སྔོན་ཆད་དྷ་ས་ནི་རྒྱ་གར་གྱི་རི་གྲོང་སྤྱིར་བཏང་ཞིག་ཡིན་པ་ལས་འདི་འདྲའི་སྙན་གྲགས་ཅན་ཞིག་ཡིན་སྐད་མི་འདུག ཡིན་ན་ཡང་། ཕྱི་ལོ་ ༡༩༥༩ ལོར་རྒྱ་ནག་གིས་བོད་ཀྱི་རྒྱལ་ས་ལྷ་སའི་མི་མང་སྒེར་ལངས་ཆེན་མོར་དྲག་གནོན་བྱས་ཏེ་བོད་ཡུལ་ཡོངས་རྫོགས་མངོན་གསུམ་འཛེམ་མེད་ཀྱིས་བཙན་འོག་ཏུ་བསྡུས་རྗེས། བོད་ཀྱི་ཆོས་སྲིད་གཉིས་ཀྱི་དབུ་ཁྲིད་༧རྒྱལ་བ་རིན་པོ་ཆེ་མཆོག་རྒྱ་གར་དུ་བཙོན་བྱོལ་ལ་ཕེབས་ནས་དྷ་སར་བཞུགས་གནས་གནང་ཞིང་། བཙན་བྱོལ་བོད་གཞུང་(ད་ལྟའི་ཆར་བོད་མིའི་སྒྲིག་འཛུགས་ཟེར་གྱི་ཡོད།)དྷ་སར་བཙུགས་པ་ནས་བཟུང་། རྒྱ་གར་གྱི་རི་གྲོང་ཆུང་ཆུང་འདི་དང་བོད་ཀྱི་ལས་དབང་གཉིས་ལ་འབྲེལ་བ་དམ་ཟབ་བྱུང་བ་མ་ཟད། དྷ་ས་ཞེས་པའི་མིང་འདི་རྒྱལ་སྤྱིའི་གསར་འགྱུར་བརྒྱུད་ལམ་སྐད་གྲགས་ཅན་རྣམས་ཀྱི་ནང་དུ་ཡང་ཡང་ཐོན་འགོ་བརྩམས་ཤིང་། ༧རྒྱལ་བ་རིན་པོ་ཆེའི་མཚན་དང་སྙན་གྲགས་ཇི་ཙམ་གྱིས་ཆེ་རུ་ཕྱིན་པ་དེ་ཙམ་གྱིས་འཛམ་གླིང་དུ་དྷ་སའི་མིང་མཐོང་ཐོས་ཡོང་མཁན་མང་དུ་གྱུར།

ང་རང་མི་ལོ་ ༡༤ ལྷག་གི་སྔོན་ཏེ་ཕྱི་ལོ་ ༢༠༠༦ ལོའི་ལོ་སྨད་དུ་རི་གྲོང་འདིར་འབྱོར་བ་ཡིན། ད་ལྟ་ངས་རང་ཉིད་དྷ་སར་འབྱོར་བའི་ཞོགས་པ་དེ་གསལ་པོར་དྲན་སོས་ཀྱི་འདུག་སྟེ། བོད་ནས་གསར་དུ་འབྱོར་བ་རྣམས་བླུགས་པའི་སྤྱི་སྤྱོ་རླངས་འཁོར་དེ་ལྡི་ལི་ནས་མཚན་གང་བོར་ཡོང་ནས་ཞོགས་པར་ཀང་རཱ་རྫོང་ཁོངས་སུ་འབྱོར་ཞིང་། གྱ་གྱུའི་སྣུམ་ནག་གི་ལམ་ཆེན་བརྒྱུད་དེ་དལ་བུར་ཡར་དྷ་སའི་ཕྱོགས་སུ་འཛེགས་སྐབས། དེའི་སྔོན་དྷ་སར་ཡོང་མྱོང་ཡོད་པའི་མི་འགའ་ཤས་ཀྱིས་“ད་ནི་དྷ་རཱམ་ས་ལ་ལ་བསླེབ་གྲབས་འདུག་”ཅེས་སྐད་བརྒྱབ་པས། ངའི་སེམས་སུ་དྷ་ས་ཞེས་པའི་༧རྒྱལ་བའི་བཞུགས་གནས་དེ་སྤྱི་སྤྱོད་རླངས་འཁོར་གྱི་སྒེའི་ཁུང་ནས་མཐོང་བའི་རི་བོ་མཐོན་པོ་དེའི་ཕར་རྒྱབ་ཀྱི་གྲོང་ཁྱེར་ཞིག་ཡིན་ངེས་བསམས་པ་ལས། རི་ལྡེབས་དེའི་ཤིང་ནགས་ཁྲོད་དུ་ཆགས་པའི་གྲོང་རྡལ་ཞིག་ཡིན་པ་གཏན་ནས་མ་འཁོར། ཕྱིས་སུ་ངས་བྲག་གི་རྩེ་མོ་རྒྱུན་པར་གངས་ཀྱིས་བཟུང་བའི་རི་བོ་མཐོན་པོ་དེའི་མིང་ལ་དྷོ་ལ་དྷར་ཟེར་བ་ཤེས་ཤིང་། རི་བོ་དེ་རྒྱབ་ལྗོངས་སུ་བཞག་པའི་འདྲ་པར་བགྲང་ནས་འདས་པ་ཡོད།

