ང་ཚོས་མིག་ཟུང་བཙུམས་ནས་ཉིན་དེའི་རྣམ་པར་ཕྱིར་ལྟས་ཐེངས་གཅིག་བགྱིས་པ་ཡིན་ན། དམ་པོར་བསྒྲིལ་བའི་ཁུ་ཚུར་ཁྲི་སྟོང་མང་པོ་ལྷ་སའི་མཁའ་དབྱིངས་སུ་བསྒྲེངས་པ་མཐོང་ཐུབ་ལ། “བོད་རང་བཙན་ཡིན། རྒྱ་དམར་བོད་ནས་ཕར་རྒྱུགས་ཤིག”ཅེས་བདེན་པའི་འབོད་ཚིག་བསྒྲོགས་པའི་སྒྲ་དབྱངས་ལྷ་སའི་བར་སྣང་དུ་ཁྱབ་པ་ཐོས་ཐུབ། དེ་བཞིན་ལྷ་སའི་སྲང་ལམ་དུ་མ་གྲོས་གཅིག་ཏུ་འཛོམས་པའི་བོད་མི་རེ་རེའི་ངོ་གདོང་ལ་སོ་སོའི་ཆོས་སྲིད་ཀྱི་དབུ་ཁྲིད་བསྟན་དགྲ་རྒྱ་དམར་གྱིས་བཙན་ཁྲིད་བྱ་ཨེ་འགྲོ་སྙམ་པའི་འཇིགས་སྣང་དང་། ཡང་འཆི་བ་སྲོག་ལ་ཐུག་ཀྱང་ཁོང་རྒྱ་དམར་གྱི་ལག་ཏུ་མི་ཐེབས་པ་བྱེད་དགོས་སྙམ་པའི་ཆོད་སེམས་འདྲེས་མའི་རྣམ་འགྱུར་གྱིས་ཁེངས་པ་མཐོང་ཐུབ། ཉིན་དེར་སོ་སོའི་གཅེས་པའི་ལུས་སྲོག་བློས་བཏང་ནས་ནོར་བུ་གླིང་ཁ་དང་། དེར་བཞུགས་པའི་ཏཱ་ལའི་བླ་མ། རྒྱལ་ས་ལྷ་ས། བོད་རྒྱལ་ཁབ་བཅས་སྲུང་མཁན་དེ་དག་ནི་ང་ཚོའི་ཨ་མྱེ་དང་ཨ་ཡེ་རྣམས་རེད། ཉིན་དེར་ཁོ་ཚོས་བོད་ཀྱི་དབུ་ཁྲིད་ཏཱ་ལའི་བླ་མ་བསྲུངས་ཐུབ་པ་བྱུང་ནས་ད་ལྟ་ཁོང་གི་མཚན་སྙན་འཛམ་གླིང་ཡུལ་གྲུ་ཀུན་ཏུ་ཁྱབ་ཡོད་མོད། འོན་ཀྱང་བདུན་གཅིག་གི་རྗེས་སུ་ཁོ་ཚོ་བསྟན་དགྲ་རྒྱ་དམར་གྱི་དེང་རབས་མཚོན་ཆ་སྟེ་མེ་མདའ་སྦག་སྦག་དང་མེ་རྒྱོགས་ཀྱི་འབེན་དུ་གྱུར་ནས་ནོར་བུ་གླིང་ཁའི་གྱང་དང་ལྷན་དུ་འགྱིལ། ནོར་གླིང་དང་ལྷ་སའི་གྱང་རྣམས་ཐང་དུ་ལོག་དུས་ས་རྡུལ་གྱེན་དུ་འཕྱོར་ཡང་། བོད་མི་རྣམས་ཐང་དུ་འགྱིལ་སྐབས་ཁྲག་དམར་ཐུར་དུ་བཞུར། གཉིས་ཀ་ཅི་འདྲའི་ལྟ་མི་བཟོད་པ་ཞིག་རེད་ཨང་། 

