ཞོགས་པ་དེར་གདུང་ལོ་༢༤ལས་སོན་མེད་པའི་བོད་ཀྱི་ཆོས་སྲིད་གཉིས་ཀྱི་འབུ་ཁྲིད་ཏཱ་ལའི་བླ་མས་དུས་རྒྱུན་ལྟར་ཞོགས་འདོན་བཏོན་ནས་ཞོགས་ཟས་མཆོད་རྗེས། ནོར་བུ་གླིང་ཁའི་མེ་ཏོག་ལྡུམ་རྭའི་ནང་དུ་གཅིག་པུར་སྐོར་འཆམ་དུ་ཕེབས། ཁ་ཁུ་སིམ་པའི་ལྡུམ་རྭ་ཡི་ལྷིང་འཇགས་དང་ཞོགས་པའི་ཉི་འོད་འཇམ་པོས་ཁོང་གི་ཐུགས་ལ་སྤྲོ་སྣང་ཞིག་བྱིན་པ་དང་། རེ་ཞིག"བཟུང་ན་ལག་པ་འཚིག་པ་དང་བཏང་ན་རྫ་ཕོར་ཆག་པའི"ལྷ་སའི་ཛ་དྲག་ཆེ་བའི་གནས་སྟངས་དེ་བརྗེད་དུ་བཅུག ཡིན་ན་ཡང་གློ་བུར་དུ་ཁོང་གིས་ལྕགས་རིའི་ཕྱི་རོལ་ནས་མི་དམངས་ཀྱིས་སྐད་འབོད་སྒྲོག་པའི་སྒྲ་གསན།
ཨ་ཅང་ཅང་། དེ་ནི་ནོར་བུ་གླིང་ཁའི་ལྕགས་རིའི་ཕྱི་ན་མ་གྲོས་གཅིག་ཏུ་འཛོམས་པའི་མི་དམངས་ཀྱི་སྐད་འབོད་རེད། དེ་དག་གི་ཁྲོད་ན་མགོ་ལ་ཚ་ལོ་དཀྲིས་ཤིང་སྐེད་ལ་གྲི་རིང་གཟེར་བའི་ཁམས་པ་དང་། ལུས་ལ་རྣམ་བུ་གྱོན་ཞིང་རྣ་བར་གཡུ་ཆུང་བཏགས་པའི་དབུས་པ། མགོ་ལ་ཕྱིང་ཞྭ་གྱོན་ཞིང་སློག་པའི་རུམ་ཆེ་བའི་ཨ་མདོ་བ་བཅས་བོད་ཀྱི་ཡུལ་གྲུ་གང་ས་ནས་ཡོང་བའི་མི་དམངས་འཛོམས་ཡོད་པའི་ཐོག སྐར་མ་རེ་རེ་ཕྱིན་པ་དང་མི་ཚོགས་ཇེ་ཆེ་དང་ཇེ་སྟུག་ཏུ་འགྱུར་བཞིན་འདུག་ལ། ཉིན་རྒྱབ་སླེབས་དུས་ཁྱོན་མི་གྲངས་ཁྲི་གསུམ་ཙམ་གྱིས་ནོར་བུ་གླིང་ཁ་ཡོངས་སུ་བསྐོར་ཟིན།
ཁོང་ཚོས་ལྷ་སར་ཡོད་པའི་རྒྱ་དམར་གྱི་དཔོན་པོ་ཚོས་༧གོང་ས་མཆོག་དམག་སྒར་དུ་གཟིགས་མོར་ཕེབས་དགོས་པའི་མགྲོན་ཤོག་བཏང་བ་མ་ཟད། སྐུ་སྲུང་ཡང་འཁྲིད་མི་ཆོག་པའི་གནས་ཚུལ་དེ་ཤེས་པས། དེར་མ་གྲོས་གཅིག་ཏུ་འཛོམས་ནས་ཁོང་རྒྱ་དམར་གྱི་དམག་སྒར་དུ་གཏན་ནས་གཏོང་འཆར་མེད། ཁོ་ཚོས་བོད་ཀྱི་ཤར་ཕྱོགས་ས་ཁུལ་དག་ནས་རྒྱ་དམར་གྱིས་གཟིགས་མོའི་མགྲོན་ཤོག་བཏང་སྟེ་བླ་ཆེན་གང་མང་བཙན་ཁྲིད་དང་དམར་གསོད་བཏང་བའི་གནས་ཚུལ་གོ་ཡོད་སྟབས། དེར་འཛོམས་པའི་བོད་མི་རེ་རེའི་སེམས་ཁོངས་ན་རང་སྲོག་ལ་ཐུག་ཀྱང་ཁོང་སྐྱིད་ཆུའི་ངོགས་སུ་བཏབ་པའི་རྒྱ་དམར་གྱི་དམག་སྒར་ལ་མི་གཏོང་བའི་ཆོད་སེམས་བརྟན་པོ་རེ་ཡོད། ཁོ་ཚོས་ནོར་བུ་གླིང་ཁའི་རྒྱ་སྒོ་འཕྱེ་ཐེངས་རེ་ལ་མིག་རིག་རིག་གིས་ཞིབ་པར་ལྟ་ཞིང་བོད་ཀྱི་གཞུང་ཞབས་མཐོ་གྲས་རྣམས་ཀྱང་ནོར་གླིང་ནང་ཡར་འཛུལ་མར་དོན་བྱེད་དཀའ་བའི་ཚད་དུ་བསླེབས།