ང་རང་དྷ་སར་བསླེབས་པའི་ཞོགས་པ་དེར་བློ་ཡི་ཟུར་ཙམ་དུའང་འཁོར་མྱོང་མེད་པའི་གནས་ཚུལ་གཞན་ཞིག་ནི། ང་རང་མི་ལོ་འདི་འདྲའི་མང་པོ་ཞིག་ལ་རི་གྲོང་འདིར་ལྷག་འགྲོ་རྒྱུ་ཡིན་པ་དེ་རེད། ངས་ཨ་ཕའི་སྒོར་མོ་བླུག་སའི་ལྕགས་སྒམ་གྱི་ཟྭ་ལྕགས་སོག་གིས་་བྲེགས་ནས་སྒོར་མོ་རྐུ་བའི་ཉིན་གུང་དེར། མི་མང་པོ་ཞིག་འགྲོ་མི་ཐུབ་པ་དང་། འགྲོ་མི་ཕོད་སའི་རྒྱ་གར་དུ་སྐོར་བ་ཐེངས་གཅིག་བྱས་ཏེ་༧རྒྱལ་བ་རིན་པོ་མཇལ་ནས་ཕྱིར་ཕ་ཡུལ་དུ་ལོག་ན། ཨ་ཕས་ངའི་སྒོར་མོ་བརྐུས་པའི་ཉེས་པ་དེ་གུ་ཡངས་སུ་གཏོང་ངེས་པ་མ་ཟད། ན་མཉམ་རོགས་པ་ཚོའི་ཁྲོད་དུའང་“རྒྱ་གར་དུ་འགྲོ་མཁན་”ཟེར་བའི་མིང་བྱང་རྫིག་པོ་དེ་ཁུར་ནས་འགྱིང་འགྱིང་དུ་འགྲོ་རྒྱུ་རག་ངེས་སྙམ། དེ་བས་ངས་ལམ་བར་ནས་ཉེན་རྟོག་པའི་འཛིན་བཟུང་འོག་ཚུད་ན། བཙོན་ཁང་དུ་རྒྱང་རྡུང་མནར་གཅོད་མྱོང་ངེས་རེད་སྙམ་པ་ལས་ན་མཉམ་རོགས་ཟླ་ཚོའི་འཕྱ་དམོད་ཟུར་ཟ་དང་། ཨ་ཕའི་གཤེ་གཤེ་འཁང་ར་ལ་སེམས་ཁྲལ་མང་བ་བྱས། ཁྱིམ་ནས་དངུལ་བརྐུས་ནས་བྲོས་རྗེས། རྒྱ་གར་དུ་འགྲོ་མ་ཐུབ་པར་ཕྱིར་ལོག་པ་ཡིན་ན། མགོ་བོ་དགྱེ་ནས་འགྲོ་བའི་སྐབས་ཤིག་ག་ལ་ཡོད།

