སེམས་གསོ། 

བརྩེ་བའི་དགའ་མ་ལགས། 

ཁྱོད་མ་ངུ་དང་། 

རྒ་བ་ནི་མི་ཚེའི་ཆ་ཤས་དང་། 

ལུས་པོའི་ལྡོག་ཏུ་མེད་པའི་འགྱུར་བ་ཞིག་རེད། 

ཨ་ཅང་ཅང་། མིག་ཟུར་དུ་སྔར་མེད་པའི་རི་མོ་བབ་ཅིང་། 

ལུས་པོའི་ཤ་ཡི་མཁྲེགས་ཆ་འཆོར་འགོ་བརྩམས་ཏེ། 

ལང་ཚོའི་གཟི་བྱིན་དུས་ཚོད་ཀྱི་འགྲོས་དང་བསྟུན་ནས་ཡལ་དུས། 

སེམས་ལ་བྲེལ་ཤ་མི་ལང་བ་ག་ལ་སྲིད། 

འོན་ཀྱང་། ཁྱོད་རང་སེམས་སྡུག་མ་བྱེད་དང་། 

འཇིག་རྟེན་འདིར་གཏན་དུ་གནས་པའི་ཆོས་ཤིག་མི་སྲིད་པས། 

ཁྱོད་ཀྱིས་དེ་སེམས་ལ་བཟུང་ནས་དང་ལེན་ཨེ་ཐུབ་ལ་འབད་དང་། 

ཁྱོད་ཀྱིས་ཆོས་ཉིད་དེ་ལས་སེམས་གསོ་འདྲ་ཨེ་ཐུབ་ལྟོས་དང་། 

བདག་གི་སྙིང་གི་ཕྱེད་ཀ། 

ཁྱོད་ཀྱིས་ངའི་སྟོད་ཐུང་གི་བྲང་ཀ་རློན་པ་མ་ཆགས་བར་ངུས་ནས། 

བཅོས་སུ་མེད་པའི་ཆོས་ཉིད་དེ་དང་ལེན་བྱོས་དང་། 

ཁྱོད་སེམས་སྡུག་མ་བྱེད་ཨ། 

ཁྱོད་མ་ངུ་ཨ།

—འདི་མི་ཚེའི་ཆོས་ཉིད་རེད། 

2019/9/9

* ཟུར་མཆན། (བདུན་ཕྲག་གཉིས་ཙམ་གྱི་གོང་དུ་ངེད་བཟའ་མི་གསུམ་ནོར་གླིང་དུ་ཕྱིན་པ་དང་། ནོར་གླིང་གི་སྒོ་རྭའི་ནང་དུ་ཆུང་མས་ང་ལ་ཁ་པར་བྱིན་ནས་པར་ལོངས་ཟེར་བས། ངས་མོའི་སྐུལ་མ་ལྟར་པར་འགའ་བརྒྱབ་ནས་ཁ་པར་ཕྱིར་བྱིན། དེ་ནུབ་ངེད་གསུམ་ཕྱིར་ནང་དུ་འབྱོར་དུས། མོས“ང་རང་རྒས་འདུག”ཟེར་ནས་ངའི་བྲང་ཁར་མགོ་བོ་སྦྱར་ནས་ཡུན་རིང་ངུས་བྱུང་། མོས་ནོར་གླིང་ནས་ངས་བླངས་པའི་པར་དེ་དག་མཐོང་རྗེས་བཟོད་དཀའ་བའི་ན་ཟུག་དྲག་པོ་ལངས་ནས་ངུ་འདོད་ལངས་ཀྱང་། དེར་ངུ་སྟབས་བདེ་མ་སོང་ཟེར། སྐབས་དེར་ང་ལའང་བརྗོད་མི་ཤེས་པའི་སྐྱོ་སྣང་དྲག་པོ་ཞིག་སྐྱེས་ནས་སྙན་ངག་ཅིག་གི་འགོ་བརྩམས་ཀྱང་། དེའི་མཇུག་དེ་རིང་གཞི་ནས་སྐྱོང་ཐུབ་སོང་།)