དེར་མ་གྲོས་གཅིག་ཏུ་འཛོམས་པའི་མི་རྣམས་ཀྱི་ངོ་གདོང་ལ་སེམས་ཁྲལ་དང་ཞེ་སྡང་འདྲེས་མའི་རྣམ་འགྱུར་གྱིས་ཁེངས་ཤིང་། ལག་པའི་ཁུ་ཚུར་བར་སྣང་དུ་འཕྱར་བ་དང་སྦྲགས། "བོད་རང་བཙན་ཡིན། ༧གོང་ས་མཆོག་ཁྲི་ལོར་ཤོག རྒྱ་དམར་བོད་ནས་རྒྱུགས་ཤིག"ཅེས་མཉམ་དུ་འབོད་ཚིག་སྒྲོག་པའི་སྒྲ་ནི་འབྲུག་སྒྲ་ཇི་བཞིན་ལྷ་སའི་བར་སྣང་ཡོངས་སུ་ཁྱབ་ནས་ལྷ་སའི་མཐའ་ན་དམག་སྦྱོང་ངམ་དངོས་སུ་དམག་རྒྱག་པའི་གྲ་སྒྲིག་བྱེད་བཞིན་པའི་རྒྱ་དམག་ཚོའི་མེ་རྒྱོགས་ཀྱི་སྒྲའང་དེ་ཙམ་མི་གོ་བར་བཏང་།
ཁོ་ཚོས"བོད་རང་བཙན་ཡིན། རྒྱ་མི་བོད་ནས་ཕར་རྒྱུགས་ཤིག"ཅེས་བདེན་པའི་འབོད་ཚིག་སྙིང་སྟོབས་ཆེན་པོས་ལྷང་ལྷང་སྒྲོག་བཞིན་ཉིན་ཧྲིལ་བོར་ནོར་བུ་གླིང་ཁར་བསྡད་དེ་བོད་རྒྱལ་ཁབ་དང་མི་རིགས་ཀྱི་མཚོན་དོན་དུ་གྱུར་བའི་༧སྐྱབས་མགོན་ཏཱ་ལའི་བླ་མ་བསྲུངས་བ་མ་ཟད། མཚན་མོར་ཡང་ཕྱིར་མ་ལོག་པར་སྲུང་རེས་དང་ཉལ་རེས་བགྱིས།
ཁོ་ཚོས་དེ་ལྟར་རང་སྲོག་དང་བསྡོས་ནས་མུ་མཐུད་བདུན་ཕྲག་གཅིག་ལྷག་བསྲུངས་རྗེས། ༧གོང་ས་མཆོག་སྐྱ་ཆས་སྤྲས་ནས་རང་དབང་གི་ཡུལ་དུ་ཕེབས་པའི་གནས་ཚུལ་བྱུང་བས། ཁོང་ཚོའི་སེམས་ན་དགའ་སྡུག་ཁྱད་མེད་འདྲེས་པའི་ཚོར་སྣང་གིས་ཁེངས་མོད། འོན་ཀྱང་གནས་ཚུལ་དེས་ལྷ་སར་བསྡད་པའི་རྒྱ་དམར་གྱི་དམག་དཔོན་ཙམ་མ་ཟད། པེ་ཅིང་ན་ཡོད་པའི་གཙོ་འཛིན་མ་འོ་ཡང་སྡུག་ལྷང་ངེར་བཏང་། རྒྱ་མཚན་ནི་ཁོ་ཚོས་བོད་མིའི་ཆོས་སྲིད་ཀྱི་དབུ་ཁྲིད་འཛིན་བཟུང་ངམ་དམར་གསོད་གཏོང་མ་ཐུབ་ཕྱིན་ཁོ་ཚོར་ཐོབ་པའི་རྒྱལ་ཁ་དེ་ཕྱེད་ལས་མིན་པ་དང་ནམ་ཞིག་ཁོང་ཕྱིར་རང་ཡུལ་དུ་ལོག་སྟེ་ཆོས་སྲིད་ཀྱི་མཛད་འཕྲིན་སྐྱོང་ངེས་པ་གསར་པོར་རྟོགས་ཡོད། སྐུ་གོང་ཡང་རྒྱ་གར་དུ་བྲོལ་བྱོལ་ལ་ཕེབས་ནས་ཕྱིར་ལོག་རྗེས། བོད་ནི་རང་དབང་གཙང་མའི་རྒྱལ་ཁབ་ཡིན་པའི་བདེན་གཏམ་ཕྱོགས་བཞི་མཚམས་བརྒྱད་ལ་བསྒྲགས་པ་མ་ཡིན་ནམ།