ངས་ནམ་རྒྱུན་རང་ཉིད་ཇི་ལྟར་རྒྱ་གར་དུ་ཡོང་ནས་རྒྱ་གར་དུ་ལྷག་པའི་སྐོར་ལ་ཕྱིར་འདང་རྒྱག་སྐབས། དངོས་གནས་ལས་དབང་ཟེར་བ་ཞིག་ཡོད་པ་དང་། རང་ཉིད་རྒྱ་གར་དུ་ལུས་རྒྱུ་དེའང་ལས་ལ་བསྐོས་པ་ཞིག་ཡིན་པའི་ཚོར་སྣང་ཞིག་ངང་ངམ་ཤུགས་ཀྱིས་སྐྱེ་ཡོང་སྟེ། ང་རང་ལམ་རོགས་ཚོ་དང་མཉམ་དུ་བལ་ཡུལ་སྣེ་ལེན་ཁང་དུ་ཐོག་མར་འབྱོར་དུས། ང་ཚོའི་ཁྲོད་ནས་ལོ་ན་ཆུང་ཤོས་དེ་ང་ཡིན་པའི་རྒྱུ་མཚན་ཁོ་ནར་བརྟེན་ནས་ཐོ་འགོད་བྱེད་མཁན་དེས་རོགས་པ་གཞན་རྣམས་གནས་སྐོར་ལ་འགྲོ་མཁན་དང་། ང་རང་སློབ་གྲྭར་འགྲོ་མཁན་ཡིན་པའི་ཐོ་འགོད་བྱས་སོང་།

ངས་ཐོ་འགོད་པ་དེས་གང་ཞིག་བྲིས་མིན་ལ་དོ་སྣང་དང་སེམས་ཁུར་མ་བྱས། ངའི་སེམས་སུ་རོགས་པ་ཚོ་དང་ཁ་མ་བྲལ་བར་རྒྱ་གར་ལ་འགྲོ་ཐུབ་པ་ཡིན་ན། ༧རྒྱལ་བ་རིན་པོ་ཆེ་མཇལ་རྗེས་ཕྱིར་མཉམ་དུ་ལོག་ཆོག་པས། ཐོ་དེབ་ནང་དུ་གང་ཞིག་བྲིས་མིན་ལ་ཁྱད་པར་དང་འབྲེལ་བ་ཅི་ཞིག་ཡོད་དྲན། ང་རང་ལྷ་ས་ནས་ལམ་དུ་ཆས་ཁར། བྱུ་རུའི་ཕྲས་བརྒྱན་པའི་བ་སོའི་ཕྲེང་བ་ཞིག་དང་སྒོར་མོ་ཉིས་སྟོང་རོགས་པ་ཞིག་ལ་བཅོལ་བ་ཡིན། ངས་སྒོར་མོ་ཉིས་སྟོང་དེ་རང་ཉིད་རྒྱ་གར་ནས་ཕྱིར་ལོག་དུས་ལྷ་སར་འཆམ་བྱེད་དང་གོས་ལྷམ་ཉོ་བྱེད་དུ་བཀོལ་དགོས་སྙམ། ཡིན་ན་ཡང་། ཐོ་འགོད་དེས་རང་ཉིད་ཀྱི་འཆར་གཞི་དང་མི་ཚེའི་ཁ་ཕྱོགས་ཡོངས་སུ་བསྒྱུར་འགྲོ་བ་སུ་ཡིས་རྟོགས།

