ང་དང་ངག་དབང་ནོར་བུ་གཉིས་ཀྱིས་དཔེ་དེབ་རྣམས་སྔར་ལྷུན་གྲུབ་འདུག་སའི་ཅོག་ཙེའི་ཐོག་རྩེག་སྐབས། <<Christma Coral>> དང་། <<Of Mice And Men>> <<A Catcher In The Rye>>སོགས་ཀྱིས་གཙོས་པའི་རང་གིས་ཀློག་འདོད་པའི་བརྩམས་སྒྲུང་གྲགས་ཅན་མང་པོ་ཞིག་ཡོད་པ་མཐོང་སྟབས། ཞི་མི་ཞིག་གིས་མི་ཞིག་གི་མདུན་དུ་བཞག་པའི་དུང་བན་ནང་གི་ཤ་མཐོང་བ་ལྟར་ཟ་འདོད་ཆེན་པོ་ལངས་བྱུང་། ཞི་མི་དེ་ལ་རང་གི་འདོད་པ་བཞིན་དུང་བན་ནང་གི་ཤ་ཟ་རུ་མི་འཇུག་མཁན་ནི་དུང་བན་འགྲམ་དུ་བསྡད་པའི་མི་དེ་ཡིན་མོད། འོན་ཀྱང་ང་ལ་རང་གི་བསམ་པ་ལྟར་དཔེ་དེབ་དེ་དག་ལོངས་སུ་སྤྱོད་མི་འཇུག་མཁན་ནི་རང་གི་སྐད་ཡིག་གི་ཆུ་ཚད་རེད། དྲང་པོར་བརྗོད་ན། ངའི་ཨིན་ཇིའི་སྐད་ཡིག་གི་ཆུ་ཚད་ད་རུང་དམའ་བས། ཚིག་མཛོད་ཀྱི་རོགས་སྐྱོར་ལ་བརྟེན་ཡང་ད་རུང་གོ་བ་ཡག་པོ་ཞིག་མི་ལོན་པའི་གནད་དོན་གྱིས་གང་འདུག
ཡིན་ན་ཡང་། ང་ལ་བརྗོད་ལས་འདས་པའི་འདོད་རྔམ་མམ་སྤྲོ་སྣང་དེ་ཡོད་པས། ངས་རང་གིས་ལྟ་འདོད་པའི་གྲགས་ཅན་གྱི་སྒྲུང་དེབ་དེ་རྣམས་ཕྱོགས་གཅིག་ཏུ་བསྒྲིགས་ནས་མ་འོངས་པར་ལེན་བདེ་བར་བཟོས།
ངག་དབང་ནོར་བུ་དང་ངེད་གཉིས་ཀྱིས་དེ་ལྟར་དཔེ་དེབ་དག་རྩེག་བཞིན་ཡོད་དུས། རྒན་ལགས་དང་བདེ་ཆེན་གཉིས་གསར་དུ་སྦྲག་ཁང་དུ་འབྱོར་བའི་ཤོག་སྒམ་རྣམས་ལེན་དུ་ཕྱིན་སོང་།། (ཀུ་ཤལ་ཡིན་ནམ་བྷེལ་ཀོབ་ཡིན་མ་ཤེས) ངེད་གཉིས་ཀྱིས་དེབ་རྣམས་བརྩེགས་ཚར་ཏེ་ངས་དེབ་གཅིག་བླངས་ནས་ཀློག་བཞིན་པའི་ཚེ། ཨ་ཅག་དང་འོད་ཟེར་གཉིས་ཀྱིས“དེབ་འབྱོར་སོང་། དབོར་རོགས་ཤོག་ཟེར”ཞེས་བོས་བྱུང་།