ལོ་ངོ་ང་བརྒྱད་རྗེས་ཀྱི་དེ་རིང་བོད་མི་ཚོའི་རེ་བ་ལྟར་༧གོང་ས་མཆོག་ཕྱིར་རང་ཡུལ་དུ་ལོག་ཐུབ་མེད་ཀྱང་། ཁོང་གི་མཚན་སྙན་གྲགས་སའི་གོ་ལའི་ས་ཕྱོགས་གང་སར་ཉི་འོད་བཞིན་ཁྱབ་ཡོད་པའི་ཐོག ཁོང་གིས་རྟག་ཏུ་"ཚེ་འདིར་ཕ་ཡུལ་དུ་ལོག་ཐུབ་པའི་གདེང་ཚོད"ཡོད་གསུང་པ་ནི་ཅི་འདྲའི་དགའ་འོས་པའི་གསུང་ཞིག་རེད་ཨང་།
ཉིན་དེར་འབོད་ཚིག་ཐོག་མར་སྒྲོག་མཁན་གྱི་དབའ་བོ་ཕལ་ཆེ་བ་གཤེགས་ཟིན་པ་བདེན་མོད། འོན་ཀྱང་ཁོང་ཚོའི་སྙིང་སྟོབས་དང་ལ་རྒྱ། དེ་བཞིན་བདེན་པའི་འབོད་སྒྲ་ནམ་ཡང་ཡལ་བ་དང་བརྗེད་པ་མེད། རྒྱུ་མཚན་ནི་ཉིན་དེར་ཕོ་བྲང་པོ་ཏ་ལའི་སྒེ་ཁུང་རེ་རེས་སྙིང་སྟོབས་ཀྱི་དཔུང་པ་གྲངས་མེད་མཁའ་རུ་བསྒྲེངས་པ་དངོས་སུ་མཐོང་ནས་ནང་དུ་ཉར་ཡོད་ལ། ཁོང་ཚོའི་བདེན་པའི་འབོད་ཚིག་ཉི་མ་ལྷ་སའི་བར་སྣང་གྱི་མཁའ་དབུགས་དང་གཅིག་ཏུ་འདྲེས་ཕྱིན་པས། ད་ལྟ་ཡང་ཞིབ་པར་ཉན་ན། ཕོ་བྲང་པོ་ཏ་ལ་དང་ཇོ་ཁང་གི་རྒྱ་ཕེབས་ནས་མར་འཕྱང་བའི་དྲིལ་བུའི་སིལ་སྒྲ་དང་། བར་སྐོར་གྱི་མཐའ་ན་བཙུགས་པའི་ལག་སྒྲིལ་གྱི་འུར་སྒྲ ཁང་ཁྱིམ་རེ་རེའི་ཐོག་གི་དར་ཅོག་རླུང་གིས་བསྐྱོད་པའི་ཕག་སྒྲ བར་སྐོར་བ་ཚོའི་མ་ནི་བགྲང་བའི་དབྱངས་རྟ། ཟ་ཁང་དང་ནག་མ་ཁང་ནས་གྲགས་པའི་གླུ་སྒྲ ལྷ་སའི་སྲང་ལམ་ནས་རྒྱུ་བའི་རླངས་འཁོར་རྣམས་ཀྱི་དུང་སྒྲ ཐ་ན་ལྷ་སའི་ཉེན་རྟོག་པ་ཚོས་ཕན་ཚུན་བརྡ་གཏོང་རེས་བྱེད་སྤྱད་ཀྱི་སྐུད་མེད་ཁ་པར(walki-talki)གྱི་སག་སྒྲའི་ནང་དུའང་ཁོང་ཚོའི་བདེན་པའི་འབོད་ཚིག་ཐིམ་ཡོད་པས། ལྷ་སའི་ནང་སྒྲ་ཅི་འདྲ་ཞིག་གོང་ཡང་དེའི་ནང་དུ"བོད་རང་བཙན་ཡིན། ༧གོང་ས་མཆོག་ཁྲི་ལོ་བརྟན་པར་ཤོག རྒྱ་དམར་བོད་ནས་ཕར་རྒྱུགས་ཤིག"ཅེས་པའི་བདེན་པའི་འབོད་ཚིག་ཡོད་པ་སེམས་སུ་དྲན་དགོས་སོ།།
༢༠༡༧/༣/༡༠ཉིན།