ཐོག་མར་ང་རང་སུ་ཇཱ་ཞེས་པའི་སློབ་གྲྭ་ཞིག་ཏུ་གཏོང་རྒྱུ་རེད་ཟེར་ཡང་། ང་ཚོ་དྷ་སའི་སྣེ་ལེན་ཁང་དུ་འབྱོར་རྗེས། འབྲེལ་ཡོད་ལས་བྱེད་ཚོས་“ཁྱོད་རང་ལོ་བཅོ་བརྒྱད་ཟིན་ནས་ཟླ་བ་གསུམ་སོང་འདུག”ཅེས་བཤད་དེ་གློ་བུར་དུ་༧རྒྱལ་བ་རིན་པོ་ཆེ་མཇལ་བའི་གོ་སྐབས་ཀྱང་མ་ཐོབ་གོང་དུ་འཇིབ་འཁོར་ཞིག་ཏུ་བཅུག་ནས་ཤེས་རབ་དགའ་ཚལ་སློབ་གླིང་དུ་བཏང་བྱུང་། ང་རང་སློབ་གྲྭ་ནས་ཡར་གཟིམ་ཆུང་དུ་༧རྒྱལ་བ་རིན་པོ་ཆེར་གསར་མཇལ་ཞུ་བར་འགྲོ་བའི་ཉིན་དེར། ངས་ལམ་རོགས་ཚོར་རང་ཉིད་ཁོ་ཚོ་དང་ལྷན་དུ་ཕྱིར་ཕ་ཡུལ་དུ་ལོག་རྒྱུ་ཡིན་ཚུལ་བཤད་པ་ན། ཁོ་ཚོས་སྣེ་ལེན་ཁང་གི་འབྲེལ་ཡོད་ལས་བྱེད་ཚོས་ཁོ་ཚོ་ཕྱི་ཉིན་རང་མར་ལྡི་ལིར་འགྲོ་བྱེད་ཀྱི་པ་སེ་ཉོས་ཟིན་པས། ང་ཁོ་ཚོ་དང་མཉམ་དུ་འཁེལ་མི་ཐུབ་ཚུལ་བཤད་བྱུང་། ད་ལྟ་བསམ་བློ་བཏང་ན། ངས་ཁོ་ཚོ་འགྲོ་སའི་སྤྱི་སྤྱོད་རླངས་འཁོར་དེ་རྩད་བཅད་ནས་པ་སེ་གཅིག་ཉོ་བའམ། ཡང་ན་དགོང་མོ་དེར་ལྡི་ལིར་འགྲོ་མཁན་གྱི་སྤྱི་སྤྱོད་རླངས་འཁོར་ཞིག་ལ་བསྡད་དེ་ལྡི་ལི་ནས་མཉམ་དུ་འཛོམས་ན་ཆོག་པ་འདུག འོན་ཀྱང་། སྐབས་དེ་དུས་སྤྱི་སྤྱོད་རླངས་འཁོར་གྱི་པ་སེ་ནི་སྣེ་ལན་ཁང་གི་ལས་བྱེད་ཚོ་ཁོ་ནས་ཉོ་ཐུབ་པ་ཞིག་ཡིན་པར་སྣང་བས། བྱ་ཐབས་ཟད་སོང་།