དོ་ནུབ་ང་རང་བཟི་ན་འདོད། 

དོ་ནུབ་རང་གཅིག་པུར་ཆང་ལ་རོལ་བཞིན་ཡོད། 

ཆང་དམ་དང་ཆང་ཕོར་གྱི་ཟུར་དུ། 

དབྱིན་ཇིའི་སྙན་དེབ་ཅིག་ཀྱང་བཞག་ཡོད་ལ།

དེ་ལས་སྙན་ངག་རེ་ཟུང་ཞིག་བཀླགས། 

དོ་ནུབ་ང་རང་ཁེར་རྐྱང་དུ་བསྡད་ཡོད། 

ལྗིད་ཏིག་ཏིག་ཏུ་གྱུར་བའི་མགོ་བོའི་ནང་།

ཁེར་རྐྱང་དང་ངོ་གནོང་འདྲེས་པའི་ཚོར་སྣང་ཡ་མཚན་ཞིག་གིས་གང་འདུག་ཅིང་།

རང་ཉིད་ལ་འཁང་ར་བྱེད་མཚམས་གཏན་ནས་འཇོག་མི་ཐུབ། 

དོ་ནུབ་ང་རང་ཁེ་རུ་ Signture འཐུང་བཞིན་བསྡད་ཡོད། 

ཕོ་བའི་ནང་གི་ཚ་དྲོད་རིམ་གྱིས་འཕེལ་བ་དང་ལྷན། 

ཁང་པའི་ཟུར་ནས་བཞུར་བའི་ཆུ་ཕྲན་གྱི་སྒྲའང་ཇེ་གསལ་རེད་ལ། 

ཐག་མི་རིང་བའི་ས་ནས་རྔ་རྡུང་བའི་ལྡིང་སྒྲ་ཞིག་ཀྱང་གྲག་བཞིན་པ་ཚོར་ཐུབ། 

དོ་ནུབ་ང་ལ་རོགས་པ་མེད། 

ཆང་ལ་ངན་ལོབས་ཤོར་ཨེ་འགྲོ་སྙམ་པའི་འཇིགས་སྣང་ཞིག་ངང་གིས་སྐྱེ་ཡོང་ཡང་། 

རང་ཉིད་ཀྱི་བླུན་རྟགས་དེ་བརྗེད་པའི་ཆེད།

མུ་མཐུད་འཐུང་བཞིན་ཡོད། 

ཁ་སང་དགོང་མོའི་བླུན་རྟགས་དེ་བརྗེད་པའི་ཆེད། 

མུ་མཐུད་ཆང་ལ་རྔམ་འཐུང་བྱེད་བཞིན་ཡོད། 

དོ་ནུབ་ང་རང་བཟི་ན་འདོད་ལ། 

སེམས་སུ་སྤས་པའི་ངོ་གནོང་ཡོད་ཚད་གཏིང་ནས་བརྗེད་ན་འདོད། 

2019/9/8ཉིན། 

ཨར་པོ་བ་འདི་དག་དཀོན་མཆོག་གི་སྤྱན་ལམ་དུ་མངོན་གྱི་ཨེ་ཡོད།

དྷ་སའི་ཉི་མ་ནུབ་ཁའི་དམར་དམངས་ཁྲོད། 

ཉིན་གཅིག་གི་ཨར་ལས་ཚར་རྗེས། 

ཨར་ལས་ཀྱི་ཐལ་རྡུལ་ངོ་གདོང་ལ་ཆགས་ཤིང་། 

གཟུགས་ཚད་ལས་ཆེ་བའི་སྟོད་ཐུང་བསྐོན་པའི། 

བྱིས་པ་འགའ་ཁུར་བའམ། 

ཁྲིད་ནས་རང་ཁྱིམ་དུ་ལོག་བཞིན་པའི་ཨར་པོ་བ་ཕོ་མོ་འདི་དག

དཀོན་མཆོག་གི་ཐུགས་རྗེའི་སྤྱན་ལམ་དུ་མངོན་གྱི་ཨེ་ཡོད།   

2020།11།9ཉིན། 

* ཟུར་མཆན།  (དགོང་མོར་ང་རང་ལས་ཁུངས་ནས་རང་ཁྱིམ་དུ་ལོག་པའི་ལམ་བར་ནས་རྒྱ་གར་གྱི་ཨར་པོ་བ་འགའ་ཡང་ལས་ཡུལ་ནས་ཁྱིམ་དུ་ལོག་བཞིན་པ་དང་ཕྲད། ངས་ཡུད་ཙམ་རིང་ཁོ་ཚོར་བལྟས་པ་དང་། ཁོ་ཚོའི་ཉམ་ཐག་པའི་ཚུགས་ཀས་ངའི་སེམས་ལ་མིང་མི་ཐོགས་པའི་ཟུག་གཟེར་ཁྱད་མཚར་ཞིག་བསླངས་པས། སྙན་ངག་འདི་འདྲ་ཞིག་འབྲི་ཤོར་སོང་།) 