 དུས་དེ་ནས་བཟུང་རྒྱལ་ས་ལྷ་ས་དངོས་སུ་དགྲ་བོ་རྒྱ་དམར་གྱི་ལག་ཏུ་ཤོར་ཞིང་། ལྷ་ས་དང་བོད་ཁམས་ཡོངས་སུ་གངས་སེང་རྟགས་ཅན་གྱི་རྒྱལ་དར་མངོན་རྒྱུ་མེད་པར་གྱུར། བོད་ཀྱི་དཔའ་བོ་ཚོས་དེང་རབས་ཀྱི་མཚོན་ཆའི་མདུན་དུ་ཁུ་ཚུར་ཕྱར་ནས་སོ་སོའི་རྒྱལ་ཁབ་དང་དབུ་ཁྲིད་བསྲུངས་བའི་ཉིན་མོ་དེ་ཧ་ལམ་ལྷ་སྒྲུང་ལྟ་བུར་འགྱུར་ཉེན་ཆེ། འོན་ཀྱང་པོ་ཏཱ་ལའི་མདུན་གྱི་ཐང་ཆེན་དང་ལྷ་སའི་སྲང་ལམ་ཐམས་ཅད། དེ་བཞིན་བོད་མཐོ་སྒང་གི་གྲོང་དང་གྲོང་བརྡལ་ཀུན་དུ་གཡོ་བའི་དགྲ་བོའི་རྒྱལ་དར་སྟེང་དུ་སྔོན་གཤེགས་དཔའ་བོ་ཚོའི་ཁྲག་དམར་འགོས་ནས་དམར་པོར་གྱུར་ཡོད།  དེ་བས་ང་ཚོས་དགྲ་བོའི་རྒྱལ་དར་མཐོང་སྐབས། ཅིས་ཀྱང་དེའི་སྟེང་གི་དམར་མདངས་དེ་སྔོན་གཤེགས་དཔའ་བོ་ཚོའི་ཟུངས་ཁྲག་དྲོང་མོ་ཡིན་པ་དྲན་དགོས། 

 ལོ་ངོ་ང་དགུའི་རྗེས་ཀྱི་དེ་རིང་གནམ་ས་བླ་འོག་ལྟ་བུའི་འགྱུར་བ་ཕྱིན་ཡོད། རྒྱལ་ས་ལྷ་སས་གཙོས་པའི་བོད་ཀྱི་གྲོང་ཁྱེར་ཕལ་ཆེ་བའི་ནང་རྒྱ་རིགས་ཀྱི་གྲངས་འབོར་འཕེལ་ནས་བོད་པ་རྣམས་སོ་སོའི་ཕ་ཡུལ་དུ་གྲངས་ཉུང་མི་དམངས་སུ་འགྱུར་བཞིན་ཡོད་པའི་ཐོག དགྲ་བོའི་དམག་ཤུགས་དང་དཔལ་འབྱོར་ཉིན་རེ་ནས་ཉིན་རེར་འཕེལ་ཏེ་འཛམ་གླིང་ཁ་ལོ་སྒྱུར་བའི་ཚད་དུ་ཐོན་སྟབས། ང་ཚོ་བོད་མི་རིགས་ཀྱི་བདེན་པ་ལ་རྒྱལ་ཁ་འཐོབ་པའི་རེ་བ་དང་། སོ་སོའི་ཕ་མེས་ཡང་མེས་ཀྱི་མཐོ་སྒང་དེ་སོ་སོ་ལ་དབང་བའི་དུས་ཤིག་ཡོང་བའི་གོ་སྐབས་ཤིན་ཏུ་ཕྲ་བར་སྣང་། 