དེ་ལྟར་ང་རང་“ལས་ཀྱི་དབང་གིས་”རྒྱ་གར་དུ་ལྷག་ནས་ལོ་ངོ་བཅུ་བཞི་ཕྱིན་ཟིན་པ་དང་། ད་ནི་ནམ་ཞིག་ལ་ཕྱིར་ཕ་ཡུལ་དུ་ལོག་ཐུབ་པ་གཏན་ནས་བཤད་ཚོད་མི་ཐིག ངས་མི་ཚེའི་རེ་འདོད་གཅིག་པུ་དེ་ཕྱིར་ཕ་ཡུལ་དུ་ལོག་རྒྱུ་བཟུང་བའི་རྒས་འཁོགས་རྣམས་ཕ་ཡུལ་དང་ཐག་རིང་བའི་ས་མཐའ་འདིར་“མེད་པར་གྱུར་”བའི་གནས་ཚུལ་མཐོང་ཐོས་འབྱུང་ཐེངས་རེར། རང་ཉིད་ཀྱི་མགོ་ཐོག་ཏུའང་ཁོ་ཚོའི་ལས་དབང་དེ་མི་ལྷུང་བའི་ངེས་པ་མི་འདུག་ཨང་སྙམ་པའི་འཇིགས་སྣང་ཞིག་གིས་བྲང་ཁ་དམ་ཤིག་གེར་བསྡམ་འོང་། རེད། ཕྱི་ལོ་ ༡༩༥༩ ལོར་བོད་མི་རྣམས་བསྐལ་བ་ཆགས་པ་ནས་རང་ཉིད་ལ་དབང་བའི་ཕ་ས་ཕ་ཡུལ་དགྲ་ལག་ཏུ་ཤོར་ནས་རྒྱ་གར་དུ་ཐོག་མར་བཙན་བྱོལ་ལ་ཡོང་བའི་སྐབས། ཁོ་ཚོས་ཀྱང་རྒྱ་གར་ནི་གནས་སྐབས་ཀྱི་བཙན་བྱོལ་བྱེད་ཡུལ་ཙམ་རེད་བསམས་པ་དང་། ཐ་ན་ཤིང་འབྲས་འདེབས་འཛུགས་བྱས་ན། འབྲས་བུ་མ་སྨིན་གོང་དུ་ཕྱིར་ཕ་ཡུལ་དུ་ལོག་ཐུབ་ངེས་ཞེས་བཤད་མྱོང་འདུག འོན་ཀྱང་། དུས་རབས་ཕྱེད་ལྷག་གི་རྗེས་ཀྱི་དེ་རིང་ཡང་་་་་་་།

ད་ནི་ང་རང་ཆུང་མ་དང་བུ་ཕྲུག་ལྡན་པའི་མི་ཞིག་ཏུ་གྱུར་ཟིན། ཡིན་ན་ཡང་། བོད་ནས་རྒྱ་གར་ལ་བྲོས་བྱོལ་དུ་ཡོང་སྟེ་འཚོ་བ་རོལ་བཞིན་པ་ཕལ་མོ་ཆེ་ལྟར། བདག་གི་ཁྱིམ་ཚང་ཆུང་ཆུང་འདི་ཡང་རྒྱ་གར་བའི་ཁང་པ་ཞིག་གླས་ནས་བསྡད་ཡོད། ཟླ་ཤས་གོང་དུ་གྲོགས་པོ་འགའི་རོགས་རམ་ལ་བརྟེན་ནས་དཔེ་ཁྲི་ཆེ་ཆུང་གཉིས་གསར་དུ་བཟོས་པ་ཕར་ཕུད། གཞན་གོས་ལྷམ་ཉར་སའི་གོས་སྒམ་དང་། མཚན་མོར་གཉིད་དུ་ཡུར་སའི་ཉལ་ཁྲི། ཉིན་མོར་ཇ་ཕོར་དང་གློག་ཀླད་འཇོག་སའི་ཅོག་ཙེ་སོགས་ཁྱིམ་གྱི་ཡོད་ཚད་ཁང་བདག་ལ་དབང་བ་མ་ཟད། ཐ་ན་ངའི་ཁང་པའི་ནང་གི་དྲི་མའང་འོག་གི་ཁང་བདག་གི་ཁྱིམ་ནས་ཡར་ཡོང་བ་ཡིན།

༢༠༡༩ ཡི་ལོ་དཀྱིལ་ཙམ་ལ་ང་རང་རྒྱ་གར་ལྷོ་ཕྱོགས་ནས་(ལྷོ་ཕྱོགས་སུའང་ལོ་གསུམ་རིང་གཞན་གྱི་ཁང་པ་གཡར་ནས་བསྡད་པ་ཡིན།)ཚུར་བཞུགས་སྒར་དྷ་སར་ལོག་སྟེ་ཁང་པ་འཚོལ་བའི་སྐབས། ངས་གྷམ་རུའུ་གྲོང་གསེབ་ཀྱི་མཐའ་རུ་ཆགས་པའི་ཁང་པ་འདི་མཐོང་། ཁང་པའི་ཁ་ཁུ་སིམ་པའི་ཁོར་ཡུག་དང་། རྒྱ་ཡངས་པའི་ཐོག་ཁ། ཤིང་གི་ཞལ་བ། ད་དུང་གཙོ་བོ་རྙོག་དྲ་ཆུང་བའི་ཁང་བདག་(ཁོ་ལོ་ངོ་ ༢༠ ལྷག་ལ་བོད་པའི་འོག་ཏུ་ལས་ཀ་བྱེད་མྱོང་འདུག)བཅས་ལ་བརྟེན་ནས་ཁང་གླ་ཅུང་མཐོ་མིན་ལ་མ་བལྟོས་པར་ངས་ཁང་པ་འདི་གཡོར་རྒྱུའི་ཐག་བཅད་པ་ཡིན།