རུམ་གྱི་བདེ་བ། 

ཕྱི་ཟླ་ 12 ཀྱི་རྡ་སའི་ཞོགས་པར། 

ཕྱི་ལ་དྲག་ཆར་འབབ་སྐབས། 

ག་དུས་ལང་དགོས་པ་དང་། 

གང་དུ་འགྲོ་དགོས་པའི་སེམས་ཁྲལ་མེད་པར། 

མགོ་བོ་ཚ་སོབ་སོབ་ཀྱི་རུམ་དུ་བཞག་ནས། 

ཆར་པའི་ཤག་སྒྲ་ལ་ཉན་པ་དེ། 

ཅི་འདྲའི་བླ་ན་མེད་པའི་བདེ་བ་ཞིག་རེད་ཨང་། 

འུར་འུར་གྱི་འབྲུག་སྒྲ་རེ་ཟུང་གྲགས་ཤིང་། 

ཕྱིའི་གྲང་སྣང་ཅི་ཙམ་ཆེ་རུ་གྱུར་ན། 

ཕོ་ཁེབས་ཀྱི་རུམ་ལ་དྲོད་སྣང་དེ་ཙམ་འཁྱིལ་འོང་། 

2020/12/12 ཉིན།

* ཟུར་མཆན། (ཚ་སོབ་སོབ་ཀྱི་མལ་ས་ནས་ཕྱིའི་ཆར་པའི་ཤག་སྒྲར་ཉན་བཞིན་བྲིས།) 

སུ་ཡིས?

གལ་སྲིད་ངའི་ཆམ་པ་འདི་ཇེ་ལུད་དུ་གྱུར་ནས། 

མཚན་གུང་ལ་གློ་བུར་དུ་འགྲོ་ན། 

སུ་ཡིས་ཆག་སྒོ་དེ་ཐོག་མར་མཐོང་སྲིད་དམ།

ག་དུས་ཤིག་ལ་ནང་མི་ཚོས་གཏམ་ངན་དེ་ཐོས་སྲིད་དམ།

སུ་ཡིས་ལན་དེ་ནང་མིར་སྐུར་སྲིད་དམ། 

ངས་མི་ཚེའི་ཕྱེད་ཀ་རྡ་ས་ནས་བསྐྱལ་ན་ཡང་།

རྡ་ས་དང་རྡ་སར་འཚོ་བའི་མི་ལ། 

ང་རང་ཡོད་མེད་ཀྱི་ཁྱད་པར་དང་འབྲེལ་བ་མེད། 

ང་རང་འདུག་སའི་ཁང་པའི་བདག་པོ་ལ།

ཁང་གླ་སྤྲོད་མཁན་ཞིག་འགྱུར་བ་ཕྱིན་པ་ཙམ་རེད།

ངས་སྔ་མོ་ནས་མི་ཚེའི་ཆོས་ཉིད་འདི་རྟོགས་ནས།

མི་འདོད་ཀྱང་དང་ལེན་བྱས་ཟིན་པས། 

ང་ལ་དམིགས་བསལ་གྱི་སྐྱོ་གདུང་མེད།

མ་རེད། བཤད་སྟངས་དེ་ནོར་སོང་། 

མི་ཞིག་གིས་སྐྲ་བྱི་ནས་ཀླད་དམར་དུ་འགྱུར་བ་དང་ལེན་བྱེད་དགོས་པ་ལྟར། 

ང་རང་སྒྱུར་དུ་མེད་པའི་སྐྱོ་བ་འདིར་གོམས་ཟིན།  

 2021/11/15ཉིན།

* ཟུར་མཆན། (ཁ་སང་ཕ་ཡུལ་གཅིག་པ་ཚོ་དང་ལྷན་དུ་ནོར་གླིང་ལ་སྤྲོ་སྐྱིད་དུ་འགྲོ་དུས། ཆམ་པ་ཕོག་ནས་མདང་དགོང་གཉིད་ཡག་པོ་ཞིག་མ་ཁུག་པ་དང་། དེ་ནས་དེ་རིང་སྔ་དྲོར་བདེ་ལེགས་སྨན་ཁང་དུ་ཕྱིན་ནས་སྨན་ཞིག་བླངས་རྗེས། ཕྱི་དྲོ་ཧྲིལ་པོ་མལ་སའི་ནང་དུ་བསྐྱལ་ན་ཡང་། ད་དུང་དྲག་སྐྱེད་ཡག་པོ་ཞིག་མ་བྱུང་བས། གློ་བུར་གྱི་ཚོར་སྣང་ཞིག་ཡི་གེར་ཕབ་པ་ཡིན།)