ང་ཚོ་མི་རེ་རེས་ཤོག་སྒམ་རེ་ཁྱེར་ནས་སྔར་བཞིན་ཁ་ལག་ཟ་སར་ཡོང་བ་དང་། དེར་སྔར་བཞིན་རས་ཐུམ་ཕྲལ་ནས་ཤོག་སྒམ་གྱི་ཁ་འབྱེད་པའི་གྲ་སྒྲིག་བྱས། ང་ཚོས་གྲི་དང་ཇེམ་ཙེ་ལ་སྒུག་སྐབས། ངས“སོ་སོའི་ཤོག་སྒམ་ནང་དེབ་ཅི་འདྲ་ཞིག་འདུག་ན། ང་ཚོ་དེ་དང་འདྲ་བོ་ཞིག་ཆགས་ཀྱི་ཡོད་པའི་རྟགས་ཡིན་ད”ཟེས་བཤད་རྗེས། ཚང་མས་རང་རང་སོ་སོའི་ཤོག་སྒམ་གྱི་ཁ་འབྱེད་འགོ་བརྩམས།
ངས་རང་གི་ཤོག་སྒམ་གྱི་ཁ་ཕྱེ་ནས་དཔེ་དེབ་གཉིས་གསུམ་ཞིག་ཡར་བླངས་རྗེས། ཤིན་ཏུ་མཐུག་ལ་མདུན་ངོས་སུ་དྲག་ཆས་སྤྲས་ཤིང་དམག་རྟ་བཞོན་པའི་དམག་དཔོན་ཞིག་གི་པར་ཡོད་པའི་དེབ་ཅིག་ལ་ཐུག་བྱུང་བ་དང་། མདུང་ཐོགས་པའི་དཔག་དཔོན་དེའི་འོག་ཏུ<<དམག་འཁྲུག་དང་ཞི་བདེ།>>ཞེས་པའི་ཁ་བྱང་ཞིག་བྲིས་འདུག
ང་ལ་དགའ་སྤྲོ་ཚད་མེད་སྐྱེས་བྱུང་། དེས་མ་འོངས་པར་ང་རང་ཡང་སྙན་པའི་གྲགས་པ་སའི་གོ་ལའི་གྲུ་ག་ཀུན་ཏུ་ཁྱབ་པའི་རྩོམ་པ་པོ་ཁོང་ལྟ་བུ་ཞིག་ཏུ་འགྱུར་རྒྱུ་ཡིན་པ་བསྟན་རེད། ངས་དགའ་སྤྲོའི་ངང་ལས་གྲོགས་ཚོར“ང་ལ་དམག་འཁྲུག་དང་ཞི་བདེ་ཐོབ་སོང་། ང་ལ་དམག་འཁྲུག་དང་ཞི་བདེ་ཐོབ་སོང་།”ཞེས་བསྒྲགས་རུང་། བདེ་ཆེན་ཁོ་ནས་རྟེན་འབྲེལ་ལེགས་པོ་ཞིག་འགྲིགས་པ་ཡིན་པའི་རྣམ་འགྱུར་ཕྲན་ཙམ་བསྟན་པ་ལས་གཞན་ལ་ཚོར་སྣང་ཅི་ཡང་མེད་པར་སྣང་སྟེ། ཁོ་ཚོས་ལན་ཅི་ཡང་མ་སྟེར།
འོན་ཏེ་དེས་ངའི་སེམས་ཀྱི་དགའ་སྤྲོ་འགོག་ག་ལ་ཐུབ། ངས་རང་ཉིད་མ་འོངས་པར Leo Tolstoy ལྟ་བུའི་བརྩམས་སྒྲུང་བ་མཆོག་ཏུ་གྱུར་བ་ཞིག་ཆགས་རྒྱུའི་རྟེན་འབྲེལ་འགྲིགས་སོང་བསམས་ནས་དགའ་སྤྲོ་སྐྱེས་པ་མ་ཟད། ཐེངས་གཅིག་ལ་བསོད་ནམས་སྐྱིད་ཀྱིས་དེབ་ཅིག་གི་ནང Leo Tolstoy ཡི་མཚན་མཐོང་དུས། ང་རང་དྲན་སོང་བའི་སྐོར་བརྗོད་པ་དང་། ཕུན་ཚོགས་ཀྱིས་རྒྱུན་པར་ཀུ་རེའི་ཚུལ་གྱིས་ང་ལ“བོད་ཀྱི་ Leo Tolstoy”ཞེས་འབོད་པ་དྲན་སོང་།
ངོ་མ་འདི་ཐམས་ཅད་ཀྱིས་ཅི་ཞིག་སྟོན་གྱི་ཡོད་པ་ཨེ་ཡིན།།།