ངའི་ཁང་པའི་ཤིང་གི་ཞལ་བ་དང་འོག་གི་ཁང་བདག་གི་ཁང་པའི་ཐོག་གཉིས་གཅིག་པ་ཡིན་པ་ལས་བར་དུ་ཨར་འདམ་གྱི་ཐོག་མེད་པས། ང་ཚོ་འདིར་མ་སྤོས་སྔོན་དུ་ངའི་སེམས་སུ་ང་ཚོའི་རྡོག་སྒྲས་ཁོ་ལ་ཅ་ཟིང་པོ་དང་བར་ཆད་བཟོ་ངེས་སྙམ་པའི་སེམས་ཁྲལ་བྱུང་བས། དེའི་སྐོར་ཁང་བདག་ལ་བཤད་པར་ཁོས་“གལ་ཡོད་མ་རེད་”ཅེས་ནན་བརྗོད་བྱས་ནས་ངའི་བློ་ལྷོད་ལ་འབབ་དུ་བཅུག་བྱུང་། འོན་ཀྱང་། ང་ཚོ་འདིར་དངོས་སུ་སྤོས་ནས་ཅང་མ་འགོར་བར་ངས་ཁང་བདག་གི་སྒྲའང་ཤིང་གི་ཞལ་བ་བརྒྱུད་དེ་ཡར་ངའི་ཁང་པའི་ནང་དུ་ཡོང་བ་ཚོར་བ་མ་ཟད། ལྷག་པར་དུ་ཞོགས་པའི་ཆོས་དབྱངས་དེ་ཤིན་ཏུ་རྣ་ལ་གཟན་ཞིང་། ངའི་ཞོགས་པའི་བྱེད་སྒོ་ལའང་བར་ཆད་བཟོས་པས། ང་རང་ཁང་བདག་གི་སར་ཆོས་དབྱངས་ཀྱི་སྒྲ་ཆུང་དུ་གཏོང་བའི་རེ་སྐུལ་ཞུ་བར་ཐེངས་གཅིག་མིན་འགྲོ་དགོས་བྱུང་།