 ཡིན་ན་ཡང་། ང་ཚོ་བོད་པ་མི་རེ་ངོ་རེ་ཡིས་རྟག་ཏུ་དྲན་དགོས་པ་དང་སེམས་སུ་འཛིན་དགོས་པ་གཅིག་ནི་འཛམ་གླིང་སྟེང་འཇིག་རྒྱུ་མེད་པའི་སྟོབས་ཤུགས་ཤིག་གཏན་ནས་མེད་པ་དེ་རེད། འདས་པའི་ལོ་ངོ་ཉིས་སྟོང་ལྷག་གི་ལོ་རྒྱུས་ལ་ཕྱིར་ལྟས་ཐེངས་གཅིག་བགྱིས་ན། གྷི་རི་སི་དང་། རོ་མ། སོག་པོ། ཨིན་ཇི་བཅས་ཀྱིས་གཙོས་པའི་སྟོབས་ཆེན་བཙན་རྒྱལ་གང་མང་ཞིག་འབྱུང་མྱོང་མོད། འོན་ཀྱང་ད་ལྟ་དེ་དག་ཐམས་ཅད་ཞིག་ནས་མིང་ཙམ་དུ་གྱུར་ཡོད། ལོ་ངོ་ཉིས་སྟོང་ཡས་མས་ཀྱི་གོང་དུ“ལམ་བུ་ཐམས་ཅད་ཀྱི་སྣེ་མོ་རོ་མ་ལ་ཟུག་ཡོད”ཅེས་རོ་མ་བཙན་རྒྱལ་གྱི་མངའ་ཐང་རབ་ཏུ་རྒྱས་ཏེ་གཏན་ནས་འཇིག་ཏུ་མེད་པར་སྣང་ལ། དེ་ནས་དུས་རབས་བཅུ་གསུམ་བཅུ་བཞིའི་ནང“དཀོན་མཆོག་ལ་སྙིང་རྗེ་ལྡན་ཡང་། སོག་པོར་སྙིང་རྗེ་མེད”ཅེས་སོག་པོའི་བཙན་རྒྱལ་རྟག་བརྟན་ཡིན་པར་མངོན། དེ་རྗེས་དུས་རབས་བཅུ་བདུན་བཅོ་བརྒྱད་ནང་ཨིན་ཇིའི་བཙན་རྒྱལ་བྱུང་ནས“ཉི་མ་ནམ་ཡང་ཨིན་ཇིའི་བཙན་རྒྱལ་གྱི་མགོ་ནས་ནུབ་མི་སྲིད”ཅེས་པའི་ཁ་དཔེ་བྱུང་མོད། འོན་ཀྱང་ད་ལྟ་དེ་དག་རྣམས་ལོ་རྒྱུས་དེབ་ཐེར་གྱི་བརྗོད་བྱ་ཙམ་དུ་གྱུར་ཡོད། དེ་བས་ད་ལྟ་དགྲ་བོ་སྟོབས་ཤུགས་མངའ་ཐང་ཇི་ཙམ་ཆེ་ཞིང་འགྱུར་བ་མེད་པར་སྣང་རུང་། ཉིན་གཅིག་གོང་དུ་བརྗོད་པའི་བཙན་རྒྱལ་རྣམས་ལྟར་འཇིག་པ་ཆོས་ཉིད་ཡིན་པས། ང་ཚོས་ངང་རྒྱུད་རིང་པོ་ཉིན་དེ་སྒུག་དགོས་ལ།  གལ་སྲིད་ང་ཚོའི་ཚེ་ཚད་ཀྱིས་མ་འདང་ན། ང་ཚོའི་བུ་རབས་ཚ་རྒྱུད་རྣམས་ལ་ཉིན་དེ་སྒུག་ཏུ་འཇུག་དགོས། 

