་བདེན་པ་ཡིན་པ་དང་། ང་ཚོའི་ཤེས་རྟོགས་མཐའ་དག་གི་གཞི་རྩའང་འདི་ལ་འཇོག་དགོས་པས། མིའི་ཀུན་སྤྱོད་ཀྱི་རྩ་བར་གྱུར་བའི་བདེན་པ་དང་དགེ་བའི་རྣམ་གཞག་མཆིས་སོ་ཅོག་མངོན་སུམ་གྱི་འཇིག་རྟེན་འདི་ནས་འཚོལ་སྙེག་བྱེད་དགོས་པའི་མཚོན་དོན་དུ་གྱུར་ཡོད།  

འབྱུང་བཞི་མཚོན་པའི་ན་བཟའི་ཁ་དོག: ཕི་ལེ་ཊོའི་ན་བཟའི་ཁ་མདོག་ཟིང་སྐྱ་དང་དམར་སྐྱ་ཡིན་ལ། ཁ་དོག་འདི་གཉིས་ཀྱིས་རིམ་པ་བཞིན་རླུང་དང་མེ་མཚོན་ཞིང་། འབྱུང་བ་གཞན་དག་དང་བསྡུར་ན་འདི་གཉིས་ལ་ཐོགས་རེག་གི་ཆ་དང་ལྗིད་ཚད་ཀྱི་ཆ་ཉུང་། ཨ་རེ་སི་ཊོ་ཊོལ་གྱི་ན་བཟའི་ཁ་དོག་སྨུག་ནག་དང་སྔོན་སྐྱ་ཡིན་ལ། འདི་གཉིས་ཀྱིས་རིམ་པ་བཞིན་ས་དང་ཆུ་མཚོན་ལ། འབྱུང་བ་འདི་གཉིས་ལ་ལྗིད་ཚད་དང་ཐོགས་རེག་གི་ཆ་ཆེ། ལྡོག་ཕྱོགས་རང་བཞིན་གྱི་འབྱུང་བ་འདི་དག་གིས་ལྡོག་ཕྱོགས་སུ་གྱུར་བའི་མཚན་ཉིད་རིག་པའི་ལྟ་བ་སྟེ། ལྐོག་འགྱུར་དང་སྤྱི་མཚན་གཙིགས་སུ་འཛིན་པའི་མཚན་ཉིད་རིག་པའི་ལྟ་བ་དང་མངོན་གྱུར་དང་རང་མཚན་གལ་ཆེན་དུ་འཛིན་པའི་མཚན་ཉིད་རིག་པའི་ལྟ་བ་གཉིས་མཚོན་པ་ཡིན། 

 
མངོན་སུམ་དང་ལྐོག་གྱུར་མཚོན་པའི་ཕྱག་བརྡ: སྤྱིར་ཨ་རེ་སི་ཊོལ་ནི་ཕི་ལེ་ཊོ་ཡི་སློབ་མ་ཡིན་ནའང་། ཁོང་གིས་ཕི་ལེ་ཊོ་ཡི་ལྟ་བ་ལ་དགག་པ་ཟམ་མི་ཆད་པར་གནང་ཡོད། འདིར་ཡང་ཕི་ལེ་ཊོས་ཕྱག་མཛུབ་གནམ་ལ་ཀེར་ནས་འཇིག་རྟེན་འདིའི་རྒྱབ་ལོགས་ན་འཇིག་རྟེན་འདི་ལས་ཁྱད་དུ་འཕགས་པའི་འདུ་ཤེས་ཀྱི་འཇིག་རྟེན་གཞན་ཞིག་ཡོད་པའི་འགྲེལ་བརྗོད་གནང་བཞིན་ཡོད་ལ། ཨ་རེ་སི་ཏོ་ཊོལ་གྱིས་དེ་ལྟར་ཁས་ལེན་མི་བྱེད་པར། བདེན་དོན་ནི་ང་ཚོའི་མིག་མདུན་གྱི་འཇིག་རྟེན་འདི་ནས་རྙེད་དགོས་པའི་བརྡ་རུ་ཕྱག་གཡས་ས་ངོས་ལ་གཏད་ཡོད། །