དེ་ཡིས་མ་ཚད། འདི་ལོའི་ཕྱི་ཟླ་གསུམ་པའི་ཟླ་སྨད་ལ་རྒྱ་གར་གྱི་སྲིད་བློན་མཱོ་དྷིས་གློ་བུར་དུ་ཝུའུ་ཧན་ཏོག་དབྱིབས་ནད་ཡམས་(ཡོངས་གྲགས་སུ་ Covid-19)སྔོན་འགོག་ཆེད་རྒྱ་གར་རྒྱལ་ཡོངས་སུ་ཐེམ་སྤང་བཀའ་རྒྱ་བསྡམས་པས། ཆུང་མ་དང་བུ་ཆུང་གཉིས་ཚུར་རྒྱ་གར་དུ་ལོག་ཐབས་བྲལ་བར་གྱུར་ནས་ང་རང་གཅིག་པུར་ཉིན་མཚན་ལྟོས་མེད་དུ་ཁང་པའི་ནང་སྡོད་དགོས་བྱུང་། དེ་ལྟར་རང་ཉིད་གཅིག་པུར་ཁང་པའི་ནང་འཛུལ་ནས་འདུག་སྐབས། ཁང་བདག་གི་སྐད་ཅོར་དང་ཆོས་དབྱངས་དུས་རྒྱུན་ལས་མཐོ་བར་སྣང་བའི་ཁར། ངས་ཁང་བདག་གི་ཁྱིམ་དུ་ཡོད་པའི་ཐུན་མིན་གྱི་དྲི་མ་དེའང་ཞལ་བའི་པང་ལེབ་ཀྱི་བར་དང་། ས་གདན་གྱི་གསེང་ནས་འཛུལ་ཏེ་རང་ཉིད་ཀྱི་ཁང་པའི་མཁའ་དབུགས་ཁྲོད་དུ་ཁྱབ་ཡོད་པ་ཐོག་མར་ཚོར་འགོ་བརྩམས་བྱུང་། དེ་བས་ངས་ཕྱོགས་གཅིག་ནས་སྐད་སྒྱུར་བ་བརྒྱུད་དེ་ཁང་བདག་ལ་དཀའ་ངལ་དེའི་སྐོར་བཤད་ནས་སྒྲ་དང་དྲི་མ་འགོག་བྱེད་ཀྱི་ཐོག་ཅིག་རྒྱག་པའི་རེ་སྐུལ་ཞུས་པ་དང་སྦྲགས། ཡང་ཕྱོགས་གཞན་ཞིག་ནས་གྷམ་རུའུ་ཡི་ཉེ་འཁོར་དང་། གངས་སྐྱིད། ཇོ་གྷེ་ཝ་རཱ། མེག་ལོར། ཐ་ན་དྷ་སྟེང་བོད་ཁྱིམ་སློབ་གྲྭའི་(TCV)ཉེ་འཁོར་དུ་ཁང་པ་འཚོལ་བའི་འགོ་བརྩམས་པ་ཡིན།

ངས་མི་གཞན་ལ་མངགས་པ་དང་། རང་ཉིད་དངོས་སུ་ཕྱིན་ནས་འཚོལ་བ་སོགས་བྱས་ན་ཡང་། ད་བར་གོང་ཚད་དང་ཁོར་ཡུག ཁང་པའི་ཆ་རྐྱེན་སོགས་ཀྱི་ཐད་ནས་རང་ཉིད་ཀྱི་བློར་བབ་པ་ཞིག་གཏན་ནས་མ་རག་སྟབས། མུ་མཐུད་མི་འདོད་བཞིན་ཁང་པ་འདིའི་ནང་བསྡད་ནས་ཡོད། ཁང་བདག་གིས་ངའི་རེ་སྐུལ་ལྟར་ཨར་འདམ་གྱི་ཐོག་ཅིག་རྒྱག་ཐབས་བྲལ་ཚུལ་བཤད་བྱུང་ན་ཡང་། ཁོས་ཤིང་བཟོ་བ་བོས་ཏེ་ངའི་ཞལ་བའི་འོག་ཏུ་བར་སྟོང་ཅུང་ཟད་བཞག་སྟེ་ཤིང་གི་ཐོག་གསར་པ་ཞིག་བརྒྱབ་སོང་བ་དང་། དེས་སྒྲ་མི་ཡོང་བར་ཕན་ཐོགས་གང་འཚམ་བྱུང་རུང་དྲི་འགོག་ཐུབ་ཀྱི་མི་འདུག

ངའི་རོགས་པ་ཞིག་གིས་“དྲི་མ་གཅིག་པུའི་གནད་དོན་ཡིན་ན། འོག་ལ་འགྱིག་གི་ས་གདན་ཞིག་བཏིངས་ནས་ཡག་པོ་སྦྱར་ན་དྲི་མ་འགོག་ཐུབ”ཟེར་བས། ངས་ཀྱང་དྷ་ཤོད་ནས་འགྱིག་གི་ས་གདན་ཞིག་ཉོས་རྗེས། རོགས་པ་འགའ་བོས་ཏེ་ཤིང་གི་ཞལ་བའི་ཐོག་བཏིང་པ་དང་། དེའི་སྟེང་དུ་སླར་ཡང་དུས་རྒྱུན་གྱི་རས་ཀྱི་ས་གདན་དེ་བཀབ་པ་ཡིན། ཡིན་ན་ཡང་། ཉིན་ཆས་རྗེས་སུ་སྦྱར་རྩིའི་དྲི་མ་རིམ་གྱིས་ཡལ་བ་དང་སྦྲགས། སྔར་གྱི་དྲི་མ་དེ་ཡོང་འགོ་ཚུགས་བྱུང་བས། ས་གདན་ཉོས་པ་དེ་འགྲོ་སོང་མཐོལ་པ་ཞིག་ཏུ་གྱུར་སོང་།