 ཉིན་མོ་དེ་མ་སླེབ་བར་དུ་ང་ཚོས་ངང་རྒྱུད་རིང་པོས་སྒུག་དགོས། ཕྱི་ནས་རོགས་རམ་ཡོང་བའི་རེ་སྟོང་རྒྱག་པའི་གོམས་གཤིས་ངན་པ་དེ་བསྐྱུར་ནས། དེའི་ཚབ་ཏུ་ནང་ཁུལ་རྡོག་རྩ་གཅིག་སྒྲིལ་གྱིས་ཉིན་མོ་དེ་སྒུག་དགོས། ང་ཚོས་བོད་མི་རིགས་དང་བོད་རྒྱལ་ཁབ་ཀྱི་རང་དབང་སླར་གསོའི་ཆེད་དུ་ཆོལ་ཁ་ཆོས་རྒྱུད་ཀྱི་གུ་དོགས་པའི་བསམ་བློ་དང་སྤྱོད་པ་དོར་ནས་བོད་མི་ཡོད་དོ་ཅོག་གི་མིག་ཟུང་བགྲད་དེ་དགྲ་བོའི་སྟོབས་ཤུགས་འཇིག་པའི་ཉིན་མོ་དེ་མཐོང་རྒྱུ་སྒུག་དགོས་ལ། རྣ་བ་ཟུང་བཏད་དེ་དགྲ་བོའི་སྟོབས་ཤུགས་ཀྱི་བླ་མཁར་འགྱིལ་བའི་འུར་སྒྲ་ཐོས་རྒྱུར་སྒུག་དགོས། འཇིག་རྟེན་སྟེང་འཇིག་རྒྱུ་མེད་པའི་སྟོབས་ཤུགས་ཤིག་གཏན་ནས་མེད།

 ང་ཚོས་དེ་ལྟར་བསྒུགས་པ་ཡིན་ན། པོ་ཏཱ་ལའི་མདུན་གྱི་ཐང་ཆེན་དང་བོད་ཀྱི་གྲོང་ཚོ་རེ་རེའི་ནང་དཔའ་བོ་ཚོའི་ཁྲག་དམར་འགོས་པའི་སྐར་ལྔའི་རྒྱལ་དར་ཚབ་ཏུ་གངས་སེང་རྟགས་ཅན་གྱི་རྒྱལ་དར་ལྷབ་ལྷུབ་གཡོ་བའི་ཉིན་ཞིག་འཆར་ངེས། དེ་དུས་དུས་རབས་ཉེར་གཅིག་གི་མགོ་ན་འཚོ་བཞིན་པའི་ང་ཚོ་ལོ་རྒྱུས་ཀྱི་ཆུ་བོའི་ནང་ཐིམ་ནས་མེད་པར་གྱུར་ཡོད་སྲིད་ཀྱང་། ང་ཚོའི་བུ་རབས་ཚ་རྒྱུད་རྣམས་ཀྱིས་དེ་རིང་གི་ཉིན་མོ་འདིར་པོ་ཏཱ་ལའི་མདུན་དུ“སྲིད་ཞིའི་ཕན་བདེ”སྐྱོར་བཞིན་གངས་སེང་རྟགས་ཅན་གྱི་རྒྱལ་དར་མཁའ་རུ་སྒྲེང་ངེས། ཁྱོད་ཀྱིས་ཁོ་ཚོའི་ངོ་གདོང་གི་འཛུམ་མདངས་མཐོང་ཐུབ་ཀྱི་འདུག་གམ། ཁྱོད་ཀྱིས་ཁོ་ཚོའི་ལེན་བཞིན་པའི་རྒྱལ་གླུའི་སྒྲ་དབྱངས་ཐོས་ཐུབ་ཀྱི་འདུག་གམ། ཁྱོད་ཀྱིས་ཁོ་ཚོའི་སྙིང་ཁོང་དུ་རྒྱས་པའི་དགའ་སྤྲོ་དང་སྤོབས་པ་ཚོར་ཐུབ་ཀྱི་འདུག་གམ། ཁོ་ཚོར་རང་དབང་ཐོབ་འདུག ཁོ་ཚོར་རང་དབང་ཐོབ་འདུག།།