ད་ནི་ཆར་དུས་ཡོལ་ནས་ཟླ་བ་གཅིག་ལྷག་ཕྱིན་ཟིན་པ་དང་། སྔ་དགོང་གི་མཁའ་དབུགས་ཁྲོད་དུ་དགུན་ཀའི་གྲང་ངར་གྱི་ཆ་ཞིག་ཚོར་ཐུབ། ངའི་ཁང་པའི་ནང་གི་དྲི་མ་དེའང་ཆར་དུས་དང་ཚ་བའི་སྐབས་ལས་ཅུང་ཟད་ཆུང་དུ་ཕྱིན་འདུག ཡིན་ན་ཡང་། རང་ཉིད་ཀྱི་ཁང་པའི་མཁའ་དབུགས་ཁྲོད་ཀྱི་དྲི་མའང་རང་ཉིད་ལ་མི་དབང་བ་དེ་ནི་ཅི་འདྲའི་བཟོད་དཀའ་བའི་སུན་སྣང་ཞིག་རེད་ཨང་། དེ་ནི་ཆེད་དུ་རང་གི་ཡུར་གྱར་གྱི་འཚོ་བའི་ཁྲོད་ཅི་ཡང་རང་ཉིད་ལ་མི་དབང་བ་དེ་དྲན་གསོ་བྱེད་སྤྱད་ཅིག་དང་མཚུངས།

དེ་སྔོན་ཐེངས་གཅིག་ལ། ཆུང་མ་དང་ངེད་གཉིས་ཀྱིས་མ་འོངས་པའི་རྨི་ལམ་གྱི་སྐོར་གླེང་སྐབས། མོས་རང་ཉིད་ལ་དབང་བའི་ཁང་པ་ཆུང་ཆུང་ཞིག་ཡོད་རྒྱུ་དེ་མོའི་རེ་འདུན་ཡིན་ཟེར་བ་དང་། གདོང་ལ་འཛུམ་མདངས་ཤིག་འཁྱིལ་ནས་“ཁྱོད་དང་ནོར་བུ་གཉིས་སོ་ཧྥག་ཐོག་ཏུ་བསྡད་དེ་བརྙན་འཕྲིན་ལ་ལྟ་སྐབས། ངས་ཟས་ཞིམ་པོ་བཟོ་འདོད་”ཅེས་བཤད་བྱུང་།

ངའི་སྒེར་གྱི་མི་ཚེའི་མངོན་འདོད་ཀྱང་ཆེན་པོ་ཞིག་མ་ཡིན་ཏེ། རང་ཉིད་ལ་དབང་བའི་ཁང་ཆུང་ཞིག་གི་ནང་དུ་ཉིན་གཅིག་ལ་སྤོ་དགོས་པའི་སེམས་ཁྲལ་མེད་པར་ལྷིང་འཇགས་ཀྱི་འཚོ་བ་ཞིག་ལ་རོལ་རྒྱུ་དང་། ཁང་ཆུང་གི་གྱང་ངོས་སུ་འཛེར་ཆུང་ཞིག་བཏབ་ཀྱང་གཏན་དུ་རང་ཉིད་ལ་བདག་པ་དང་། ཁང་པའི་མཁའ་དབུགས་ཁྲོད་ཀྱི་དྲི་མ་དེ་རང་གི་ཁྱིམ་ཚང་ལ་དབང་རྒྱུ་དེ་ཡིན། །

༢༠༢༠།༡༠།༡༡ ཉིན།